TALA I VAIFANUA

Pago Pago - AMERIKA SAMOA

4 NOFOAGA FA’ATULAGA AI PALE A LE ASG MO E UA MALILIU - FA’AFETAI MO LE LATOU TAUTUA:

E 4 na fa’atulaga mo pale a le Faigamalo e fa’amanatu ai sao aoga o i latou ua maliliu, ma ua mapu mai i galuega e tele sa latou fa’atuatia ai ao soifua, ma o le fa’afetai fa’atino lea a le malo mo i latou uma i lenei tausaga.

O le Pale muamua sa fa’atulaga lea mo le Fanua o lagomau ai i latou uma i Satala ma sa oo atu i ai le susuga le Lutena Kovana Talauega Eleasalo Ale ma le Faletua mo lea sauniga mamalu. Ina ua mae’a sa latou tu’ua Satala agai sa’o i le Nofoaga o Marine Patrol a le Matagaluega o le Puipuiga o le Saogalemiu Lautele, lea sa fa’ae’e ai le aumalaga latou te lafoina le Pale Fugala’au manogi i le Moana, aua e to’atele fo’i le vasega o fitafita o le Malo tele sa faiilagi le folauga ao fa’atino tiute i luga o Fuava’a a le Malo tele. 

O le sauniga na soso’o ai o luga o le Mauga o Ali’i lea  o lo’o ta’o’oto ai ali’i Pailate ma e sa fa’aopeopea i le ea na maliliu ina ua lavea le va’alele na fa’apa’u’u mai ai i le uaea o le Cable Car ma pa’u ai le va’alele i le isi itu o le Rainmaker Hotel. O le fa’alavelave lea na maliliu uma ai i latou ua fa’amautu le latou ma’a fa’amanatu i luga o le Mauga o Ali’i, le nofoaga fo’i o le Ato sa i ai.

O lena sauniga sa fa’ataunuu a’o le’i malamalama lelei i le itula e 6:30 i le taeao ma sa auai ai fo’i le afioga le Sui Kovana Talauega Eleasalo ma le faletua.

I le itula e 7:00 i le taeao lava ae oo mai le fa’asologa i le nofoaga lona fa, o le lotoa lea ale Veterans Affairs i Tafuna ma o iina na faia ai le sauniga ma ta’ita’ia e le susuga Rev. Patolo Mageo. ma sa auai nisi o ali’i mamalu o le Malo sa fa’afeaoa ta’ita’i o le Malo mo lenei fa’amoemoe, nisi o le Ofisa o le Veterans Affairs.

O le sauniga lea sa matauina le matagofie ona tapena fo’i o le lotoa atoa ua fa’atutu ai fu’a uma a le Malo tele o Amerika ma lava tapena mo le sauniga e fa’amanatu ai soifua uma o fitafita ua lagomau i tu’ugamau o e sa tautua i vaega au eseese o le Malo Tele. 

I latou fo’i sa fa’amuamua i o latou olaga le tausiga o le saogalemu ma le filemu o le Malo Tele. O le toe fa’afetai fo’i lenei a le Malo o Amerika Samoa, aua o lo latou sao sa mautu ai le saogalemu o le malo fa’ateritori o Amerika Samoa, ma o lo’o fa’aauau mai pea e le vaega o fitafita galulue ma fa’ataunuu tiute i le taimi nei.

AUAI LUTENA KOVANA TALAUEGA ALE I LE TUFAINA O FA’AILOGA MO LE TAOA 2022:

Ole aso Faraile na te’a nei sa fa’ala’ititi ai le sauniga mamalu e masani ona taualoa ai Tina ma Tama Matutua uma i le teritori, i latou ua 55 tausaga ma aga’i i luga, o e ua fa’asino o Matua Matutua o le atunuu.

