TALA I VAIFANUA

Pago Pago - AMERIKA SAMOA

TAPENA LE MALAEVA’ALELE I OFU - TOE TATALA IA IULAI 14, 2022:

O le aso Lua na te’a nei sa malaga ese atu ai le Manu’atele lll ma le aumalaga mulimuli a le Pulega o Malaeva’alele ma Uafu, ina ia tapena le Malaeva’alele i Ofu mo le tatalaina aloaia mo faigamalaga e toe fa’aauau ai talu mai ona tapunia mai i le fa’aiuga o le tausaga ua te’a 2021.

Ona o tulaga e le o sefe o le Malaeva’alele i lona malae sese’e ma ia toe fa’aopoopo nisi futu ina ia fa’aleleia atili, o lea sa toe tauofo ai le galuega ma sa manumalo ai le ofo a le Paramount Builders Construction mo le galuega lea.

I le amataga o le tausaga nei sa malaga mai ai i le va’alele o Ianuari 27 le sui e toe fa’atulaga sa’o le paluga o le sima e tatau mo le malaeva’alele ua mae’a nei i Ofu. Fa’ailoa mai e nisi o le aufaigaluega,  “Fa’afetai lava ua mae’a pasia lelei le galuega e le vasega o le auinisinia fa’apitoa mo Malaeva’alele. O se galuega e le’i faigofie, ae o le mea sili ia i matou le aufaigaluega ua  Aua sa toe suatia uma lava le fausaga tuai, ma le fa’amatalaga na fa’ao’o mai, ua sese le paluga o le sima, ona o le ituaiga sima mai Fiti sa fa’aaoga e le lelei lea mo le fausaga o le malae sese’e ai va’alele.”

“O lea ua mae’a, ua tino mai le galuega e ui ina e le’i mae’a ona faia ona teuteuga o autafa o le malae sese’e ai va’alele, ae ua mae’a lava le malae latou. Ua tatau fo’i ona fa’aaoga ina ia fa’aleleia atili feoa’iga a le mamalu lautele fa’apea ma fela’ua’iga o uta i va’alele.”

O lo’o talanoa mai le aufaigaluega i le tulaga o autafa tonu o le malae sese’e o lo’o ua mae’a tanumia i le oneone le palapala ina ia fa’aolaola ai le mutia. Ua tapena le Kamupani ina ia totoina le mutia ma galueaina lelei ina ia olaola lauusiusi poo le isi 4 masina ua atoatoa le va’aiga matagofie o lo’o fa’ataoto e mae’a lelei ai. I le soso’o ma lena vaega o le galuega i ona itu e lua, ua mae’a fa’asima atoa ai le auala mo ta’avale. Ua va’aia lava le fa’aaogaina tatau o lena alatele e feoa’iga fa’apea ma le vaega a le ARFF poo le Fire a le Malaeva’alele i Ofu.

O le aso Lulu na fa’aaoga tatau ina ia tapena ese uma ai le tele o mea uma e le matagofie ai le va’aiga lautele i le malae atoa ma le ofisa autu o le ARFF lea ua fa’atulaga e fa’atautaia mai ai le sauniga e tatala ai le Malaeva’alele i le aso ananafi.

Ua fa’ailoa mai, ona ua le mafai ona sese’e ni va’alele i le Malaeva’alele i Fitiuta ona o le louloua o le tau i le aso Lulu, o lea ua fa’atalia sa’o lava le sese’e atu o le va’alele i le aso Tofi e tatala ai le malaeva’alele ma fa’atino ai le sauniga mamalu i le Malaeva’alele i Ofu. O le malaga lea ua fa’asinotonu o le aumalaga a le afioga le Kovana ma le faigamalo mo lea fa’amoemoe.

E ese mai nei galuega i le Faleluasaga, ua i ai foi galuega sa tatau ona tatalaina i le Faleta’u. Peita’i ua fa’ailoa mai ua le fa’atinoa le tulaga i lenei vaitau o le Sisigafu’a a le Manu’atele. O se tasi o nei galuega o le fa’atautaiga lea o le polokalama “Dial-A-Ride” a le matagaluega o Galuega Lautele a le Malo. Ua fa’ailoa mai e nisi sa malaga fa’apitoa mai Tutuila mo lea polokalama, “O lo ua matou o mai e fa’aa’e le poloklama tautua lea i le Faleta’u. Ma e to’a4 le matou aufaigaluega lea tatou e malaga fa’atasi mai mo lea fa’amoemoe. E tasi le masina lea e matou te nonofo ai e fa’atino le galuega, ona fa’afaigaluega ai lea o nisi i le Faleta’u ae toe taliu atu i matou i Tutuila.”

O le tautua lea e tatau fo’i ona aoga i le tatou mamalu o matua matutua i le Manu’atele, ma o lo’o iloga fo’i, e le tofu ta’avale uma aiga ma e mo’omia ai ona fa’atino lea auaunaga mo tatou matua matutua ua agava’a i lea auaunaga.

