TALA I VAIFANUA

Pago Pago - AMERIKA SAMOA

SAUNIGA TAUA’AO ULUA’I SIKOLASIPI MO - MAIKA TAUTOFI ‘AOGA I LE ASCC

Na vala’aulia faapitoa lava e le Komiti Fa’afoe o le Maketi a Tonga i Tafuna susuga i le Faife’au Toeaina a le Ekalesia Tonga i Amerika Samoa ina ia latou tapena le sauniga fa’apitoa e fa’amanuia ai le taumafaiga a le talavou e tupuga mai matua Tonga, lea ua mauaina nei i le ulua’i sikolasipi na tapena e le Maketi a Tonga i Amerika Samoa nei.

O le aofai o le tinoitupe ua ofoina nei mo le ulua’i sikolasipi a Tonga e $4,000 ae ua i ai ma le meaalofa e taua’aoina fa’atasi ma lea tinoitupe o le Laptop e fa’aaoga e le tama a’oga ina ia manuia ma fa’afaigofie  ana taumafaiga ma suesuega uma i le Kolisi Tuufa’atasi o Amerika Samoa lea ua mautnoa e ulufale ai.

I lea sauniga sa matua iloga ona fa’aumiumi le sauniga ona o le agaga o ali’i fa’afeagaiga e to’alua na oo ane mo le sauniga mamalu. O la’ua foi fe’au fa’amalosi’au i le atali’i o Maika Tautofi, sa matua momoli atu ma la’ua fa’amanuiaga ina ia manuia le taumafaiga a le atali’i, ae o le a nofo tapua’i i latou ma matua ma aiga, ia sao ma uli le fa’amoemoe lelei.

Ina ua mae’a le sauniga sa tula’i loa le Ta’ita’ifono o le Komiti Fa’afoe lea e pulea le Maketi ma lona fa’atautaiga iinei, Taimalelagi Dr Claire Tuia-Poumele.

“O le talavou ua matou filifilia nei, ua iloga lona agava’a, e ausia uma e ia aiaiga o le Sikolsipi e pei na mana’omia ona aiaia ai mo se tasi e mauaina lea avanoa. O le talavou ia Maika Tautofi o se tasi e tolu gagana ua mafai ona tautala ai ma tusitusi ai fo’i, O le gagana Samoa, o le gagana Peretania ma le gagana Tonga,” o se tala lea a le tamaitai ta’ita’ifono.

“Ona o le fa’amoemoe ina ia mafai ona aoga lenei Maketi mo tagata Tonga o lo’o alaala i Amerika Samoa, ma ia fa’apea fo’i ona avea ma se avanoa e aoga atu ai i tagata faifa’ato’aga ma faipisinisi i Tonga, o lea ua taumafai ai lenei fo’i ala, ina ia si’itia vave ma fa’asinotonu le aoga o le Maketi ma sona tamaoaiga e maua mai ai, i alo o Tonga o lo’o taumafai i Kolisi ma Iunivesite i’inei.” 

“O le filifiliga o le sui na va’ava’aia toto’a i matou i ona togi ia ausia le togi maualuluga, ia le mafai ona usita’ia uma aiaiga na fa’atulaga. O le isi mea taua, ia mautinoa e tumau le loto ma le agaga o le sui i lona atunuu ua latou tapenaina le fa’ailoga sikolasipi. Na mae’a lelei le taimi na fa’atulaga mo ni talosaga e fia fa’aulu mai mo le avanoa, ma ua mae’a fo’i ona mautinoa lona ulufale i le Komiti Tu’ufa’atasi i le tausaga a’oga fou, lea fo’i ua fa’apea o le a tau’avea ai ana kosi fa’apisinisi e amata ai lana taumafaiga.”

Na tuuina se avanoa e saunoa fa’afetai ai Maika Tautofi i le Pulega o le Maketi, ma le komiti fa’afoe.

“Ou te fa’afetai i le avanoa ua ou maua, sa fa’aulu lava la’u talosaga ae tuuina atu i talosaga le mana’oga tupito ina ia fa’amanuiaina. Fa’afetai e siitia i le Atua aua e le lau maua avanoa fa’apenei. O le fa’afetai lona lua o le Malo na tupuga mai ai o’u matua, lea ua ou selesele i se taumafaiga ua outou tapena mo i matou o fanau ua ola a’e i Amerika Samoa, ma ia tumau o matou loto e taumafai se galuega lelei mo le tatou malo. Ia tapua’ia nei taumafaiga, tau ina mafutaina e le Atua ina ia manuia. E le mama ia te a’u lenei avanoa, sa manatu fo’i e maua lava ua maua, ae o lea ua pale, ua iloga e faigata le avanoa ua tuuina mai, E tatau ona ou toe fa’afo’i atu se taui lelei. O le taui sili e tatau ona mautu mai, o le taumafaiga ia au. Alofa ma tatalo mo a’u.”

Na tauta’ao aloaia lea e susuga i fa’afeagaiga tofia le siaki $4,000. i le susuga Maika Taotofi, ina ia amata totogia ai lana a’oga, ae o le Laptop ua fa’ato’a to’ai taunuu mai i le afiafi lava o le aso Tofi na te’a i le va’alele a le Hawaiian Air, sa malaga fa’apitoa mai ai se tasi mai Hawaii ma aumai i le pasese a le va’alele lea.

