TALA I VAIFANUA

Pago Pago - AMERIKA SAMOA

FA’AILOA KOVANA LEMANU P.S. MAUGA LE A’AFIA O IA I LE KOVITI-19

Ina ua tele mea sa fa’atulaga e fa’atasi atu i ai le tatou ta’ita’i Kovana Lemanu P.S. Mauga, ae ua le auai atu ai, ona fesiligia lea e le mamalu o le au fa’asalalau, pe mata o i ai se fa’aletonu ua le auai ai le tatou ta’ita’i i nei vala’aulia mamalu. Peita’i sa oo lava i le tamaitai Fomai Dr Elizabeth Lauvao, sa ia te’ena se fesili pe mata o fa’anofoesea pe fa’anofova’ava’aia fo’i le Kovana ona ua maua i le Covid-19?

Peita’i i le fonotaga muamua o lenei vaiaso, ua tali ai le afioga le Kovana sili ma ua ia fa’ailoa patino mai ai o lo ua maua o ia i le Covid-19 ma ua fa’atonuina o ia ina ia fa’anofoesea ai i lona aiga, e le mafai ona fealua’i i mea uma sa fa’atulaga e auai. Peita’i o le Fa’au’uga o le Kolisi Tuufa’atasi lea sa tatau fo’i ona auai, o le amataga lea o ona vala’aulia ua le mafai ona auai.

Ua ia fa’amatalaina fo’i auga o le ma’i ia te ia, “Pau lava le mea sa iloga mai ua a’afia a’u i i le Covid-19, ua tele atili ai le naunau e ‘ai ma ua fa’ateteleina ai lo’u mamafa. O le taimi nei ua toe lima aso ona fa’ato’a mae’a lea o aso atofa ou te fa’anofoesea ai.”

Ua ia faailoa mai fo’i lona agaga fa’afetai tele i talosaga siitia e le mamalu o matua matutua i le atunuu ma le tapua’iga mau a aiga ua lagona ai le fa’amalosi’au i taimi fo’i o apulusia i tofaga ona o ma’i vale o le olaga. 

TATALA LE FALETA’ALO FOU O LUPELELE - $686,158 LONA TAU

O le taeao ananafi, Aso Lulu Iuni 1, 2022 na tatala aloa’ia ai le Faletaalo fou o le Laumua a le Aoga Tulaga Muamua i Lupelele ma ua suia ai fo’i le tagai i le lotoa a lea Laumua, aua ua mautu nei le nofoaga tele e faia i ai latou fa’atasiga tetele fia fa’ataunuu, ma avea fo’i ma se faleta’alo e aoga e atina’e ai tomai o le fanau i fa’agatama eseese e fa’atauva ai ma isi Laumua i le atunuu.

O le tamaitai Pule Julie Meleisea sa tula’i ina ia fai ma fofoga o le polokalama fa’asolo o le fa’amoemoe o le Lupelele, ma o ia fo’i sa ia tulai ina ia muamua ona fa’atino le sauniga mamalu e ootia le lipine e tatala aloa’ia ai le Faleta’alo.

O le sauniga i totonu o le faleta’alo na mua’i tula’i lana susuga le Faife’au Toea’ina EFKAS Tony Hollister mo le tatalo amata ma sina upu fa’amalo ona o le galuega ua mae’a ma ua avea o se mitamitaga o le Laumua i Lupelele. Ina ua mae’a le tatalo sa tula’i le Fa’atonu o Galuega Lautele a le Malo, Faleosina Voight mo le fa’alauiloaga o le galuega ua mae’a lelei ma ua pasia lelei fo’i mo le fa’aaogaina e le fanau a’oga.

O sina tala i le galuega, ua fa’ailoa mai ai na fausia ma manumalo le Happy Trucking Construction mai Futiga i lenei galuega latou te fausia. O le latou ofo na manumalo ai i le tauofoga e $665,200.00 mo le taimi o le galuega sa tatau ona mae’a lelei ia Iuni 2021.

Peita’i na talosagaina se isi tinoitupe e toina mai mo le galuega i tulaga suiga fa’aopoopo i lona tau sa tauofo ai e $20,958. ma ua siitia ai le tau o le galuega i le $686,158. lea ua aotelega ai le tau aofai o le galuega i lona fa’amae’aina lelei.

Ua faafetaia le matagaluega o A’oga ma le latou fo’i matafaioi tausi i tulaga o le fa’aleleia o fale e fa’atino ai aoga ma fa’atasiga a le fanau talavou. “Aua a lelei nofoaga e aoaoina ai fanau, o le a fa’apena fo’i ona tula’i mai fanau o le lumana’i lea o le atunuu, ua latou gafatia ona fa’atautaia le malo ma tausia lelei o tatou tagatanuu uma. O le lelei atoatoa lea o aiga, le nuu,itumalo ma le atunuu atoa, ae maise lava o lo tatou sao lelei mo le galuega a le Atua i Ekalesia ta’itasi ua aofaga i le teritori nei.”

