TALA I VAIFANUA

Pago Pago - AMERIKA SAMOA

154 AU FA’AI’UASO A SAMOANA HIGH SCHOOL - VASEGA O LE 2022

O se tausaga ese lenei ona to’atele i latou le fanau ua ausia le 4.0 GPA mai le Laumua o le Malie. O le ala fo’i na sailia ai ma fa’atumau le 4.0 ua suia, masalo o se mea lea ua fa’atulaga mai fa’aonapo nei e tata’i i ai le silasila toto’a a le Matagaluega o A’oga, aua ua mautinoa ua amata ona iloa lelei e le fanau, fa’aaoga tekonolosi fa’aonapo nei, e tausailia ai le poto ma le atamai.

O le sauniga na fa’atautaia e pu’upu’u lava, e le’i toe iai le tufatufaga o fa’ailoga fa’apitoa i le polokalama fa’ataoto na fa’atautaia, peita’i ua na’o le saunoaga fa’apitoa lava mai le ta’ita’i o le Malo, Kovana Lemanu PS Mauga ma fa’aluiloa mai i latou ua togisilia ma le tulaga lua, tufatufa Tipiloma o le fanau a’oga atoa, fa’alauiloa fo’i sikolasipi a le Malo, ona mae’a loa lea o le fa’amoemoe.

Ona o lo’o i ai pea nisi o le atunuu o lo’o i ai le verusi o le Covid-19 i o latou tino, o lea ua fa’aauau ai pea ona tima’ia le atunuu i so’o se fa’atasiga lava ina ia fa’apu’upu’uina le polokalama fa’aaoga pupuni fofoga ma ia nonofo fa’avava.

I le saunoaga fa’ala’eia’u, fa’amalosi’au ma tima’ia fo’i le fanau ua fa’ai’uaso ina ia savavali ma le mautinoa o lo’o fa’atasi le Atua ma i latou i soo se latou taumafaiga, sa ia toe fesiligia lava i latou,”O ai o sili lona fiafia i lenei taimi? Ia e manatua lou Atua i lau fa’afetai muamua, manatua ou matua, ou matua faaleagaga ma le tapuaiga mau a lou aiga atoa a’o e savalia mai le 4 tausaga o lau toe tapenaga fa’atalavou puipuimalu e ou matua ma lou aiga. Aua o lea o le a savali na’o o oe ma e te mautinoa, e mo’omia le Atua i taimi uma o lau taumafaiga fa’atalavou ua matua.”

“O le aga’i i luma e mamafa, tu lava oe mo oe. O au filifiliga ma au fa’ai’uga o le a e faia na’o oe. Leai se toe fafagu ma se toe tima’i atu a matua ma le latou sapaia o lou fa’amoemoe i taimi uma, O le a e mana’omia le Atua e fai ma ou fesoasoani sili ma lona agaga e fa’amalosi’au ia te oe i taimi e fita ai le faigamalaga ona o mea e fa’auilavea i lau taumafaiga. Ia e tausisi ma taula lau va’ai i lou amataga mai. Le fa’amoemoe sa tuu i ou luga, ina ia ausia le sini o lau taumafaiga. Ia maua manuia o le Atua!”

O i latou e to’a 14 ua ausia togisilia i le vasega ua fa’amauina le latou taumafaiga i a latou GPA 4.0 ua aofia ai: Aleynah Florence Grey; Ann Mariel  Villanueva, Anthony Salave’a, Audrey Rose Seva’aetasi, Christalinn Ilimaleota; Eciladen Jade Ulu, Fa’apa’ia Drusilla Vili, Ferila Gabrina Vele; Luana Le’iato; Mary Malae Misilei David; Prodieus Quinn Lutu-Fuga; Sufi Elizabeth Fa’alogo; Timena Hanna Aneseli ma Trajan Alexander Rarotonga.