O le ‘aiga fiafia aua sa auai fo’i sui mamalu o le DOE, le sui fa’atonu o a’oa’oga maualuluga Dr. Dottie Aga - Tuisamatatele, le tamaitai PD o Aoga, Batta Leatuaevao ma le isi fo’i PD o a’oga Gingerlei Maga-Uili. O i latou na sa fai ma sui o le Matagaluega o a’oga latou te molimauina le avanoa matagofie ua maua e lea fanau e tupuga mai Tonga aua le fa’auaauina o ana a’oa’oga maualuluga i le ASCC.

Sa mua’i fa’ailoa e le ta’ita’ifono, “Sa manatu ina ia fa sikolasipi ta’i $1,000. e taua’aoina, peita’i ua na’o le pau lea o le sui ua fa’amanuiaina e ausia uma lava aiaiga o le Sikolasipi lea, ua mafua ai ona taua’aoina uma lava ia te ia le tinoitupe sa pasia mai e le Komiti o Turisi ma Pisinisi Fa’afoe a le Malo o Tonga e ao ina fa’aalu mo lea fa’amoemoe lelei.

155 FA’AIUASO LEONE HIGH - 3 SUI TOGISILIA TAUSAGA A’OGA

 I le sauniga mamalu o le fa’au’uga i le Laumua o le Liona i Leone, na ta’ita’ia ai le fa’apotopotoga atoa sa auai i le tatalo na siitia e le susuga le Taitaifono o le Fonotele a le EFKAS Rev. Elder Fa’aeteete Saifoloi ma ia fa’ailoa ai fo’i, o le fanau ua fa’au’uina nei, le anofale lea ua atoa le fa tausaga o fa’atonutonu ma a’oa’o i le Laumua, ma ua saunia i latou mo sailgia ole atamai lautele i le lumana’i.

O le auau fo’i lea o le upu fa’amalosi a le afioga le Kovana Sili Lemanu Peleti Mauga sa ia fa’amalosi atu ai i le vasga fa’ai’uaso. “O outou o le fanau o fua ia poo le anofale sa leva ona aotauina, puipuimalu ma tausia lelei e matua ma aiga, fa’apea ma le vasega o faia’oga ma le Laumua nei o le Liona. Ia avea outou ma anofale lelei, e fa’aatagia ai le tele o galuega lelei sa aoaoina ai outou ma tausia lelei ai outou. Ae afai fo’i ua alu alu ae fa’aletonu se taumafaiga, aua le muta ai iina lou fa’amoemoe, ae toe taumafai atili. O le olaga e tele mea e fetuleni mai e fa’auilavea i lou fa’amoemoe, ae aua lava ne’i muta ai lou fa’amoemoe, ia finau pea ma taumafai atili.”

Mai fa’amaumauga mautu a le vasega fa’aiuaso ua maua ane ai e togisilia le to’atolu o sui ma ua tolaulauina o i latou ia o Ario Fiatagata Hopkinson, Maryann tanuvasa ma Va’afuti Centennial Va’afuti.

O le ui o le vasega fa’ai’uaso na maua le tulaga lua o le tamaitai lea o Maricia Alexia Asulu Chanel. Ua lisia fo’i le isi to’a 6 o le fanau ua togimaualuluga i le vasega fa’ai’uaso ma ua lisia ai Raquel Ituau Fa’ataunuu, Liai Fa’amolemole, Roberthenry Lucas Koon Wai You, Tilongiana Afu Fa’amu, Liaina Sade Cassens,tereise Andra Samoa, Leili Falemai Lemi, Vaotupu Sataulagi Arwen Moaa’i ma Anthony Tausa’afia Talitiga Faiivae.

O isi fa’ailoga sa saunia e le PTA o le fa’ailoga mo le Taitai lelei ua maua lea e Maricia Alexia Asulu Chanel. O le fa’ailoga o le sui pito i amio lelei i le vasega fa’ai’uaso ua maua lea e le tamaitai o Maryann Rosa Tanuvasa.

O le sui ua mauaina le togisilia i le Suega a le SAT - Va’afuti Centennial Vaafuti. O le tulaga lua o le SAT na maua lea e le tamaitai o Ario Fiatagata Pulotu Hopkinsons.

Ole sui ua togisilia i le ACT ua maua lea e Va’afuti Centennial Vaafuti, Tulaga lua i le ACT ua maua lea e Ario Fiatagata Pulotu Hopkinson ma Maricia Alexia Chanel. O le togisilia i le ASVAB ua maua lea e Va’afuti Centennial Va’afuti.

O le fa’afetai mai le ali’i pule a’oga, lea ua atoa fo’i le fa tausaga o lo’o avea ma pule a’oga i le Laumua o le Liona, sa ia fa’afetaia ai le vasega fa’ai’uaso, aua o le vasega muamua lenei sa ulufale fa’atasi atu i latou i le Laumua, o i latou o fanau a’oga, a’o ia o le Pule Aoga.

“Ia outou o ma ia outou manuia i le alofa ma le agalelei o le Atua, aua ne’i galo ia te outou, o outou o anofale sa tapena atu i le tatou Laumua nei.” O sana toe tala fa’amavae lea i le vasega fa’aiuaso 2022.