TALA I VAIFANUA

Pago Pago - AMERIKA SAMOA

TO’A 8 SUI USARMY RESERVE - SIITIA TOFIGA FOU GALULUE AI

E tolu vaiaso o le Kosi na fa’atautaia a le vasega o fitafita o le Vaega Au Fa’aagaaga a le US Army i Tafuna  ina ia a’otauina latou fitafita tiute i tomai tau Ta’ita’i Lelei ma le Agava’a. O lea kosi sa fa’aulutalaina “Aota’u Nei -Ta’ita’i o Taeao!”

E to’avalu i latou sa a’otauina, ma ua mae’a taua’aoina tusi e fa’amaonia ai le latou auai ma fa’ai’uina ma le manuia lea kosi, peita’i ua tumati’e ai le taumafaiga a le tamaitai SPC Jenade Ausage lea ua ausia le tulaga Superior Academic Achievement. O le sui na soso’o ai lana taumafaiga o SPC Lealuga - Ioselani ua ausia le Commander’s list.

O isi sui e to’aono ua pasia lea fo’i kosi fa’atasi ma i la’ua nei e aofia ai: SPC Tiatia, Mealofa; SPC Sipa, Jackson; SPC Iuta, Gaoa; SPC Kim, Yong; SPC Filisi, Filisi ma SPC Falelua, Fuatino.

O lenei tausaga ua fa’ailoga ai fo’i le atoaga o le 114 tausaga o le US Army Reserve i le Iunaite Setete o Amerika, ma ua fa’afetaia fo’i lenei faatofala’iga aua ua talafeagai le taua’aona o nei fa’ailoga i sui ua lautogia ai, ma le aso 23 Aperila, 2022, o le vaitau ua fa’ailoga ai le atoaga o le 114 tausaga o le Army Reserve a le USArmy.

O le taimi fo’i lea ua fa’atulaga e le Pulega o le USArmy Reserve e fa’atautaia ai Kosi eseese e siitia ai tofiga mo e ua agava’a ma tatau ona siitia pe a maea kosi fa’apenei. O lona uiga o le ala lea ua fa’amau fa’ailoga ai le aso na fa’atula’ia ai le USArmy Reserve i so’o se nofoaga o lo ua fa’amautu ai tatou vaega au fa’aagaaga nei.

O le toavalu o sui ua lisia nei, ua fa’amaonia ua siitia fo’i o latou tofiga e galulue ai i le SGT.

Ua mautinoa lava e i ai loa se avanoa o le pulega e ao ina fa’atumu i le Lala o le tatou Vaega Au Faaagaaga i le atunuu ona taualoa loa lea o le galulue o nei sui i o latou tofiga fou.

O le fa’amalo i nei vasega o fitafita galulue o le tatou Vaega Au Fa’aagaaga, ma ia manuia fo’i le atoaga o le 114 tausaga o le USArmy Reserve.

TUSI E TAOFIA AOGA MANUMALO BAPTIST ACADEMY - A’E A’OGA IA ME 02.

Ua fa’ailoa mai na matua oo atu uma fa’atonu e to’alua, Motusa Tuileama Nua o le DOH ma Samana Ve’ave’a o le Homeland Security a le tatou malo, e fa’ao’o atu i le pulega a le Manumalo Baptist i Malaeimi le tusi e taofia ai le fa’aauau pea ona faia o aoga a lea a’oga.

E ui ina fa’ailoa mai e Trish Peau, o lo’o mulimulita’ia uma aiaiga o le Covid-19 i nei vasega e faia fa’apitoa mo le fanau o lo’o ua manana’o matua e fesoasoani i a latou fanau ona o le vaivai i aoga e faatautaia i laina feso’ota’i tau tafa’ilagi.

“O loo tausia le le silia ma le 10 tamaiti i vasega ta’itasi e aofia ai ma le faia’oga. Ua fa’amama ia lelei atoatoa potu o faia ai. O lo’o nonofo fa’avava le fanau aoga. Ona o lo ua loto matua ma talosaga mo se fesoasoani mo fanau ia mafai ona malamalama lelei i mataupu ua a’oa’oina i potu a’oga, ae ua le malamalama ai pe a faia i a’oga i luga o laina feso’ota’i tau tafa’ilagi, lea ua faia ai nei vasega fa’apitoa.” 

Toe pau le fa’afesili o lo ua tatau ona tali lelei mai, pe ua i ai se tamatiti a’oga ua maua i le covid-19 ona o lo’o pesia mai le faleaoga? O le tali ua tuuina mai, e leai se tamaititi ia maua talu mai ona talia mai le talosaga sa fa’auiu atu i le Komiti Faafoe ina ia faia aoga i potu aiga mo le fanau o lo ua iloga ua vaivai i aoga ona o le fa’atautaia mai o aoga i luga o upega tafailagi.

