TALA I VAIFANUA

Pago Pago - AMERIKA SAMOA

FA’ALAUILOA MATAGALUEGA SOIFUA MALOLOINA - PEPESI LE FLU

Ua fa’alauiloa e le Matagaluega o le Soifua Maloloina , ua pepesi le flu i le atunuu ma e tali tutusa ma le Covid-19 ona auga va’aia ia i latou ua maua ai.

O auga nei: Vave tele ona oo mai le fiva i le tagata o maua ai, tale tu’i, e a’ala le fa’a’i, e tafe le isu, tiga le tino, tiga le ulu, vaivai le tino i nisi taimi, ua oo lava ina pua’i nisi male manava tata, ma e ui la ina matele nei uiga i fanauiti, ae ua fa’asoloatoa ai ma tagata matutua i auga nei.

“O auga va’aia nei e mafai ona a’afia ai le tagata ua maua i le influenza lea mai le 3-7 aso, ae matele ina umi atu lava le taimi o tumau lava le tale. I nisi e to’atele ua i ai nisi a’afiaga eseese tau le soifua maloloina poo ma’i tumau, e mafai ona fa’apogaia ai e lea ituaiga o flu o latou gasegase o i ai ma atili ai ona mama’i, ma e i’u lava ina fa’aletonu ma maumau le ola pe afai e le vave va’aia le foma’i mo se toafitiga vave.” O fa’amatalaga lea ua mafai ona fa’alauiloa mai mo le silafia a le mamalu lautele  ina ia nofouta i ai ma aga’i mao mo talavai pe afai ua mautinoa o maua ai nei auga i se tasi i totonu o le aiga.

“O i latou ua taumafai atili ina ia malu puipuia mai lenei ituaiga o Flu ua aofia ai le fanauiti e lalo o le 5 tausaga le matutua, tagata o lo’o a’afia i ma’i tumau e fa’aletonu le manava ma ma’i fatu, tina ma’itaga, tagata e vaivai o latou tino e tete’e atu i fa’ama’i eseese, ma tagata ua sli atu le matutua i le 65 tausaga o le soifua.”

E vave tele le pepesi solo o lea ituaiga o flu pe afai e tumutumu ni tagata ae aofia ai ma se tasi o lo’o ua maua i le influenza lea. O tagata e faigaluega fa’atasi, o a’oga ma fanau o fa’atasitasi mo galuega ma a’oga, ma isi nofoaga faitele e pei o luga o pasi ma le fa’atasi fo’i i tapua’iga. Peita’i ua fautuaina pea lava, ia alofagia fa’aititia le pepesi o lenei fa’ama’i i le faia lea o lau talipupuni o ou fofoga e aofia fa’atasi ai le isu ma le gutu i taimi uma, ma ia nonofo pe tutu fa’avava i taimi uma.

O lo ua mafai fo’i ona pepesi lea ituaiga o Flu pe afai o le a le fa’amamaina ou a’ao ae e te papa’i atu i se isi. Ia alofagia ia le so’ona feso’ota’i i tatou i ala masani ai a’o le’i pesia i tatou i fa’amai nei e feavea’i i le tatou pai atu, fa’atalofa pe feasogi.

Ua lapata’ia ina ia pupuni ou fofoga ma le gutu i sau pepa solo pe afai e tele tale, ma afai ae mae’a fa’aaoga nei pepa solo ia tia’ia lelei i totonu o lapisi o lo’o tapunia lelei. Ia fafano lima i taimi uma e te va’aia ai fagu fafano lima o fa’atutu solo i ofisa ma nofoaga tumutumu o aga’i atu i ai.

Afai ua mautinoa ua amata e ma’i i le Flu lea, ua tatau loa ia te oe ona e fa’anofoesea mai le to’atele o lou aiga ina ia le pesia i latou i lou ma’i ai i le Flu. Ia fua lava lou fiva i taimi uma ma fa’amaumau ia taumafai loa ona inumia sau fuala’au e fa’ate’a ai le fiva, ma ia usita’ia fa’atonuga i taimi e tatau ona inumia ai nei fuala’au. Aua lava ne’i fa’aaogaina ituaiga fuala’au o le Asprin mo le fanau talavou ma fanau iti, ona e i ai isi fa’aletonu e alia’i mai lo latou soifua maloloina lelei pe afai e inumia e i latou asprin mo le fiva.

