TALA I VAIFANUA

Pago Pago - AMERIKA SAMOA

LAGOMAU NIUATEA JR LAULU I LE SAMI - LE’ALA VAILOATAI

O le sauniga mamalu e lagomau ai le atali’i o Niuatea Jr. Laulu i le sami na leiloa atu ai lona tino sa fa’ataunuuina lava i le aoauli aso Faraile, Iulai 01, 2022, ina ua lafoa’i le pale i le nofoaga tonu lava na toe va’aia tasi ai lona tino ma toe mou atu loa mai le vaai.

Na matua va’aia le ootia o lagona o si aiga ali’i, ae maise le tina sa mafuta ma Niuatea Jr, le pele ia Gia Laulu. O le susuga Saunoa na avea ma Failauga o le Sauniga ma sa fa’apea fo’i ona saunoa i ai le susuga Toa o le ekalesia sa fa’atasi i ai le aiga a’o soifua le atali’i.

Peita’i o le fa’asologa o le Polokalama atoa mo le maliu o le atali’i sa pa’u tasi lea i le fofoga o Lei’a Sione Laulu na te faafoea le toe sauniga o le atali’i. Ina ua mae’a le sauniga i le fanua, sa fa’agasolo loa le mamalu o le aiga na poto ina ia latou lafoa’i le pale o fugala’au manogi i le Sami i Le’ala e fa’atofa ai ia Niuatea Jr.

O se mea e maofa ai, ona e savavali lava le aiga i luga o le papa mase’ese’e i Le’ala, o tagata ua masani ai i lea ogasami, oo lelei i le mea o fafati mai le galu ma taia ai. O iina fo’i na fa’atoa lafoa’i ai e le uso Niutea Junior lea sa fa’ato’a fa’au’u mai Leone High School i le tausaga nei, le pale e mavae ai ma lona uso matua.

O matua o Niuatea Jr o le susuga ia Aoniutea ma Muavae Laulu o Vailoatai e toaono le fanau i le ua maliu nei i le tai. Ua toa le 22 tausaga o le atali’i ua maliu nei. Fa’amaise le mana o le Atua i agaga o le aiga nofo fa’avauvau ona o le maliu ai o se tasi o le fanau.

FA’AMANUIAGA MAI TA’ITA’I O LE MALO - MANUIA LE ASO O LE FU’A A AMERIKA

Na vave fa’auia mai faamanuiaga a le tamaitai Faipule o Amerika Samoa i le Konekeresi a le Malo tele, Uifa’atali Aumua Amata i le mamalu lautele o le atunuu ma le malo o Amerika Samoa, i le ulua’i aso o Iulai, a’o loma le Posiulai, le aso na sisi a’e ai le fu’a i le sa’olotoga a le malo o le Iunaite Setete o Amerika poo Meleke, e pei ona lauiloa muamua ai i e tatou atunuu.

“Ia manuia le aso malolo ua fa’amau fa’ailoga o le aso na tuto’atasi ai le faigamalo a le Iunaite Setete o Amerik. Ia maua se aso fa’ailogaina ma le saogalemu i le tatou atunuu, ma e iloga fo’i o aso nei e fa’amanatuina ai e le toatele i le atunuu auaunaga a tama fanau a le atunuu ma o pelega o aiga ta’itasi o lo’o tautua i tafa o taua ma nofoaga o vevesi, ina ia fa’amautuina le saogalemu o Amerika atoa. O le a tele mea e fa’amanatuina ai lenei aso, e ala i mea fa’apapa felanulanua’i ma savali  po’o solo fa’aaloalo fa’apitoa i laumua eseese o le Iunaite Setete atoa. Ia mautu fo’i i o tatou loto ia sii a’e le fa’afetai ona o lenei malo ua avea ma tatou fa’amalumaluga, e tu mai fo’i i taimi e pagatia ai i tatou o teriori tau atia’e ina ia mafai ona tatou a’e manumalo nisi o fa’auilavea i le folauga a le tatou teritori nei.”

“Sii a’e le fa’afetai i el Atua ona o le auaunaga ua iloga a tatou fanau i le vaega au, ua taualoa ai lo tatou sao i le va ma le malo tele. Fa’afetai le tautua tuavae fa’afetai le tauata’i i faiva ua tofia ai, faamlo le tautua!”

