TALA I VAIFANUA

Pago Pago - AMERIKA SAMOA

8 VAIASO AOAOGA FA’APITOA I COSTA RICA - M.J MATULINO ASCC

O se tasi o fanau a’oga ua fa’amanuiaina lana talosaga ina ia auai i aoaoga fa’apitoa ma suesuega fa’atautaia i tulaga o Fa’ato’aga o lo’o fa’aaogaina i Costa Rica, i le taumafanafana poo le tu’uaga umi o a’oga o le tausaga nei, lea e amatalia ia Iuni 2022.

O le ali’i talavou o M.J.Matulino o se tamaititi a’oga i mataupu tau Faifa’ato’aga i le Kolisi Tuufa’atasi ma ua tauavea e ia nei mataupu i lana Kosi o lo’o tau’avea i le kolisi, Puna’oa Fa’anatura poo le Natural Resources.

Na talosaga fa’apitoa Matulino i sona avanoa e auai atu ai i nei suesuega ma a’oa’oga fou tau faifa’ato’aga i lea fo’i atunuu i Amerika i Saute ma e fa’afetaia e ia le talieleia mai o lana talosaga lea mo lea faiva i le Summer 2022.

O Matulino fo’i o le Peresetene o le latou Green Force Student Agricultural Club i le ASCC, ma e valu la vaiaso o lana lea malaga e saili tomai ina ia mautu ia te ia nisi fo’i ala e mafai ai ona faaleleia atili le eleele mo fa’ato’aga, ituaiga o la’au e mafai ona totoina ona e aoga i le eleele ma ona puna’oa, ma ia silisili ona lelei ai fua o fa’ato’aga mo le fofoga taumafa o le mamalu o tagata lautele ma manu e a’ai ai.

O le kosi lea ua fa’atulaga e auai ai Matulino o le OTS Las Cruces Research Center i Costa Rica.

O le fa’alapotopotoga e auau i le taumafai e fa’aleleia atili tomai o fanau ina ia lelei i tulaga o suesuega fa’apitoa fa’asaeanisi i atunuu o le teropika poo le OTS sa latou ofoina mai se avanoa mo soo se tasi e talosaga atu e fia auai i lea aoaoga fa’apitoa i Costa Rica ma ua fiafia Matulino e fa’aulu i ai lana talosaga lea ua talileleia.

O lo ua fa’ailoa mai aso patino mo lea fa’amoemoe o Iuni 05, se’ia oo ia Aukuso 02, 2022 ona fa’ato’a fa’amae’a lea, ua saunia lea alo o le atunuu ina ia malaga atu ai.

O se sosia o le a taliu mai ma Matulino o le a aoga lea i isi fanau a’oga o le a galulue feso’ota’i ma ia i suesuega i potu a’oga mo le sailiga o latou fa’ailoga maualuluga, ae o le a mafai fo’i ona aoga i le atunuu pe a oo ina mae’a lana a’oga ma galue i le tatou Malo.

Ua fa’ailoa mai e Matulino e tusa o lona avanoa, “O se mea ua fiafia ai o le avanoa ua ou maua. O se mea e le’i manatu o le a maua i lenei tausaga ona malaga ese atu mo aoaoga feso’ota’i fa’apenei, ma o se avanoa e le lau maua, ae o se mea lelei mo a’u ma nisi o le a mafai ona matou suesue fa’atasi pe a taliu mai, ma se ‘ai fo’i mo le atunuu pe a oo ina maua le avaoa e galue ai i le mae’a ai o aoaoga.”

“O se mea taua lava o le mafai ona fa’aleleia atili puna’oa o lo’o tatou galulue i ai i fa’ato’aga, i o tatou laufanua, i eleele vailaloa ma ia taga’i toto’a lava i ni a’afiaga o le matagofie ma leleiga o le si’omaga i so’o se mea e tatou e fa’aaogaina i fa’ato’aga ma le gataifale fo’i, lea aotelega i lo tatou Siomaga atoa,” o sana tala lea e tusa o lona fa’amoemoe.

