TALA I VAIFANUA

Pago Pago - AMERIKA SAMOA

$2.6MILIONA AOTELEGA SIAKI MO LAFOGA MO LE LAUTELE I LE TAEAO NEI

O lo ua fa’ailoa e le malo o i latou uma lava na faila lafoga mai ia Aperila 12 se’ia oo ia Me 01, 2022, e maua siaki ma tupe o le lafoga i le taeao nei. 

O le aotelega o nei lafoga totogia maia e le Matagaluega o le Tupe a le tatou Malo e $2.6miliona. O nisi fo’i ua fa’auia lea i pusa meli i le falemeli a latou siaki ma le fa’amalama o le Disbursing Office a le tatou Malo. 

Ua fa’alauiloa aloa’ia mai lea tulaga ise tusi fa’asalalau ua tapena mai e le sui Teutupe a le Malo Levi Reese, ma ua fa’alauiloa fa’alaua’itele nei i le vasega o le ‘au fa’asalalau mo le silafia e le mamalu lautele o le atunuu e fuafua i ai latou fa’atauga.

Olo ua fa’ailoa mai ai fo’i i le mamalu o le atunuu, o le a tapunia aloa’ia ai le Ofisa o Lafoga i le aso Faraile, Aukuso 19, ona o le a auai le pulega ma le aufaigaluega uma i le toe sauniga o le tamaitai sa avea ma tausala lalelei o Amerika Samoa 2003-2204, Mary Ann Laurenson Olo.

Ua silia ma le 20+ le umi o le tautua a lenei tamaitai i le Ofisa o Lafoga.

FA’AAUAU PEA LULUGA O LE ELE’ELE I MANU’A

O lo ua fa’aauau pea lava ona fa’alogoina e le mamalu o e alaala i Ta’u, Ofu ma Olosega luluga o mafui’e i le Manu’atele.  Ua mae’a fa’ato’ai atu le tamaitai suesue fa’apitoa o Maugamu, na malaga mai fafo i le aso Tofi ua te’a, Natalia Deligne ma ua i ai i le Manuatele talu mai le aso Toona’i, lea sa malaga atu ai ma nisi o le aufaigaluega a le Ofisa Va’ai Tau a le NOAA i Tafuna.

Ua mae’a fo’i ona latou fa’ata’ati’a nisi o masini e mafai ona fuaina luluga o Mafui’e o tutupu nei i le Manuatele, ma ua latou fa’ailoa mai ai nisi o latou fa’amaumauga ma ni fa’ai’uga vave ua latou fa’amauina nei.

Ona ua mautinoa e i latou ua popole le to’atele i le Vailulu’u ina ne’i pa ma a’afia ai lo latou ola i le Manu’atele, o lea ua latou fa’ailoa mai ai se fa’aaliga vave lava mo le silafia e le to’atele, ae le o mautinoa a’ia’i nei fa’ai’uga.

E mautinoa e fa’aauau pea lava ona fa’alogoina e le Manu’atele i e o alaala ai luluga o mafui’e e pei ona latou fa’alogoina i le vaiaso ua tuana’i e oo mai i lenei vaiaso.

O lo ua galulue vave lava le vasega o e suesue fa’apito augafa i Mafui’e ma Maugamu ina ia mautinoa le tele o latou fa’amaumauga ma ni tima’iga e ono fa’ailoa mai mo le mamalu lautele, ae maise lava i le mafuaga o nei luluga uma.

E matinoa lava, e matele le popolega i le Vailulu’u, peita’i e mautinoa o le tele o le afaina lea sa va’aia i Tonga i le latou maugamu na mafua ai mafui’e ma le maugamu na pa, e le fa’apea se mea o le a oo mai i le Manu’atele ona o Vailulu’u.

Afai o oe o lo’o tulata i nofoaga tumatafaga, afai ua umi ma malosi tele se luluga, taga’i i le sami pe gogolo mai ma mou atu ai le suasami, ma toe sua mai, a tutupu na mea i lau silasila, fa’ata’alise loa ona e sola i nofoaga maualuluga o lo’o lata ane ia te oe.

