TALA I VAIFANUA

Pago Pago - AMERIKA SAMOA

FA’ATALANOA AVANOA OFISA VA’AI TAU ANCHORAGE ALASAKA & NATIONAL PARKS

O tima’iga lelei ma agatonu mo le fanau e tausailia e o latou mafaufau ni avanoa lelei e faigaluega ai, pe tausailia ai tomai fa’apitoa ina ia ausia latou galuega o fia tautua ai i le mae’a o a’oa’oga, sa fa’atinoina lea e tamaitai totoa o Carol  Ma’afa;a Bacqui mai le Anchirage Alasaka Weather Station ma Pa’i o le Ofisa o le National Parks o Amerika Samoa i le vaiaso ua te’a i le Night Hawk Restaurant i Iliili.

“O le taumafaiga lenei ua na’o se una’iga la’ititi ina ia mafai ona fa’ataua e fanau le fa’aaliga tele lea ua fa’atulaga mo le aso Lulu i le lotoa a le Ofisa Va’ai Tau i le teritori i Tafuna. O iina lea ua aotelega i ai Ofisa eseese uma o Tautua a le Malo tele i Amerika Samoa, ina ia fa’alauiloa ituaiga o avanoa faigaluega o lo’o aofia fa’atasi i totonu o nei ofisa ta’itasi, ma ala e mafai ai ona maua ai se avanoa faigaluega o le fanau talavou,” o se fa’apupulaga lea a le tamaitai va’ai tau Samoa, lea ua galue nei i le Alaska Aviation Weather Unit /Anchorage Volcanic Ash Advisory Center - i latou lea ua mataituina le tele o va’alele femalaga’i i le ea, ina ia le a’afia i le tauasuasu e fa’apogai mai i maugamu e ono lamatia ai le va’ai a Pailate ma leaga ai fo’i va’alele i lapisi o lo’o mapuna mai i nei tauasuasu mafiafia.

O le afuaga o sofa’ia fo’i o le tatou nei teritori i galu malolosi ma le maualuluga, o Alaska lea isi setete sa a’afia i mafui’e malolosi ma ua fa’ailoa mai fo’i o lo’o papa maugamu i Rusia, lea lava e soso’o ma Alaska ma o le isi lea vaega tele o le tauasuasu o nei maugamu, ua to’a ane i le itulagi o Alaska, ma e ao ina mataituina mo feoa’iga i le ea.

“O le 20+ tausaga o tautua ai i le va’ai tau, ua se’e teisi le galuega lea ua faia nei mai le mea sa masani ai, ae o se avanoa lelei fo’i e a’oa’o tatau ai mo lea ituaiga o tomai, ma ua fa’afetaia fo’i lea avanoa,” o se tala lea a le tamaitai o Ma’afala - Bacqui.

O le aotelega o matua ma fanau a’oga na auai sa tulata i le 20.

SUIA PULE SILI A LE STAR KIST SAMOA - TULA’I MAI MR. INOIA HA

Ua suia LE Pule Sili o le Star Kist Samoa ma ua tu’ua e Mr. Jason Kim le atunu’u ae tula’i mai le susuga Inoia Ha. Ua tolu tausaga o tauavea mai e Jason Kim lea tulaga o le pule sili i le Star Kist.

Ua tu’ua e Jason Kim le galuega, e ua iloga lona tula’i mai le foe mo le lala i Amerika Samoa nei, aua e tele lu’iga sa feagai ai ma ia i lona tula’i mai. Sa feagai o ia ma le fa’afitauli lava tau tumau o le aufaigaluega i se faitauga e mafai ai ona fa’aauau le gaosiga o le I’a mo le tuuapaina, ma ua sainia ai le feagaiga e sailia mai nisi o le aufaigaluega mai Samoa, ma latou tauavea fo’i se vaega tele o le fa’afaigaluegaina tumau o nei tagata mo le Kamupani.

O le isi tulaga fita na feagai ma ia a’o avea pea ma pule, o le maliliu fa’afuase’i ai lea o le to’afa o le aufaigaluega i se fa’alavelave le ma’alofia i lumafale o le Kamupani ina ua manava tiute mai le galuega.