Ua fa’apea fo’i ona fa’ailoa mai se lagona fa’afetai o le afioga le Kovana SIli Lemanu Peleti Mauga ma le faigamalo, “O Iulai 04, o le aso e fa’amantuina ai e i tatou uma le sisigafu’a a le Malo Tele o Amerika i ona setete ma teritori uma. O se aso e tatou toe taga’i ai i le tele ma le anoanoa’i o manuia ua tatou maua, a’o le saolotoga fo’i ua toina mo lo tatou malo ma o tatou tagatanuu.”

“Tatou fa’aaoga tatau lenei aso malolo e sii a’e ai le fa’afetai ma le fa’amanu i le Atua ona o se malo malosi ma le tele o ona alagamanuia o lo ua fa’amalumaluina o tatou tagata ma la tatou faigamalo fa’ateritori. Fa’afetai tele i le mamalu lautele o le atunuu ma le aufaigaluega a le malo i ona vaega eseese fa’apea ma Kamupani eseese ma latou tautua lautele lea o le a maua se aso e malolo ai ma fa’amanatu le aso o le Fu’a a Amerika. Ia manuia ma saogalemu le mamalu o le atunuu ma le fa’amamaluina o le aso o le Fu’a a Amerika.”

AMATA FA’ATAUINA MAI LE VAILIMA BEER  O LE APA PIA- SUIGA I LE VA’AIGA AE TASI LAVA LE TOFO!

Ua faailoa mai e le GHC Reids & Comapny, “O se suiga fou o le a si’itia i ai le va’aiga i le Vailima Beer mai Samoa, ua fa’ailoa mai o le a aumaia lea oloa i le apa, ae ua nofo sauni fo’i e fa’aoo le maketiina o le Vailima Beer i le malo o Fiti.

O le tausaga ua te’a na ulufale ai ma fa’amauina le fefa’ataua’iga o le Vailima Beer i Setete o Amerika, peita’i o le fagu lava sa utufia ai mo nei fefa’ataua’iga uma. 

O le suiga fou lea ua i ai nei ua fa’ailoa mai ai le Samoa Breweries Ltd. o le a siitia i Fiti mo le tuu apaina o le pia.

Fa’ailoa e Cherith Lober Soliai, ina ua fa’afesiligia le tulaga o le tapunia aloa’ia ai o le Samoa Breweries i Samoa, ae fa’ailoa ai, “o lo ua fa’aauau pea lava feutaga’iga i le va o le Samoa Breweries ma le Paradise Breweries i Fiti mo lea suiga tele.

“O le a fa’aauau pea lava ona maua mai le Vailima Beer i le fagu mai Samoa, ae le’i oo i le taimi e tapunia aloa’ia ai. Peita’i, o le suiga i le apa pia o se mana’oga tupito lava lea sa tulitulimatagau e le pulega a le GHC Reids mo se taimi umi lava, aua e faigofie atu le fa’aputuina ma le fela’ua’iga e i latou o oloa tuu’apa tau mea inu. Peita’i o lea la fa’ato’a toe atagia mai lea o lea fo’i talosaga, ae o le a faia mai Fiti lea suiga.” O se talanoa mai lea a Lober-Soliai e tusa o le suiga.

E tusa ai ma le fa’afesili i le tulaga o le tau, pe taugofie atu pe leai le apa e fa’atusa i le fagu, ae fa’ailoa mai e Lober-Soliai, “O le a ou le talanoa i lea tulaga, aua e le taitai tutusa le tau na ofoina mai e Samoa i le tau e ofoina mai e Fiti. O malo nei e lua o loo eseese fo’i a latou tau e fefaataua’i mai ai latou oloa i Amerika Samoa. Ona o le vailima lea o le a gaosia mai Fiti, o  Fiti fo’i ma a latou fefa’ataua’iga e fua i ai le tau mo le vailima i le lumana’i.”

I le taimi nei o lo’o sapalaia mai e le Samoa Breweries le Vailima Beer i fagu pia o le Vailima Extra Strong, Vailima Pure i fagu lapopo’a e 750ml ma le 355ml ma le Paelo Bia tetele.

O le isi fale gaosi pia i le atunuu o lo’o fa’afoea lea e le Auaiga o Aliki ma o lo’o latou gaosia mai le Taula Beer, lea ua fa’ailoa mai, ua avea ma pia e matele ina fa’atauina e tagata lautele i Samoa.