TALA I VAIFANUA

Pago Pago - AMERIKA SAMOA

LULUGA O LE MAFUIE I MANU’A O LOO LULU LAVA I NOFOAGA MASANI

“O mafui’e i le Manu’atele o lo’o fa’aauau pea lava ona lulu,” e tusa ai o le fa’amatalaga a le saeanisi o Dr Natalia Deligne.

Ua fa’ailoa mai e ali’i saeanisi suesue a le USGS, “O lo ua faaauau nei luluga mo le ma o loo fa’aauau pea lava a latou suesuega ina ia tau matau poo fea tonu o lo’o matuaina mai ai nei luluga, ma le nofoaga tonu o lo’o afua mai ai, aua o lea ua amata ona si’isi’i le malosi fa’amauina o nei luluga mai le 3-4 i le fua o mafui’e.

O le isi mea e le o mautinoa lava, o le maulalo o loo mapuna mai ai nei mafui’e e lulu.

Ua fa’ailoa fo’i e Dr Deligne, “O nei mafui’e uma ua lulu e le o se’e ese mai le nofoaga o afua mai ai muamua, o lo’o tumau lava le nofoaga tonu o matua’ina mai ai ma e tulata lava i Ta’u.”

O lo ua i ai fo’i la le fa’amoemoe e autova’a mai nisi o sui suesue o le USGS fa’aopoopo i ai ma masini malolosi atu ina ia fuaina tonu mea uma e le o mautinoa i le taimi nei i fa’amaumauga ma le mata fonu o le afuaga o luluga o fa’alogoina e le mamalu o e alaala i le Manu’atele.

NA’O MALAGA I PAGO PAGO - TOTOGI  LAFOGA MALAEVA’ALELE I SAMOA

O le mamalu o e uma e faimalaga mai Samoa e aga’i atu i Pago Pago e ala i va’alele ua fa’ailoa mai nei e tatau ona totogia le Lafoga ile Malaeva’alele i Faleolo, i Samoa a’o le’i tu’uva’a ese atu. O le lafoga lea e $65 faato’a malaga ese atu.

O lo ua fa’ailoa mai, o isi uma e malaga i isi malo e aofia ai Fiti, Ausetalia ma Niu Sila, ua mae’a aofia ai le lafoga lea a le Malaeva’alele i latou pasese o femalaga’i ai.

Ua fa’ailoa mai e le CEO o le Pulega o le Malaeva’alele i Faleolo, Silamanai Ueta Solomona Jr., “O le Lafoga totogi lea mo le malaeva’alele i Samoa, sa aiaia lea i le tausaga e 2012, o lea tupe sa tatau ona tuuina lea i le pasese e malaga ai ai le tagata i va’alele, ona o lea e le’i totogia mai e Kamupani va’alele lea e femalaga’i i le va o Pago ma Tutuila le vaega tupe lea mai latou pasese mo le Pulega o le Malaeva’alele poo le Samoa Airport Administration.

Ua le fa’asifo se manu ia tasi i lenei tulaga, ae ua tutusa lelei lava le mea ua faia i tagata mai Tutuila ma tagata mai Samoa pe afai e malaga i Tutuila, ua tofu totogia lava latou nei lafoga o le malaeva’alele e $65. fa’ato’a o ese mai ai mai Faleolo Aiport.

Na fa’ailoa mai e Silamanai Solomona Jr.”Ua fa’aauau nei feutaga’iga i le va o sui mamalu o Kamupani va’alele a le Samoa Airways ma le Talofa Airways ina ia toe fa’aauau lava le totogia o nei lafoga a le Malaeva’alele aua o lea ua toe sologa lelei femalaga’iga i le ea.

“O le mea sili ona taua e ao ina faia e Kamupani Va’alele nei e lua, o le fa’auia mai lea o tupe nei ua mae’a totogia e tagata femalaga’i i le SAA poo le pulega a le Malaeva’alele.” O se toe tala mai lea a Silamanai.

O le pau lava pasese ia e totogia nei lafoga mo le malaeva’alele o le Samoa Airways ma le Talofa Airways aua o lo’o tele le tupe sa tatau ona totogia mai  e nei Kamupani i le malaeva’alele mai tausaga ua mavae.