“Ia outou fiafia i lo Outou Soifua Matutua, aua o Outou o Tagatanuu o Amerika Samoa! E tatau ia te outou ona fiafia e faia mea e fa’afiafiaina ai outou i aso fai soo. Fiafia e gaosi oloa taulima o measina a Samoa, fiafia e sisiva ma pepese i fatuga fa’asamoa e fa’afiafialoto ia te outou. Fiafia e fa’amatala ma talatala atu ni mea lelei o lo’o e silafia i talatu’u o Samoa e aoga ona silafia e nisi e to’atele.”

O le susuga le Lutena Kovana sa pa’au atu mo lea sauniga ina ia fa’amamaluina a’ia’i le fa’atasiga a nai sui e to’aititi o matua matutua sa auai mo le fa’amoemoe e tufatufa atu fa’ailoga e pei ona masani i latou i tausaga ta’itasi i lo latou vaiaso fa’ailogaina.

O lenei tausaga ua fa’aauau mai le faia fa’apitoa o le meaalofa mo le Matua ua sili ona matua o lo’o i le latou polokalama o le SCESP, lea e toe faigaluega ma totogi i latou. O lea vaega o le Polokalama ua avea ma se vaega o le “Age My Way” poo le “Aga’i ina matua”

 “O le taimi nei o lo’o ua matauina lava le lelei ona fa’atautaia e le TAOA o ana polokalama o loo ua mae’a fa’atulaga mo tatou Matua Matutua. O le “Agai ina Matua”  o se polokalama e agaga ina ia soifua o tatou Matua Matutua i se olaga ua fa’afiafiaina i latou e soifua ai, o i latou o sitiseni o Amerika Samoa, ma ua fiafia i latou e soifua ma ola tumau ai i lona olaga.”

“Ua naunau le faigamalo ina ia mafai ona outou fiafia e soifua i lo outou malo ma ia faia e outou mea e tou te fiafia e fai. Ia aofia fa’atasi outou ma a outou fanau ma fanau a i latou i taimi uma, aua o lo outou mitamitaga lena ma lo outou agaga atoa fo’i lea.”

“E tatau ia i matou o talavou ma ta’ita’i o le tatou malo, ona fa’ataua o outou tupu’aga ma outou tala’aga. Ia fa’amaumau a outou galuega ma ia va’aia pea lo outou fiafia tatou te soifua fa’atasi iinei, lo tatou nuu moni. Ia fa’aauau pea ona outou talatalagafa ma fa’amaumau usuga lelei ua faia e tatou fanau ma aiga, ina ia tumau lo tatou agaga fa’asamoa, o le galulue ma nonofo fa’atasi i le fealofani,” o le saunoaga lea a le Lutena Kovana.

“O le polokalama lenei e taumafai ina ia mafai ona soifua matua matutua ma le agaga fiafia ma ia filemu lava ma saogalemu i latou ao soifua i AMerika Samoa nei. O nisi e manan’o e soifua lava na’o i latou , e tatau o a mataituina poo saogalemu i latou pe afai o lea se faiga e mana’o i ai.”

Ou te fa’amalosi atu ia te outou, ina ia outou mataituina poo le ala tonu lea e te manao ai pe leai. E tele isi filifiliga e mafai ona e faia, e mautinoa ai ua i ai isi polokalama ua faia ina ia outou fa’atasitasi ma feso’ota’i fa’atasi ma isi, ae mautinoa ua saogalemu lava ma faia ina ia mataituina lo outou avea ai ma tagata tino matutua o le atunuu.” O se saunoaga lea a le tamaitai fa’atonu Evelyn Satele Lili’o.

O le Matua ua sili ona matua i le teritori ua taua’aoina lea i le teritori ua 102 tausaga ua taua’aoina aloa’ia lea i le susuga le Faife’au Malolo Manumalo o Rev. Ta’ai Lemana. O le fa’ailoga lea sa tapena lelei e le tatou Faipule i le Konekeresi Uifa’atali Aumua Amata ma sa taua’aoina aloa’ia e le afioga le Matua Pulu Ae Ae Jr., le pule sili o tagata faigaluega i le Ofisa fa’alotoifale o Uifa’atali Amata Coleman Radewagen.

