TALA I VAIFANUA

Pago Pago - AMERIKA SAMOA

AIAIGA FA’ATAUTAIGA FALE MALIU & E MALILIU MAI COVID-19

Ua i ai aiaiga fou o le fa’atautaiga ai o galuega tautua a le Fale Maliu o le tatou falema’i i Faga’alu. Ua fa’atulagaina nei fo’i nisi tautua fa’aopoopo ina ia mafai ona fa’atinoina auaunaga mulimuli mo e ua mautinoa ua maliliu i le fa’ama’i o le Covid-19 i le atunuu.

Ua fa’ailoa e Dr Akapusi Ledua, e lua lava filifiliga a le Aiga e fa’ailoa patino mai pe a oo ina maliu se tasi o le latou aiga ona o a’afiaga o le Covid-19. O le mea muamua ia fa’aliuefuefu le tino o pelega ua maliliu, poo le tuu pea le tino maliu o le a le fa’aliuefuefuina, ae o le a tapunia mau le pusa e le toe tatalaina mo ni fa’amavaega i le taimi atoa o le a tu’ua ai le Fale Maliu.

Ua i ai se suiga lelei mo lea fa’amoemoe lona lua, ua aiaia fo’i le i ai o ni sui o le aiga e latou te o’o atu ma maimoa patino i le tino o le tagata ua maliu o le latou aiga. O le a tuia le tino maliu i vaila’au e mafai ai ona tapena mo le maimoaga a sui o le lona aiga i le Maota Maliu, ona fa’ato’a avea ai lea i le aiga ma ekalesia mo latou sauniga o le Maliu, ma lagomau ai.

Ua na’o le 30 minute lea ua fa’ataga mo le maimoaga a aiga i le sui ua maliu, ma tapunia ai.

Pe afai ae le tuia le tino maliu i vaila’au e mafai ai ona maimoaina le tino maliu mo lona aiga, ua na’o le 30minute e mafai ai ona maimoaina e nei sui le tino maliu lea, ma o le a le fa’atagaina fo’i le pa’i atu i le gasegase lea e le o tuia. O le aso lava lea e avatua ai i tua le gasegase mo lona toe sauniga ma lona falelauasiga.

Ua fa’ailoa e Dr Ledua, ua mae’a pasia ma silafia lelei e sui mai le Malo Tele lea suiga o lo ua tuuina i le pa’ia o aiga ina ia mafai ona va’aia ai le tino maliu o latou pelega ua maliliu i le Covid-19. Ua talia leleia e i latou lea faiga fou ina ia mafai ona toe va’ai tasi lava aiga i a latou pelega, ona e taua tele i le tu ma agaifanua a le tatou fo’i atunuu, nei toe taimi o le mafutaga ma pelega ua fa’ia i le fa’ama’i o le Covid-19.

PASIA MAOTA O LE KONEKERESI TINOITUPE - SUESUEGA A LE FALEMATA’AGA

O se fiafiaga o le tamaitai Faipule o Amerika Samoa i le Konekeresi ua ia fa’ailoa mai ai le pasia e le Maota o Sui o le Konekeresi o le fa’atupega mo se suesuega fa’apitoa lava e fa’atula’ia ai se Fale Mata’aga mo le Asia Pacific American History & Culture Act.[H.R. 3525]

O lo ua fa’ailoa aloa’ia fo’i e le tatou Sui i le Konekeresi Uifa’atali Aumua Amata le sui sa amata mea i lea fa’amopemoe o Rep. Grae Meng [D-NY].

“E mautinoa lava e taua tele la tatou aganuu i o tatou tagata uma ma e i ai lo tatou fa’anaunauga ina ia fa’atumauina pea a tatou tu ma aga i le soloa’i mai o le soifuaga o tatou augatupulaga i le lumana’i.”

“I le aiaiga ua tamau i lea fo’i pili tau fa’aulu i le Maota o Sui a le Konekeresi, ua mafai ai ona tatou fa’amatalaina lo tatou soifuaga ma le talaaga o le tatou atuvasa lea e aotelega fa’atasi ai i tatou ma lo tatou aiga atoa fa’aatumotu. Ua mae’a i ai fale mata’aga tetele i le Laumua o Uosigitone DC mo Tagata Nuu Amerika mai Aferika  ma le Falemata’aga mo Tagatanuu Moni o Amerika, ae ua tatau nei ona tatou fiafia i lo tatou avana ua tu’ulima mai ina ia tatou fa’atula’ia ai le Asian Americans & Pacific Islanders.” O se tala fiafia lea a le afioga UIfa’atali Amata Radewagen o le tatou faipule i le Konekeresi.

O le fa’aupuga o lea lava pili na fa’aulu mai i le maota ua mae’a fa’amautu ai le tuufa’atasia o se Komisi e mafai ai ona latou afuafuaina le fa’amoemoe. E tatau ona galulue lea Komisi fa’atula’ia e fa’amautu le tala’aga, aganuu ma le tele o tautua ua mataina mo tagata o le Asian Americans & Pacific Islanders[AAPI]. O atunuu uma o lo’o aofia i le tatou Atuvasa ma le Atu Asia, o se tasi o vaeag o le Lalolagi ua sili ona televave lona faitauga i le Iunaite Setete atoa.

