TALA I VAIFANUA

Pago Pago - AMERIKA SAMOA

23 I LATOU MALILIU I LE COVID-19

Na tapunia galuega o le vaiaso ua te’a i le aso Tofi, ua fa’amauina le 21 e ua maliliu ae 5,602 i latou ua mae’a maua ai le Verusi o le Coronavirus, pe’ita’i e toe a’e mai galuega ae ua faaopoopo mai le maliu e to’atasi ua atoa ai le to’a 22 o e ua maliliu i le Covid-19, ma le aotelega e 5,647 i latou ua mae’a maua i le fa’ama’i i le atunuu.

O le tama mulimuli lea ua fa’amauina i le maliu lona 22 e 92 tausaga le matua, ma e tele isi gasegase o le tama ae ua fa’aopoopo atu i ai ma lona toe po’ia i le Covid-19.

O le maliu lona 23 o le tina lea e 90 tausaga le matua  na maliu o ia i le aso 18 Aperila. Ma e i ai gasegase tumau ole tina sa talavai ai, ae o lona po’ia ai fo’i i le Covid-19 lea ua maliu ai loa o ia. E le’i faia ni ona tui puipuia.

Ua faamauina le aotelega o e ua maua i le Coronavirus ua atoa le 5,647 i latou ae o le to’a 4,965 o i latou na ua mae’a toe malolosi mai le covid-19. 

VAITAU O LE ESETA - VAITAU ALOFA E FOA’I ATU

O le vaitau o le Eseta - e ua te’a atu - o le vaitaimi foi lea o foai alofa ma isi o lo’o manomia.

Foa’i a le GiveLight i Aiga Pagatia - faliu le Malo foa’i mo i latou le $50,000. mo latou Foa’i Fa’aauau: O nisi o fa’alaotopotoga ae maise lava o le Hris Ledoux Foundation, ua avea i latou ma fa’aola totoga i nisi o aiga, e ta’i $50. mo le totogia o le pili ASPA ina ia mautinoa o mumu le moli ma sapalaia le Eletise ma le Suavai Taumafa Mama i aiga i le vaitau nei ua taofia galuega ona o le faasa o le Covid-19.

Peita’i ua logotala le Malo i lona fa’auluuluga, ma ua foa’ia mai ai e le Malo i lea fa’alapotopotoga GiveLight le $50,000. ina ia mafai ona latou fa’aauau le galuega lelei ua latpu fa’atno. O le Fa’alapotopotoga lenei, e le o se fa’alapotopotoga e fa’atupe e le Malo, poo se vaega o le Malo, pe fa’atuina fo’i ina ia maua ni tupe faasili, ae ua fa’atula’ia ina ia fesoasoani atu ma avatu se fa’amalosi’au i nisi o lo ua i ai le mana’omia. O se fa’amanatu i le soifua sa ola ai le atali’i Christian Ledoux Foeiletini o Pago Pago.

Ua fa’ailoa mai o le vaega tupe ua toina mai ai lea meaalofa a le Malo i le GiveLight e ala mai i le CARES Community Block Grant o le polokalama a le CSBG e fa’afoea lea e le Matagaluega o Fefa’ataua’iga a le tatou Malo. E fa fa’alapotopotoga lea ua aofia uma i le GiveLight, Christian Ledoux Foeiletini Foundation, Easter Generation a le VOCFG, Agency for Better Living ma le Rotaract Club o le Rotary Club of Pago Pago.

Fa’aalia le agaga fa’afetai tele o le fa’auluuluga o le tatou Malo, le afioga Kovana Lemanu PS Mauga faapea ma le Sui Kovana Talauega Eleasalo Ale ona o le agalelei ma le alofa fa’atino i aso uma, ua afua ai ona foa’i ma le loto i latou ia mafai ona fa’amama avega i nai aiga ua lima vaivai ona o le fa’asa o le Covid-19.

Foa’i a le Kalapu o le Liona i le Falepuipui na matua iloga ona la’u atu i Ta’avale:

O se tasi o Kalapu fai mea mafai ma le agalelei i le atunuu, ua latou foa’i ma le loto alofa i le mamalu o pelega ma e o nofosala  ma tuli fa’asalaga i le To’ese i Tafuna. 

Ua le gata i mea taumafa ae ua fa’apea fo’i ona la’u atu ai ma vaila’au ma mea uma e fa’amama ai nofoaga o lo’o nofosala ai i latou i aso ta’itasi. Ona o le fa’ailo o lo’o nofosala i latou, masalo o se isi lea mea e le manatu muamua ai le auaunaga i nei sui, ae peita’i, o le fa’amagaloga e a le Atua ia, ae o i tatou i lalo nei.

