TALA I VAIFANUA

Pago Pago - AMERIKA SAMOA

8 FANAU FA’AI’UASO MAI LE LAUMUA O LE SEGAULA - MANU’ATELE:

O le aso Faraile na te’a sa fa’atasi atu ai le afioga le Kovana Sili Lemanu P.S.Mauga ma le faletua Ella Mauga fa’apea le vasega o fa’atonu sili o matagaluega eseese, i le Manu’atele, mo le sauniga o le fa’au’uga o le vasega fa’ai’uaso i le Laumua o le Segaula, ma sa amatalia lea i le itula e 9:00 i le taeao lava.

O le fa’atulagaga sa i ai ma ua fa’amalosia fo’i e na’o le to’atolu lava sui mai le aiga o le alii/tamaitai fa’au’u, e mafai ona auai i le sauniga mamalu. O le a fa’avava foi nofoaga ma ua le mafai ai ona to’atele nisi e auai i le fa’amoemoe o le vasega fa’ai’uaso o lenei tausaga.

E tulaueleele le va’alele sa malaga atu ai le Sui o le Konekeresi, ua alu le solo a ta’avale a le au faau’u, o se taimi muamua lea ua faia ai fa’apea se fa’au’uga ona o le lutia fo’i o le Manu’atele i le Covid-19 i lenei tausaga. 

Na va’aia le teuteuina lelei ma ua fa’aaogaina fo’i ta’avale e tutula’i mai ai sui faau’u a le aiga latou ma fa’ata’amilo mai Ta’u seia oo i Falesao ma toe taamilo mai i Fitiuta i le Matasaua, lea na avea loa ma nofoaga e faia ai latou pu’ega ata.

Mai le Polokalama na taulimaina, e na’o le tasi lava le saunoaga fa’apitoa na fa’atulaga mai ai, o le saunoaga mamalu lea a le afioga le Kovana Sili mo le Vasega fa’ai’uaso 2022.

Sa i ai fo’i le Upu fa’amalosi na fofogaina e le ta’ita’i o le sauniga Rev. Elder Iosefa Autele i le taimi na ia ta’ita’ia ai le sauniga mamalu o le fa’au’uga o le fanau.

O le tama’ita’i Pule A’oga i le Laumua o le Segaula sa fai ma fofoga o le polokalama fa’asolo o le fa’au’uga i lea taeao fesilafa’i ma ta’ita’i o le Malo, le susuga Fa’ato’ese Tauanuu.  O ia foi sa tulai e faamaonia le vasega faauu e to’avalu, o lenei tausaga.

Ina ua mae’a le saunoaga mamalu a Kovana Lemanu Mauga sa fa’alauiloa mai loa le tulaga lua o le vasega fa’ai’uaso - lea sa mauaina e le tamaitai o Sekolasitika D. Filimigo. 

O le tamaitai ua avea le tausaga i le tulaga togisilia ua tula’i mai ai le tamaitai o Allyson L. Liusamoa. O ia lea sa ia ausia fo’i le togisilia i le suega SAT i le vasega atoa, toe ua na’o ia fo’i o lo’o maua le sikolasipi mai le Malo e fa’aauau ai ana a’oa’oga.

O fa’ailoga na tapena e le Rotary Club ua maua lea e Apuauro Mauga ma le fa’ailoga o le tamaititi amio lelei sa mauaina lea e D’Angelo Siimalevai. I le sauniga atoa sa usuina lava e le vasega fa’ai’uaso pese ma vi’iga o le latou fa’au’uga ma sa matagofie fo’i lona fa’ataunuuina o le latou fa’amoemoe i lenei tausaga.

O le ulua’i fa’au’uga lenei ua alu ai se solo a taavale teuteuina a le au faai’uaso ma ua avea o se mea fiafia lea i matua ma aiga. E lua fo’i sui fa’ai’uaso sa la’ua ta’imua mai e tietie mai i a la’ua pasika.

E to’aono le fanau e fa’au’u ma togi maualuluga i lenei tausaga i a latou mataupu sa tau’avea mai a’oga maualuluga ma ua faamauina ai suafa o: Allyson L. Liusamoa; D’Angelo S. Siimalevai; Lawrence Fautua; Price Charles S. Faleagafulu; Sekolasitika D. Filimigo ma Sooupu S. Tuialu’ulu’u.

O le tamaitai peresetene fo’i sa fa’afetaia lana tautua i lenei tausaga i le vasega fa’ai’uaso o PrinceCharles Faleagafulu ma lana soatau o Apuauro Mauga.

Na toe fa’ai’u fo’i le sauniga mamalu i le tatalo e le susuga le Faife’au Toeaina Iosefa Autele ma mae’a ai le sauniga ae saunia le afioga le Kovana Sili, lona faletua ma le vasega o Faatonu uma sa fono i le Manu’atele e toe taliu mai i fanua i le ta o le 10:30 i le taeao lava o le aso Faraile.

O le to’avalu fa’au’u ua aofia ai:Allyson L. Liusamoa; Apuauro R. Mauga; D’Angelo S. Siimalevai; Lawrence Fautua

LEAI SE POLOKA A LEOLEO MO FA’AU’UGA - AE MALOSI LE PUIPUIGAMALU I TAIMI UMA I ALATELE:

O lo ua fa’ailoa mai e le ta’ita’i o le Matagaluega o Leoleo a le Malo, e le o fuafua e fa’atulaga se Poloka a leoleo e pei ona masani ai i taimi o fa’au’uga o le fanau a’oga. Peita’i, ia le avea lea ma tulaga e fa’atamala ai le ave ta’avale mai le tausia lelei o tulafono uma tau feoa’iga saogalemu i luga o alatele o le Malo. E mautinoa lava o lo’o mataala leoleo i lo latou tiute fai, ina ia matauina le tausia lelei e ave taavale uma o tulafono e fa’afoe ai ta’avale ma feoa’iga saogalemu i luga o alatele. 