O le tamaitai fa’atonu o le Pulega o le Suauu Lisa Tuatoo sa avea ma sui o le Kalapu a le Lions i le tatou atunuu e taua’aoina le fa’ailoga na latou tapenaina mo le Tautua Lautele e fa’amau fa’ailoga ai le tautua a le afioga Tualamasala Michael Ryner Sala. Ua maliu lenei tama o le atunuu, ae tautala lava ana auaunaga uma sa lava ai lana tautua i le atunuu ma ona tagata.

Ua taua’aoina fo’i le fa’ailoga i le tagata sili ona matua o lo’o faigaluega pea i le Polokalama a le TAOA o le SCSEP ma ua maua lea e le tina o Alaia Filia ua atoa le 86 tausaga le matua.

FA’AU’UGA O LE LEVEL 8 MANUMALO BAPTIST ACADEMY - ASO FARAILE ME 26, 2022:

O  le sauniga mamalu na fa’atautaia a le Laumua o le Manumalo Baptist Academy i Malaeimi sa fa’ataunuuina ai le fa’au’uga o le vasega 8 ma o lo ua mautinoa le to’a 33 o i latou, ua agava’a ai e ulufale atu i a’oga maualuluga ua filifili fa’atasi i latou ma o latou matua e sailia ai latou fa’ailoga Tipiloma mai A’oga Maululuga i le atunuu.

O le to’a 33 lea o i latou e to’a 4 i latou na fa’alauiloa ua ausia e i latou le tulaga togisilia, tulaga lua e to’alua i la’ua e tutusa ai togi ma le tulaga tolu  e fuafua i latou GPA ua mae’a ausia i lenei tausaga a’oga.

O le tamaitai ua togisilia o le tamaitai o Faith Ponausuia ma e 3.82 lana GPA, o le tulaga lua e tutusa ai taumafaiga a Aaron Young ma Asherayne Romero i le ta’i 3.80 GPA, ae o le tulaga tolu ua tula’i mai ai Fagasa Mareko ma lana GPA e 3.75.

I le amataga o le sauniga ua mae’a fo’i le tatalo ma ua o i le taimi o se upu fa’amalosi, sa tula’i ai le susuga Papali’i Laulii alofa ma ia saunoa e fa’alauiloa le agava’a ua i ai nei vasega fa’ai’uaso a le Manumalo Baptist Academy i lenei tausaga.

“I le taimi nei o le vasega fa’ai’uaso a le Manumalo Academy i le 2022 e na’o le 20 tamaiti o loo fa’au’u, 16 e maua fa’ailoga sikolasipi mai le ASG, 13 i latou i Iunivesite ma Kolisi i fafo, ae 3 mo le Kolisi Tuufa’atasi. Filifili tatau oe le tamaititi a’oga ma ou matua, poo fea e te fia a’oga ai ma tausaili sou lumana’i, ae na ona fa’ailoa atu le tulaga o lo’o tu ai nei taumafaiga a le tatou nei Laumua.”

O se tala e fa’amalosi’au ma fa’ama’ite ai fa’ai’uga lelei e ao ina faia e matua poo fea o i ai lana fa’amuamua i le taumafai a lona alo mo le lumana’i manuia.

O le fa’amalo ma le fa’afetai aua ua tali matua ma selesele i a latou galuega lelei o le tima’i, tausi ma le fautua ina ia fa’aauau ona faia mea a’oga a le fanau e tusa pe ua faigata ona o suiga o le Covid-19 sa feagai ai ma fanau a’oga i le atunuu.

O le sauniga mamalu sa ta’ita’ia lava e Pr Lenny Seumanu, ae fa’ai’uina i le tatalo e Pr Aumua Semurana Temese.