TALA I VAIFANUA

Pago Pago - AMERIKA SAMOA

GALULUE FA’ATASI NOAA, USGS & MATAGALUEGA SAOGALEMU FA’ALOTOIFALE MO SAILIGA:

Ua i ai se feutaga’iga i le va o le NOAA ma le vaega o sui suesue fa’apitoa mo tulaga o Maugamu ma Mafui’e a le Iunaite Setete ma ua faia ai se maliliega ina ia malaga mai nisi o nei sui su’esu’e fa’asaeanisi o nei fa’alavelave fa’anatura ina ia latou suesueina fa’apitoa le tulaga o i ai nei Vailulu’u ma Nafanua, aua ua fa’alogoina so’o mafui’e ua lulu i le Manu’atele.

Ua na’o le to’atasi na maua le avanoa e malaga muamua mai ai i le vaiaso na te’a nei, peita’i o lo’o i ai le aumalaga fa’apitoa a le NOAA lea o le a fa’ato’ai mai i le va’alele o le aso, poo le aso Tofi o lenei fo’i vaiaso, e fuafua i le tulaga o avanoa o va’alele.

Ua fa’ailoa mai fo’i e le lautele o tagata o lo’o alaala i le Manu’atele, ona o lo ua talosagaina i latou e le malo, pe afai e fa’alogoina e i latou ni mafui’e ua lulu, e ao ina latou fa’ailoa mai ma fa’amauina le taimi tonu o lo’o lulu ai, e aoga tele lea e mafai ona faia aga’i i ai fa’amaumauga a le au suesue ua fa’ato’ai mai nisi i le tatou atunuu, ae maise o latou aotelega o latou suesuega e fa’amautu ai ni fa’ai’uga e tusa o le Vailulu’u ma Nafanua i se taimi tonu e ono pa ai.

Ua leai ni gogolo e fa’alogoina e i latou i Ta;u ma Fitiuta, peita’i mai Olosega ua lipotia mai e tagata, e fa’alogoina fo’i e i latou le gogolo mai o le taimi e lulu ai fo’i mafui’e lea e faalogoina e i latou. Ua fa’apena fo’i ona i ai taimi e lulu fa’atasi mai fa’atopetope mafui’e ma le gogolo fa’afuase’i, ua avea ma se tau fa’amata’u i le to’atele o lo’o nonofo pea i le tatou lea motu.

O lo ua fautuaina fo’i le mamalu lautele lava o le atunuu, “Afai o e tu matafaga i se taimi lava e fa’alogoina ai le luluga o se mafui’e, ia e tepa i le tai ma va’ai toto’a pe matauina e oe ua mou vave ese atu i le tai e foliga mai ua pe eleele, afai e toe vaaia le sua mai o le suasami e foliga mai ua toe sua tutu’i ona iloa lelei lea o le galulolo poo le Tsunami o le a oo mai, e tatau ona fa’avave ona e tamo’e i luga o se mauga maualuga o lo’o soso’o ane ma oe.”

O i latou fo’i nei ua tutu fa’atasi ma le NOAA fa’apea ma le Matagaluega o le Saogalemu Fa’alotoifale o Amerika Samoa, ina ia fa’atulaga se fuafuaga fa’ataoto e fa’atautaia ai galuega tima’i ma galuega lavea’i i se taimi e ono pa ai se maugamu ma tutupu mafui’e tetele i Amerika Samoa. E le gata i lea, ua latou fa’aauau pea suesuega ina ia mautinoa lelei se vaitaimi tonu e ono pa ai le Vailulu’u ina ia nofo sauni i ai le atunuu aua se taimi tonu e ‘ave’esea mai ai le mamalu o le atunuu e tulata i le Vailulu’u i ni nofoaga e ono saogalemu ai.

O le galuega ua mae’a tapenapena i ai le NOAA ma le USGS ua fa’ailoa mai, e tuufa’atasia muamua lava e i latou le masini e mafai ona alu i lalo i le alittitai na te tapu’eina ata ma fa’amaumau mai uma gaoioigae tatau ona fia maua e le USGS ma le NOAA e fuafua tatau i ai le taimi tonu e pa ai le Vailulu’u.

Ua tapena mea uma e oo i le malaga fa’apitoa a le Va’alele mo Ta’u Manua ma toe tulaueleele fo’i i Ofu ina ia faatautaia suesuega uma o moomia e le USGS ma le NOAA e tusa o Vailulu’u ma Nafanua. Ua faatulaga fo’i e la’uina atu ai meafaigaluega uma e moomia mo nei suesuega ma fa’amaumauga o Vailulu’u.