O le tamaitai ua tulaga lua, e le o iinei, ua auai atu o ia i fafo e amatalia ana sailiga o le atamai ua manatu e faaauau i le lumana’i o ana sailiga. O ia lea o Daniella Fa’amanu  Pela Fagota. Na auai nai ona matua e talia ona fa’aeaga i le sauniga o le fa’au’uga mo le vasega fa’aiuaso.

O isi fa’ailoga taua sa tauaaoina ma saunia e le PTA mo le fanau a’oga ua agava’a ai, o le fa’ailoga lea o le Amio lelei i le vasega fa’ai’uaso na maua lea e Mary Malae Misilei David.

O le fa’ailogao le  togisilia i le SAT na maua lea e le tamaitai o Audrey-Rose Maluomalo Sevaaetasi 1,290. O ia foi lea na mauaina le fa’ailoga o le togisilia i le ACT e 28. 

O le togisilia i le ASVAB na maua lea e Prodieus Quinn Tanumaleu Lutu-Fuga e 71.

O le tamaitai ua mauaina le fa’ailoga o le tamaitai ta’alo malosi ma le tausaafia i le vasega fa’aiuaso na maua lea e Hemione Olioli Simanu. O le Ali’i sili ona ta’alo malosi ma le tausaafia i le vasega fa’aiuaso ua mauaina lea e AJJacob Tufuga.

O le tamaitai ta’alo lelei i le vasega fa’aiuaso 2022 ua maua lea e Anaya Salilioenaileata Kimberly Kapesi ma le ali’i ta’alo lelei o le vasega fa’ai’uaso ua maua lea e Ietitaia Apisaloma Lale Ga’opo’a.

Fa’ailoga na saunia e le Rotary mo le vasega fa’aiuaso a Samoana ua maua lea e Suli Elizabeth Fa’alogo.

Ua tofufia fo’i le vasega atoa ua fa’au’uina ma le tusi pasi ua tapena e le tatou Faipule i le Konekeresi e fa’amau ai a latou taumafaiga ua au ma ua fa’ai’uina ma le manuia i lenei tausaga.

O le faia’oga filifilia i lenei tausaga o le susuga Fritz Elmer Mageo. E toa sefulu le fa’anau fa’ai’uaso ua mafai ona maua a latou fa’ailoga sikolasipi mai le Malo o Amerika Samoa lea sa tutulai le susuga le Taitaifono, le afioga Senatoa Faiivae Alexander Godinet e tolaulauina.

FAITAUGA VERUSI COVID-19 - VAIASO IUNI 6 E OO IA IUNI 12

I le fa’ai’uga o galuega ia Iuni 12, 2022, ua faamauina mai ai le aoetelega o e ua a’afia i le verusi o le Covid-19 ua oo i le 6,281 i latou, ae o lo’o ua tumau pea e na maliliu ai i le to’a 31.

O fa’amaumauga fo’i nei ua mae’a fa’alauiloa i le fonotaga a le Komiti Fa’afoe o le Covid-19 a le atunuu i le latou fonotaga na usuia i le amataga o lenei vaiaso.

Ua fa’amautu mai fo’i o lo ua fa’amauina ma fa’aalia le faitauga lenei i vaiaso ta’itasi  ma o le a fa’alauiloa fo’i nei fa’amaumauga fa’alevaiaso mo le silafia e le atunuu lautele.

I le taimi nei ua mama uma le to’atele o i latou sa maua i le Covid-19 se’ia vagana ai le to’a 107 o i latou o lo’o totoe mai. O se fa’amaumauga lea ua mafai ona tuuina mai ina ua mae’a faia suega o le Covid -19 i le to’a 3,114 tagata ma na maua ane e na’o le 73 i latou ua fa’amaonia o i ai le verusi, mai suega na fa’atautaia mai le vaiaso atoa o Iuni 6 se’ia oo ia Iuni 12, 2022.

O le lipoti mai le Manu’atele ma le fa’agasologa o togafitiga ma le faitauga fo’i o e ua lutia i le Covid ua fa’amau mai ai le oo o le faitauga lea i le 80 sui ua mae’a aafia.