O isi ituaiga o fuala’au mo le fiva lea e fa’atau mai i faleoloa i so’o se afio’aga ua aoga lea mo le fa’aititia o le fiva ma togafitia ai lou Flu. Inumia e tusa o le fa’atonuga ma ia nofouta mo le fanau e ititi ane i le 4 tausaga le matutua ia va’aia lava le foma’i.

ATOAGA O LE 232 TAUSAGA O LE US COAST GUARD

Ua faalauiloa mai e le afioga le Faipule o Amerika Samoa i le Konekeresi, Uifa’atali Aumua Amata ana fa’amanuiaga fa’alauaitele i le USCoast Guard a le Malo Tele i lona Ofisa fa’alotoifale i Amerika Samoa fa’apea le Iunaite Setete atoa ona o le latou auaunaga matavela i le puipuiga o le tatou talafatai ma o tatou sone fagota ma le vasa loloa o loo gafatia ona latou puipuimalu.

O Aukuso 04, e atoa i ai le 232 tausaga talu ona fa’atula’ia lenei vaega tele o le Puipuigamalu o le talafatai ma le Gataifale ma sone fagota a le Iunaite Setete ma Teritori o Amerika i lona aotelega.

“Ou te fa’amanuia atu i le tou aso fanau US.S. Coast Guard aua e talu mai ona fa’atula’ia la outou vaega, ua outou mata’alia e fa’ataunuu o outou tiute uma faiva mo le 232 ai lenei o tausaga. Ua matauina e matua tele lo outou sao i le fa’asaogalemuina o gataifale pito i saute o Amerika lea e aofia ai se teritori la’ititi o Amerika Samoa, o se sootaga vavalalata ma outou ua malutia ai pea i matou mai le tele o mea e ono lamatia ai o matou talafatai, sone fagota ma le vasa loloa e au i ai la outou puipuigamalu.”

Ina ua maua le taimi ma le susuga le pule o le US Coast Guard Lt Col Quintana, sa ia fa’ailoa ai, “I le taimi nei ua malaga mai nisi o sui mamalu mai fafo, o alo o Amerika Samoa ina ia latou faia se sao matagofie i lenei tausaga mo le tautua a le US Coast Guard, ina ia mafai ona ulufale nisi e to’atele o fanau talavou a Amerika Samoa e tautua i le US Coast Guard.”

“Ua fa’atulaga le vaiaso fou o le a faia ai lea fa’amoemoe lelei i le atunuu ma ua fa’alauiloa atu i matua uma o fanau o a’oga i a’oga maualuluga, e afifio mai ma latou fanau e maimoa ma fa’afesili i ni mea e fia malamalama ai e tusa o tautua a le USCoast Guard e mafai ona faigaluega ai tou alo pe a mae’a ona pasia e i altou suega o el ASVAB ma i’u fo’i mai a’oga maualuluga,” o se isi lea toe fa’amatalaga aloa’ia a Quintana e tusa o lea fa’amoemoe.

O le galuega tele a le Ofisa fa’alotoifale o le US Coast Guard i le tatou nei malo, ua fa’asinotonu lea i le saogalemu a’ia’i o le talafatai o Amerika Samoa, o le saogalemu o feoa’iga i luga o le sami i le tatou gataifale, le saogalemu o fagotaga i le gataifale ma le tatou sone fagota, o le tausia lelei lea o tulafono ua mae’a fa’ataoto mo le fa’atinoga o latou tiute e tusa o le gataifale, feoa’iga i va’a o so’o se ituaiga, atoa ai ma fagotaga i le sone a le Iunaite Setete ma Amerika Samoa.”

“Pe afai e to’atele nisi o alo e fa’aopoopo mai i le tautuaina o le tatou gataifale ma ona sone fagota uma, o le a faigofie ona mataituina lava e suli o Amerika Samoa o latou lava tuaoi i le vasa ma isi malo tuaoi e aofia ai le usoga i Samoa, lea fo’i e se ona aiaiga o le sootaga o tatou sone fagota ona o le vavalalata o tatou atumotu.”