Ua iloga fo’i lana ta’ita’iga ina ua saga lu’ia lona vaitau i le a’afia ai o le atunuu i le Covid-19, e le’i taofia le faigaluega pea o le aufaigaluega a le Star Kist a’o taofia nisi o le tele o galuega a le Malo ma isi kamupani uma, ona o le mana’omia e ao ina fa’atumu aua le totogia o tagata faigaluega ma latou oka e auina i fafo ina ia tumau lo latou mo’omia.

O se meaalofa na taua’aoina e le Star Kist mo Jason Kim ua avatu ai se Poster tele ua mae’a pu’ea ai lona ata ma le to’atele o tagata safui’a o lo ua lolofi atu ia te ia. Mai le agaga o le fa’afetai ona o lana tautua i taimi faigata e taumafai ai ona so’o le fau ma le fau i le galuega, ma le toe tau fa’atumuina o avanoa faigaluega i le Kamupani, ina ia fa’aauau pea lava ona tumati’e le Star Kist i le tulaga numera tasi i le apa i’a fa’atau atu i fafo.

FA’AILOGAINA 50 TAUSAGA USNMS - 10 TAUSAGA NAMS AMERIKA SAMOA

Ina ia fa’ailogaina le atoaga o le 50 tausaga talu ona fa’atula’ua Nationa Marine Sanctuaries a le Malo tele, fa’apea ma le 10 tausaga talu ona fa’atula’ia le National Marine Sanctuary i Amerika Samoa, ua tatala ai ma le fa’atauga o Fa’ailoga Tusi poo Stamps fa’apitoa o ata na pu’ea e le US Sanctuaries ma le National Marine Sanctuary i Amerika Samoa nei, poo le latou vaega a le NOAA lea e faauluulu i ai lea fo’i vaega o le auaunaga mai le gataifale.

O nei fa’ailoga tusi, ua mafai ona fa’atauina mai i le falemeli i so’o se latou lala lava i le Iunaite Setete o Amerika, ma ua oo lava i le tatou falemeli tele i Fagatogo nei.

O le agaga tonu ua fa’ato’a tatala ai le fa’atauga o nei fa’ailoga tusi fou a le NOAA ina ia fa’amanatuina ai le latou 50 tausaga talu ona fa’atautaia Ogasami fa’asao nei mo le Malo tele i so’o se ogasami ua mae’a fa’asao, ma ua fa’aalia ai le matagofie o sosia o lo’o aofia ai i nei ogasami.

O ata o le gataifale o Amerika Samoa i ona fa’asao ua mae’a fa’atulaga ua i ai le ata o le amu matagofie ma le faisua lea sa pu’eina e le tamaitai o Wendy Cover a’o alaala ai i Amerika Samoa. O le ata lea o le fa’ailoga tusi ua fa’alauiloa ai le matagofie o le ituaiga amu o lo’o maua i le fa’asao i Amerika Samoa, atoa ai ma ituaiga i’a o lo’o ofaga i ai, ma na pu’eina mai i le ogasami fa’asao o le Rose Island.

O nisi o fa’ailoga tusi nei, o ata sa tapu’eina e nisi o le aufaigaluega a le NOAA National Marine Sanctuary, ae o nisi fo’i o ata sa tapu’eina e nisi sa maimoaina nei fa’asao ma latou pu’eina ai ata matagofie ua mafai ona fa’amatala ai le lauolaola o le amu o Amerika Samoa ma ituaiga o i’a eseese ua ola ma ofaga i ai.

Afai o e fia maua nisi o nei faailoga tusi e mafai ona e talosaga i le Aufaigaluega o le Falemeli tele a le atunuu i Fagatogo mo le laupepa atoa o Stamps fou a le Nationa Marine Sanctuary e na’o le $9.60 lona tau aofai. O Aukuso 5, 2022 sa fa’ailoga ai le atoaga lea o le 50 tausaga o le NMS a le Malo tele, ao le 10 tasuaga lea o le NMS i Amerika Samoa nei ma tatala ai loa le fa’atauga o nei fa’ailoga tusi. Ua mafai foi ona e fa’atauina mai i luga o laina feso’ota’i mo fa’atauga a le Initeneti i le tuatusi usps.com/stamps.

