TALA MAI I LE LALOLAGI

Pago Pago - AMERIKA SAMOA

FA’AAUAU TAUTUA SFC JACK PUNA PEKO - TAUVA I LE WARRIOR GAMES IUNI 2024:

O se tasi o Toa o Samoa, SFC Jack Puna Peko ua sauni nei ma koleni fa’apitoa ina ia auai i ta’aloga faitaulia a le Warrior Games mo le Department. of Defense a le Malo tele lea e fa’atautaia ia Iuni 2024 i le Disney Land, i le setete o Florida. 

O nei ituaiga o ta’aloga, e agava’a ai i latou o lo’o toe taumafai ona fa’aatoatoa le malosi mai ni manu’aga sa a’afia ai a’o tautua o fitafita tiute a le Vaega Au, poo ni gasegase foi ua fa’apogaia mai i ala o le tautua a’o fa’atino tiute fa’afitafita i le vaega au. O le tulaga fo’i lea o lo’o ua i ai le taumafaiga a lea atali’i o le atunuu, ae o lo’o fa’aauau pea ona avea ma se fitafita tiute o ia i le Nofoaga o le USArmy i Kanasa City i le taimi nei.

Na ulufale sa’o mai lava Jack Puna Peko mai Leone High School i totonu o le vaega au ina ua mae’a o lona fa’au’uga mai le vasega 12 i le tausaga e 2012. O ia fo’i sa matua lauiloa lona fo’i tomai i le fa’agatama o le Football i lona vaitau sa ta’alo ai mo Leone lana a’oga maualuga mo le fa tausaga atoa.

O ia o se tasi o totino mai le Ekalesia a Iesu o le Au Pa’ia o Aso e Gata Ai ma e alaala o ia i le afio’aga o Taputimu ma Pago Pago, o afio’aga ia o nai ona matua, Keligi ma Sela Peko. 

O le latou fanauga e to’a 6 ia te ia Tama ae to’atasi lava lo latou tuafafine, o lo ua aofia ai  i sui ua mae’a ulufale fo’i i le Vaega Au, le to’a 3 ua litaea le toatasi ae toe toalua lea e tautua pea. E foliga mai o ia o se tasi e fa’ata’ita’i i ai nai ona uso ma le tuafafine i ona tulaga a’ao, ae fo’i se manuia o si o latou aiga. 

“O ia o se fa’ata’ita’iga lelei mo i matou na mulimuli mai ia te ia.” O se tala tautino lea a lona tuafafine lava e to’atasi, Silafaga Kerine Peko o le Toa Samoa o lo’o fa’amautu i Fort Bliss El Paso, Texas.

O ona faiva i le USArmy o lo’o avea ai o ia ma 19K Tanker Specialist ma ua fa’alima ona ia tauto e toe fa’aauau lana auaunaga i ona ia faiva, ma ua atoa fo’i le 29 tausaga o lona soifua i le taimi nei.

Ua fa’aipoipo o ia i lana pele o Gloriah Peko ma ua atoa le to’afa o la’ua alo: Jayden, Liliana, Emeline ma Puamau lea latou te fa’atasi uma i lo latou aiga i Kansas City.

Na auai o ia i le Soldier Recovery Unit i Fort Riley Kansas ina ua a’afia o ia i lona ulua’i Stroke ina ua mae’a maua ane o lo’o i ai se tuma i lona faiai ia Novema 2022. Na fa’afuase’ia ona le toe gaoioi ma le toe tautala o ia, o se suiga tele ma le faigata ua feagai ma ia talu mai ona soifua i le tatou motu ma malaga mai fo’i e tautua i le USArmy. E moni fo’i la ua mafai ona tautala ma toe savali ae le o toe tutusa.

O lona itu tauagavale ua matele ina vaivai mai le a’afiaga o lona stroke ma le tuma i lona faiai. Peita’i o le fa’amalosi a si ona to’alua ma le fanau ae maise matua ma i matou uma ua asiasi ma tausi ia te ia, ua fa’atumauina ai lava lona naunau e taumafai ia toe fa’afo’i mai le malosi mai le Atua. E le o se ala faigofie ua oo i ai lana taumafaiga, ae tatau lava ona manumalo le fa’atuatua e tausia pea e le Atua le fitafita ma fa’aumiumi aso o le mafutaga.

O lona fiafia fo’i e tauva i le Warrior Games ua atili ai ona toe fa’afo’ia mai lona malosi, ma ua fa’atumauina ai lona fa’amoemoe e soifua tauva pea ma lu’iga o lo ua feagai ai. 

O le tauvaga lenei, ua naunau ai o ia e fa’ailoa atu i lona atunuu pele ma aiga, “E le o fo’i a tamaiti o le Tualatai ma le Aeto. E fusu ai lava i le avanoa ua maua, atonu fo’i o se tasi lea ala ua saunia e le Atua e fa’atula’ia mai ai se isi matati’a mo Amerika Samoa i sana taumafaiga.”

