Tala I Vaifanua — TATALA NOFOAGA ‘MY VISION’ I LE KS MART I TAFUNA

O le tautua a le Foma’i Mata ia Dr. Laloasi Petaia Steffany lea sa i lona nofoaga tuai i Pago Pago, ua si’itia ma ua mae’a tatalaina i le taeao ananafi i totonu o le faleolo o le KS Mart Inc i Tafuna.

“Ina ia fa’afaigofie ona o’o ane e tautuaina le atunu’u lautele e ao ina vave maua le avanoa pe a mae’a le auaunaga mo sui Fitafita Tuai, lea fo’i e i Tafuna le latou falema’i. O le ala tonu lea o le si’itia o le nofoaga autu mo lenei tautua i Tafuna, ma ua talafeagai fo’i ma le avanoa mai o lea itu o le Faleoloa o le KS Mart” o se tala lea a le tama’ita’i foma’i mata.

E le gata ina faigata ona toe fa’atulaga ana masini va’ai mata ma suesue ai le va’aiga e agava’a ai, ae o se suiga ua talafeagai ona fa’atino ia lava ai le taimi o le Foma’i e va’aia ai le lautele o le atunu’u o mo’omia lana tautua fa’apitoa.

Ua fa’ailoa mai fo’i, ua mae’a fa’atulaga le masina atoa o Aukuso 2017, mo suesuega o mata o le fanau a’oga. E le totogia lea tautua, ae ua alagatatau i matua ona sailia va’aiga a le fanau, pe mata o le isi lea ala ua tau le fiafia ai nisi o le fanau e suesue i a latou a’oa’oga.

E lelei fo’i ona fautuaina i tatou matua, ia taga’i toto’a i le fanau aua e le mafai ona toe lipea se a’ai a se tasi, pe afai lava ua leaga e le taugofie fo’i taotoga o fofoga i so’o se falema’i lava!

TU’UMALO REV. DR. FA’AVAINA TILO - VOICE OF CHRIST FULL GOSPEL

Na tu’ua filemu e le Tina matua a’o le faafeagaiga Rev. Dr. Fa’avaina Tiumalu Malemo Tilo ana galuega ma le mafutaga mafanafana ma le fanau faapea le Ekalesia i le aso Faraile, Iuni 09, 2017 i le 6:00 i le taeao lava. O le a manatua pea o ia ona o lana auaunaga matavela ma le le fa’atuaoia mo le Atua e ala i le tala’iga o le Talalelei, fa’apea fo’i lana ta’ita’iga o le galuega o le Ekalesia o le Vocie of Christ Full Gospel i le lalolagi.

O Rev. Dr. Fa’avaina Tilo ma le Tama o le Aiga, Rev. Elder Ta’afulisia Kalepo Tilo sa la’ua amata fa’atuina lea Ekalesia i San Francisco, Kalefonia i le tausaga e 1965, ma fa’asolo mai ai ina fa’atula’ia ekalesia e 78 ua mae’a fa’atutuina i atunu’u eseese o le lalolagi, e aofia ai ma le 5  i Amerika Samoa nei. E toafitu o la’ua alo.

Na soifua a’e o ia i Fagatogo, Amerika Samoa ia Setema 24, 1931, i ona matua le afioga le  Tapunu’u  Tiumalu Male ma Fa’auluuluga Malemo Tufele. O ia o le uii o le fanau e to’avalu. Na amata ana a’oa’oga i Poyer School soso’o ai ma le ulufale i le High School o Amerika Samoa, le igoa lea o le Samoana High i le taimi nei, ma agava’a ai e ulufale i le a’oga Fa’afaia’oga a le Feleti Barstow Teacher Training. Na mae’a tausaga iina ona si’itia lea o ana a’oa’oga i le Iunivesite o Washington State ma nisi fo’i o ana a’oa’oga na a’otau fa’apitoa ai i le tatou Kolisi Tu’ufa’atasi.

Na avea o ia ma Faia’oga i le Faga’alu Elementary, Pago Pago Elementary ma Aua Elementary ma o se Faia’oga mo le Special Education poo le faia’oga mo le fanau e i ai mana’oga fa’apitoa i le tino po’o le mafaufau.

