TALA I VAIFANUA

Pago Pago - AMERIKA SAMOA

225 AGAVA’A MO PENEFITI A LE AUFAIFAIVA - MAI LE CARES ACT:

O le aofaiga o i latou ua mae’a taua’aoina atu i ai siaki mai le Cares Act e fesoasoani i o latou faiva o Tautai o le Gataifale, e to’a 225 i latou i le ulua’i vaega ua fa’amanuiaina nei a latou talosaga mo lea vaega tupe.

Manatua fo’i le tumutumuga sa solo atu i le Ofisa o le Vaomatua ma le Gataifale e fa’amautu atili o i latou o e fai faiva, lea la ua maua le fa’amanuiaga e le toa 225 o i latou ma o lo ua tatalia fo’i le isi fa’asalalauga poo ai ae to’a fia fo’i nisi e fa’asolo mai i le tufatufaga lona lua.

O i latou nei ua agava’a e tusa ai o aiaiga uma na sailia ai e le NOAA talosaga sa fa’aulu atu, o le mea mautinoa e to’atele lava nisi o le a le agava’a. E to’atele nisi o le a le mauaina nei alamanuia mo le au faifaiva sa talosaga mai ai.

O le aso Faraile ua te’a na maua ai nei fa’amanuiaga, ma ua selesele tonu fo’i le ‘au Faifaiva o le atunuu i lea alamanuia aoga tele mo le vaitau tonu lava ua fa’asa ai ona feoa’i solo le atunuu ona ua laveia nei i tatou e le Covid-19.

O nisi o mea ua mautu i ai le filifiliga tonu o e ua agava’a i lenei alamanuia, ua fa’ailoa mai ai, “E ao ina e fa’ailoa patino atu e ala i fa’amaumauga le fa’aitiitia na’ua o le tele o au fa’agotaga ma i’a na maua mai ai e tusa ma le 35%. E tatau ona fa’ailoa atoatoa i au fa’amaumauga lea tulaga, mai le aotelega o ou faiva i le taimi ua lofia ai le atunuu ona o le Covid-19 ma ona fa’asa i le amataga mai ona tau puipuia le teritori mai le fa’ama’i. O le a fa’atusatusa lea vaitau i au fa’amaumauga o le lima tausaga o muamua atu nai lo le vaitau o le Covid-19.”

Ua toe fa’amautu atili mai e le DMWR o lo’o i ai le tufatufaga lona lua o lo’o fotua’i mai, ma o talosaga lava ia na fa’aulu i le tausaga 2021, mai le alagatupe lava lea o le Consolidated Appriations Act 2021.

O le alagatupe lea e mafai ona fesoasoani ai i taagta faifaiva ua a’afia le latou fofoga taumafa sa masani ona fa’amoemoe i ai ona o le Covid-19 ma lona fa’asa i le tausaga e 2021.

I le taimi nei o lo’o aiaia fo’i le fa’aaogaina o le alagatupe lava lea e tasi mo le tausaga 2021, afai e mae’a lelei lea aiaiga e fa’atulaga mai e le NOAA ona fa’atautaia loa fo’i lea o talosaga mai le au faifaiva, ma e fa’alauiloa atu lava taimi e fa’atumu ai nei talosaga mo lea fa’atupega.

E mafai fo’i e i latou ua mae’a talosaga ma tali leleia a latou talosaga i le fa’atupega ua tufatufaina nei ona toe talosaga soso’o mai i lea fo’i alagatupe ua toina fa’alua mai mo le 2021 CARES Act.

FUAFUAGA MO TAGATA FAIGALUEGA I PISINISI

Ua fa’ailoa e le taitaifono o le Komiti Fa’afoe o le Covid-19, Talauega Eleasalo Ale, o tagata faigaluega sa le maua ni a latou siaki totogi i le vaitau o le fa’asa o le Covid-19, o le a latou maua se vaega tupe e totogia sa’o mai e le Malo o Amerika Samoa ona o le latou afaina a’o fa’amalosia le fa’asa i le tausaga lenei, mai ia Fepuari 22, 2022.