Amerika Samoa saunia e tapua’ia faiva o la outou Toa o Samoa, o lo’o fa’aauau lava fo’i ma lana tautua i le Vaega Au lea e le’i leva ona fa’aeaina o ia i le tofiga Specialist First Class ua i ai nei.

O ta’aloga nei a le Warrior Games na faatula’ia i le tausaga e 2010 e le Matagaluega o le Puipuiga Lautele o le Iunaite Setete o Amerika [DoD] ina ia fa’atauva ai i latou i ta’aloga e aoga mo le latou fa’amalositino. 

O le vasega o fitafita ua mama’i a’o tautua, poo nisi fo’i na fa’amanu’alia i le taimi o tautua e avea ma Fitafita o Taua a le Matagaluega. E le gata i lea, ae toe fa’afo’ia ai le agaga fa’atauva ma le toe fia atoatoa o le malosi i loto o i latou ua fa’amanu’alia ma lutia o latou soifua ona o gasegase ua fa’apo’ia ai.

Ona o lea ua mae’a fa’amauina lona auai o se tasi o le ‘au ta’a’alo a le USArmy i lenei taumafaiga mo se pine auro pe tulaga muamua, ua naunau ai Jack Puna Peko, ina ia to’atele lana au tapua’i i ona faiva fou ua taumafai nei e fa’aea ai lona atunuu ma aiga.

“O Faiva e manuia e tapua’ia! E pei lava oa tapua’ia o matou faiva i tafa o taua ma taimi o tiute fa’afitafita, o lo ua talosagaina nei o’u faiva fo’i i nei fa’agatama, ae a se ‘ai mai lea fo’i ala o le tautua ua i ai nei.” O sana lea tala ma le agaga fiafia.

E ui i le faigata o le tulaga ua i ai ma ua fa’apo’ia ai lana tautua  i le vaega au ma lona atunuu ma aiga, ae ua ia fa’afetaia tele lenei toe fa’afoi mai o le malosi ua i ai nei, ma e le fo’i i le taumafaiga ina ia toe malosi lelei. 

“O le ala fo’i e toe fo’i mai ai le malosi e le o faigofie, ia te ia ae maise nai ona matua ma lona to’alua ma le fanau. Fa’afetaia lava outou tatalo le atunuu pele, e faia i masina ta’itasi a outou sauniga lotu ina ia mautu matou taumafaiga i tiute uma e fa’atino. Fa’afetai, e pule lava le Atua, i le ola ma mea uma!” O sana toe fa’amatalaga lea.

“Fa’afetai i le SRU mo le fesoasoani malosi i ona togafitiga ma ala e toe fa’afo’i mai ai le malosi. I so’o se tasi latou te galulue mo le toe fo’i mai o le malosi ae silisili i le Atua mo lenei avanoa ua ou toe maua, pe faigata ae o le avanoa e fa’aauau ai le ola ma toe tauva e fa’afo’i mai le malosi o le tino ma le mafaufau.”

A maua se avanoa e te maimoaina ai nei ta’aloga fa’atauva a le DoD Warrior Games, ia tapua’ia faiva o lo tatou Toa o Samoa, SFC Jack Puna Peko, i le amataga o le masina o iuni 2024.

“O le a lava se taumafaiga o le a mafaia e la outou fitafita fa’atauva’a, ia vi’ia le Atua i so’o se mea ua mafai ona fa’atino, aua o le taimi nei, ua fa’atino mea uma ma le oia i tiga o le tino ua le toe atoatoa. Fa’afetai le tapua’i ma fa’afetai mo talosaga molia.” O sana toe upu lea mo i tatou uma e tusa ma lana taumafaiga ua sauni atu i ai.

AGIAGIA LE TAGAVAI AMERIKA SAMOA & SAMOA - WITWORTH  PACIFIC STUDIES:

O le aso 27, Aperila 2024 na fa’ataunuuina ai le Luau sailing tupe a le Sosaiete a le Pacific Studies a le fanau aoga i le Witworth University i Spokane, Washington State ma sa iloga foi ona tula’i mai ai siva ma fa’afiafiaga a Samoa i lea taumafaiga a le fanau.

I le fa’asologa o lea po, sa fa’ataunuuina le fa’amoemoe sa fau ao fau po a le fanau a’oga i le nofoaga faapitoa Witworth University Theatre ma na amatalia i le taimi tuupoina, aiga muamua mai le itula e 5:00 - 6:00 i le afiafi, ona soso’o loa lea ma fa’afiafiaga mai atumotu ta’itasi o lo’o a’o’oga fanau i le Laumua o le Pirates. Na amata mai i faafiafiaga mai le motu o Hawaii na tapena fa’apitoa e le to’a 10 fanau mai Hawaii o lo’o aofia i lenei sosaiete a fanau a le Pasefika i Witworth. O latou siva ma fa’afiafiaga matagofie ua masani ai maimoagai a latou siva Hula ma e tele fo’i a latou toniga o pale ma ula fugala’au manogi. 

