TALA MAI LEOLEO

LOKA LE ALII NA MOLIA I LE SAUAINA O LANA UO TEINE

O le vaveao o Oketopa 27, 2024, na agai atu ai leoleo i se faalavelave na tupu, i luma o le fale a se aiga, lea na misa ai le alii o Ralph Autufuga ma lana uo teine, ae ua fiu le aiga o le teine e tau fa’ato’ato’a le mataupu.

E taunu’u atu leoleo, o lo’o tau taofiofi mai le tamaitai na a’afia, mai i tagata o lona lava aiga.

Ae e tusa ai ma le faamatalaga a le molimau (tuagane o le tamaitai na a’afia ma ua molia) na iai i lea vaveao, na amata mai lenei pisa i se falekalapu, lea na ia molimauina ai le po ina e Autufuga o lona tuafafine.

Ma sa ta’ua e le tuagane o le tamaitai na a’afia ma ua molia, sa leai sana gaioiga na faia i le falekalapu, ae sa faatali se’i o latou o’o mai i le fale, lea na ia fesiligia ai Autufuga i le pa’i o lona lima i lona tuafafine.

Ae peitai, na oso le tamaitai na a’afia ma molia (po o le tuafafine a le molimau), i le ‘au mai ma Autufuga ma o’o ai ina feosofi mai tagata o lona aiga, ona ua le fiafia i le puipuiina e le tamaitai o le ua molia.

Sa ta’ua e nisi o le aiga a lenei tamaitai, lo latou faalogoina o tala feavea’i i le fasi so’o e le ua molia (Autufuga) o le tamaitai, ae e le ripotia.  Ae o le po o lea, na fa’ato’a vaai tino ai tagata o le aiga o lenei tamaitai i le moni o tala feavea’i ma o latou manatu ai, e tatau ona faia se faaiuga o lea tulaga ae e le’i faateteleina.

O lea lava taeao, na aveina ai e leoleo ia le ua molia ma le tamaitai na a’afia ma ua molia, i le ofisa a leoleo i Tafuna, mo le fa’aauauina o a latou suesuega.

Ina ua fa’atalanoaina e leoleo ia molimau o le faalavelave, sa ta’ua le mafua o le pisa ona o le faafitauli lea o lo’o tupu i le va o le ua molia ma le tamaitai.

Na faamatala e le tuagane a le tamaitai lona taumafai e puipui lona tuafafine (le tamaitai na a’afia ma ua molia) ona e le tautala sa’o i gaioiga e faia e Autufuga ia te ia.  Na ta’ua e le tuagane lona va’ai tino i le po ina e le ua molia, o lona tuafafine ma e le sa’o i lana vaai.

Ma o lo’o ta’ua foi i totonu o faamaumauga a le malo, le tupu so’o o lenei faafitauli i le va o Autufuga ma le tamaitai, talu ona toe fo’i mai Autufuga mai Samoa.

Sa mafai foi ona fa’atalanoaina e leoleo ia se tamaitai po o se molimau autu, lea o lo’o nonofo faatasi ma i la’ua ua molia. Ma na ia va’ai tino foi i isi taimi sa sauaina ai e le ua molia, ia le tamaitai ua a’afia ma molia.

Ma e tusa ai ma le faamatalaga a le molimau autu, o le tele o taimi e tupu ai faalavelave ma o’o ai le lima o le ua molia, i le tamaitai ua a’afia ma molia, o totonu o le la fale, ae e fefe e faamatala.  Ma na ta’ua foi e le molimau autu le tele o taimi e ta’u atu ai e le tamaitai ua a’afia ma molia, le sauaina o ia e le ua molia, ae faigata ona ia ta’uina i lona ‘uncle’.

O lo’o ua ta’ua foi i totonu o faamaumauga a le malo le fa’ailoa atu e le tamaitai ua a’afia ma molia, lona fefe aua e na te le iloa po o le a le mea e faia e Autufuga ia te ia, i taimi e na’o la’ua e iai i le fale, ma o le mafuaaga lea e na te le faia ai se tala.

Sa faamatalaina foi e le molimau autu ia se tasi taeao na tu’i ai e Autufuga ia le tamaitai ua a’afia ma molia, faapea ma isi taimi e na te faalogoina ai fusuaga mai totonu o le la potu, ae na te tago tu’u mea faalogo i ona taliga e pupuni ai le pisa.

E le gata i lea, sa faamatala foi e le molimau autu ia le taimi na maua ai e le tamaitai ua molia ia le le faamaoni a Autufuga i lo la va, ma na musu ai le tamaitai e faamagalo le ua molia, ae na i’u ina fasi ai e le ua molia ia le tamaitai.

Sa ta’ua foi e le molimau autu seisi foi tulaga na tupu ia Oketopa 26, 2025 lea na fafagu ai o ia e le tamaitai ua a’afia ma molia ma fa’ailoa atu ia te ia (molimau autu) lona fefe i le alii ua molia ma na alu atu le molimau autu ma fesiligia le alii ua molia pe mafai ona alu atu le tamaitai ua a’afia ma molia, e la te momoe, ae tali mai le alii ua molia, e leai.

Ae ina ua musu le tamaitai ua a’afia ma molia e alu i totonu o le la potu, sa faapea ona tu’i e le alii ua molia, ia ona foliga.

