TALA I VAIFANUA

Pago Pago - AMERIKA SAMOA

AUAI SUI O FAIA’OGA AMERIKA SAMOA - KONEFERENISI TA’ITAI TALAVOU PASEFIKA

O le tamaitai faia’oga talavou o Mary Cheung-Fuk mai le A’oga Maualuga a Tafuna ua avea nei ma sui o Amerika Samoa e auai atu i le fonotaga a Ta’ita’i Talavou o le Pasefika 2022, lea e tauaofia i Hawaii.

O lo’o aofia fa’atasi atu ma ia i le to’a 41 o sui totino ua fa’atulaga e auai i lenei fonotaga mai Iulai 18 se’ia oo ia Iulai 21, 2022, ina ia fa’aleleia atili o latou tomai ma agava’a e avea ai ma ni ta’ita’i agava’a i le lumana’i, ma e tatau fo’i ona matua lelei o latou tomai e mafai ai ona feso’ota’i fa’ata’alise i ala o upega tafailagi ma isi uma ituaiga o feso’ota’iga e mafai ai ona fono i altou i so’o se taimi, ae le tau usuia ni fonotaga e ao lava ina auai atu i ai.

“O ala fa’aneionapo e tatau ai ona le toe femalaga’i tagata usufono, o se faiga lea e mafai ona fa’ataugofie atili ai feso’ota’iga  ma ia fa’amautinoa lava o auai mo fonotaga ma feso’ota’i i so’o se taimi e mo’omia ai le fesoasoania’i o malo ma o latou ta’ita’i i ala fa’ata’alise tafailagi.”

Ua aofia i nei ala o feso’ota’iga fa’ata’alise, o ala e mafai ai ona fa’atautaia a’oa’oga ma le fanau o tausailia tusipasi maualuluga, le fanau o fia fa’atino ni suesuega patino e tausailia ai o latou togi, O ala e fa’afo’ia ai fa’afitauli tau suiga eseese ua alia’i mai o le Tau ma le Tai. O nisi lava o mea ia vave maua fesoasoani pe a i ai le mana’omia i se isi atunuu o le Pasefika, e mafai ona vave ma taugofie le telefoni ma fa’amatuu atu se fesoasoani i ala fa’ata’alise o feso’ota’iga nei.

O le ituaiga o fonotaga lenei sa talimalo ai i tatou Amerika Samoa i le tausaga e 2013 peita’i o le talosaga e auai ma mea uma sa fa’atautaia mai e le Malo o Niu Sila.

Fa’ailoa e Cheung-Fuk, ua atoa le tolu vaiaso o fa’atautaia matou fonotaga feso’ota’i i tafa’ilagi ma ua tele fo’i ni a matou fa’asoa ua mae’a faia mai lea sui ma lea sui, ina ia mafai ona manino atili ta’itai ma sui o lea malo ma lea malo i eseesega ma ni mea e tutusa ai fo’i faigamalo a lea malo ma lea malo i le tatou atuvasa.

“Ua ou fiafia lava a’u ina ua mafai ona ou fa’amasani atu i lea ta’ita’i ma lea ta’ita’i o malo eseese i le Pasefika, ua mafai ona fefa’asoa’i e ala i upega tafailagi ma ua fa’atumuina fo’i le ato vailiili latou o le atamai ona ua maua lea fa’alautelega o le silafia.”

“O le oa sa’o lea o lo’o sailia patino e so’o se tasi e tausaili, ina ia silafia le eseesega ma fo’i e tutusa lelei ai faigamalo eseese i totonu o le tatou atuvasa. Ia malamalama fo’i i tatou i mea o feagai ai ma lea malo ma lea malo i a tatou faigamalo. O lea ua nofo sauni fo’i mo se mafutaga taua e fa’atunuuina i Hawaii i lenei fonotaga ma o le a sili atu ona fiafia e feso’ota’i aua ua tele fo’i mea ua malamalama ai sa le mautinoa tonu ona o feso’ota’iga lelei i ala tafa’ilagi a’o le’i mafuta i lenei fonotaga i Honolulu,” o se toe tala fiafia lea a Cheung-Fuk.

A’AFIAGA O FANAU & AUFAIGALUEGA I LE COVID-19  - TAPUNIA AI BGCAS

O le Kalapu a Tama ma Teine i Tafuna poo le “Boys & Girls Clubhouse of American Samoa ” BGCAS ua fa’alauiloa mai le tapunia i le vaiaso nei Iulai 11 se’ia oo ia Iulai 15 ma fa’asolo atu ai i le fa’ai’uga o le vaiaso, se’ia fa’ato’a toe tatala lava ia Iulai 18, 2022, poo le aso Gafua lea o le vaiaso fou.

Ua faia lea tulaga ona o le mataituina lava o le saogalemu a’ia’i o le soifua o le fanau talavou o lo’o auai i le polokalama ma o totino fo’i o le BGCAS i a latou polokalama fa’atautaia o lenei tu’uaga umi o a’oga. Ua fa’ailoa mai e to’alua nisi o fanau talavou sa taofia mai le polokalam i le vaiaso ua tuana’i ona ua fa’agasegasea, 

Peita’i o Iulai 9 loa ae fa’amaonia le po’ia o nisi o le aufaigaluega e to’alua i le Covid-19, ma ua tatau ai loa ona fa’amalosia ona tapunia le tatou Kalapu, ae se’i toe tatala pe a mautinoa ua toe maloloina uma le aufaigaluega.