Ua fa’ailoa fo’i le agaga fa’afetai o le afioga le Lutena Kovana Talauega Eleasalo Ale i lana saunoaga fa’afetai i le Laumua, le Pulega ma le vasega o le aufaigaluega atoa, ona o le onosa’i ma le mau fa’apalepale i nei tausaga e tele sa leai ai se faleta’alo mo le fanau e faia ai latou fa’atasiga, e faia ai latou fa’au’uga, e faia ai latou ta’aloga. 

Na tula’i fo’i le Fa’atonu o a’oga, Talauega Samasoni Asaeli,  “Ou te fa’afetaia le Laumua nei, i lona pulega ma le aufaigaluega ae maise le PTA a Matua ma Faia’oga i le latou lagolagosua i mea e fa’atino i totonu o le a’oga i Lupelele. Fa’afetai le onosa’i ma le fa’apalepale fo’i i le galuega fa’agasolo a le Matagaluega o Aoga, e taumafai lava ia tofusia Laumua uma i le fa’asoa o falea’oga fou, ma faletetele fa’apenei mo ta’aloga ma fa’atasiga, ona ua le tatau ona toe fa’ala ma fa’atimu fanau pe tau fa’aofiofi i latou i totonu o nofoaga tuai sa fa’atautaia mai ai latou fa’atasiga tetele tuufa’atasi.”

MUAMUA MAI TAGATA FAIGALUEGA A LE STAR KIST I SIAKI FESOASOANI MAI LE MALO:

Ua fa’ailoa mai e le Fa’atonu o le Matagaluega o tagata faigaluega a le malo, i latou sa to’esea ni vaega o latou siaki masani na maua a’o le’i a’afia le atunuu i le Covid-19, poo nisi sa matua le toe faigaluega lava ona ua a’afia pisinisi i le tapunia a’ia’i ona o le lutia ai o le atunuu i le Covid-19, lea ua ta’imua mai le aufaigaluega a le Star Kist Samoa i na alamanuia, ma ua mae’a maua i le vaiaso ua te’a.

O le aso Faraile o le vaiaso ua te’a, sa amata maua ai siaki a le aufaigaluega a le Star Kist Samoa mai le latou Ofjsa autu o tagata faigaluega e masani ona taua’aoina ane ai latou siaki.

O le polokalama lenei o loo fa’atautaia e le Matagaluega o Tagata Faigaluega a le Malo ma galulue fa’atasi atu ai ma le Matagaluega o Tagata Faigaluega a le Kamupani I’a a le Star Kist ina ia mautinoa e le o misia se tasi o tagata faigaluega na a’afia i lea vaitau o le taofia ai o galuega ona o le fa’asa o le Covid-19.

Ua fa’ailoa mai e le fa’atonu Lynn Pulou Alaimalo, DHR a le Malo, e sili atu ona faigofie ona fa’atautaia mai le pulega i le pulega o tagata faigaluega ina ia mautinoa e tasi lava le faasologa o tagata faigaluega ma e le misia fo’i se tasi, nai lo le tau tautuaina ma fa’atumu talosaga ta’itasi a tagata faigaluega uma a le Kamupani lea.”

Ua mautinoa lava na a’afia soifuaga masani o nai tagata faigaluega aua ua fa’amauina e tolu vaiaso atoatoa na taofia ai galuega a le Kamupani, ae fa’ato’a mafai ona tatala mo galuega a’o Code Red lava le atunuu ona o le Covid-19. O lo ua fa’atulaga fo’i ina ia taua’aoina atu le ta’i $240. mo le tagata faigaluega e to’atasi ma e fa’asalafa uma lava i tagata faigaluega uma i kamupani eseese sa tapunia pisinisi e faigaluega ai ma a’afia ai latou tupe maua e tausia ai latou aiga.

E le o le polokalama tonu lea sa fa’atupe mai e le malo tele le Federal Pandemic Unemployment Assistance poo le FPUA, lea sa fa’auia mai ai le $16miliona i le Malo o Amerika Samoa e fa’atupe ai. O lena fa’atupega e na’o tagata nuu moni o Amerika Samoa, tagata ua talia e nonofo mau i Amerika ma ona setete ma e ua i ai latou Green Cards e Galulue ai i Amerika.

Ona o le to’atele o e ua talia e galulue i Amerika Samoa e le agava’a i lea vaega tupe FPUA, o lea ua saunia ai e le Malo o Amerika Samoa le fesoasoani lea mo i latou uma o galulue i pisinisi i Amerika Samoa ae le agava’a i le FPUA. O le alagatupe lea ua fa’aigoaina o le CAP mai le Malo o Amerika Samoa ua agava’a ai sui uma mai le polokalama a le Star Kist, o e na fa’afaigaluega mai Samoa.

O lo ua mafai fo’i ona talosaga ai sui uma sa faigaluega i pisinisi na matua tapunia mau lava ina ua fa’amamaluina le fa’asa, lea e aofia ai faleoti ulu, faletifaga, fale teuteu ulu ma tino, fale fa’amalositino ma isi lea fa’ato’a mafai ona tatala i le aso Toona’i na te’a nei.