TALA I VAIFANUA

Pago Pago - AMERIKA SAMOA

FA’AGAFUA NISI AIAIGA FA’ASA A LE FALEMA’I O LE COVID-19

Amata i le aso ananafi, ona fa’amatu’u ese atu e le Falema’i nisi o a latou tulafono sa fa’amamalu ina ia tau taofiofia mai ai le pipisi tele o le fa’ama’i Covid-19 ina ua ulufale mai i le atunuu, talu mai Fepuari 2022.

O lo ua i ai nei la se tusi fa’asalalau fa’alaua’itele ua fa’alauiloa mai ai nai suiga ua fa’amalosia i le taimi nei i le tatou falemai. ”Ina ua mae’a iloiloina toto’a e le pulega ina ua va’aia fa’amaumauga uma ua mae’a i ai mai aso ta’itasi a le LBJ Medical Center e tusa ai ma le to’atele e a’afia i le Covid-19, o i latou o e gasolo atu i le falema’i mo talavai poo e fia fo’i e fia maua ni togafitiga mo latou gasegase. Ua soloia nei le Fa’ailo Lanu Mumu sa fa’amalosia i le fa’ailo Lanu samasama ma sa amatalia lea i le aso 29 Aukuso, 2022.”

O lo ua toe tatala nei Potu talavai mo i latou e fia ulufale mai mo talavai ma togafitiga i o latou itula masani e pei ona sa sau a’i ae le’i ulufale mai le Covid-19.

O le a fa’amalosia pea lava le faia o pupuni fofoga pe a e ulufale mai i soo se vaega lava o le falema’i i taimi uma fo’i e te i ai i lea nofoaga. O le a mafai fo’i ona toe fa’aaogaina le pakaga o ta’avale lea sa fa’aaogaina lea mo le Covid-19 i a latou faleie sa fa’atutu ai.

O le a i ai lava le vasega o Leoleo o le Falema’i ina ia latou fesoasoani i le mamalu fegasoloa’i. I le taimi nei o lo’o faia lava suega a le Covid-19 i so’o se taimi e te asia ai le falema’i mo se talavai poo le fa’ailoa ane fo’i i le mamalu lautele o nisi o aiaiga o lo’o fa’amalosi pea lava.

FA’ATAUA GALUEGA FALEMA’I FA’AITUMALO - MATAGALUEGA SOIFUA MALOLOINA

O  le vaiaso lenei ua fa’atulaga ai e le Matagaluega o le soifua maloloina e taualoa ai le tele o galuega o lo’o tautuaina ai le mamalu lautele o le atunuu e fa’atino mai lea e le vasega o Falema’i Fa’aleitumalo i le atunuu.

Na fa’ailoa mai e le tamaitai o Suitupe le sui fa’asalalau a le Matagaluega o le Soifua Maloloina, “O lo ua fa’atulaga e amata lenei fa’amoemoe i le sauniga lotu ina ia mua fo’i mea i le Atua e fa’afetaia ai le tele o tiute ma faiva e tautuaina ai le atunuu lautele mai nei falema’i fa’aitumalo a le Matagaluega. E le gata i lea, sa matua fa’aaogaina lava falema’i fa’aitumalo nei i le taimi na lutia ai le atunuu e le Covid-19.

I le vaiaso atoa lenei, o le a i ai ni mea e fa’atulaga mai le fa’auluuluga o le matagaluega ina ia fa’ailogaina ai fo’i le vaiaso fa’apitoa mo Falema’i Fa’aitumalo uma i le Iunaite Setete o Amerika, ina ia taualoa fo’i le tele o galuega o lo’o fa’atautaia mai ai ma i latou o lo’o fa’ataunuuina nei galuega tautua mo le lautele mai nei nofoaga. O i latou lava e to’atele o lo’o aofia i nei aufaigaluega o ali’i ma tamaitai Foma’i ma Tausima’i fo’i. Peitai o lo’o aofia ai ma nisi o lo’o faigaluega ai foi i a latou pulega ma aufaigaluega tofia.

Ua fa’ailoa mai e tatala lenei taumafaiga i le latou talotaloga e faia lea i le nofoaga o i ai le McDonalds i Tafuna, ma ia tatou manatua fo’i a latou auaunaga mo le tausiga fa’apitoa o le soifua ma’ale’ale o fanauiti e ala i a latou tuiga ma talavai a’o itiiti se’ia oo lava ina matutua, fa’atasi ai ma auaunaga i tina ma’itaga ma talavai fo’i mo isi uma gasegase tumau o lo’o maua ai le mamalu lautele o le atunuu.