Ua le gata i lea, ae ua manatu fo’i le Malo i le vasega o pisinisi sa fa’aititia itula e tatala ai ma nisi o pisinisi sa fa’amalosia a’ia’i ona tapunia a latou tautua mo le mamalu lautele, ma o nisi o lo’o fa’aauau pea lava ona tapunia nei. O i latou nei ua fa’asinotonu i ai le fesoasoani a le Malo.

O lo ua nafa nei ma le Ofisa fa’apitoa mo le tupe fa’asoa o le ARPA a le Malo ma aiaiga e fa’atulaga i ai talosaga fa’aulu mo se fesoasoani i nei vaega e lua, ona fa’ato’a matala mai lea o le fesoasoani lenei mo ni talosaga e taua’aoina mai ai i e ua agava’a. 

E tusa ma le $2M i le $3Miliona le tupe fa’asoa o le a fa’aagaaga mo lea fa’amoemoe, ia fesoasoani i tupe fa’asoa mo le latou tamaoaiga tausi ona o a’afiaga mai le fa’asa o le Covid-19.

Mo pisinisi lava latou ua i ai le tupe fa’aagaaga a le BRCP lea e fa’atautaia e le Matagaluega o Fefa’ataua’iga, ma e $4miliona ua mae’a fa’atulaga mo lea fesoasoani i pisinisi ua lisia i luga.

O lo ua fa’ailoa mai le vaevaega, ua amata mai le $10,000. i le $25,000. mo pisinisi laiti lea ua mae’a fa’ailoa atu. Peita’i mo pisinisi e maualuluga atu latou tinoitupe o talosaga mai e ao ina fesoasoani ai i le latou lusi mai le fa’asa, o le a fa’auia i le isi polokalama ua fa’atulaga tau nogatupe e fa’atautaia e le Faletupe o Atina’e i le atunuu, fa’apea ma le Faletupe o le Teritori o Amerika Samoa.

SIAKI LAFOGA TOTOGI ASO FARAILE UA TE’A

Pe afai e te le’i oo ane i le aso Faraile ua te’a e talia lau siaki lafoga, ua tatau loa ona e  siaki lau pusa meli, poo le fa’amalama fo’i o le Ofisa Dispursing a le Malo i le EOB, aua ua mae’a fa’aalu e le Malo le $1.1miliona mo lafoga totogi a le atunuu na faila mai ia Fepuari 2, 2022. 

Ua fa’ailoa e le Matagaluega o le Tupe a le malo, o le lona tolu ai lenei o vaega o lafoga totogia o tagata faigaluega uma i le atunuu ua taua’aoina mai.

Mai le aotelega mo le tufatufaga i le aso Faraile ua te’a ua aofia ai le vasega o Siaki o Lafoga a le Fanau e faaalu ai le $803,326. ae o lafoga totogia tagata faigaluega taitoatasi ua fa’aalu ai le $308,479 ma ua maua ai le aotelega lea e $1,111,825.

Ua na’o le 267 i latou ua mafai ona totogia mai latou alfoga na faila mai i lea vaega tupe ma ua fa’atulaga lava le mea e maua ai lau lafoga i le ala ua e manatu e tatau ona fa’auia atu ai lau lafoga. O nisi ua tuusa’o i le teugatupe i faletupe, o nisi ua lafo atu i le pusa meli le siaki ae o nisi ua mana’omia ona taua’ao atu i le Ofisa o le Dispursing a le tatou Malo i Utulei.

Sa fa’amanatu mai lava ina ia usita’ia uma tulaga o le fa’aaogaina o pupuni fofoga pe afai e te uia laina uumi e faatalitalia ai lau lafoga, pe o le oo atu foi i le falemeli mo lau lafoga ma fale tupe foi pe afai o fa’auia atu i faletupe lau siaki lafoga.