TALA I VAIFANUA

Pago Pago - AMERIKA SAMOA

20 FANAU FA’AU’U MAI LE A’OGA MAUALUGA KANANA FOU - IUNI 02,2022:

O le aso Tofi, Iuni 2, 2022, sa fa’atautaia ai le sauniga mamalu o le fa’au’uga o le Aoga Maualuga a Kanana Fou i lumafale o le Malumalu tele “Ua Taunuu” ma o se ulua’i fa’au’uga e malaga atu le sui fa’ai’uaso i le taavale, talia ona fa’ailoga ma tusi pasi, ta’amilo le ta’avale ma toe fo’i e tu i le tulaga sa i ai ao le’i fa’asolo mai.

O le sauniga mamalu o le fa’au’uga sa i ai sui vala’aulia fa’apitoa, ma o lea fo’i sa le mafai ona auai le ta’ita’i o le Malo, ae ua avea ai le susuga le Fa’atonu o A’oga Talauega Samasoni Asaeli ma sui o le Malo. O Sui patino fo’i o le Komiti Fa’afoe o A’oga a le EFKAS, le failautusi Semo Tapaleao sa auai, fa’apea le susuga le Faife’au Toeaina Fa’aeteete Saifoloi, o le Taitaifono o le Komiti Fa’afoe o le Fonotele EFKAS na avea ma ta’ita’i o le sauniga mamalu. Na auai fo’i le susuga le Taitaifono o le Komiti o Sikolasipi a le Malo, Senatoa Faiivae A. Godinet ina ia taua’aoina aloa’ia le fa’ailoga o Sikolasipi a le Malo mo e ua agava’a ai mai lea vasega fa’aiuaso.

O le fe’au taua o lenei fa’au’uga, “Ia tuuina atu uma au galuega i le Alii, ona manuia lea o au fuafuaga uma!” Na fa’amalosi fo’i le ta’ita’i o le sauniga mamalu i le fanau fa’aiuaso, “Ia outou fa’atuatua i le Atua, ma tuu atu uma mea e tou te popole ai ia te ia, aua o ia lava e tali mai. Poo a lava fita ma faigata i le ala, e manuia lava le taumafaiga a le tagata e talitonu ma tuuina atu mea uma i le Atua, e iloga fo’i ona manuia.”

Mai le vasega fa’aiuaso e to’a 20 ua togisilia ai le tamaita’i o Indira Lemana, i lona GPA e 4.0, o ia fo’i ua ia maua lena fa’ailoga maoa’e, na tapena e le Taitaifono o le Fonotele a le EFKAS Rev. Elder Fa’aeteete Saifoloi. Ua ia mauaina fo’i le fa’ailoga o le Presidential Award, ae maise o le fa’ailoga Scholastic Award, fa’apea ma le togisilia i le ACT lea na saunia e le Faipule Samuel Meleisea.  O Indira Lemana fo’i ua ia mauaina le fa’ailoga mai le tatou Sui Fapule i le Konekeresi, Uifa’atali Amata.

O le sui fa’ai’uaso ua avea le tulaga lua i le vasega o Ianeta Fuataga i lona GPA e 3.99, ma o ia lea ua ia umia fo’i le Ipu ma le fa’ailoga fa’apitoa o le tulaga lua na tapena e le susuga le  Sui Taitaifono o le Fonotele a le EFKAS Rev. Elder Leitulagi Fa’alevao, ma ua ia mauaina foi le fa’ailoga na tapena e le Rotary mo le vasega fa’aiuaso i Kanana Fou.

O isi fa’ailoga na tu matie ai le taumafaiga a Abigail Shalhout ona o ia o se ta’ita’i agava’a ma le mata’alia. O le fa’aloga lea sa tapena e Rev. Nafatali Falealii.

O le fa’ailoga mo se tamaititi aoga amio lelei ma le pulea sa maua lea e Christology Orakene Taofi, ma sa tapena lea fa’ailoga e le Fofoga Fetalai o le Maota o Sui, Savai Talavou Ale. 

O le fa’ailoga mo le Sui sili ona lelei i le Aganuu i Tu ma Aga e tatau i talavou Samoa, na maua lea e Li’amatua lll Jr. Maugasolo Tufele, o le faailoga na tapena e le Teutupe a le EFKAS Fiasili Puni Haleck.

O le fa’ailoga o le tamaititi fa’auu ua sili ona tele le suiga i lona taumafai mai le ulufale i le a’oga e oo i le taimi ua fa’au’u ai nei, ua maua lea e Louisa Gaisoa ma sa tapena lea fa’ailoga e Rev. Iasepi Ulu mai le EFKAS i Fagatogo.