O le aufaigaluega ua agavaa mo suesuega uma o Maugamu ma Mafuie i le Iunaite Setete ua i ai nei i o tatou laufanua ina ia faia suesuega uma e ao ina mautinoa e le atunuu ona o Vailulu’u ma Nafanua le vete lea ua pusapusa mai ai le ea vevela. O le isi nofoaga tulata mai e mafai ona fuaina le fesee’eta’i o eleele e afua ai mafui’e o lo’o i Apia ma ua galulue malosi le vaega suesue o mafui’e ma maugamu ina ia fa’atulaga se isi nofoaga mo nei meafaigaluega uma i le Manu’atele.

O le mea sili ona taua e faia e tagata o le Manu’atele o le fa’amaumau lea o le taimi na lulu ai le mafui’e ma toe fa’amauina le umi o lulu pea nei mafui’e. A maua nei faamaumauga, e aoga tele lea mo le vasega o e suesue i mafui’e ma maugamu mo le faailoa fa’alaua’itele mai o ni a latou fa’ai’uga aoga mo le nofo tapua’i a le atunu’u.

Ua tima’i mai le tatou sui faipule i le Konekeresi, “Manu’atele e, ia utagia e i tatou fautuaga ma ni tima’iga o le a fa’auia atu e le vasega o saeanisi suesue fa’apitoa i maugamu ma mafui’e ma o latou fa’amfuaga i le tatou gataifale. E aoga le latou tima’i ina ia fa’asaoina le soifua o tatou tagata, ma ia outou nofo tatalo fo’i, ia matua talitonu i le agalelei tausi o lo tatou Atua, tatou te sao ai ma ni faafitauli fa’anatura e le mafai e le malosi o le tagata soifua ona fa’ataututu atu.”

“Ou te aioi atu ina ia amana’ia latou fa’ai’uga e i tatou, o fesoasoani fo’i ua faauia atu e le Malo Tele ina ia mafai ona fesoasoani mo i tatou i nei taimi o fa’alavelave fa’anatura o tau fa’aolioli mai, ae le’i tutupu ma a’afia ai lo taotu soifua ma’ale’ale lava.”  O se toe augani mai lea a le tatou faipule i le Konekeresi, Uifa’atali Aumua Amata.

Poo a lava tala e tele e faia, ae o le mea mautinoa, ua fa’ailoa mai le atugaluga o e uma o alaala i Ofu ma Olosega lea e matua tele mafui’e ua fa’alogoina e i latou le lulu so’o mai.

Ua mae’a tuufa’atasia e Natalia Deligne ma lana vaega fa’apitoa ole aumalaga ni masini seismometer e 2 ma ua faatulaga i le alititai ina ia mafai ona maua mai ai ni fa’amaumauga taua lava talu mai le aso Toona’i inaua to’ai taunuu i Ofu ma Olosega le latou aumalaga.

Ua fa’ailoa mai sa maimoaina e le toatele le tuufa’atasiga o nei masini e lua mai le Fitiuta Elementary ma Olosega Elementary ina ia mafai ona maua mai fa’amaumauga lelei mo suesuega ma tali fo’i e fia fa’afofogaina e le atunuu mai nei suesuega taua, o afuaga o luluga o mafui’e ma le maugamu fo’i o Vailulu’u.

Ua tatalia fo’i nisi e to’alua o le latou aufaigaluega e mafai latou tuufaatasia nei fa’amaumauga mai masini nei ma latou fa’ailoa mai ni tali e agatonu ma suesuega o faia nei e i latou.

Ua fa’ailoa mai e nisi lo latou popolega aua o lo’o ua malosi tele toe umi lea mafui’e i lo luluga uma na muamua atu. Ua fa’aleo uma latou lagona i ni a latou tala i luga o le facebook ma ua fautuaina fo’i e nisi i latou ina ia malaga mai i Tutuila mo le saogalemu o latou aiga ma pelega. Peita’i ua fa’ailoa le faatuatua o nisi ma latou fai mai, “E tele lo matou Atua o talitonu ma fa’amoemoe i ai, na te alofaina i matou ma tausia i matou i so’o se puapuaga lava e oo mai.”