SAINIA KOVANA PILI MO SIITAGA SAOGA TEUGATUPE O LE LITAEA

O le pili na fa’atulaga ma fa’aulu e le malo ina ia si’itia ai le pasene a le Malo faapea fo’i ma le tagata faigaluega ina ia siitia ai latou saoga e totogia mo le latou litaea, ua mae’a sainia nei e Kovana Lemanu Mauga ina ia avea ma se tasi o tulafono e ao ina fa’amamaluina.

Na maea sainia lea tulafono e le tatou kovana i le aso Lua o le vaiaso na te’a, ma o le a fa’amalosia ona fa’atautaia lea siitaga ia Oketopa 01, 2022.

Ole siitaga ua fa’atulaga i lea tulafono ua aofia ai le saofaga a le Malo ua siitia ei mai le 11% sa i ai i le 14% i le siitaga fou, pe a tuufa’atasia pasene o saofaga e lua. O le saofaga a le Malo, ua siitia mai le 8% sa i ai i le 10% i le taimi nei. O le tagata faigaluega ua siitia mai lana  saofaga mo lona litaea mai le 3% sa i ai i le 4% ua i ai nei. E fua nei pasene o le saofaga e lua i le aofai o lou totogi o maua i vaiaso totogi ta’itasi.

Ua ese mai lea, ua faatulagaina fo’i ma isi siitaga uma mo le litaea ua fa’asolo mai se’ia oo i le tausaga 2024.

Mo le sefulu ai lenei o tausaga sa faia ai suesuega auiliili e tusa o saofaga e fa’aulu atu i le taugatupe o le Litaea fa’atasi ai ma le fuafuaga fa’atatau i e fo’i o le a talaina o latou litaea, ua matauina ai se fa’aletonu e ono oo i ai la teugao’a pe afai o le a le siitia saofaga a le Malo ma tagata faigaluega e tuuina i totonu.

O le fa’aiuga lea ua faailoa mai, ua mafua ai ona fa’atautaia le suiga o saofaga e pei ona fa’atulagaina nei, ina ia le tupu pea a’afiaga ma le maua ai e nisi a latou litaea i le taimi ua latou mana’omia ai ona ua agava’a ai.

O le fa’aiuga tamau ua mautu mai i lea suesuega, afai e alu ai pea i le saofaga o i ai nei ae le fa’auia siitaga ua fa’atulaga mo saofaga a le Malo ma tagata faigaluega ta’ito’atasi, e oo ina le taitai ona lava le faasoa mai o litaea a le aufaigaluega i le tausaga e 2040.

O le tausaga e 2021 na mua’i tau fa’aulu mai ai fo’i se tulafono fa’apea, ina ia siitia ai le saofaga a le Malo i le 11% ae siitia le tagata faigaluega i le 5%. E le’i sainia e Kovan Lemanu Mauga lena siitaga ina ia avea ma tulafono e fa’amalosia, ma o lana saunoaga ua fai si maualuga o lea saofaga mo le malo ma le tagata faigaluega fo’i.

O le toe fa’aulua o lea mataupu  e toe iloilo mai e le fono faitulafono, ina ia mataituina fo’i le a’afiaga e ona oo i ai le teuga’oa a le Litaea o Tagata Faigaluega uma a le malo, o lea ua mautinoa lava o lo’o manatu le ta’ita’iga o le tatou Malo ina ia fa’amautinoa o lo’o sologa lelei ma le mautu le teugaoa o le litaea o ana tagata faigaluega uma i le lumana’i, ma ua manatu fo’i le faigamalo ina ia le matua tigaina tagata faigaluega i le siitaga o le saofaga fa’ae’e mo lona litaea ae ia sologa lemu mai nei mea e lua.

