TALA MAI I LE MAOTA FONO

Pago Pago - AMERIKA SAMOA

30 ASO FA’ASALA AI LE FAIPULE MAI SWAINS

Ae e le’i amataina tauaofiaga masani a le Maota o Sui i le taeao o le aso Tofi, Fepuari 20, 2025, sa faapea ona fa’alauiloa mai ai le fa’asalaga ua tu’uina atu nei i le Faipule o Swains, le susuga ia Su’a Alexander Jennings, lea na fa’atula’i ‘ese mai totonu o le Maota i le aso Lulu, Fepuari 12, 2025.

E 30 aso lea ua fa’asalaina ai le Afioga i le Faipule mai Swains, ae maua pea lona totogi.

Na mafua ona tupu le faalavelave lea ua faasala ai nei Su’a, ina ua ia fa’aalia lona le fiafia i le fa’aauau pea ona le taulia o lana palota, i palotaga a le Maota o Sui i iloiloga o sui Faatonu.

Sa fesiligia ai e Su’a ia tulaga ua iai ia fa’aopoopoga ua mae’a ona pasia e le Maota i le tausaga e 2022, lea e aofia ai ma lona aia tatau e palota ai.  Ina ua fa’atula’i ‘ese ia Su’a i lea aso, e le’i tu’uina atu iai sona fa’asalaga.  O se tulaga na u’una’ia malosi ai e le loia a le Maota o Sui, le susuga ia Nathaniel Sotoa Savali, ia Afioga i Faipule, ua tatau ona faia iai se fuafuaga.

I le soalaupuleina o lenei mataupu, sa saunoa ai Savali, e tatau ona fa’ataunu’uina tulaga o le tulafono, a leai, o lona uiga, ua fa’ate’a Su’a mai totonu o le Maota o Sui, lea e mana’omia ai se palota mai i le 2 vae 3 o totino o le Maota, po o Faipule e to’a 14.

Sa fa’aleoina e le sui Fofoga Fetalai, le Afioga Fetui Fetui Jr., le tatau ona tu’uina atu se faasalaga mamafa i le Faipule mai Swains, ma ia fa’aauau ona fesiligia le loia a le Maota, po o le a le fa’asalaga pito sili ona mamafa, e mafai ona fa’asala ai Su’a.  Ma na o’o lava foi ina ona ia fautuaina le fa’ate’a loa o Su’a mai le Maota o Sui, se’ia mae’a ona faia ni ona su’esu’ega fa’afoma’i.

I se manatu na fa’aleoina e le Afioga i le Faipule ia Faimealelei Allen, sa ia fautuaina ai le toe aumaia o Su’a i totonu o le Maota ina ia mafai ona o latou soalaupuleina lenei mataupu ma tu’uina atu ai loa sona fa’asalaga e tusa ai ma ana gaioiga sa faia.

O se manatu sa faapea ona fa’aluaina e le Afioga i le Faipule tamaitai ia Dr. Va’asa Simanu.  

Ae i se manatu fa’aleo o le Afioga ia Vailoata Amituanai, sa ia fautuaina ai le fa’asalaina o Su’a mo aso e 60 ma ia faia sona su’esu’ega fa’alemafaufau, ae e na te le’i toe fo’i mai i totonu o le Maota.

Na tutusa manatu a Vailoata ma le Afioga i le alii Faipule ia Manumaua Wayne Wilson, ina ia faia se su’esu’ega faalemafaufau a le susuga ia Su’a, ae mo aso o lona fa’asalaga, sa ta’ua e Manumaua le tu’uina atu o se faasalaga mo aso e 90.

Sa taumafai le Afioga i le alii Faipule ia Larry Sanitoa e fa’ato’ato’a le mataupu, e ala i lona faaleoina o nim au mai i le Tusi Paia, lea o lo’o fa’amamafa ai le taua o le alofa, ma ia lagolagoina ai le manatu fa’aalia a le Fofoga Fetalai, mo le fa’asalaga e 30 aso.