“O le pili lenei o se mataupu sili ona aoga lea mo le tatou atuvasa ma le atu Asia, o se toe fa’amanatu e ao ina tatou tu’ufa’atasia ina ia mafai ona fa’amatala le tatou fo’i tala’aga e afua mai o tatou tua’a ua mavae ma latou taumafaiga ua tumati’e ai tatou taumafaiga i lo tatou vaitau ma soloa’i atu i le lumana’i. E ao ina tatou fa’amautuina  uma tatou nei fa’amaumauga i le tatou fale mata’aga ua aiaia nei.”

Sa toe fa’aopoopo mai le tamaitai Sui i le Konekeresi, “E ao ina mafai e tatou fanau o le lumana’i, ona toe va’ai ma manatua mea sa taumafaia e o tua’a ua mavae, fa’amaumau mea uma o tatou mafaia ona fa’atino i lenei vaitau, ma fa’asolo atu i le lumana’i.”

I le fa’aupuga o lenei pili e fa’atula’ia ai le Komiti Fa’afoe e to’a 8 ona sui totino o i latou ia latou te fuafuaina toto’a le suesuega auiliili o aganuu a atumotu ma le atu Asia ma ia latou tapenaina se fuafuaga tamau o le tatou fale mata’aga i le Laumua o le Malo tele o Amerika.

E 18 masina lea ua fa’atulaga e fa’atautaia uma ai lea suesuega ma fa’amautu le lipoti moomia ma o i latou fo’i o le a faia se filifiliga pe tatau ai ona avea le fale mata’aga o se vaega a o le Smithsonian Institution, o le fale mataaga sili ona tele i le lalolagi ma e faia ai fo’i le tele o suesuega mautu.

FA’ATUPEGA $50,000 MO LE GIVE LIGHT - TOE TATALA AI AVANOA MO TALOSAGA

Ua toe tatala nei le fesoasoani a le Give Light ina ia fa’aulu atu fo’i ni talosaga mo fesoasoani tupe e mafai ai ona totogia a latou pili uila ma le suavai taumafa i o latou aiga, ona ua a’afia latou tupe maua i le taofia ai o galuega ma fa’aitiitia o itula faigaluega ona o le tamau o le Covid-19.

O le fa’atupega le foai a le Malo mo le GiveLight e $50,000. lea sa fa’aauala mai le Matagaluega o Fefaatau’iga Community  Block Grant e fesoasoani mo fa’atupega o Fa’alapotopotoga ma Pisinisi Tumaoti, ua mafai ai ona toe amata ona talia talosaga nei e le Give Light mo ni aiga o i ai le mana’omia.

O le tamaitai o Tiara Drabble o le Rotaract Club o se vaega o le Rotary Club, ua ia faailoa mai, “O le taimi lenei ua fa’aluaina le aofai o le a tauaaoina atu i aiga, o le a fa’aluaina le $50. ma o le a taua’aoina le $100. i aiga e talosaga mai.”

I le taimi nei ua mafai ona e talosaga mai e fa’auia lea i le emeli www.tinyurl.com/GiveLight2.

Afai o le a le mafai ona maua atu le pepa fa’atumu mo le talosaga lenei i le GiveLight, e mafai ona fa’atumu nei talosaga i le Ofisa o le Foeiletini i Fagatogo mai le aso Gafua - Aso Tofi, 8:00am - 12:00pm. O le Ofisa lea e i le Iupeli Siliva i Fagatogo e soso’o ma le Faletusi o le Ekalesia Metotisi.

Ua na’o le tasi lava le talosaga mai le aiga e tasi. Ua mafai fo’i ona toe talosaga i latou na mua’i maua le $50. mo le eletise, ae o le a le maua e i latou le isi $50. ua na’o le $50 mo le pili vai e latou te mauaina i le tufatufaga lenei. O aiga e le’i mua’i fesoasoani i ai le GiveLight e maua uma le $100. $50 o le eletise ma le $50. o le pili vai.

Ua fa’ailoa mai e i ai le fa’amoemoe o le Give Light e mafai ona faia se latou sailiga e fa’amautu ai se isi vaega tupe e tusa m ale $25,000. e fa’aopoopo atu i le foa’i mai le Malo aua latou meaalofa nei mo le mamalu o aiga o pagatia i le le lava o le tamaoaiga tausi mo latou lotoifale ae maise i pili a le ASPA.

Ina ua faia lea fa’amoemoe ua fa’ailoa mai, a ele’i mae’a le masina talu ona fa’atautaia sailiga, ae mautu mai le aofai e $29,100. ua mae’a ona tuufa’atasia, ma ua fa’afetaia ai i latou na foa’i ma le loto ma talia le fa’amoemoe na mafua ai ona tausaili i latou.

O lo ua fa’amoemoe e tatau ona fesoasoani nei foa’i uma i le aotelega e 500 aiga. O nisi o nei foa’i sa oo lava i le $2,000. mai le CostULess, $5,000. mai le Rotary Club of Pago Pago, $3,000. mai le Lions Club of Pago Pago ma le $8,000. mai le Haleck Family Businesses.

O isi fa’alapotopotoga uma lava o lo’o aofia fa’atasi i le GiveLight ua galulue fa’atsi ai le Esther Generation, Rotaract Club of Pago Pago, Christopher James Foeiletini Foundation ma le ABLE Agency for Better Living Endeavors.