O le tama ma le teine ta’a’alo mata’alia ma ua iloga le agava’a i taaloga ua maua lea e Abigail Shalhout ma Jerry Saga Ifopo, ma o fa’ailoga na sa tapena e le Failautusi o le Komiti Fa’afoe o A’oga a le EFKAS Rev. Semo Tapalaeao mai Aoloau.

Na fa’aiu le aso o le fanau i le fa’alauiloaga o le faia’oga o le tausaga fa’atasi ai ma le meaalofa na tapena e le PTA mo le faia’oga sa galue mai lava e a’oa’o le fanau e aunoa ma se totogi, Mrs Patricia Tuimalealiifano - Fuiava, o le tina o le galuega i Sa’ilele, peita’i a’o le’i vala’auina i le galuega e galulue ai i Sa’ilele, sa mua’i avea ma Pulea’oga i le Laumua o le Segaula i le Manu’atele.

FAASUAFA ALLISON PFAEDLER “MOLIOLEAVA” - FA’ATOFA I SUI O LE FEMA SA TATOU GALULUE:

O le taeao o le aso Tofi, Iuni 2, 2022, na fa’atautaia ai se sauniga mamalu ina ia fa’asuafaina le tamaitai Fa’atonu o le Aufaigaluega galulue a le FEMA na autova’a mai e fesoasoani ia Ammerika Samoa ina ua lutia i le covid-19 ia Fepuari 21, 2022. E ese mai fo’i i lea, o le sauniga fo’i e fa’atofa, fa’aoo atu le fa’afetai ma fa’amavae aloa’ia fo’i le tatou malo ia i latou e le’i taliu i aiga i Amerika fa’atasi ai ma le pule o le latou vaega, Allison Pfaedler lea ua fa’asuafaina nei ia “Molioleava” Allison Pfaedler.

Ua matua fa’ate’ia lava le to’atele o le aufaigaluega a le FEMA ona o le agaifanua tau aiava a le tatou atunuu, ua matua fa’ameaalofa mo i latou le tele o Oloa gaosi a Samoa ina ia latou manatua lenei vaitau sa galulue ai i o tatou laufanua ina ia fa’asaoina le to’atele mai le fa’ama’i Covid-19.

“O se vaitau e moni ai le alagaupu a le atunuu, “E suamalia a niu a’ati!” O le fa’atofa e le faigofie ona ua masani fo’i ma ua latou tofoina le aganuu talimalo lelei a Samoa. O le a le mafai ona galo ona ua taua’aoina fo’i meaalofa e fa’amau ai lo matou taimi na galulue ai iinei.” O se tala lea ma loimata o se tasi o tamaitai galue a le FEMA.

O le aso Tofi na te’a i le afiafi na malaga ese atu ai toega o le aufaigaluega a le FEMA, CDC ma le Health & Human Resources, o sui mamalu na malaga mai mo le Feterale ina ia sootau’au ma le aufaigaluega a le tatou matagaluega o le soifua maloloina ia tautuaina le atunuu ina ua lutia i tatou e le Covid-19.

O lenei fa’amoemoe sa mafai ona auai le tatou Sui Kovana Talauega Eleasalo Ale ma le Failautusi o le Mataupu Tau Samoa ina ia fa’atautaia le sauniga mamalu o le fa’amavaega ma nei pa’aga aoga i le tatou Malo, ma sa faia lea i le Tradewinds Hotele i Naumati, Tafuna.

O sui uma ta’ito’atasi na galulue iinei a le FEMA sa tofusia i meaalofa taua o measina a Samoa ina ia tamau lo latou malaga mai e tali le vala’au ina ia fesoasoani mai le Feterale e puipuia le to’atele o le atunuu mai le fa’ama’i Covid-19. O se gauega ua matua iloga ona aoga ma ua ausia fo’i le fa’amoemoe e ui ina ua maumau le soifua o nisi o pelega a le atunuu.

O le susuga le Ta’ita’i o le Malo, Sui Kovana Talauega Ale fa’apea ma le Foma’i fa’apitoa o fa’ama’i pipisi i le atunuu, Dr Elizabeth Lauvao, sa la’ua saunoa ma fa’ailoa le agaga fa’afetai tele o Amerika Samoa ma ona tagatanuu uma, ona o le galuega faia mae’ae’a ma le fesoasoani ua tua i ai le teritori i taimi ua lutia ai i le Covid-19. Sa fa’afofogaina fo’i le saunoaga a le fa’atonu o le Matagaluega o le Soifua Maloloina, Motusa Tuileama Nua, ma ua autasia lava tuleiga uma i le agaga o le fa’afetai.

