TALA I VAIFANUA

Pago Pago - AMERIKA SAMOA

68 FANAU FA’AU’U MAI LE KOLISI TUUFA’ATASI - ME 20, 2022:

I lenei tausaga, ua i ai suiga i le fa’atautaiga o le faau’uga o le to’a 68 i latou na mafai ona oo atu e taua’aoina o latou fa’ailoga o kosi eseese ua mae’a a’otauina ai i latou i le tatou Kolisi Tu’ufa’atasi o Amerika Samoa. O se tasi fo’i o vasega fa’au’u ua toa’ititi lona faitauga, ae o le mea ua mae’a fa’amauina, o i latou o ni toa o le faiga fou aoaoga fa’atautaia i laina feso’ota’i tau tafa’ilagi. Malo le tauata’i, ua a’e manumalo o outou faiva tau saili le atamai.

O nisi ia o mea iloga sa fa’ailo i tautalaga fa’apitoa a le Peresetene o le Kolisi, Dr Rosevonne Makaiwi Pato, fa’apea le sui mamalu o le Faigamalo, le Sui Kovana Talauega Eleasalo Ale, ina ua toina o la’ua avanoa mo se tima’iga ma le fa’afetai i le vasega fa’au’u i lenei tausaga.

I le polokalama pu’upu’u na tatala ai le aso o le fanau, na mua’i fa’afofogaina fo’i o le fa’amalo ma le fa’amalosi’au mai a le susuga le Fa’afeaigaiga tofia, Rev. Elder Fouvale Asiata o le EFKAS i Matuu ma Faganeanea, ae o le Taitaifono fo’i o le Komiti Fa’afoe o A’oa’oga Maualuluga o le tatou Malo. O ia fo’i  na mua’i siitia le fa’afetai i le Atua, aua o le fa’amoemoe lava ua taunuu o le fanau ma le Laumua, o le la’au o le ola lea.

“O outou o se vasega o Toa, o fanau ua a’emanumalo o outou faiva tausaili i ala fou fa’aneionapo. Ua outou le tu’u i le faigata o ala ua tausailia ai le atamai i lenei vaitau ua sofa’ia le saogalemu o le atunuu i fa’ama’i fita, ae ua outou tula’i ma taumafai ma saga taumafai, lea ua tini taunuu lo outou fa’amoemoe, fa’afetai le fa’amalolosi, fa’afetai le galulue punoua’i i suesuega.” O se vaega lea o le fa’amalo a le tamaitai peresetene o le Kolisi i lenei vasega ua fou fo’i le ala ua taua’aoina ai latou tusi pasi ma fa’ailoga, latou malaga mai i ta’avale ma avatu o latou fa’ailoga ma tusi pasi.

Na saunoa le Sui Kovana e fa’amalo i le fanau fa’aii’uaso. “Ua outou tau le taua lelei, saga’i ane la’ia e talitali le manuia o latou taumafaiga ua au, e ui i le tele o fa’afitauli sa tatou ui mai ai, ae ua outou tumau e taumafai le mea sili. Fa’afetai i lo outou tausisia o tulafono uma ma aiaiga o le fa’asa, o lea ua oo mai lava i lo outou aso fa’apitoa, ae ua usita’ia lava poloa’iga ina ia maua le ola, ia outou malolosi e fa’aauau le taua ole sailiga o le atamai, ia outou maua fo’i ‘ai o le tausinioga  ona o lo outou usita’i ma le fa’alogo, ae silisili o le fa’autauta ma tumau e tausaili pea. O outou o fa’ailoga o le manumalo a’ia’i aua ua outou mafai ona a’ea olo ma fa’atini lo taotu ‘ai.”

O le fa’amalosi fo’i a le Tama Faife’au Toeaina, ma o le ta’ita’ifono o le Komiti Fa’afoe o Aoaoga Maualuluga, sa ia toe fa’afetaia le sogasoga, lotomau ma le naunau o fanau ina ia mae’a latou aoaoga ma sauni atu i le isi la’asaga fou o le olaga tausaili. “Ia outou manatua le Atua na outou amata fa’atasi i lenei faigamalaga, ia outou o fa’atasi se’ia oo i le i’uga o la outou sailiga, a au outou ma le Atua, o ai ea se fa’asagatau mai?”

