TALA I VAIFANUA

Pago Pago - AMERIKA SAMOA

73 FANAU FA’AU’U LEVEL K5 - MANUMALO BABTIST ACADEMY

O fa’au’uga o fanau mai le Level K5, ua fa’ailo o fa’au’uga o Iunivesite muamua sa ulufale i ai lou alo, ina ia amata lana folauga e saili le atamai. O le sipili poo le agaga moni, e ao ina fa’aofi i loto o le fanau, ia naunau e saili le poto, ma ia saga fa’afiafiaina lona agaga, ua fa’aautu ia te i latou uma lava se aso taua, ona o le amataga o lana sailiga.

O tausaga ta’itasi, ua matauina, e le fa’avaivai fo’i matua ma aiga i le latou sapaia o fa’amoemoe amata folau o le fanau, ina ia fa’amautu o latou tomai a’o itiiti i latou, o le ulua’i la’asaga lea o le taumafaiga fa’alea’oa’oga.

Ua iloga fo’i ona fai mea lelei i ai matua i nei aso fa’apitoa o le fanau. I so’o se tausaga, afai fo’i o ni sailiga o se seleni ae sausaunoa se alo o aiga i ia vaitausaga o le soifua, o se sailiga ‘oa le sailiga lea. E tauva matua e fa’ailo lo latou valevale alofa ona o taumafaiga a fanau.

I le Manumalo Academy sa fa’au’u mai ai le fanau e to’a 73 i latou ma sa mua’i tapena mai e le Manumalo Baptist le tausamiga o le malu taeao mo le mamalu o e na autova’a atu mo le fa’amoemoe e molimauina le aso o fanauiti.

Sa fa’atautaia lea sauniga mamalu e sii i le Atua ona o le fa’amoemoe ua taunuu o le la’au o le soifua lea. I le sauniga lea sa tauloto uma e le fanau mau e tele mai le Tusi Paia i le gagana Peretania ma sa iloga le matagofie ona e matua maua a’ia’i a latou mau teuloto. O vi’iga o le sauniga sa fofogaina lava e le vasega fa’ai’uaso. O le tatalo sa siitia e le susuga le Faife’au Pr. Temese o se tasi fo’i o faia’oga i lea Laumua.

I le tolaulauga o i latou ua fa’ai’uina le la’asaga muamua o le latou sailiga o le atamai na faailo uma ai mea ua agava’a ai le fanau, e afua mai le amata ona a’otau o le faitau tusi, fa’aleoina o upu, sipela o upu, faitau o numera, silafia o lanu eseese ma le vave o le tautala ma le silafia ma le malamalama lelei i fa’atonuga e mulimulita’i ai i totonu o le vasega.

I le fa’au’uga atoa, e matua moomia lava le fesoasoani a faia’oga uma, ina ia fa’atonutonu pea ma le alofa le fanau, e iloga ai fo’i lo latou agava’a i le a’otauina o fanauiti. O se mea sili ona taua, ona o le matauina o le lava o lo latou onosa’i ma le fa’apalepale aua o le fanau lea ua faato’a lima o latou tausaga le matutua. Fa’amalo le Tauata’i Level K5 2022.

FAIGATA TELE TAGATA MALAGA MAI SAMOA 

Ua fa’ailoa mai e le to’atele o lo’o malaga toe taliu mai Samoa, le uia e i latou o le TalotaPass e malaga mai ai. O lo ua fa’ailoa mai e le Samoa Airways e soo se malaga lava e tusa pe 2 ile 3 tagata e misia pe le mafai ona malaga mai ona o latou suafa e le o i le lisi ua mae’a fa’aulu ma kilia mai i le TalofaPass.

O malaga uma lava e oo ia Iuni 9 ua tutumu mai le va lea o i tatou ma Samoa. O le lisi lea ua faato’a kilia atu lava i le Kamupani va’alele mo le kilia maia o aumalaga ma ua toe taofia ai nisi mai le malaga mai.

O lo ua i ai le isi pili fa’aopoopo e toe totogi e le tagata malaga. E mautinoa o le toe nofo ai fo’i i Samoa e tele isi tupe e fa’aalu ai. E toe totogi fo’i le tui o le suega o le Covid-19 ma ae ese ai fo’i feoa’iga ma le totogi o tau o telefoni mo feso’ota’iga mai i aiga i Amerika Samoa nei.

Ua fa’ailoa mai la e tagata faigaluega a le Samoa Airways i Samoa, “E le o faigofie ia i matou ma nai pasese ona fa’atautaia o malaga e fua i aiaiga uma ua i totonu o le TalofaPass. E alolofa atu fo’i i sui o lo ua le mafai ona malaga i taimi uma e te’ena ai i latou ua le malaga, aua ua matou iloa lelei le taugata o suega o le covid-19 i Samoa nei.”

Ua fa’amatala mai nisi o fa’aletonu, “O au na amata malaga mai Amerika Samoa i Samoa, ua mae’a lesitala ma fa’aulu mea uma i le TalofaPass. O le fa’amatalaga ia te a’u, o mea uma ua fa’amauina e oo i le taimi ou te toe taliu mai ai, ua mae’a lesitalaina, e le toe i ai se isi mea e toe tau faia i ai, pe afai e le o fa’ailo atu e le TalofaPass ia te a’u se suiga poo se isi gaoioiga e faia.”

“Ua usita’ia mea uma e oo i le suega e ao ina faia ae le’i tuua le atunuu i le isi 72itula o lumana’i. O suega na e le faia fua e pei o Amerika Samoa e totogi ai le $ST150. pe $ST300. pe afai o oe o le sui e tusi folau Amerika poo nisi lava atunuu ese. O’o lava ina to’ai taunuu i Faleolo, ae fa’ato’a fa’ailoa mai ai, o lou suafa e le o i le lisi mai le Ofisa o le Kovana e kilia mai ai sui e malaga atu i Amerika Samoa.”

“Na toe faia lava feso’ota’iga ma sui i le Ofisa o le Kovana lea e kilia mai ai le lisi, ae ua le mafai ona maua se tali mautu ae ua tu’uva’a ese mai le tatou malaga na mua’i fa’atulaga i lana faigamalaga e toe taliu mai ai.” O le a la se tatou tali i nei mea uma?

O lo ua tula’i mai, e tatau ona fai lava ma siaki lau TalofaPass a’o e malaga atu ma toe taliu mai. E tatau foi ona fa’amautinoa i taimi uma lau TalofaPass pe le o auina atu ai se emeli ia te oe, ma toe fa’aulu i ai le aso tamau ma le taimi o le malaga o lo’o e toe taliu mai ai. Ole TalofaPass lea e feso’ota’i ai lava oe ma sui o lo’o galue i le Ofisa o le Kovana mo aiaiga uma o lau faigamalaga ma toe taliu mai.

Pe afai e i ai se tasi e faia lana suega i le malae va’alele ae faailoa mai ua ia te ia le verusi, e mafai ona toe faia le isi ana suega e le MOH ae le totogia, pe fa’amaonia lana suega muamua. Afai e fa’amaonia lava o ia te oe le verusi e le mafai ona sau ae o le a fa’anofoesea i Samoa, ma afai ae maise lea e toe totogia lana suega covid i le vaitau ua fa’ataga e malaga mai ai.