Ua fa’ailoa manino mai e Ms Peau, “Ua mae’a ona taua’ao mai le fa’atagaga a le Komiti Fa’afoe i le matou talosaga, aua o lo’o usita’ia uma lava aiaiga o le fa’asa o lo’o fa’amamaluina. Ia nonofo valavala, ia le silia ma le to’a 10 le fanau a’oga ma le faia’oga i le potu e tasi, ia fa’amama auiliilia le potu a’oga ma isi nofoaga uma e malolo i ai le fanau ma tausasami ai fo’i i taimi uma o aso ua faia ai lesona nei.”

Pau lava le faatonuga tuusa’o o le Faasa lea ua solituina e le Manumalo, o le taofia lea e le faia ni a’oga i potu aoga. Peita’i ua mae’a taliaina le talosaga a le manumalo e le Komiti Fa’afoe.

O lea la ua mae’a taua’aoina le tusi ma ua fa’amamafa atu ai fo’i ma le ituaiga sala e mafai ona fa’amalosia e totogia e le Manumalo pe a fa’aauau pea ona solitu le aiaiga lea o le fa’asa o le Covid o fa’amamaluina.

Ua fa’ailoa mai o le talosaga a le Matagaluega o A’oga a le tatou Malo na fa’aulu ai le latou fuafuaga fa’ataoto i le faiga e faia ai a’oga pe a toe a’e aoga i le aso 02 Me, 2022.

Ona o le manatu fo’i i fanau o le a fa’ai’uaso mai vasega 8 ma i latou i vasega 12 o lenei tausaga a’oga. Ua i ai le fa’atulagaga ua mae’a pasia mai fo’i e le Komiti Fa’afoe ina ia taofia le fanau aoga i vasega uma o le ECE seia oo i le vasega 4 o a’oga tulaga muamua, e faia pea latou a’oga i luga o laina fesoota’i tafa’ilagi.

O le vasega 5 se’ia oo i le vasega 8 o aoga tulaga muamua, o le a feauaua’i mai i vasega i potu a’oga ma vasega i luga o laina feso’ota’i tafa’ilagi i isi aso o le vaiaso. Tolu aso mo a’oga i potu a’oga, ae lua aso o a’oga i upega tafailagi.

O le a fa’amama lelei potu aoga uma, o le a le silia ma le 10 le fanau a’oga i totonu o le potu a’oga ma ia nonofo fa’avava i latou i taimi o vasega i potu aoga. O a’oga maualuluga, e a’e uma lava i latou e pei ona fa’ailoa atu tolu aso i potu aoga, ae lua aso i a’oga i upega tafailagi, ma o le a auaua’i fo’i le fanau i avanoa i potu a’oga.

O lona uiga, o se isi lava mea mautinoa, o lo ua aga atu nei le Malo ina ia tatala aoga a le fanau ia Me 02, 2022 ua leai lava la se suiga tele e toe tau tapunia ai le a’oga a le fanau i le Manumalo, pe a taga’i totoa i le mana’omia ona fesoasoani faia’oga i le mana’omia ona fa’amalalama lelei le fanau a’oga i a latou mataupu o tauavea i a’oa’oga.

FOA’I LE SOFIAS AUFAIGALUEGA LBJ MEDICAL CENTER  - TAUSIGA MAMA A’O GALULUE

O  le fa’aiuga fo’i o le vaiaso ua te’a, na oo atu ai sui mamalu o le SOFIAS latou te taua’aoina le latou foa’i taua o mea taumafa mama, vaiinu suamalie ma fagu vai manino. 

O lenei fo’i o le a aoga tele lea i le tausiga o le tino o le aufaigaluega a le Falema’i tele i Faga’alu a’o feagai i latou ma tiute fai i le tausiga ma le tau togafitiga o le mamalu o faataotolia o latou gasegase i le LBJ Medical Center.

O i latou na oo ane o nisi o sui iloga o le Laulauafono a le SOFIA i lenei tausaga, o le tamaitai fo’i o lo’o tutulai e fa’aauau tiute o le Tausala Lalelei a le SOFIAS. O i latou na ua fai ma sui o le Sosaiete O Fa’afafine I Amerika Samoa e fa’ao’o atu lea foa’i tele. Ua iloga ona tele le pusa Saimin ma le Pusa o apa sosisi nini’i e fa’aopoopo i le Saimin mo sina fa’asiliga malosi ao fa’atino tiute, fa’atasi ai ma pusa apainu ma pusa vai manino.

O le afioga le CEO o le falema’i Moefa’auo Bill Emmsley sa fai fo’i ma sui na te talia ma le fa’afetai tele le foa’i taua. Sa ia faailoa atu ai, “O le agaga o le fa’afetai e talia ai ma le fa’aaloalo lenei alofa tula’i ua taua’aoina e outou. Ua le tasi ae ua lasi lava ni foa’i e faia e le tou Sosaiete malosi mo le falema’i ma isi fo’i vaega o le malo ma le atunuu lautele. Tau ina ia fa’amanuia atu le Atua ia te outou uma o totino o le SOFIAS ma le tou fa’alapotopotoga atoa.”