TALA MAI I SAMOA

Apia - SAMOA

LOIA ITU TETE’E:  O LE ITU A LE MALO E GAFA MA LE FA’AMAONIGA O MOLIAGA

O le aso Lulu i Samoa (aso Lua i Amerika Samoa) o le vaiaso nei, sa faapea ona fa’amae’aina ai le faamasinoga i Samoa lea o lo’o molia ai susuga ia Laaulialemalietoa Leuatea Polataivao Schmidt, Fepuleai Faimata Sua faapea se leoleo su’esu’e e suafa ia Li’o Faataumalama Auava, ma Samuelu Su’a ma lona faletua ia Sivai Kepi ma le tamaitai ia Lise Schmidt.

Ma e fa’amae’aina lenei fa’amasinoga, ae e leai seisi o i latou e to’aono mai i le itu tete’e sa molimau.

Ina ua fesiligia ai loia a le itu tete’e i lea tulaga, sa tali le tamaitai loia ia Muriel Lui, o le tiute a le [loia] malo, o le fa’amaonia lea o moliaga um aua faia e faasaga ia i latou nei e to’aono, aua o le tagi, o le tagi a i latou.

Na saunoa Lui i le vaega fa’asalalau a le Talamua, ina ua mae’a ona fa’afofoga le latou itu i a latou molimau, sa tonu ai ia i latou, e leai se mea e mana’omia ai ona tu’uina atu ni molimau a le itu tete’e, ona e leai se mea e manaomia ona o latou fa’amaonia.

Sa ia ta’ua foi e faapea, e 2 ata vitio sa pu’eina e Samuelu (Sam) Sua, ma fa’amatalaga faufautua e tolu a le susuga i le La’aulialemalietoa Leuatea Polataivao Schmidt, faapea ai ma le tele o nisi ata vitio sa pu’eina, lea sa tu’uina mai e le itu a le malo e avea ma molimau.

Ma ua talitonu ai le itu tete’e, ua lava ma totoe ia molimau e finauina ai la latou itu, o le latou tiute lea o le fa’amaonia o mea uma, o lo’o i le itu a le malo.

I le mataupu e fa’asaga ia Fepuleai Faimata Sua, sa faatalitali le itu tete’e i le molimau a le alii leoleo o Ieremia, ma faia ai le latou faaiuga, e leai sa latou molimau o le a tu’uina mai, ona e leai se vaega e mana’omia ona ia fa’amaonia.

Sa saunoa Lui, ina ua mae’a ona o latou fa’afofoga i molimau uma, sa faapea ona fa’amalosia e le itu tete’e ia o latou aia tatau, e le molimau ai.

O i latou ia e to’aono, o lo’o molia i le taupulepule ma faamatalaga tau faaleaga, e faatatau i se fa’alavelave na tupu ia Aperila 21, 2021 lea na maliu ai se tamaititi a’oga, i Vaitele.

O le aso 5 o Setema lea ua faatulagaina e le afioga i le Faamasino ia Talasa Saaga Atoa, e fa’amae’aina ai e loia uma a latou finauga fa’ai’u mo a latou folasaga i luma o le faamsinoga, ia Oketopa 6, 2025.

Ae e le’i tu’uina mai foi e le tamaitai fa’amasino sana fa’ai’uga e tusa ai ma le talosaga a le itu tete’e, mo le fa’aleaogaina o tu’ua’iga o le taufa’aleaga.

SAILI NI ALII SE TO’ALUA NA GAOIA SE FALEOLOA I VAILOA

Na fa’amaonia e le afioga i le Komesina o Leoleo, ia Auapa’au Logoitino Filipo, i le vaega fa’asalalau a le Samoa Observer, ia le fa’aauau pea ona sailia e leoleo, o ni alii se to’alua, sa a’afia i le gaoia o se faleoloa i Vailoa, ina ua mae’a ai ona ave faapagotaina ia se alii e 16 tausaga le matua.

O i latou uma nei, e malaga mai i Satapuala ae o lo’o nonofo i Vaiusu, i le taimi na tupu ai le fa’alavelave.

Na saunoa foi Auapa’au i le tau saili foi e leoleo o nisi tagata se to’afa, o lo’o faapea ona a’afia i le fasiga o se tamaititi aoga, i le nofoaga faatali pasi i Savalalo, i le vaiaso ua mavae.

Sa ta’ua e le alii komesina i le Observer, le leai o seisi ua lokaina i le fa’alavelave lona lua.  Ona o le ‘oga’oga o manu’a o le tamaititi a’oga, ua faapea ona u’una’ia ai e tagata lautele ia le fa’amalosia o ni tulafono malolosi, e taofia ai le tupu o nei tulaga i fanau talavou.

Na u’una’ia e le Komesina ia tagata o le atunu’u o lo’o iai so latou malamalama e tusa ai ma nei fa’alavelave e lua, ina ia fa’ao’o atu a latou ripoti i le ofisa a leoleo.

TAPA E LE MALO IA LE TUSI FOLAU A KERESOMA

Sa ripotia e le Samoa Observer, ia le tula’i o le faletua ia Taliilagi Keresoma, le Peresetene o le Asosi Tusitala a Samoa (JAWS), i luma o le fa’amasinoga fa’aleitumalo i le taeao o le aso Lua (aso Gafua i Amerika Samoa), e tali ona moliaga, o le taufa’aleaga.

O le moliaga faasaga ia Keresoma, e mafua mai i se ripoti sa lomia, e masalomia ai se tasi na avea ma leoleo, i lona talosagaina o le Ao o le Malo ina ia fa’aleaogaina moliaga sa faia e faasaga ia te ia (leoleo).

O le aso 18 o Me na molia ai Keresome, ae o Me 1, na lomia ai le tala e pei ona molia ai o ia.

O le tamaitai loia ia Precious Chang, o lo’o tula’i mo Keresoma i luma o le faamasinoga ma sa ia talosagaina ni vaiaso se lua, e mafai ai ona fa’ao’oina atu e le itu a le malo, ia moliaga ua faasaga ia Keresoma.

O le afioga i le alii faamasino ia Leota Raymond Schuster, o lo’o pule faamalumalu i lenei mataupu. 

Sa ia taliaina le talosaga a Chang ma faatonuina ai foi Keresoma ina ia fa’ao’oina atu lona tusi folau i le Lesitala.  Ae e le tau alu Keresoma i le ofisa a leoleo, e Saini ai lona suafa.