Ina ua tali fuaitau le tofa Molioleava Allison sa ia fa’ailoa ai, “O le vala’au mo Amerika Samoa, o se vala’au e uiga ma e ese mai le agaga na talisapaia ai i matou. Ua fa’agalogata fo’i lenei malaga, aua e le masani i matou i fa’aaloaloga fa’apenei ua soo le pale ma ua ‘au’au le titifaitama fa’asamoa i o matou loto ma agaga. O le faigata lea ona matou o aua ua foliga mai o i matou o se vaega o se aiga to’atele. E le lau maua ni atunuu matou te galulue ai, a oo i taimi e matou te toe taliu ai, ua faigata tele ona fa’agalo i o matou loto ma agaga. Amerika Samoa o oe o matou fatu ma o le a ou taumafai lava e fa’atino pea le tiute ua toina mo a’u i le aso, o a’u o le Matai e tatau ona tautua mo Amerika Samoa, Ou te toe fia maua se isi taimi o lumana’i ou te toe sau ai fo’i e fa’atino o’u faiva.”

Ina ua fa’ai’u le sauniga mamalu lea, sa sausaunoa le tofa Molioleava Allison ae aiaiuli ai ;e afioga le sui kovana, le failautusi o Mataupu tau Samoa, le fa’atonu Samana Semo Ve’ave’a ma Dr. Elizabeth Lauvao fa’atasi ma isi uma fa’atonu sa auai.

MAUA FA’AILOGA FA’APITOA MO FANAU AOGA LELEI TA’ALO - SAUNIA E LE JPS AMERICAN SAMOA:

O fanau lava sa sogasoga ma ta’a’alo lelei i le tausaga a’oga ua tuana’i nei, ua latou maua le fa’amanuiaga mai le polokalama a le JPS American Samoa. Na fa’ataunuuina le latou tufatufaga o fa’ailoga i le fale’aiga o le DDW i Utulei i le aso Lulu, Iuni 1, 2022. 

Sa tapena fo’i e le Junior Prep Sports American Samoa taumafaiga i aoaoga i potu a’oga i lenei tausaga, fa’atasi ai ma i latou ua avea ma sui ta’a’alo i le All Stars poo le aufili a le Football i le atunuu. O le aotelega o i latou uma na tofu fa’ailoga e to’a 21.

Ua ofoina fo’i e le JPSAS ni sikolasipi e fesoasoani i fanau o lo ua maua avanoa i Kolisi i fafo ma le ASCC fo’i.

Na i ai saunoaga faapitoa o le fa’atasiga ma sa saunoa fa’amalosi’au ai fo’i le Sui Kovana Talauega Eleasalo Ale , le fa’atonu o a’oga Talauega Samasoni Asaeli, le fa’atonu o Fefa’ataua’iga Petti Matila ma le Komesina o le JPS i Amerika Samoa, Dr Bone Ta’ase. Na saunoa tima’i fo’i le tamaitai o Liualevaiosina Chloe Leiato ma le susuga Oakland Salave’a Jr. o nisi o sui ua fa’amanuiaina i nei avanoa matagofie.

O le tamaitai Peresetene o le JPS Lydia Faleafine Nomura sa avea ma sui e saunoa ma tolaulauina faailoga sikolasipi e ta’i $500. ma tusi pasi mo le fanau fa’amanuiaina. Peita’i e to’atasi lava le sui na mauaina le fa’ailoga e $1,000. O le ‘au atoa a le All Stars poo le ‘au fili ua tofusia i latou ma le JPSAS jersey.

O i latou na maua fa’ailoga ona ua i ai fa’amoemoega e ulufale i Kolisi poo Iunivesite:

3 Nu’uuli Vocational Technical High School -  Leo Vaafulu Togia – Allan Hancock College; Peko Leasiolagi – Allan Hancock College ma David Siaosi Vaa – Colorado State- Pueblo.

6 Tafuna High School- Oakland Salave’a – University of Colorado; Scott Taai – Reedly Community College; Michael Mavaega – New Mexico Military Institute; Apisa Poumele – St Martins University; Liualevaiosina Chloe Le’iato – University of Hawaii ma Leigafa Mercy Tuimalatu – St Martins University

3 Samoana High School: - Marcus Samia – University of Alabama; Mary Alice Umi – ASCC. ma Hermione Simanu – Southern Oregon University.

4 Leone High School - Maricia Alexia Asulu Chanel –  ASCC; Celisa Kapisi – ASCC; Anthony Tausaafia Faiivae – New Mexico Military Institute ma Dominique L. Maiava – New Mexico Military Institute

5 Fagaitua High School - Gafataulagi Faga – New Mexico Military Institute; Starlight Lotulelei – New Mexico Military institute; Jared Lotulelei – Mount Mary University.; Apotala Sua – ASCC ma Meli Ofagalilo –  Southern Oregon University