TAUMAFAI UIFA’ATALI FA’ALELEIA ATILI TAUTUA VETERENI

I le fa’aiuga o le vaiaso na te’a nei na auai atu ai le tatou Faipule i le Konekeresi, Uifa’atali Amata Radewagen i le fonotaga fa’apitoa  na tapena e le vaega o Vetereni mai le Teritori o Puerto Rico, ma ia saunoa ai e ao ina faa’atoatoa auaunaga uma ua ofoina mo vetereni i soo se vaipanoa o le Iunaite Setete ae maise lava i vetereni o lo’o ua alaala i teritori.

“E pei lava o le teritori o Puerto Rico, ou te tu atu e avea ma sui o Vetereni uma o lo’o alaala i le teritori o Amerika Samoa, fa’atasi ai ma o latou aiga uma o lo’o fa’amoemoe ia te’i latou ma le latou tausiga, ou te iloa e le maluelue lo latou agaga lotonuu ma le pele ia i latou o Amerika le malo tele. Ou te iloa ua mae’a fo’i ona latou tautua ia Amerika ma fa’ataunuu o latou tiute a’o avea ma fitafita, ae tatau ia Amerika ona toe fa’afo’i ia i latou taui atoatoa o le latou auaunaga ua mae’a ona tuuina atu i le Iunaite Setete o Amerika, e taualoa ai le latou auaunaga.”

“E fa’afetaia lenei taumafaiga ua mae’a fa’atula’ia e Congressman Gonzalez-Colon ina ia mautinoa o lo ua silafia e le Konekeresi, e le tatau ona fa’agalo nei taui lelei mo le auaunaga a fitafita o lo ua filifili e alaala tumau i Teritori.”

O sui o le Konekeresi sa auai e aofia ai Congress. Jenniffer Gonzalez -Colon, Uifa’atali Amata mai Amerika Samoa, Darren Soto mai Florida, Mike Waltz Florida ma Ruben Galleo mai Florida fo’i fa’atasi ai ma le US Army Brigadier General Victor Perez, o se vetereni mo le 30+ tausaga sa latou fa’asoa ni folasaga aoga tele mo le una’iga o tautua eseese mo Vetereni poo fitafita tuai ua alaala tumau ma soifua fa’atasi ma o latou aiga i teritori uma o Amerika.

O le saunoaga a Uifa’atali, “E le taua poo sui vetereni o matou suia i le aso, e afua mai le Vasa Karipiana pe mai le Pasefika i Saute pe o vereteni uma e alaala i le va o nei vasa tetele e lua, sa latou talia le vala’au fa’apitoa ina ia tula’i mai ma tautua le unaite Setete o Amerika e fa’asaga tau mai ia i latou ma sofa’i lona nofo saogalemu ma le filemu lautele o ona tagata ma ana mea totino o aofaga uma ai. Ua mae’a fa’atino le latou tautua, ua le lape ma fa’aumatia ai le soifua, o i latou na ua tatau ona fa’afo’i atu le taui e le Malo tele o Amerika e toe soifua ai.”

“Ua le fa’ailoga esea le nofoaga o alaala ai, ae ia gatusa uma tautua e ofoina atu ia i latou uma sa faia le tautua ua saogalemu ai i tatou uma mai na tausaga ua te’a. E tatau ona atoatoa le auaunaga a le Iunaite Setete  e afua i vetereni o alaala i setete eseese uma se’ia oo lava i ona teritori. O le mataupu lea o le mataupu tau le taualoaina o le latou auaunaga. Ia laugatasia Fitafita tuai uma poo vetereni i penefiti ua ofoina mo so’o se tasi o i latou, e le fa’aptoa mo nisi o i latou o alaala i setete ae le tusa ma le sui vetereni o alaala i teritori. E le’i fa’avasegaina fa’apena a latou tautua ina ua fa’atino a’o avea ma fitafita tiute. Tasi le ‘auga o le fa’amoemoe o le tautua, ia fa’ataunuu tiute uma e i latou uma, e le fa’ailogaina poo fea na aga’i mai ai. O lo’o fa’aauau pea lea auaunaga e fitafita uma mai Teritori ma Setete eseese i lenei fo’i vaitau.”