O le Peresetene o le Lions Club o Pago Pago Pauga Joey Cummings, sa avea ma sui mamalu e fa’aoo atu lenei fesoasoani tele mo i latou uma o lo’o nofosala i le To’ese.

“O le matou o mai ai, ina ne’i matou le manatua le auau o le aso lenei o le a fa’ailogaina i le atunuu, Eseta o le Alofa Moni. O le Kalapu a le Liona i o latou sui totino uma, ua latou iloa le mana’omia o mea nei ua taulimaina, o mea’ai fa’atasi ai ma vaiinu fa’atasi ai ma le sapalai eseese o mea e fa’aaogaina e fa’amama ai tino ma nofoaga o outou, o uso, tuafafine, tama ma tina o fanau ae maise o uo peleina o lo’o nofosala. Ina ua logotala i le a’afia o i ai nei, tasi lava le agaga ua tula’i ai ma fa’atino le poloketi o le Alofa Moni, e fia foa’i, ia mautinoa ua usita’ia le auau o le Eseta. Ua fa’afetaia le agaga fia foa’i o le Kalapu, ma ua outou va’aia i le taimi nei lea fa’atinoga o le alofa. Ua fa’ailoa atu fo’i e Cummings, ua le gata i tagata o tino o le Liona lenei foa’i, ae ua fa’asaga mai ai ma pisinisi ua logotala i lo outou mana’omia.”

O le Malu o le Malo Capt Matuu sa avea ma sui o Leoleo o le TCF sa ia talia ma le fa’afetai lenei fesoasoani tele mo i latou uma o lo’o taofia i le nofoaga o sala.

Ua va’aia ua ese lava le foa’i tele o mea’ai eseese ma vaila’au eseese e oo i fasimoli ma mea manogi uma, ae ua aofia ma lavalava fou ma le tele o mea e fa’aaogaina e tamaitai o lo’o nofosala ua fa’aopoopo atu i le foa’i tele. Ua le ma faitaulia le tele o pupuni fofoga ma isi oloa masani mo le fa’amamaina o tino ma lauao o mea’ai mama mo le fofoga taumafa fa’avai’aiga ua mae’a tapena fa’afafine to’aga e le Kalapu ma a latou pa’aga. E silia ma le 400 o alo ua mae’a tapena fa’ameaalofa mo sui ta’ito’atasi o taofia, ma o se fa’amanatu, ia e faimeaalofa atu ma lou loto atoa.

O pa’aga mo lenei foai e aofia ai, le Pacific Independent Distributors, Fagaima, Manu’a’s Store ma le TMO Wholesale.

Poloketi Fa’a- Iesu i le Itu i Sisifo o le Motu: 

E i ai se tina palagi ae ua ia fa’atama faia nisi o alo Samoa, ae nonofo i latou i se tasi o afio’aga i le falelima i sisifo. O le tina sa nonofo ma se tasi o tama Samoa, peita’i ua toe o ia ma le fanau Samoa lenei.

Ua logotala le ali’i faipisinisi e ona le Tool Shop Peter Crispin ma le faipisinisi o Billy Young i le mana’omia o i ai le tina ma le fanau, ua matua tutulu ina ua ele ma pala apa o le latou falenofo. O le fa’aiuga o le vaiaso na te’a nei, na matua vaaia ai nei ali’i faipisinisi ma nisi o sui na ofo fo’i a latou tautua fa’atino ai le fa’afouga o le taualuga atoa o le fale nofo o lenei tina ma le fanau.

I le tina ua le manatu ina ia fa’ailoa le suafa, ua na’o na tu ma tagi i loimata o le fiafia ma le fa’afetai. E soifua lava le Atua alofa i so’o se ala i totonu o le atunuu, fa’afetai i le foa’i alofa, fa’afetai e le’i alo fofoga o le Atua Soifua ile tatalo a lea tina mo se fesoasoani.

O sapalai uma e fa’atino ai le galuega lenei sa foa’ia lea mai pisinisi a nei tama e to’alua, ae ua foa’i fo’i le taimi ma le agaga fiafia o nisi o a la’ua pa’aga sa fa’atinoa le galuega ma e fa’aauau pea lea faiga se’ia mae’a maota o lo ua mae’a fa’amauina e tatau ona fa’amae’a.

Ua iloga mai le fa’afetai a le tina, o le a momoe fiafia ma si ana fanau i le Eseta 2022, aua o le galuega ua faia, ua malu ai i latou mai timuga i soo se taimi.