AUMALAGA AMERIKA SAMOA - USUFONO FONOTAGA VETERANS AFFAIRS UOSIGITONE DC:

O le aumalaga a le tatou malo o faufautua ma sui mamaiu mai le Ofisa o Tautua Eseese ma Penefiti e agava’a ai tatou sui Vetereni, ua auai nei i le latou fonotaga na amata mai i le aso Sa se’ia oo i le aso Lulu ona mae’a lea i le Laumua Washington DC.

O le au usufono lenei o lo malaga ai fa’atasi faufautua tofia ina ia latou mata’i ma matau nisi o polokalama e fa’aulufale mai e aoga mo Sui Vetereni ina ia le a’afia tele o latou mafaufau i mea na tutupu a’o tautua ma tiute i le vaitau o taua ma fevaevaea’iga, ae ia fa’asaga ane e fa’aaoga nisi o latou agava’a e tausailia ai latou tausiga lelei o le tino ma le mafaufau, ae maise e amatalia e foufou ai ona fa’atuina ni a latou pisinisi e faatautaia mo i latou ma latou aiga pele.

O i latou o malaga e aofia ai le susuga le foma’i Dr Jay Lincoln mai le Matagaluega o le Soifua Maloloina, Uti Robert Gebauer, Hollis Tuiolosega ai le Veterans Affairs, Jasher Blocker  ma Phil Paty mai le VA, ma Partick Reid mai le Ofisa o le tatou Kovana Sili.

O le avanoa sili na maua e le aumalaga, o le avanoa lea e fa’alauiloa ai le latou polokalama ua tumati’e nei i le tautuaina o Vetereni, ma ua iloga le aoga tele o lea polokalama mo Vetereni, ae ua lalamua ai Amerika Samoa mai setete uma e 50 ma ona teritori o le Iunaite Setete. 

Na tulai le susuga a Gebauer mo lea folasaga ma sa ia tapena lelei fo’i ina ia mautu le auina atu o le fe’au taua, ia fa’alautele atili lea polokalama aoga mo isi setete ma teritori o Amerika, ina ia le toe a’afia Vetereni i le fia pule i le soifua, pe a’afia i lagona ootia loloto o le mafaufau, e iloga ai ua leai sona fa’amoemoe mo se olaga fiafia fa’atasi ma o latou aiga o e pele ia i latou.

O le polokalama lea ua tautalagia e le folasaga a Amerika Samoa sa molita’i e Gebauer o le “Food Security” aua ua aoaoina Vetereni ina ia latou toto togala’au o fuala’au ‘aina mata e fa’aaogaina ai le suavai, fa’auia i ai fa’ato’aga o I’a fafaga i le vai mo le tele o niutieni e moomia mo le fa’aleleia o le olaola o nei togala’au, ma tau amata ai e le Vetereni ona fa’atautaia lana pisinisi e maua ai le isi tamaoaiga tausi o latou aiga.

O le polokalama lea ua mae’a fa’apupula e fa’aalu ai le 6 vaiaso o aoaoga e tatau lava ona auai le Vetereni, ia silafia lelei ona toto lana togala’au o fuala’au ‘aina mata, ma e aoaoina fo’i i le faia o latou fa’ato’aga e fa’aaoga ai le suavai poo le Hydroponics. O le polokalama ua fa’amaonia le matua aoga ma ua leai ni fa’aletonu o toe va’aia ai i le fiafia o sui Vetereni a Amerika Samoa i latou fa’atautaiga o nei fa’ato’aga ma fa’atau atu fua o fa’aeleeleaga i le tele o faleoloa i totonu o le teritori mo le tupe tausi o aiga.

Ua ese ai lava lea polokalama ua fa’atautaia i Amerika Samoa nei nai lo isi polokalama o lo’o fa’atautaia i isi teritori ma setete o Amerika.

O le fuafuaga fa’ataoto lea ua fa’ailoa mai e Gebauer, “O lo ua fuafua afai e toe taliu atu i fanua le au usufono lenei, e toe tatala le polokalama lea mo ni sui fou e fia fa’atautaia ia Setema 2022.”

A mae’a le fonotaga i le Laumua, o le a i ai isi a latou fonotaga e faia i Hawaii mo le isi vaiaso fou, ona taliu mai ai lea i fanua.