O le tausaga e 1967 na toe taliu mai ai i la’ua ma le fanau i Amerika Samoa ina ua mae’a fa’atuina le Voice of Christ Full Gospel i San Francisco. O le taimi tonu fo’i lea na  amata ai tala’iga e faatula’ia ai le Voice of Christ Full Gospel i Aua, ae faia latou sauniga i le Maketi i Fagatogo mo le 20 tausaga. E ese mai lena sa latou fa’asalalauina fo’i polokalama i luga o le ea e fa’aigoaina “Itula o le Filifiliga” ma isi polokalama fa’asolo i le Televise.

I le tausaga e 1987 sa ia vala’auina fa’apitoa ai nisi o uo mamae, o faletua o fa’afeagaiga ma latou tu’ufa’atasia le mafutaga a Tina, mai so’o se Ekalesia ina ia so’ofa’atasi i le Tatalo ma ua fa’aigoaina lea mafutaga tatalo, Women’s Aglow Fellowship. Sa avea o ia ma se ulua’i peresetene o lea mafutaga.

Ina ua maliu le tama o le aiga, Rev. Elder Ta’afulisia Kalepo Tilo i le 2003, na mafuli tasi le Ekalesia Voice of Christ Full Gospel e avea o ia ma Peresetene mo le tausaga e tasi. O le soifua galue, soifua tautua i le Ekalesia, o lona soifua fa’atuatua ma lona agaga i le galuega a le Atua, ua avea ma fa’amalosi’au i le to’atele o Ta’ita’i ma Tina o le Ekalesia i le lalolagi atoa. Ua latou si’itia fo’i le fa’afetai tele i le Atua i lana meaalofa taua, o le tina o le galuega i lona amata mai se’ia o’o mai i le taimi ua tu’ua ai le nofoa e lana auauna.

AVANOA FA’ASIKOLASIPI TAPENA MATAGALUEGA SOIFUA MALOLOINA

Ua fa’alauiloa mai  e le Matagaluega o le Soifua Maloloina i latou ua mae’a taua’aoina i ai  avanoa fa’asikolasipi. O i latou uma o fanau fa’au’u mai le vasega 12 i a’oga eseese i le teritori ma o nei sikolasipi  ua fa’atupea e le CDC ma le Tobacco/Diabetes Coalition.

O i latou ua maua sikolasipi e to’aono: Azariah Maiava - Manu’a High School;  Marie Theodora Ta’ai  - Leone High School; Elma Solaita - Tafuna High School; Teddy Barber - Fagaitua High School; Fenian Finau - Samoana High School; Dela Sene - Nuuuli Voc Tech High School.

Na faia se fa’atasiga a i latou uma nei ma le taupulega a le Matagaluega o le Soifua Maloloina ina ia mafai ona fa’ailoa ia i latou aiaiga o lenei sikolasipi, ma fa’amalosi’au fo’i ia i latou ina ia to’aga ma filiga i suesuega i a latou kosi o lo’o ua fa’atulaga e a’oa’oina ai kolisi ma Iunivesite o lo ua latou filifilia e a’otauina ai.

PERISE SIO-HILES, FOMA’I FA’APITOA - PHYSICAL THERAPY

O se tasi o alo tama’ita’i o le tatou atunu’u, sa malaga mai e fa’amae’a lelei le 8 vaiaso o lana aoaoga fa’apitoa e mafai ai ona pasia lona tusi fa’afoma’i Physical Therapy, ua toe taliu nei i Loma Linda University, Kalefonia mo lona fa’au’uga sa faia ia Iuni 11.

O ia o Perise Sio-Hiles mai le afioaga o Asili. Na mua’i sailia ona tusi pasi maualuluga i le Union College ma fa’asolo mai ai i Loma Linda University mo ona fa’ailoga maualuluga lea ua taua’aoina  nei. Matagofie lava le toe auai mai o lenei alo o le atunu’u ina ia fa’atautaia iinei ana toe suesuega ma faigaluega fa’ata’ita’i ai e fa’amautu ai lana suesuega a’ia’i o lona Doctorate in Physical Therapy.