Tala Mai i le Ofisa a Leoleo

Pago Pago - AMERIKA SAMOA

LOKA LE ALII NA GAOIA OFISA I FAGATOGO E AOFIA AI MA LE FALEMELI

O le aso 11 o Iulai, 2023 na sainia ai se faatonuga faaletulafono mo le ave faapagotaina o Seiuli Seleti, lea o lo o masalomia i lona gaoia o meatotino mai i ofisa eseese i totonu o Fagatogo, e aofia ai ma le Ofisa Lesitala faapea le Falemeli.

Ua mae’a nei ona lokaina Seleti ma e tusa ai ma sana faamatalaga tusia, sa o la toalua ma se alii talavou i le gaoiina o le falemeli i le aso 30 o Iuni 2023 i le 2 i le vaveao ma sa la fa’aaogaina se sikukalaiva (screwdriver) e talepe ai le faitotoa pito i tua o le ofisa ale KVZK-TV ma o la ulufale mai ai i totonu.

Na ta’ua e Seleti, sa o la ulufale foi i totonu o le Ofisa o le Soifua Maloloina ma o la gaoia ai ni ‘tablets’ se tolu faapea ma se $100  sa i luga o se kesi.  

Ua ta’ua i faamaumauga a le faamasinoga, na oso le ua molia i luga o se kapeneta ma oso i luga o le fa’alo o le ofisa ma tolotolo agai i le itu o iai le falemeli, ma o iina na mafai ai ona sao i totonu o le falemeli.  Ina ua taunuu i la’ua nei i totonu o le falemeli, sa o la agai atu loa i le mea o teu ai le meli ma amata ona tatala atigi pusa ma ave ni telefoni feavea’i se lua.  Na uma lea ona o la agai atu lea i le ofisa o le fale meli ma o la sueina totonu o kesi ma e pe a ma le $120 se tinoitupe na o la maua ai.  Ina ua maea lea, ona o la toe o ese mai lea mai i le falemeli i le auala e tasi na la feosofi atu, i luga o le fa’alo o le fale.

Na gaoia foi e Seleti ni seevae mai i le ofisa a le KVZK.

O le aso 12 o Iulai, 2023 i le 1:05 i le po, na vaaia ai e leoleo, i luma o le faleaiga a Sweetie’s i Fagatogo ia le alii talavou lea na toalua ma Seleti, ma na o latou aveina o ia i le ofisa leoleo i Fagatogo mo le suesueina o ia e tusa ai ma lenei mataupu.  Ina ua o latou taunuu i le ofisa a leoleo, sa valaauina le tina o lenei talavou ma sa mafai ona auai le tina o lea talavou, i le taimi na suesueina ai o ia.

Sa faamaonia e lenei alii talavou, lo la osofaia o le falemeli ma Seleti ma le ia faamaonia ai foi faamatalaga a Seleti i le auala na la ulufale ai i totonu o ofisa ia na lagaoia ma lo la tatalaina o meli sa i totonu o le falemeli.

I lona uluai tulai i luma o le faamasinoga ia Iulai 21, 2023, na molia ai Seleti i faitauga e fa o le faomea ma faitauga e tolu o le gaoi, atoa ai ma moliaga o lo la solia o fanua po o fale o isi e aunoa ma se faatagana, ma le faia o ni gaioiga e ono afaina ai le soifua o se talavou.

E $5,000 le tinoitupe sa faatonuina e le faamasinoga e tatau ona totogi e Seleti, e tatala mai ai i tua mai i le falepuipui.

SOLA SE PAGOTA A O IAI I LE FALE FAAMASINO

O le aso 12 o Iulai, 2023 na sola ese mai ai se alii pagota mai i le fale faamasino, a’o iai mo ona iloiloga e faatatau i tuuaiga i lona faia o ni uiga taufaamata’u i lona toalua.  Sa ta’ua e le Leoleo o le fale faamasino, na iai lenei alii i totonu o le potu e faatali ai pagota mo le lauina o a latou faamasinoga, ae ia talosagaina se ipu vai.  E savali atu le leoleo o le fale faamasino i lona ofisa e aumai se fagu vaai, ae ia vaaia ai i luga o le mea pu’e ata a le fale faamasino, le agai atu o se tamaitai ma tu’u atu se mea i le pagota,

Na faatopetope mai le leoleo o le fale faamasino i totonu o le potu sa iai le pagota, ua leai seisi.  I le suesueina o lenei pagota, na faailoa atu ai e seisi fafine sa iai i le fale faamasino, le agai atu o le pagota o lo o sueina, i fafo.

O le aso 13 o Iulai na valaau atu ai se tagata i le ofisa a leoleo i Tafuna ma faailoa atu i leoleo, le iai o le alii pagota lea na sola, i lona fale i Fagaima.  Na taunuu atu leoleo ma maua atu ai lenei alii ma faatonuina o ia e sau i fafo ma le fale.

Ua molia nei lenei alii i lona sola ese mai a’ao o leoleo, e faaopoopo i ona uluai moliaga i lona faia o uiga tau faamatau i lona toalua.  Ma e $1,000 le tinoitupe ua faatonuina e le faamasinoga e ao ona ia totogia, e tatala ai i tua, e faatalitali ai lona faamasinoga.

MOLIA SE TAMALOA FAASUAAVA I LE FAATUPU VEVESI I TOTONU O LONA AIGA

Na valaau atu se fafine i le Ofisa a Leoleo mo se fesoaoani ona o lona toalua ona, lea o lo o faatupu vevesi i totonu o lo latou aiga, e ala i le taeia o ipu ma laulauvavale solo.  O lenei faalavelave na tulai mai I le afiafi o le aso 20 o Iulai, 2023.

Ina ua taunuu atu leoleo o lo o tu mai le tina o le aiga i luma o le fale, ma na faamaonia, o ia lea sa valaauina le ofisa a leoleo mo se fesoasoani.  Sa faamatala e lenei tina, na foi atu lona toalua ua faasuaava ma amata ona palauvale atu ia te ia, ona tago lea ua togi se ulo meaai sa i totonu o le umukuka, ona sosoo ai lea ma le taeiina o ipu.

Na faasino e le tina i leoleo i totonu o le fale ma maua atu ai le tamaloa i totonu o le potu mea ma aveina loa e leoleo i le ofisa a leoleo i Fagatogo.  Na faalogoina e leoleo le malosi o le manogi pia i le tamaloa.

Ua molia nei lenei alii i le faitauga e tasi o le faatupu vevesi i nofoaga faitele.  E $300 le vaegatupe sa faatonu e leoleo e ao ona totogi, e tatala mai ai o ia i tua e faatali ai lona faamasinoga.