Na fa’atoluina e le Afioga i le tamaitai Faipule ia Trude Ledoux-Sunia ia le faasalaga mo aso e 30 ma na ia faaleoina foi ia tulafono a le Maota o Sui, lea e tatau ai ia Su’a ona folafola mai, o le a na ia le toe faia lenei tulaga sa ia faia.  Ma na saunoa foi Ledoux-Sunia i sona popolega mo tagata o Swains, pe afai ae umi le fa’asalaga o lo latou sui.

Ae sa toe fa’amanatu e Fetui ia le gaioiga sa faatino e Su’a, na aofia ai lona saeia o ona la’ei, ma faamatalaga sa ia lafoina, ma sa talosagaina ai e Fetui ia Afioga Faipule ina ia o latou puipuia le mamalu o le atunu’u ma ia faia se fa’ata’ita’iga e mafai ona mulimulita’i ai le Maota o Sui.

Ua taofi le sui Fofoga Fetalai, o fa’aupuga na lafo e Su’a, o ni faamatalaga taufa’amata’u ma ia fautuaina ai sui o le Maota ina ia aua le manatu mama i lea tulaga ae ia taula’i i le lumanai, ma ia faia se fa’asalaga e aua ai ne’i toe tupu nei tulaga i le lumanai.

I le fa’ai’uga o felafolafoga’iga a Faipule, sa o latou ‘autasi ai loa, o le a tu’uina atu le fa’ai’uga i le Fofoga Fetalai.

Ma o lea ua tu’ufa’atasia ai se tusi mo le fa’ao’oina atu i le Afioga i le Faipule mai Swains, o lo’o ua auiliili ai le fa’ai’uga a le Fofoga Fetalai o le Maota o Sui.

Ua tu’uina atu ia Su’a ia aso e 30, e mafai ai ona o’o mai i luma o Faipule mo se fa’alalolaloga ma faia sana tautoga, o le a le toe tupu se tulaga faapenei.

Afai ae o’o atu le Afioga i le Faipule mai Swains i luma o le Maota, ae e le’i atoa aso e 30 ma fa’amalieina finagalo o afioga i Faipule i sana fa’ato’esega ma tautoga, o le a faapea ona fa’amagaloina aso o totoe o lona faasalaga.

Na fa’alauiloa mai e le Fofoga Fetalai, le le a’afia o le totogi a Su’a i lona faasalaga, ona o tulaga o le tulafono.

Ae peitai, e le’i talanoaina se tulaga e ono tula’i mai, pe afai ae le toe fo’i atu le alii Faipule, i le mae’a ai o lona faasalaga i aso e 30.

FA’ATULAGA E LE SENATE SE ILOILOGA FA’ALAUA’ITELE MO NI PILI O LE AGAVA’A O SUI TAUVA (KOVANA & LUTENA KOVANA) FAAPEA MA ‘FAAGASOLOGA FILIFILIINA-FAAGASOLOGA O PALOTAGA’

O le aso Lulu o le vaiaso nei, Fepuari 26, 2025 i le 8:30 i le taeao, o le a fa’ataunu’uina ai i le Maota Maualuga i Fagatogo, ia se iloiloga o le a tatalaina i le mamalu luatele, e tapa ai ni manatu ma finagalo o le atunu’u, e tusa ai ma ni pili se lua ua taoto nei i totonu o le Maota o le Senate.

O nei pili sa fa’aulufaleina e le Afioga i le Senatoa ia Togiola T.A. Tulafono:

PMM NU #39-04 “E suia ai le tulafono ina ia tu’u’ese’ese ai le palotaga o le Kovana ma le Lutena Kovana.”

PMM NU #39-05 “E suia ai agava’a o sui tauva mo le Ofisa o le Kovana ma le Lutena Kovana.” 

I le fa’atomu’aga o le pili mo le tu’u’ese’eseina o le palotaga o le kovana ma le lutena kovana, ua ta’ua ai e faapea, ‘e iai se itu e lelei/malosi ai le palota ‘ese’ese o le kovana ma le lutena kovana.”