O le a matua toe fufulu ia matua fa’amamaina atoatoa le nofoaga atoa o le tatou BGCAS i lenei vaitau ua tapunia ai. I le taimi fo’i lenei ua talosagaina matua uma o lo’o aofia latou alo i polokalama sa fa’atautaia a le BGCAS ina ia faia suega a le fanau pe le o afaina se tasi i le fa’ama’i, ona taofia lea o le pepa fa’amau o le su’ega sa faia ina ia mautinoa sa fa’atino lea faamoemoe mo fanau uma i le polokalama o le taumafanafana a le tatou Kalapu, pe a toe tatala.

Pe afai o le a fa’amaonia se tasi o le fanau ua maua i le Covid-19, fa’amolemole ia taofia lelei lou alo i le aiga ma usita’ia fa’atonuga uma e ao ina faia mo si au tama, ina nei sau pesia ai nisi o le fanau i le tatou Kalapu.

O le a fa’ato’a toe tatala aloa’ia le tatou Kalapu i le aso Gafua, Iulai 18, 2022, ae o Matua uma fa’amolemole e fa’autagia mai e tatau ona fa’afeso’ota’i mai le Ofisa a’o le’i fa’aoo maia fanau i lea taeao, ina ia silafia mea uma e aiaia ai le toe ulufale mai o lou alo i lea taeao.

ALAGATUPE E FA’ATAUTAIA A’OGA GAGANA SAMOA A LE INTERSECTIONS INC.

Ua fiafia lava le tatou Faipule i le Konekeresi, Uifa’atali Amata e fa’ailoa mai ua talia lelei le talosaga a le Intersections Inc. mo le latou fa’atupega e mafai ai ona fa’atautaia Le Aoaoina o le Gagana Samoa. O le Intersections Inc. o se fa’alapotopotoga tumaoti e le sailia ai ni tupe fa’asili ae ua galulue ina ia mafai ona maua avanoa e le fanau a le Atunuu e aoaoina lelei ai, ae maise lava mai nofoaga maotua o atunuu taitasi e le to’atele fo’i nisi o lo’o alaalata’i fa’atasi ai.

O lea tinoitupe ua fa’ailoa mai e $217,520. o lo ua fa’auia mai le US Health & human Services [HHS] ma o lo’o fa’atautaia mai e le Pulega o Tautua Eseese mo le fanauiti ma Aiga o nisi o tagatanuu moni o Amerika i ona Setete ma ona Teritori.

“Fa’afetai tele i le HHS ma le latou taliaina o lea talosaga, ma o se galuega fo’i o le a matua iloga ona aoga mo le toe aoaoina lelei o fanau i le gagana Samoa, o lo latou tofi lea na toina mai e le Atua fetalai.”

“Fa’afetai fo’i i le sogasoga o Maselui Faleosalafai Tipa ma le aufaigaluega mo le latou galuega maeaea sa latou talosagaina ai lenei fa’atupega aoga tele, e le na’o mo i latou i le taimi nei, ae mautinoa ai le lumanai o le Gagana Samoa i le atunuu,” o se tala lea a Uifa’atali.

O le a fa’aauau lenei polokalama taua i le a’otauina o le gagana ma tu ma agaifanua a Samoa e soo fa’atasi atu i lea Kosi e tauavea i le tatou Kolisi Tuufa’atasi lona soso’oga.

LE TOE MAFAI ONA FA’AAOGAINA MASINI TALATUPE A LE ANZ - AUKUSO 01

Ona o lea ua mae’a fa’agasolo atu gaoioiga uma e mafai ai ona tapunia aloaia tautua lautele a le Faletupe o le ANZ Amerika Samoa Bank i le tatou atunuu, o lea ua fa’alauiloa mai ai, a’o le’i taitai lava, o le a le toe mafai ona fa’aaogaina masini talatupe otometi a le Faletupe ANZ i so’o se nofoaga o I ai, e afua i le aso 01 Aukuso, 2022.

O le aso 30 Setema 2022 lea ua mae’a fa’atulagaina e tapunia aloa’ia ai lala ma tautua uma a le faletupe ANZ Amerika Samoa Bank i le tatou nei malo. Fa’ailoa e le tamaitai pule sili o le ANZ i Amerika Samoa, Tasi Scanlon, o le itula 6pm i le afiafi o Aukuso 01, 2022 o le a tapunia aloa’ia ai loa tautua nei e tolu. 

E aofia ai:  EFTPOS merchant terminals; ANZ ATM’s; ma e le toe fa’aaogaina ai fo’i ni latou pepa talatupe mo masini ma fefa’atauaiga lava i faleoloa ma isi nofoaga uma i soo se ituaiga o fefa’ataua’iga fo’i e faia ai; Ua mae’a lisia nei suiga uma o le tautua a le faletupe lea i le atunuu i lenei vaitau.

O Aukuso 31 2022 ua fa’atulaga e faamuta ai le toe faia o ni tupe uaea atu mai lala o le faletupe ANZ i Amerika Samoa.

Peita’i o lala uma e lua o le faletupe ANZ i Tafuna ma Fagatogo o le a tapunia i le itula e 3:00 i le afiafi ia Setema 30, 2022 ma le toe tatalaina ai e tautuaina Amerika Samoa.

O le aso lava lea e tasi e fa’amuta ai fo’i ona toe talosagaina mai se lisi o pisinisi sa fa’atino e lau faletupe mo au teuga’oa ma muta ai fo’i ma le toe fa’aaogaina o ni a latou taga e fa’ao’o atu ai tupe e teuina i le latou faletupe.

Fa’ailoa e Scanlon, “E fa’afetaia le mamalu lautele o le atunuu ona o le latou faipa’aga ma le tatou faletupe ANZ Amerika Sama Bank mai tausaga e tele. o lo’o i ai le lagona, atonu sa aoga i le mamalu lautele le tautua fo’i sa matou ofoina atu mo lo outou pa’ia lasi mo nei tausaga e tele.”