Pe afai ae maea le fa’asologa o le polokalama lenei mo le tatalaina o le Malaeva’alele i Ofu, o le a malaga loa le Manu’atele lll i le Faleta’u mo le fa’atautaiga o le Sisigafu’a a le Manu’atele lea e faia lava i Ta’u. O le taimi lava e mae’a ai nei mea uma, ona fa’ato’a toe taliu atu lea o le MV Manu’atele lll i Tutuila i le aso Faraile lava.

SILIA 70% TUPE FA’ASOA 2023 FA’AAOGA MO TOTOGI O LE AUFAIGALUEGA MALO

O lo ua mautinoa lava ua aofia le siitaga o totogi o le aufaigaluega a le Malo i le tupe fa’asoa o lo ua fa’ailoa mai i le lipoti mae’ae’a a Kovana Lemanu PS Mauga lea ua mae’a ona fa’alauiloa aloa’ia i le tatalaina o le tauaofiaga lona 4 o le nofoaiga lona 37 a le Fono Faitulafono o Amerika Samoa ia Iulai 11, 2022.

O le aofai o le tupe fa’asoa ua fa’amauina e fa’aulu mo le iloga ma le pasiga a le Fono Faitulafono ua tula’i mai i le $963.4 miliona.

E le gata i lea ae ua aofia ai ma le fa’aopoopoga o le saoga a le Malo e totogia mo le litaea o tagata faigaluega uma lava a le Malo. Peita’i o le si’itaga o le saoga e totogia e le tagatafaigaluega e 1%, lea ua fuafua e amata totogia lea ia Oketopa 01, 2022, amataga o le tausaga fa’aletupe 2022-2023.

I le aotelega o le tupe fa’asoa o fa’ataoto mo le tausaga fa’aletupe fou, ua mae’a fo’i ona taua’aoina aloa’ia kopi mo le silafia a sui uma o le fono faitulatono.

Mo le Paketi Fa’asoa ua Fa’ataoto ma fuafua nei ua aofia ai mea nei i lona fa’aaogaina:

• $117.8 milliona  e maua i tupe maua fa’alotoifale,

• $341,7 milliona e maua mai tupe toina mai le Malo tele.

• $223.5 milliona e maua mai i Poloketi Fa’apitoa a le Malo po’o “Enterprises”; 

• $10.3 milliona e maua mai CIP tupe e toe fa’aleleia ai poloketi sa fa’atupe e le Malo tele.

Pe a aotelega mea uma e 47% o le tupe fa’asoa e maua mai alatupe aoina fa’alotoifale ae 51.1% e faatupe e le Malo tele. O le Fa’aaogaina lea o le Paketi Fa’asoa ua mae’a fuafuaina nei: $84.5 milliona poo le 71.7% e fa’aalu mo le totogia o tagata faigaluega a le malo; $17 Milliona pe o le 14.5%  e fa’aalu lea mo galuega fausia i le atunuu; $11.6 milliona or 9.9% mo isi uma galuega ma tautua a le Malo; $3.1 milliona or 2.9%  mo sapalai a le Malo; $891,500 or 0.8% mo faigamalaga a le Malo; $586,500 or 0.5% mo mea faigaluega eseese.

TOATOLU PASESE MV LADY NAOMI - PAGOTA TOE FA’AFO’I I SAMOA

I se lipoti a le TV1 Samoa mai Apia, o lo’o fa’ailoa ai o le malaga a le “MV Lady Naomi” na tu’ua le uafu mo va’a laiti i Fagatogo i le aso Tofi o le vaiaso ua te’a, e to’atolu lava le pasese na kilia e malaga ai mai Amerika Samoa mo Apia.

I se lipoti a le Komesina o Leoleo a Samoa, Auapa’au Logoitino Filipo, “O ali’i pagota nei mai Pago Pago na malaga mai, ona ua tipotia mai i latou, ia usita’ia ai le fa’ai’uga na tamau e le fa’amasinoga i Amerika Samoa e tatau ona fa’ataunuu, pe a oo ina mae’a tulia o latou fa’asalaga i le Toese i Tafuna.”

O le to’alua o le to’atolu  lenei ua tipotia, o sui sa fa’afalepuipuia e togisala i ni moliga tau le fa’ataumaoia fa’aleituaiga o i tamaitai, ae o le to’atasi e to’atolu i ai nei sui, o le fa’ao’olima matuia.”

Ua fa’ailoa e Auapa’au, “E ui lava ina o loo i ai le tulaga matuia ina ne’i a’afia nisi i nei ituaiga o pagota ua tipotia mai i le atunuu, ae ua leai se mea e mafai i le vaega ua fa’afo’ia mai, ona o tagatanuu o le tatou Malo.”

“O se vaega fo’i o le latou fa’asalaga ua mae’a tamau ai le fa’aiuga e tatau lava ona toe fa’afo’ia i lo latou malo pe a mae’a le taimi e fa’anofoia ai i latou nei i le to’ese i Tafuna,” o se tala lea a le Komesina o Leoleo.

O le to’alua lea ua mae’a fa’amauina o sui ua la’ua fa’amalosia tamaitai, ua fa’amau nei o la’ua igoa i le lisi o tagata Samoa solitulafono o lea ituaiga i le atunuu, ma e i ai lava mea o le a le mafai ona toe fa’afaigaluegaina ai ona o nei moliga ua fa’amaonia ma nofosala ai.