Ua fa’apea fo’i ona fa’agafua atu e le Malo lea fesoasoani i le mamalu o lo’o nofoia le Manu’atele, pe afai e i ai nisi ua fia malaga mai e fa’atumau i Tutuila nei se’ia fa’asaogalemu mai ai i se mea e ono tupu mulimuli mai le Vailulu’u, ua mafai ona malaga mai i lea malaga togipau a le Malo.

Ua fa’ailoa mai e le o tele ni nofoa o avanoa, ae ua fuafua nei avanoa patino mo tagata lava o Manu’a o lo’o alaala tumau i Olosega ma Ofu poo Ta’u Fitiuta ma Faleasao.

Afai e fia malaga mai ai nisi i lea malaga i le aso Gafua nei, e tatau ona fa’afeso’ta’i Tupuola i Ta’u poo Lameko i Ofu ma Olosega mo sou avanoa.

TOATELE MANANA’O E TAOFIA PEA LE EMS I LE NOFOAGA O I AI I FAGA’ALU

O lo ua fa’ailoa mai nei, ua mae’a se fonotaga a le afio’aga o Faga’alu, ma ua fa’ailoa lo latou fa’anaunauga, e fa’amalosia se latou mau, ina ia taofia pea le nofoaga o le EMS i le tulaga o i ai nei, ona o le latou fo’i naunauta’iga ia le ela lava le tulaga o galuega lavea’i a le EMS e feso’ota’i lelei ma le falema’i, ia vave fo’i ona fa’ata’alise atu latou faiva ia fa’asaoina le soifua o le mamalu lautele ua lamatia.

O nei fanoga sa va’aia lea i luga o finagalo fa’aalia i feso’ota’iga tau initeneti, ma ua fa’ailoa ai lagona o tagata i le facebook ina ua faalauiloa mai le tala, ua manatu le pulega o le falema’i e fa’atula’i ese le EMS i lona nofoaga ua leva ona i ai.

MAUA MAI VAEGA TUPE AMERIKA SAMOA MAI LE USDOT - $873,348.

O lo ua sauni fo’i le matagauega o Malaevaalele ma Uafu o le tatou Malo e maua mai le latou fa’atupega e $873,348. mai le matagaluega a le USDOT e fa’aleleia atili ai feoa’iga i le sami i va’a lelei mo feoa’iga ma ia tele nisi ala e mafai ai ona femalaga’iga tagata o le atunuu mo le tausaga fa’aletupe 2022.

O le aotelega lea mo Amerika Samoa sa maua mai le fa’asoaga o le $172..2 miliona  i lalo o le Bipartisan Infrastructure Law.

O Amerika Samoa e aofia ai i le to’a 35 setete ma le 3 Teritori o Amerilka sa aofia i lea tufatufaga o lea seleni tele.

“O lenei fa’atupega o le a fesoasoani malosi lea e fa’aleleia atili le tulaga o va’a folau mo le to’atele o e femalaga’i i le va o motu o Amerika Samoa.” O se saunoaga mautinoa lea a le tatou Faipule i le Konekeresi a le Malo tele, Uifa’atali Aumua Amata.

Ua fa’ailoa mai o le BIL e masani ona latou taua’aoina mai le $912miliona i so’o se setete ma Teritori i le vaitau e ta’i 5 tausaga ina ia mautinoa o lo’o taga’i setete ma teritori i fausaga ma faaleleia atili va’a folau i o latou ogasami, ma ua matauina fo’i ua fa’aluaina lea seleni talu mai le tausaga e 2015 FAST Act.

Ua fa’apena fo’i ona fa’alautele ma fa’aleleia atili ai o tatou fausaga ma galuega toe lipea o va’a feoa’i i le sami ma ua mafai ona galuea’ina ai fo’i pasi ,ma taavale fa’apitoa ua fa’aauupegaina mo feoa’iga o tagata lautele ua i ai a’afiaga fa’aptoa o le tino ma le mafaufau.

Ua mafai foi ona fa’aaogaina lea alagatupe e toe fa’aleleia ai nisi o galuega sa mua’i fa’atupe mai le fausaga e le Malo tele, poo le CIP ae maise i galuega e feso’ota’i lelei ma le fa’aleleia o feoa’iga i va’a ma atili ai ona fa’ateleina tagata e fia malaga i nei ituaiga o femalaga’iga.