O le fa’amoemoe, afai o le a fa’atauina ma fa’aaoga e le mamalu lautele i le Iunaite setete nei fa’ailgoa tusi, e fa’aosofia ai le agaga fiafia ma latou fia maimoaina fo’i o tatou gataifale ma sosia uma o aotelega i ai i le lumana’i.

TAUALOA VETERENI UMIA - “PURPLE HEART” MAI LE MILITERI:

O Aukuso 07, 2022 ua fa’atauaina ai i latou uma o fitafita totoa sa tautua i so’o se vaega o le Militeri a le Malo Tele, ma ua umia e i latou faailoga fa’apitoa o le “Purple Heart.”

O i latou nei sa a’afia o latou tino poo le mafaufau, poo le maliu ai fo’i i lana auaunaga i le taimi a’o tautua i latou pe tiute i so’o se vaega au a le Malo tele. O le fa’ailoga lea e taualoa ai lea fo’i auauanga sili sa latou fa’atino mo le latou malo ma le saogalemu o le mamalu lautele o tatou tagata o nonofo ma papa a’ao i so’o se vaega o le Malo tele o Amerika. Ia te outou o lo’o ua avea ma Vetereni ae o lo’o ua mae’a taua’aoina i ai lenei fa’ailoga taua, fa’afetai mo la outou tautua matavela ma le tautua toto sa outou fa’atino ao outou tiute ai i vaega au.”

I le tausaga e 1782, na taua’aoina muamua ai e le ta’ita’i’au George Washington le ulua’i fa’ailoga Purple Heart, lea sa mua’i fa’ailogaina o le Badge of Merit, i le vasega o fitafita ua iloga le latou auaunaga na fa’atino i le taimi o le vevesi i na vaitau. O le tala’aga lea o le Purple Heart, na afua mai i le vaitaimi o le ulua’i peresetene o le Malo o le Iunaite Setete o Amerika, e oo mai i lenei vaitau ma ua fa’ailoa ai se auaunaga sili ona taua ma tumati’e lona fa’atinoga i soo se vaipanoa o le atunuu atoa ma le lalolagi o lo’o tautua ai tatou vaega au.

“Ua alagatatau fo’i ona tatou manatua le tautua tuavae ma le tautua toto a tatou fitafita Samoa uma sa fitaituga i le tausiga o le saogalemu ma le filemu i so’o se mea sa vala’auina e tautua mai ai i le lalolagi.Ua afua mai le taua muamua se’ia oo mai i le taua lona lua o le lalolagi, soso’o mai ma le taua i VietNam ma le taua fo’i i Korea se’ia oo mai i le taua o le Tausia o le Filemu i le Faga Peresia ma Sasa’e Tutotonu, ia tatou fa’ataua ma toe manatunatu i le auaunaga sili sa latou fa’atinoa, ona o le agaga ia saogalemu i tatou uma ma soifua i le filemu i o tatou laufanua.”

“Ou fa’afetai ua avea a’u ma sui o le to’atele o tatou fitafita i Amerika Samoa ou te tautua atu ai mo i latou uma o fitafita tiute ma fitafita tuai i le Komiti o le Maota o le Konekeresi, o se tasi o sui totino o le Komiti Fa’afoe e vagaia alamanuia ma isi uma mataupu e agatonu mo fitafita tuai i le Iunaite Setete o Amerika. O se ala lea ua foa’ina mai e le Atua Soifua e maua ai so tatou ala i malo, ma e fa’aaogaina tatau avanoa uma e sailia ai nisi alamanuia mo fitafita tuai uma lava.”

“Fa’amalo le tautua, fa’afetai mo la outou tautua.” O se toe tima’i mai lea a le tamaitai faipule o Amerika Samoa i le vasega o fitafita tuai uma i Amerika Samoa ae maise i latou ua umia Purple Hearts, ona o tautua ua mae’a faia mo le vaega au.