“Ma afai e palota ‘ese’ese, e i ai le malosi tuma’oti lava ia o le lutena kovana i se palotaga a le setete atoa e ta’ita’ia ai le teritori i mataupu taua.  Ma o nisi foi taimi, e ese lava foi sona lagona i se mataupu; o le faiga foi lea o le a moomia ai le lutena kovana fou, e atina’e lona lava ofisa, ona lava tiute ma matafaioi faalutena kovana ma Failautusi foi o Amerika Samoa, e tusa ai ma le Tusi Tulafono ma le Faavae toe teuteu o Amerika Samoa.”

 E le gata i lea, ua taofi lenei pili, “o le palotaina ‘ese’ese o le kovana ma le lutena kovana ,o le a tu’u atu ai foi se avanoa lelei e fa’aleo mai ai e tagatanu’u o Amerika Samoa so latou lagona i auala e pulea ai latou ae po o ai foi e finagalo e ala mai ai lena pule.”

I le fa’atomu’aga o le pili mo le ‘Agava’a o le kovana ma le lutena kovana’, ua ta’ua ai e faapea, “E taua tele ta’ita’i o Amerika Samoa mo le soifua maua’a, aga’i i luma ma le tamaoaiga o le atunu’u.  Ina ia mautinoa le mausali o le naunauta’iga o sui tauva mo le ofisa aupito maualuga i le teritori, e taua tele ona fa’atu o ni suiga i le tulafono o iai, ma fa’ama’oti lelei agava’a mo i latou e fia tauva mo tofiga o le Kovana ma le Lutena Kovana.”

Ma “o le fa’amaonia o le Sitiseni o le Iunaite Setete po o se Nesionale o le Iunaite Setete e tupuga Amerika Samoa, o le a fa’amaonia ai le malosi ma le moni o le so’otaga a o tatou ta’ita’I ma tu ma aga mai talafa’asolopito o Amerika Samoa.”

“O le manaomia o le alaala o le sui tauva iinei, o le a mautinoa ai e masani lelei ta’ita’I ma mataupu ma mana’oga o le Teritori.”

O nei pili ua fa’apea ona valaaulia ai so’o se tasi, e mafai ona fa’aalia sona manatu pe molimau ai fo’i, i le aso Lulu a sau nei. 

E mafai ona fa’afeso’ota’i le ofisa o le Senate i le 633-4565 pe afai o finagalo so’o se tasi e molimau i lenei iloiloga.

FA’AGASOLOGA O LE TUFATUFAINA O LAFOGA MAUA

O le aso Tofi o le vaiaso ua mavae, Fepuari 20, 2025, na faia ai se fa’aasilasilaga fa’alauaitele a le Faatonu o le Matagaluega o Tupe, le susuga ia Donald Kruse, mo le mamalu lautele, e tusa ai ma le fa’agasologa o le tufatufaina o lafoga maua mo le tausaga 2024.

Ma sa ta’ua i lenei fa’aaliga e faapea, “O le a le taliaina ni lafoga e fa’atalosagaina le vae ona maua, mo ni mafua’aga eseese.”

Ma o le a maua lava “i le aso na failaina ai lau lafoga na ia fa’atauaina le laugatasia tutusa uma o le mamal o le au totogi lafoga.”

Ua fa’alauiloa mai foi e Kruse le fa’asallaauina “i se aso o i luma, le aso o le a tufaina ai le tatou lafoga muamua.”

I le taimi nei, e leai se fa’aaliga ua maua mai e tusa ai ma lafoga o le 2023, lea o lo’o ta’ua e nisi o le atunu’u e le’i maua lava.

I se iloiloga a le Maota o le Senate, i le tausaga ua mavae, sa saunoa ai nisi o taitai o le Ofisa o Tupe mai i le Faigamalo a Lemanu e faapea, o nisi o tagata na maua a latou lafoga ona o ni talosaga faapitoa, e pei o faalavelave.  Ma sa saunoa ai se tasi o taitai, o lona alofa i tagata na mafua ai ona ia tali atu faapena.