Na tula’i fo’i Dr Simaua Ropeti o le Taitai o Aoaoga tau’ave i le Kolisi, ma fa’alauiloa le vasega fa’ai’uaso i lenei tausaga ile susuga le Taitaifono o le Komiti o Aoaoga Maualuluga Rev. Elder Fouvale Asiata mo lana fa’amaoniga, ona fa’asolo ai lea o le tufatufaga o fa’ailoga ma tusi pasi o le fanau fa’au’u.

O lenei tausaga ua fa’asolo ai le taua’aoina o tusi pasi ma fa’ailoga o le fanau i ta’avale ma e na’o na tu lava oso ese mai le tamaititi mai le ta’avale ma savali mai e talia ona tusipasi ma fa’ailoga, ma toe fo’i ese atu, ma malaga ma lona aiga.

O le tamaitai Fa’atonu o Faufautua uma i le fanau a’oga a le Kolisi MS Annie Masele Panama sa ia tolaulauina suafa o le au fa’au’u ua gasolo mai mo le tufatufaga o latou tusipasi, ae o le fofoga o le polokalama fa’asolo mo le aso fa’ailogaina o le fanau fa’au’u o le susuga Ma’auga Tauvela Fale.

E to’a 23 le fanau fa’au’u ma fa’ailoga AA Liberal Arts; to’atolu i latou na fa’au’u ma AA on Elementary Education; to’atasi lava le AA on Human Services; to’alua i la’ua ma fa’ailoga AA in Political Science; 1 maua le AA in Music; 2 na maua fa’ailoga AA in Visiual Arts; 6 i latou ua maua fa’ailoga Associate of Science in Business Management; 2 i la’ua ua maua fa’ailoga ASci in Civil Engineering; 12 i latou na maua fa’ailoga ASci in Criminal Justice; 2 ua maua fa’ailoga ASci in Agriculture; 7 i latou ua maua fa’ailoga ASci i le Health Science; 2 ua maua fa’ailoga i le ASci i le Marine Science.

Mai le kosi ua ofoina atu e le ASDOE ina ia sailia ai fa’ailoga Bachelor of Education mo tatou faia’oga, e to’afa i latou ua fa’amanuiaina ai latou taumafai ma ua taua’aoina latou fa’ailoga BEd i le fa’au’uga lenei:

Blessiga Fa’alata; Faith Siagalai Vaomalo Loia; Omeka Tagoa’i ma Jonathan Paul Utu.

O e na fa’amauina fa’ailoga o le Bachelor of Artts in Health Care Administration e to’a 2 i la’ua mai le University of Arizona Global: Doreen Leata Ameperosa ma Esmeralder Moana Charliotte Iese.

Mai le NorthCentral University ua faamanuina mai ai le sailiga a le tamaitai Sui Peresetene o le Kolisi Tuufaatasi o Amerika Samoa, i lona fa’ailoga PHD in Educational Leadership - Letupu Tauanuu - Moananu.

Fa’amalo le fa’amalolosi ma le finafinau i sailiga aua se lumana’i o Amerika Samoa i le to’a 68 o tatou sui ua fa’amanuiaina nei taumafaiga.

10 AUFA’AU’U AOGA MAUALUGA - PACIFIC HORIZONS:

O le ulua’i A’oga Maualuga ua fa’atautaia le latou fa’au’uga o le vasega fa’aiuaso i lenei tausaga, o le a’oga maualuga lea a Pacific Horizons School i Tafuna. 

O le ‘au fa’au’u ua lisia mai e to’a 10 i latou: Oliver Auala, Angela Chen; Georgia Cox; Sa’ofetalai Fuatagavi, Annie Kim, Gillian Lexington, Mavis LiYang; Alfred Lim; Angela Milford ma Lene Uiagalelei.