O le aofai o sui ua mae’a faia tui puipuia i totonu o Amerika Samoa ua fa’amauina mai ai le 84.8% ma le 89% o i latou ua mae’a faia tui ta’itasi i le taimi nei o tui puipuia e lua e tatau ona faia.

Eto’alima i latou na malaga mai Hawaii na mafai ona fa’amaonia a latou suega Covid-19 ina ua taunuu mai i le Malaeva’alele i Tafuna i le malaga e to’a 238 i latou na malaga mai ai i le aso Tofi ua te’a nei.

AGIAGIA TAGAVAI AMERIKA SAMOA FALEMATA’AGA SMITHSONIAN

O lenei vaitau ua tatou fa’atasi ma le tatou Faipule i le Konekeresi Uifa’atali Aumua Amata, ae ua sisi a’e le Fu’a a Amerika Samoa i le Falemata’aga tele o le Smithsonian i le Laumua Washington DC, o se tasi o ana pili na fa’aulu ma latou mafuli aspaia fa’atasi ma isi sui Faipule i le Konekeresi mai Teritori ma setete o Hawaii, ina ia mafai ona tino mai lea fa’aeaga.

O lo ua fai le afioga le Loia Sili o le Malo, Fainuulelei Falefatu Alailima Utu e fai ma sui o le tatou Kovana Sili Lemanu PS Mauga ina ia auai e saunoa faapitoa i lea sauniga ua fa’aopoopo atu ai ma tagavai mai Teritori uma e sisi a’e i lumafale o lea Fale Mata’aga tele i le Laumua o Amerika.

Ua mae’a ona fa’atulaga ma sisi a’e fu’a a Setete e 50 o le Iunaite Setete i lumafale o lea Falemata’aga, peita’i sa le aofia ai le Fu’a a Amerika Samoa, Guam, NMI  ma le US Virgin Islands. O lea la ua atoa tino o le tama, ua aofia fo’i le tatou malo i lea fa’aeaga, ona taumafaiga ma le una’ia malosi o faia e le tatou faipule i le Laumua.

Saunoa fo’i Uifa’atali, le aso e fa’ataua ai le Fu’a a le Iunaite Setete o Amerika, Iuni 14, ua fa’atasi atu ai le tatou Loia Sili ina ia auai i le sauniga mamalu e saunoa fa’apitoa fo’i e tusa ai o le fa’aeaga ua tatou i ai. E faia lea sauniga i totonu o le falemata’aga, ona siitia lea i fafo a’o sisiina a’e tagavai a Teritori e fa’aopoopo i fu’a a setete e lima sefulu ma Puerto Rico ua mae’a fa’atulaga ai. E faia fo’i le savali ma le tutu fa’aaloalo  e le vasega o leoleo a le Falemata’aga.”

Na mua’i sainia e Uifa’atali faatasi ma isi sui uma mai isi teritori o Amerika ina ia aofia ai ma fu’a a teritori  lea faaea pe a oo ina toe fa’aopoopo atu nisi fu’a i lea tulaga. Sa talileleia lea tusi ma ua afua ai manu o lenei aso fou.

“O se fiafiaga i le loto pe a va’aia ua tino mai nisi o mea e tatau ona faia mo le atunuu o lo’o avea ma o’u ala i malo. O le aofia ai o le tatou tagavai i le fa’asologa o Fu’a e sisi a’e i le Laumua, o se fa’amanatu lea o le tatou tautua ma lo tatou sao i le faigamalo a le Iunaite Setete o Amerika, ma o le a va’aia ma maimoaina e le faitau miliona o tagata tafafao atu i le Laumua o le Malo tele i Washington DC. O le fa’afetai sili ona ua mafai ona oo atu le afioga le Loia Sili o le tatou Malo e auai ma saunoa fa’apitoa ai i lea fa’atasiga tele ma le taua. O ia lea ua fai ma sui o ta’ita’i o le malo faapea i tatou uma i lea fo’i fa’atasiga taua ma le tele.”