TALA I VAIFANUA

Pago Pago - AMERIKA SAMOA

SAILIA NISI O SUI KOMITI FAUFAUTUA - NATIONAL MARINE SANCTUARY AMERIKA SAMOA

Ua fa’ailoa mai o le vaitau tonu fo’i lenei e toe sailia ai nisi e fa’atumuina nofoa mo le Komiti Faufautua a le Nationa Marine Sanctuary i Amerika Samoa.  E tatau ia i latou o le a talosaga mai ona fa’atumauina lona agaga e avea o ia ma sui o le mamalu lautele o le atunuu ma le Malo o Amerika Samoa.

Ia faapena fo’i ona agaga o ia e fa’amautu aiaiga uma o le Fa’asao o le Gataifale ua mae’a fa’amauina i le taimi nei i o tatou gataifale, ma avea ma faufautua ina ia fa’aleleia atili le pulega, va’ava’aiga malu ma le fa’afoega o nei fa’asao mo le lumana’i.

Ua talileleia e le Fa’asao ni talosaga e fa’aulu mai mo avanoa nei: fa’apitoa mo suesuega; Maulu; Turisi; Pisinisi/falegaosioloa; Sui o le Mamalu lautele Falelima i Sasa’e; Sui o le Mamalu Lautele Manu'atele; Sui o le Mamalu Lautele Aunu’u; Sui o le Mamalu Lautele Falelima i Sisifo; Fagotaga

O le Komiti Faufautua lenei e to’a 17 ona sui palota ae to’avalu o latou sui e le palota, ma e tautua mai o ni sui e volenitia ma e le maua se taui o latou galuega fa’atino, ae latou te suia le nisi o vaega ae maise lava o le mamalu lautele o le atunuu, e aotelega ai le teritori ma le Malo tele.

E tatau ona fa’aulu mai lau talosaga ia Aukuso 31, 2022 ma e tatau ona fa’ailo mai se fa’ailoga o lea talosaga na taua’aoina ia Aukuso 31, 2022, ina ia aloa’ia lau talosaga.

Ua mafai ona maua mai lau pepa talosaga e fa’atumu i le uepesite https://americansamoa.noaa.gov/council/recruitment/ poo le fa’afeso’ota’i mai o Tiara Drabble i le emeli  [email protected] mo ni fa’afesili.

6 MASINI AED MO LE FA’ASAOAINA O LE SOIFUA - FOA’I E LE BLUESKY 

Ina ia fa’amanatuina le atoaga o le 23 tausaga talu ona fa’atula’ia le auaunaga a le BlueSky i le tatou atunuu, sa latou foa’ia ai ni masini AED e 6, e ao ina fa’atutu i le tele o nofoaga e masani ona tumutumu i ai tagata o le atunuu. 

O lea ituaiga o masini, e aoga tele mo le toe fa’ate’ia mai o le fatu o se tasi ua oso le fatu ma matapogia atu ai, ma e oo lava ina le toe te’i mai. I le pusa ua taua’aoina e le Blue Sky ua aofia uma ai le masini ma mea uma e ao ina fa’aaogaina, ma e le tau moomia se tasi ua agava’a i lona fa’aaogaina, e na te fa’aaogaina, aua o lo ua i ai lava ma le fa’atonuga o mea e fai, fa’aleo mai fo’i lea fa’atinoga pe a moomia ona tautala nai lo le faitau i ai.

O le susuga le CEO o le BLueSky, Justin Tuiasosopo na taua’aoina nei masini i le vasega o e ua filifili e pulea nofoaga ua lautogia mo AED [Automatic External Defibrilator.]

O nofoaga nei: Malaeva’alele i Tafuna, Maota o le Malo i Utulei poo le EOB, o le Sports Complex i Tafuna poo le Stadium ma nofoaga e lua o le DYWA Matagaluega o Tina ma Talavou, i Pago Pago ma Tafuna.

O sui fo’i o nei matagaluega ma nofoaga o le malo sa auai ina ia taua’aoina i ai aloa’ia nei masini, ma le fa’aupuga, “Atonu e le moomia i taimi uma, peita’i o lo’o ua mae’a fa’atulagaina pe afai e oo i taimi e moomia vave ai ona toe fa’asaoina vave mai le tagata ua matapogia ona ua “pe fa’afuase’i le tata o le fatu” ma ua fa’ailogaina ua Stroke, poo le faaupuga Sudden Cardiac Attack [SCA].”

“Pe oo fa’afuase’i lea tulaga i se tasi, ua le toe tata le fatu, peita’i o nai isi minute o soso’o mai i le sui ua matapogia e mafai ona toe fa’ate’ia e le masini le tata o lona fatu ma toe soifua mai ai, a tuai lava ona fa’atino lea tulaga, ua maumau lava le soifua.” O nisi ia o fa’amatalaga taua sa fa’afofogaina i le taimi a’o taua’aoina fo’i nei masini.

Mai le Sports Complex a le Malo sa oo atu lava le susuga le Fa’atonu Asuega Bill Kalasa mo le taua’aoina o lenei masini aoga tele ae maise i le tagata o ta’alo malosi ae pe fa’afuase’ia ai le fatu i le malae ta’alo fo’i i Tafuna.

Mai le DYWA i ona nofoaga e lua sa oo atu ai le tamaitai o Monicalei Ve’ave’a. O le masini mo le Malaeva’alele i Tafuna ua taua’aoina lea i le susuga le Pule o le Malaeva’alele Tavita S. Fuimaono.

Mo le EOB poo le maota o Ofisa o le Malo i Utulei sa oo atu ai le Sui Faatonusili o le Matagaluega o le Pulega a le Malo poo le Administrative Services, le susuga Gago Fa’atafa mo lea fa’amoemoe lelei.