Mai le fa’amau o le fusipa’u i nofoa o fanau e nonofo lelei ai i totonu o ta’avale seia oo i le mautinoa o faia pupuni fofoga o ave ta’avale lau pasese ma ala e le tatau ona e tipia ai le isi ta’avale atoa ai ma le tausia o tulafono o le saoasaoa faatulaga, alofagia ia tausisia uma.

O tausaga ua mavae sa matua mafuli lava le matagaluega e faia poloka i alatele ina ia sailia ai le to’atele o e ua fa’afoea ta’avale mo feoa’iga ae o lo ua faasua’ava ma ua fa’ateleina fo’i le fanau ua tagofia le ava malosi ma le pia, ae le’i oo i tausaga ua fa’atagaina ai le inu ava malosi ma le pia.

Ua fa’amalosia nei tulafono o le fa’amau o fusipa’u o nofoa  ta’avale mo le saogalemu i feoa’iga, peita’i o lo ua va’aia ai lava ma isi uma tulafono o le feoa’i saogalemu o le atunuu i taavale.

Ua fa’atautaia galuega a leoleo i a latou sifi e lua e ta’i 23 itula e faigaluega ai i aso ta’itasi, ma sa amata mai lava le ituaiga sifi lena i le taimi na mua’i fa’amauina ai le ulua’i tagata ua a’afia i le Covid-19 i le atunuu e oo mai i lenei vaitau o fa’au’uga.

Ua fa’ailoa mai e Letuli, le sui Komesina o le tatou malo, “O le taimi nei ua fa’aauau ai pea matou galuega e le o mailoa se taimi o le a toe fo’i ai matou tiute i le tolu sifi e ta’i 8 itula o le sifi e tasi i le aso.”

Ua fa’ailoa mai fo’i e Letuli, “O le taimi na sofa’i ai le atunuu e le Covid-19, na to’atele leoleo sa maua ai i le fa’ama’i, ua iloga fo’i le faigata o le taumafaiga e leoleo ma malupuipuia le atunuu. E tele i latou na fa’alogogatata i le fa’amalosiga o le taimi e tapunia ai faleoloa i le po. O lea le tulafono sa matele ina solituina e le lautele. E maua fo’i nisi o feoa’i lava ae ua ta le taimi e le tatau ai ona toe feoa’i solo.”

FAAMAUTU MAI E SUESUEGA - MAMA & LELEI LE SUASAMI I FAGATELE BAY:

Ua fa’alauiloa mai e le suesuega ua mae’a lelei ona fa’atautaia e le NOAA, National Centers for Coastal Ocean Science, i le vaiaso na te’a atu nei, “O lo’o matua mama lava le suasami o Fagatele i le taimi nei.

Ole faiga o lenei suesuega na fa’atauaia e lea vaega o le NOAA, ua fa’ailoa mai e 32 elemeni patino na sailia ai le suasami o Fagatele pe o fa’ateleina ai pe leai. A e ina ua maua ai fa’amaumauga o suesuega nei, ua fa’ailoa mai e le o taitai lava le pasene o nei elemeni, i lona tele e mafai ai ona fa’amauina ua lamatia le soifua laulelei o mea ola uma i lea vaega o le ogasami fa’asao o Fagatele Bay.

O lona uiga o le pasene o nei tosini ua le a’afia ai le ola o meaola uma i le sami, fa’apea fo’i ma le soifua o tagata lautele pe afai e ‘aia e ia se i’a po’o tagata fo’i e taisamia ni i’a ma meaola uma o i lea ogasami e lele mo le fofoga taumafa o le atunuu i mataiai uma lava o lo’o maua mai i le Fagatele Bay.

E se mai le elemeni o le Nickle, o le tele lava o isi uma elemeni e o’ona mo le soifua o tagata ma meaola,ua matua ititi lava pasene e le afaina ai se ola o tagata, ia ma isi fo’i meaola e aina i le Fagatele Bay.

O suesuega nei e sailia ai le pasene o tosini i le suavai o Fagatele Bay, ua matua iloga ai lava e le o taitai lava le tele o le tosini o maua i le suavai o Fagatele.

Peita’i ua i ai se vaega o le suasami ua iloga e i ai le siama o le Escherichia coli, ma o mea uma na tapena e 32 ua maea maua uma ai lava le siama o le coliform lea e mafai ona maua mai i fe’au a manu vaefa ma manulele.

Ona o lea tulaga e tauau e i ai nei se isi a’afiaga o tulata mai mo le mamalu lautele o lo’o tausamia le a’ano o i’a ma meaola uma i lea itu o le fa’asao i Fagatele.

O se la’asaga taua lea ua faia nei e le pulega o le Fagatele Bay ina ia sailia mea uma nei e ono a’afia ai le soifua maloloina o le mamalu lautele ona o i’a ma isi mea uma e tausamia e le lautele e mafai ona fagotaina mai e le Lautele.

O le laasaga muamua lava fo’i lea e ao ina fa’atino a’o le’i oo ina faamalosia ni galuega e fa’amautu ai ua toe fa’aleleia le suasami mai nei tosini e ono a’afia ai le soifua o le lautele.

O lo ua maua mai lea lipoti atoatoa a le NOAA i le latou uepesite: https://coastalscience.noaa.gov/project/assessing-futiga-dump-site-impa…