Ona soso’o lea ma fa’afiafiaga mai le Kingdom o Tonga i a latou siva sa a’oina e le tahine Tonga o Nane Moimoi ae fesoasoani i ai Heavenly Miracle Leova mai Amerika Samoa i le a’oina o nei siva. I taimi o fa’afiafiaga e muamua lava ona auina mai i luma o le aofia le Agiagia a lea malo fa’aatumotu. Sa fa’apea lava ona faia mo Hawaii, soso’o mai ma le malo o Tonga. O le fa’afiafaga na soso’o ai o le sao lea o Uso Maori mai Niu Sila.

O le siava lauiloa a le Malo o Niu Sila i lana Haka Fa’a-Maori na tapena mai lea e le taule’ale’a Niu Sila lava e to’atasi o lo’o ua ulufale nei i Witworth University i lona tausaga muamua lenei, le ali’i o Logan Lucio. Mata’ina fo’i le sao o lea fa’afiafiaga aua ua lauiloa lava le Haka a Niu Sila o se siva tau e tomua mai i ta’aloga Lakapi uma a le All Blacks ae maise fo’i o le Manu Samoa, a’o le’i faia a latou fa’agatama i malae.

O se mea mata’ina lava le momoliga mai o tagavai a Amerika Samoa ma Samoa Tuto’atasi, aua sa muamua mai lava le leo o le fa’ailo o fa’aumu. Ua le gata i taulele’a ae ua sasao fo’i ma fa’aumu a tamaitai a’o’oga a Samoa i Witworth. O le isi mea, e le’i taofiofia fo’i le fa’aumu tali atu a le vasega o Matua sa auai i le po o fa’afiafiaga a le fanau, O Lupe Fa’alele a le atunuu i nei fo’i laufanua.

Na muamua momoli mai le tagavai a le malo Fa’ateritori o Amerika Samoa ona fa’ato’a molita’i mai lea o le Fu’a o le Malo o Samoa Tuto’atasi.

O i’ina fo’i na molimauina ai le toetoe a malepe le Hall, i le ala o le fa’afiafiaga a Samoa na lua. Ua le gata i lea, ae ua lalafo le sii alofa ma agaga faitama o le Samoa i le tele o le tupe ua va’aia i le fola. O latou siva na tapena e 5 lelei o mauluulu e sisiva fa’atasi ai tama ma teine a’oga, sa a’oina uma i sui totino o le sosaiete a fanau a le Pasefika o a’otauina i lea fo’i Laumua.

Ua mata’ina le sao o ma ua iloga fo’i ala o fa’afiafiaga a Samoa i lea itu o le Setete o Uosigitone, aua e sausaunoa ma le toto’a le tamaitai fa’aiuaso o lenei tausaga, le tausala filifilia o Rene Lolesio Tiumalu mai Malaeimi, Amerika Samoa, e taualuga fa’afiafiaga a Samoa. O lona fa’au’uga ua mae’a faia ia Me 19, 2024.

Ona o lea ua fai ma ua mafai lenei taumafaiga lona 52 ai lenei o Siva tele fa’apea a Sosaiete a Fanau a’oga a le Pasefika i Witworth University, ua iloga fo’i lo latou fesoota’i atu ma isi Sosaiete a fanau a le Pasefika i le Eastern University i Spokane lava, ma latou fesoasoani fo’i e fa’atautala a latou polokalama i fa’ai’uga o latou tausaga a’oga 2024.

“O le agaga lava ua masani ai i tatou i lo tatou ola fa’atasi mai i le tatou Alamoana, e fa’amasani ma fesoasoani a’i i taumafaiga ina ia au ma i’u lelei. O lea ua talia fo’i le vala’aulia fa’apitoa matou te fa’aalia ai fo’i tu ma aga a tatou atumotu i lea Iunivesite i nei malo tetele.” O se tala mai lea a Heavenly Miracle Leovao mai Fitiuta ma Fagatogo, Amerika Samoa.

Ua fa’ailoa mai o siva e lima sa a’oina lea e le fanau a’oga lava e aofia ai: Sinaita’aga Ala’ilima, Althalia Ioane, Emma Fuala’au, Taira Alaga ma Heavenly Miracle Leovao. Ina ua maimoaina e le mamalu o matua a latou fa’afiafiaga sa matua fa’afiafiaina i latou i lo latou sao e faaauau ai ona fa’alauiloa tu ma agaifanua a Samoa i nei fo’i eleele o aumau ma a’otauina ai.