Mai ia i latou uma nei, na tula’i ai le afioga le Ali’ioaiga ia Asuega e fai ma latou sui e fa’afetaia le BlueSky ma le foa’i taua ina ia fa’asaoina se ola o tau maumau atu.

O ia lea sa ia fa’ailoa fo’i, “O si o’u to’alua o le tausima’i ma e masani lelei ma le fa’aaogaina o masini nei. O lona lea faiva ma ua fa’agae’etia le agaga aua sa oo i ai lou sui i lea fo’i a’afiaga i le tausaga 1999. Peita’i o le vave ona fa’atino o tiute uma o foma’i ma le lelei ona toe fa’aa’e mai o lo’u ola maloloina, o le tausiga lava o le tino e ala i mea’ai. Ia matua ave’esea mea lololo i a tatou taumafa, ona mafai lea ona maua le soifua maloloina lelei. O le fa’afetai BlueSky aua pe fa’aaoga le masini lea pe leai, ae ua taula lo tatou fa’amoemoe e fa’asao se soifua pe a alia’i mai taimi fita ona o gasegase tau le fatu.”

Ua ofoina mai fo’i e le BueSky e latou te fa’atula’ia le masini, pe afai o le a mae’a filifilia e vaega ua lautogia i ai nei masini aoga, le nofoaga tonu e fa’amau i ai.

O le isi masini ua fa’apipi’ia lea i le Laufou ma le Ofisa o le BlueSky i Iliili lava, lea sa faatautaia ai lea foa’i i le taeao o le aso Gafua.

Mai le tausaga ua mavae sa foa’ia ai e le BlueSky i le latou aso fa’amanatuina lenei le $15,000 e fesoasoani i le galuega na fa’atino a le Rotaract Club a le Rotary Club ina ia faia ai se paka tafafao i le Laufanua o le Community Swimming Pool i le Paka Liona i Tafuna. Ua tino mai fo’i lea foa’i ma ua matagofie ma aoga tele i le vasega o fanauiti i le atunuu. 

O lo ua fa’aauau pea lava le folauga a lenei Kamupani o Feso’ota’iga Fa’ainitenti ma Telefoni i le atunuu, ma ua fa’aauau fo’i ona latou foa’i e toe fa’ailoa mai ai lo latou agaga fa’afetai tele i le sapaia e le atunuu lautele o latou fefa’ataua’iga fa’apisinisi i Amerika Samoa nei.

25 FANAU MAUA SIKOLASIPI MAI LE MALO 

O le afiafi o le aso To’ona’i na te’a nei i Honolulu sa fa’atasia ai le vasega o fanau talavou ua mae’a autova’a ese atu mai le atunuu e fa’aauau latou a’oa’oga i nisi o Iunivesite ma Kolisi i fafo, o latou aiga ma sui mamalu o le Malo ina ia taua’aoina atu e le Malo latu sikolasipi ua saunia mo i latou, ae i ai lo latou mana’oga fa’apitoa.

“A mae’a o outou faiva i le sailiga o le atamai, ia outou toe fo’i mai e tautua le tatou Malo ma fa’aaoga i ai fua o a outou sailiga!” O se toe tima’i lea a le susuga le Sui Kovana Talauega Eleasalo Ale, lea sa fai ma sui o le Kovana ma le faigamalo i lea fa’atasiga sa fa’asalalaugaina e le KVZK-TV i le Facebook. 

O le aofai o le meaalofa taua’aoina mo fanau o se fesoasoani mai le latou malo, sa fa’afaileleiina i latou mo le 12 tausaga o a’oa’oga amata, e $1000. Ua fa’ailoa atu fo’i e Talauega, “E ititi ae ia outou manatua, i le olaga a’oa’oina, o le fa’asoasoa lava, ititi pe tele ae ua tau ane ai le fa’asoa a lou malo mo oe.”

O le vaega lona lua o lana tautalaga fa’apitoa i le fanau fa’asikolasipi, sa ia fa’ailoa atu ai, “Aua ne’i galo ia te oe lau aia tatau mo lau palota. E le o mafai e le to’atele o galulue ma la’u atu le tamaoaiga i totonu o le tatou teritori ona maua lea aia tatau e palota atu ai i nofoaga o aumau ai, se’i vagana outou le vasega o fanau o a’o’oga ma i latou o tautua i le vaega au. Fa’aaoga tatau lau aia tatau i le sailiga o tofi o lou malo, ia e lesitala e fai lau palota.”

O nisi o ta’ita’i sa va’aia na aofia fa’atasi i lea fa’amoemoe o le Failautusi o Mataupu Tau Samoa, Mauga Asuega, Senatoa Togiola Tulafono ma le faletua, ma le Fofoga Fetalai o le Maota o Sui, Savali Talavou Ale. 

O le lisi o fanau sa mauaina lea fa’amanuiaga mai le Malo o Amerika Samoa sa aofia ai: Albert Moe; Aliitaeao Amisone;  Alofamoni Galoia; Amara Ueligitone; Antonina Sisalelesi Senio; Ariyana Jaselle Giron; Charis Tafaovale; Fa’afouina Tasi; Kirah Evile; Kutrina Matautia; Leasuone Vaeoso; Lillian Mataele; Mau Salota Tanielu; Meki Tuivaifale-Sheck; Mele Luafatasaga; Myka Pale; Natasha Ripley; Noah Alefosio Bartley; Shave Niu; Tappdine Foluena; Titoa’ana Williams; Toni Sosefina Savelio; Tuamauga Atisano’e; Vailani Ulukita ma William Spitzenberg.