Ma o le aoauli lava o lea aso, a’o fai se latou tagamea i se fale ta lavalava, na misa ai foi i la’ua ia ua molia, ma tuli faata’amilo ai e le alii ua molia ia le tamaitai i totonu o le fale ta lavalava ma fasi.

Ina ua fa’atalanoaina e leoleo ia le alii ua molia e tusa ai ma ripoti ua o’o sa ia te’ena ia faamatalaga e faapea, na o’o lona lima i le tamaitai ua aafia ma molia.  Ae sa ia ta’ua e faapea, o se la ta’aloga sa faia ma e na te le’i sauaina le tamaitai.

O le vaveao lava lea na lokaina ai Autufuga.  Ae ua liliu loa leoleo i le tamaitai ua a’afia ma molia, mo le faatalanoaina o ia, ae musu e faia sana faamatalaga i le tulaga na tupu i le va o ia ma Autufuga.  

Ma sa molimauina foi e leoleo le fa’aalia o le le fiafia o le tamaitai i tagata o lona aiga.

Sa faamatalaina e le ‘uncle’ e faapea, i le taimi na tupu ai le misa i lo latou fale, sa foliga mai ua galo i le tamaitai, o ia o lona ‘uncle’ ma sa fiu e taumafai e fa’afilemu ae ua le fia fa’alogo atu le tamaitai ia te ia.  Ma na ta’ua foi e le ‘uncle’ le le fiafia o le tamaitai ona ua lokaina lana uo tama ma o lo’o iai sona talitonuga, o le a faatupu misa le tamaitai pe a o’o i le fale.

O lea na fautuaina ai e leoleo ia le ‘uncle’ a le tamaitai, ina ia tu’u o ia i a’ao a leoleo ina ia aua ai ne’i toe tupu seisi faalavelave ae le gata i lea, o le a molia o ia i le faatupu vevesi i totonu o lona aiga.

Ua molia ai nei Autufuga ma le tamaitai i le Faatupu Vevesi i totonu o aiga (sauaga i totonu o aiga) faapea ma le Faao’olima i tulaga e tolu.  O nei moliaga o se vaega ‘A’ o solitulafono mama, e mafai ona nofosala ai i le falepuipui i le tausaga po o se sala tupe e $1,000; po o faasalaga e lua.

E le gata i lea, ua molia foi i la’ua i le Fa’ao’olima i lona tulaga e tolu, o se vaega ‘C’ o solitulafono mama, e mafai ona nofosala ai i le falepuipui, i le o’o atu i aso e 115; po o se sala tupe e $300; po o faasalaga uma e lua.

E $3,000 le vaegatupe faatulagaina e mafai ona tatalaina ai le ua molia, e faatalitali ai ona faamasinoga.

MOLIA SE ALII 20 TAUSAGA I LE FA’AO’OLIMA

I totonu o faamaumauga a le malo, ua ta’ua ai le o’o atu o se tina ma sona alo i le Ofisa a Leoleo i Tafuna i le aso 27 o Oketopa, 2024 e faila sa la’ua tagi e faasaga i le susuga ia Telea Senetuki, lea ua molia i le Fa’ao’olima i lona tulaga e lua.

Ae e le’i faatalanoa le alo o lenei tina sa a’afia i lenei mataupu, na mua’i vala’au e leoleo ia le vaega a le EMS mo le togafitia o ona manu’a, na aofia ai le fufula uma o ona mata, o se manu’a i luga o lona mata tauagavale, o fula i luga o lona muaulu faapea ai ma le lavea o totonu o lona laugutu a lalo.

O le moliaga o le Fa’ao’olima i lona tulaga e lua, o se vaega ‘D’ o solitulafono mamafa, e mafai ona nofosala ai i le falepuipui i le lima tausaga, po o se sala tupe e o’o atu i le $5,000; po o faasaga uma e lua.

Ina ua fa’atalanoaina e leoleo ia le alii na a’afia sa ia faamatalaina e faapea, na iai o ia i le falesa ma ona va’aia ai Senetuki (lea ua molia), ma na lue atu iai lona ulu.

Ae ina ua alu i le fale ta’ele, na alu atu ai foi ma le ua molia ma tu’i ona foliga, ma pa’u ai i lalo ma tau lona ulu i le ‘sink’. Ma o le taimi lea na matapogia ai, ae na fa’aauau le sauniga a le ua molia, i le tatu’iina o ona foliga, kiki lona manava ma ona foliga.  Ona alu ese atu ai lea o le ua molia, a’o ta’atiatia le na a’afia i le fola o le fale ta’ele.

Ina ua mafai ona tu i luga le ua a’afia, sa agai atu loa i lona tina ma o la o loa i le ofisa a leoleo e faila le la ripoti.

Na faapea loa ona agai atu leoleo i le fale a Senetuki ma lokaina mai o ia ma aveina i le ofisa a leoleo i Tafuna, le nofoaga sa faatalanoaina ai o ia.

Sa faamatalaina e Senetuki i leoleo, sa valaau atu le alii na a’afia i lona aiga ma lue atu lona ulu ma e na te le’i faia se tulaga i lea taimi.  Ae ina ua ia va’aia le agai atu o le na a’afia i le fale ta’ele, o iina na ia (le ua molia) mulimuli atu ai i le alii na a’afia ma ia sauaina ai loa o ia e pei ona sa faamatalaina e le na a’afia.

E $30,000 le vaegatupe sa faatulagaina e mafai ona tatalaina ai le ua molia, e faatali ai sona faamasinoga.