Ua fa’aalia e le tina o Anne Sue Tinoisamoa sona manatu e tusa o le luluga tele lea ma le malosi, “O le a faigata lava ona toe momoe lelei i matou ma le fanau, ua lagona le lulu atoa o le fale. Ou te lagona le lagona ua oo ia i matou uma o lo’o alaala tumau i le Manu’atele, ua tatou aofa’atasi i lenei lu’iga tele. Ia tutumau o tatou fa’atuatua, e alofagia i tatou e le Atua e ona mea uma lava e o’o i le ola.”

TULATA INA A’E A’OGA A LE FANAU - UA SAUNIA FALEA’OGA MA UA MAE’A MAMA?

Ua le o toe mamao ae a’e a’oga, peita’i o le fesili ua tula’i mai, “Ua saunia ea falea’oga ma ua mae’a fa’amamaina mo lea fa’amoemoe?”

O se lipoti maumaututu mai le ta’ita’i o le Envirinmental Health Services Aileen Solaita, ua ia fa’ailoa atu ai i ta’ita’i o le atunuu, “O le tulaga sa i ai fo’i i le tausaga ua mavae lea ua oo mai fo’i i lenei tausaga, o fa’apea lava ona moomia ona matua fa’amamaina lava nofoaga uma o aoga tulagamuamua ma a’oga tulaga lua a le malo. O lona uiga e le o mama a’ia’i ma fa’aleleia atoatoa potu aoga ma fale’ai fa’apea ma umukuka i totonu o aoga uma ale Malo ina ia gafatia ona tausia faapitoa le soifua maloloina o le fanau aoga aoaoina i latou.”

E sili ona fa’amuamua i le tulaga o fa’amama, ona o lea lava tatou te nonofo ma le Covid-19 i le taimi nei, e le’i mama uma mai Amerika Samoa i na fa’ama’i pipisi o le Covid-19 na ala ai ona fai sui e fa’amamaina potu a’oga ma nofoaga uma e fa’atautaia ai aoaoga o le fanau a’oga, soso’o ma latou faleta’ele ma fale ‘aiga ma umukuka.

Ua matauina o faia’oga fa’ata’ita’i lea ua soloai mai ma avea ma nisi o faia’oga tumau i lenei tausaga aoga a le Matagaluega.

Ae ua opu ai nei le galuega fa’amama, sa tatau ona latou mataituina e pei ona fa’amauina i a latou konekarate faigaluega. Manatu o lo’o tuuina pea le fa’amuamua i le fa’amamaina o nofoaga uma e faia ai a’oa’oga a le fanau, aua o lea ua faailoa nei e le tamaitai Suesue o le Matagaluega o le Soifua Maloloina, o lo’o tutusa lava mea o fa’aletonu i Laumua uma a le Malo ma le tausaga a’oga ua te’a i lona tau amatalia o a’oga ale fanau.

O lea la ua toe fafagu mai nei fo’i ina ia toe fa’aleleia le tulaga o falea’oga, fale’ai ma umukuka ae maise fo’i o faleta’ele o le fanau a’oga, ae le’i a’e a’oga i lenei tausaga. Ua tofu a’oga ta’itasi ma matagaluega o le Malo latou te sapaia faatamafai a’oga uma, o lea ua toe fa’aa’e ai fo’i se tima’iga, ina ia manatua lea galuega e ao ina fa’atino, aua ua toe lua nei fo’i vaaso a’e le a’oga mo fanau uma a’e i a’oga a le Malo.

O lea ua fa’ailoa mai ai, e ao lava ina faia tui puipuia e lua o le fanau a’oga e a’o i le ECE ma fa’asolo mai ai i a’oga tulaga muamua ma a’oga maualuluga ua laugatasia i le fa’aalia muamua lava o latou pepa tui ua mae’a lelei ona faia tui puipuia e le gata i le Covid-19, ae o isi uma tui ia matua mae’a lelei e fuafua i latou tausaga ua i ai nei.