Fa’aalia fo’i e Dr Emioni Dakua, “O lo ua i ai lava se polokalama o le a fa’atautaia aga’i i ai lenei vaiaso atoa o mea e fa’afiafiaina ai i latou uma o e faigaluega i o tatou falema’i fa’aitumalo i le teritori. O lenei vaiaso  ua fuafua e faia ai ni tausiga lelei o le aufaigaluega e le matagaluega, e ala lea i a latou mea’ai mo le tausiga lelei o le soifua maloloina a’o faigaluega, ma ua ofo mai vaega eseese o le matagaluega lava latou, e fafaga i lea aso ma lea aso.  E le gata i lea, o lo ua i ai fo’i le avanoa lelei, e mafai ai ona faia fono fa’alaua’itele a i latou e mafai ai ona fa’aleleia atili o latou tomai i tiute ua latou fa’atinoa i le matagaluega. Ua atoa nei le lima o tausaga o faia mai lenei fo’i fa’atofala’iga.”

MANA’OGA O LE STAR KIST TU’U ATU I LE KOVANA SILI

O nisi o mataupu sa mafai ona talanoaina e le fa’auluuluga o le StarKist Co., ma le afioga le Kovana Sili Lemanu PS Mauga, ua fa’ailoa mai ai le fa’anaunauga ua i ai nei le pulega a le StarKist, ia toe tula’i mai le StarKist i lona tulaga numera tasi i le tele o le apai’a e gaosia atu ai mo le mamalu lautele o tagata uma e taumafaina i le Iunaite Setete

O le fonotaga lea a nei ta’ita’i sa fa’atautaia lea i le aso Lulu o le vaiaso ua te’a, ma ua tapena mai ai se fa’asalalauga o mataupu sa talanoaina e nei ta’ita’i mo le silafia a le mamalu o le au fa’asalalau ma fa’ailoa atu ai i le mamalu lautele o le atunuu.

O sui o le StarKist sa auai i lea fonotaga e aofia ai le Peresetene ia Andrew Choe ma le Fa’atonu o le Star KistSamoa, Inioa Ha, ma o ia lea sa manatu le Pulega ina ia fa’amasani atu i le afioga le Kovana Sili, ona o lea o le a ia ta’ita’ia le StarKist Samoa.

O le mataupu sa fa’ailoa e le StarKist i le kovana sili, “O le mana’omia ona toe faaopoopo lea o le aufaigaluega a le StarKist, i lalo o le polokalama ole “guest worker program”.

Ua talosagaina fo’i la e Mr Ho, “Le si’itaga o le aufaigaluega o lo’o mo’omia nei ona o lo’o tumau pea lava le alumia o le apa i’a ma isi sapalai o le pepa i’a mai le tatou lala i’inei. O lo ua manaomia lava ona fa’aauau pea ona fa’afaigaluega mai le to’atele o tagata mai Samoa i le polokalama o le “Ulufale mai e Faigaluega” lea ua iloga ona aoga mo i latou e fa’alava ai latou tagata faigaluega tumau.”

Ua fa’ailoa le agaga fa’afetai o le afioga Kovana Lemanu Mauga i le latou fonotaga ma ua ia fa’ailoa ai, “O manaoga ua fa’ailoa mai e le Pulega a le Star Kist o lo’o mana’omia ai le fesoasoani a le Malo o Amerika Samoa, e le mafai ona tu’ua. Ua sauni fo’i le malo e tuu atu le tau’au ina ia mafai ona ausia e le Star Kist o latou fuafuaga fa’ataoto mo le lumana’i o le Kamupani, aua o le lumana’i mautinoa fo’i lea o Amerika Samoa, ona o le latou sao i le tamaoaiga tausi o le atunuu.”

Ua ia fa’ailoa atu fo’i, “Ua nofo sauni fo’i matagaluega eseese o le Malo ua lautogia mo le fa’ataunuuina o tiute feso’ota’i ma le Star Kist i o latou mana’oga fa’apitoa ua folasia fa’apea ma nisi fo’i o fa’aolioli mai i le lumana’i o le latou tautua i le atunuu.” O nei vaega o le malo e aofia ai le ASEPA, ASDOH, DMWR ma le DLA.

Sa ia toe fa’ailoa atu, “O lo’o tumau lava le tele o lo outou sao i le tulaga fa’aleleia o le tamaoaiga tausi o Amerika Samoa, aua e matua to’atele lava aiga o lo’o faigaluega o latou sui i le Star Kist Samoa.”

Sa fa’afetaia fo’i e le afioga le Kovana Sili le ta’ita’iga a le Star Kist ona o le latou onosa’i fo’i e usita’ia le tele o aiaiga o le Covid-19 na tuuina atu fa’amalosia e le Malo ina ia tau puipuia mai le atunuu i le so’ona a’afia tele i lea fa’ama’i fita ma maumau ai le soifua.