Matagofie le sauniga na faia i le afiafi o le aso Toonai, ma sa vala’aulia fa’apitoa le Sui Kovana o le Malo, Talauega Eleasalo Ale, Sui Fa’atonu o le Matagaluega o A’oga a le Malo Theresa Atuatasi, Sui o le Ofisa o le tatou Faipule i le Konekeresi o Uifa’atali Aumua Amata Radewagen, le afioga le Matua, Pulu Ae Ae Jr ma le fofoga fa’apitoa mo le Fanau fa’au’uina Lydia Faleafine Nomura, fa’apea fo’i le mamalu o matua ma aiga o le au fa’au’u.

Na tuuina le avanoa mo folasaga i le tamaitai na maua le tulaga lua i le vasega fa’aiuaso, Annie Kim mo lana tautalaga ma sa ia fa’ailoa ai lona agaga fa’afetai ina ia fa’ai’u ma le manuia o latou aoaoga e ui ina ua ese mamao ala ua fa’atino ai mai le mea sa masani ai mai le amataga ona a’otauina i latou i le Pacific Horizon School.

O lana fa’afetai fo’i sa ia molita’i muamua i o latou faia’oga ma le laumua sa latou utuvai ai mo nei tausaga e 4, ina ia a’e manumalo latou sailiga o le atamai.

“Ona o le matou aoga o lo ua fa’ailo o tagata folau, ua tatau ai ia i latou uma o e a’otauina i lea a’oga, ona gafatia ona fa’ataututu so’o se ituaiga fesuia’iga o le tau. O lea ua matou taumafai ai le mea sili, ma e fa’afetai o lo ua a’e manumalo i matou uma i sailiga o le atamai e fa’au’u ai ma aga atu i le soso’oga o le ala umi o lo’o fotua’i mai.”

O le saunoaga tima’i fo’i na feagai ma Lyfdia Faleafine Nomura sa ia taumafai ai ina ia i ai lava se fe’au aoga mo le vasega fa’au’u latou te avea e fai ma so latou ta’iala i le lumana’i, a’o latou o ese atu ma matua ma aiga, ina ia taumafai e toe fo’i mai ma le manuia.

“Ia avea outou ma e tausisi i le fa’amaoni ma ia fai le mea sa’o, tusa lava pe ete a’afia ai!”

“Pe a oo ina mae’a le aso lenei, o mea uma lava o fotua’i mai e le toe faigofie, o le umi lava ona e tuua le aiga mo lau taumafaiga, e fa’aopoopo mai lava fita. Ae ia e manatua le fautuaga, ia e fa’amaoni ma faia le mea sa’o.”

“O lou fa’amoemoe lea ua amata nei ona e taumafai i ai, ia e tumau ma tausaili pea ina ia e maua. E te maua loa, ua e manumalo. Peita’i o lou agava’a lena e te mafaia ai ona e oo atu i le isi la’asaga, ia e aoga atu ai e tautuaina se tasi ma o lou aoga lena i ou matua, aiga, nuu ma lou malo.”

Matagofie mea uma ina ua fa’aiu le polokalama atoa o le fa’auuga i le lauga na tapena e le tamaitai ua togisilia i le vasega fa’ai’uaso, ua fa’atulaga fo’i e ulufale i le Yale University i le tausaga a’oga fou, Angela Chen.

“Ou te iloa ua vave tele lenei fa tausaga ua mae’a ma o le a tatou tete’e ai, o le a tofu le tagata ma lana atia’e i lona ala ua amata ona fa’atulaga. Tau ina tatou iloa lelei, ou uso ma tuagane o le vasega fa’ai’uaso, o le aso lenei, ua faia e Ioeva tatou te fiafia fa’atasi ai. Ia tatou matau pe a mau a taeao, o ananafi fo’i ua tuana’i, ae o nei, o se meaalofa mo i tatou, ia tatou fiafia fa’atasi ai.”

 Folau ia i lagima outou le fanau o tagata folau, ia oa liu o outou va’a!