“O le mafuaga tonu lea ua totogia ai lea $65 lafoga i le malaeva’alele ona o lo’o tele se tupe o nofo aitalafu ai le Kamupani Va’alele a le Samoa Airways i le SAA e le’i totogia lava.

E le’i mafai ona fa’ailoa maia le aotelega o lea aitalafu a le Samoa Airways.

LE MANANA’O MATAI FAGALI’I I SAMOA E TOE TATALA LE MALAEVA’ALELE

Ua fa’ailoa se iugafono a Ali’i ma Matai o le saofa’iga a le afio’aga o Fagali’i i Samoa, e toe fa’ailoa atu ai i le faigamalo a le FAST  lo latou le manatu e toe tatala le Malaeva’alele i Fagali’i mo feoa’iga i le ea.

E leva nei ona fa’aaogaina lea malaeva’alele e le Matagaluega o Leoleo, Falepuipui ma Ta’avale Afi a le Malo o Samoa.

Ua fa’ailoa fo’i i lipoti e feavea’i atu i televise ma Leitio se saunoaga fa’apitoa a le afioga Tuisugaletaua Sofara Aveau, ma ua ia fa’ailoa ai lona tete’e tele i lea lava fa’aiuga a le FAST e toe tatala le malaeva’alele i Fagalii a suia ai le fa’aiuga e tapunia lea malaeva’alele ae ae suia le nofoaga e fa’atuina ai le malaeva’alele fou, sa faia lea e le faigamalo a le HRPP lea na mavae atu nei.

Ua faia foi se tusi aloa’ia a lea afio’aga ina ia toe faliuliu le tofa mamao ma se faataga poto e tusa o lea fa’ai’uga, ae maise ua faailoa manino ai lo latou fanoga ua manatu le saofaiga a le afio’aga o Fagali’i ina ia fa’amautuina mai se tali mai le faigamalo fou a le FAST.

Na fa’ailoa e Tuisugaletaua, “Sa matua fa’aumiumi o afaina lo latou afio’aga ma le soifua to’atuga o le afioaga ona o le leotetele o vaalele e tu’uva’a ese atu pe taumafai fo’i ona tulaueleele mai, peita’i ua lagona le to’afilemu mo le taimi atoa na taofia ai loa le toe fa’aaogaina ole malae sese’e lea, ae o lea o le a toe tatala nei, ua matua le fia oo atu lava i ai.”

“Ua fa’atupu ma’i a’afiaga o le malaeva’alele lenei i tagata tino matutua ma e pito i laiti o le matou nuu.”

Ua fa’ailoa mai fo’i e i latou, “Ua oo lava i tagata e aumau i nu’u tuaoi mai ia i latou, e aofia ai Vaivaseuta fa’apea ma nisi vaega o Moata’a ma Vailele ua latou fa’ailoa mai latou fa’asea i le leo tetele o va’alele ma le ola mata’u ina ne’i pa’u mai lava se va’alele i luga o latou fale, aua e le faitaua e le tagata taimi e aafia fa’afuase’i ai i ni vaalele pa’u’u ma mea fa’apena.”

“O le tele fo’i o nei atugaluga ma popolega o nei afioaga uma lava na mafua ai ona tafa se finagalo o le faigamalo ua tuana’i nei ina ia suia le nofoaga o le Malaevaalele i le nofoaga fou lea ua mae’a tapena mo lea fa’amoemoe, ma ua mae’a totogia tupe mo lea nofoaga fou.”

Ua taofia nei le fausaga o le malaeva’alele fou lea e le FAST ona ua toe manatu o le a toe fa’aauau ona tatala le Malaeva’alele i Fagali’i.

O le susuga le Minisita o Feoaiga i le Ea, Fauoo Fatu Tielu, sa ia fa’ailoa mai “O le toe tatalaga o le malaeva’alele i Fagali’i o le a muamua fa’aumi le malae sese’e ina ia le toe a’afia ai le tele o lagona popole ina ne’i tupu mai ni fa’afitauli o loo atugalu ai tagata.”