TALA I VAIFANUA

Pago Pago - AMERIKA SAMOA

1,565 FA’AMONIA MAUA COVID-19 E O’O MAI IA MATI 20

O le lipoti a le Matagaluega a le Soifua Maloloina ua fa’ailoa ai e o’o mai ia Mati 20, Aso Sa, o le aotelega o latou ua fa’amonia ua maua i le COVID-19 e 1,565.

I lea aso ua na o le LBJ Medical Center sa avanoa ai le faia o suega ona sa tapunia galuega a le Matagaluega o le Soifua Maloloina ona o le Aso Sa. 

Ua faituaina pea le mamalu o le atunu’u e faia  tui puipui o le COVID-19 ma faia suega pe aafia i le COVID-19. 

Mo nofoaga e faia ai tui puipui ma suega o le COVID-19 telefoni i le 219. 

Ma o lo’o fa’aauau pea galuega fou ua ofoina mai nei, ua malaga atu foma’i e asiasi i Ma’i Fa’ataotolia i o latou aiga ina ia tautuaina i latou i tui ma siakia i latou e faia suega o le Covid-19.

O nisi o mana’omia le fesoasoani i le feavea’iga o i latou e mafai ona vala’au i le laina 219 mo le fesoasoani a le DOH ina ia fa’auia ane le aumaga ma le pulenuu e iloa le nofoaga tonu o le latou aiga, e fa’ao’o ane ai le latou auaunaga.

SIITIA TAU O LE KESI UNLEADED I LE ATUNUU

O le faatulagaga o le totogi poo le tau o le Suau’u ma ona Oloa Tau Suauu e aofia ai le kesi o ta’avale ma isi masini tetele uma i le atunuu ua iloga ai ona siitia le tau o le Kesi ta’avale ituaiga o le Unleaded talu mai Mati 15, 2022 ile pamu kesi mai le $4.19 se’ia oo i le $4.30 i le Kalone e tasi.

O faamaumauga o fuainumera mai le Ofisa o le Pulega o le Suau’u ma Oloa tau Suau’u i le atunuu poo le ODPM, ua fa’ailoa mai ai, ua fa’atagaina e le latou ofisa pamukesi i le atunuu e mafai ona latou fa’atau maia le kesi i le mamalu lautele e afua mai le $4.19 i le $4.30 i le kalone e tasi.

O le tau ua i ai nei le totogi o le Kesi Unleaded ma le Kiso ua matauina ua siitia lea mai le tau sa i ai i le amataga o le masina, Mati 01, 2022 i le 0.29 sene i le kalone e tasi. O le tau sa i ai ae le’i toe siitia nei sa $3.79 - $3.88 i le Kalone e tasi. O lo ua mafai ona fa’atau maia e le Pamukesi i le mamalu lautele le totogi o le kalone e tasi pe a mae’a ona latou fa’ae’e i lea tau le totogi o fefa’ataua’iga ma mea uma e a’afia ai, fa’atasi ma le totogi o ana tagata faigaluega.

Ua fa’ailoa mai fo’i e le tamaitai fa’atonu Lisa Tuatoo, “Ua afua lenei siitaga ona o lo ua siitia uma fo’i le totogi o le suau’u i le lalolagi i ala o fefa’ataua’iga. E le gata i lea ua taofia nei le suau’u mai Rusia ona o le latou osofa’ia o Ukraine, ma ua atili ai la ona tau le leava le suau’u fefa’ataua’i i totonu o malo eseese o le lalolagi, ua a’afia ai fo’i ma le tau o le suau’u i Sigapore ma le latou suau’u lea tatou te fa’atauina mai.”

Ua mae’a sainia nei e le Peresetene o Amerika, Joe Biden, Ia Mati 08, 2022, le feagaiga ua tamau ai le fa’asa ona toe fa’atauina mai e Amerika le suau’u ma isi fo’i oloa eseese mai Rusia, o se gaoioiga fa’atino ma fa’amalosia mai e le UNO mo latou totino uma, ona ua le usita’ia e Rusia nisi o feagaiga e le tatau ai ona latou sofa’ia se nofo saogalemu o nisi o Malo e vaivai atu lo latou tamaoaiga tausi nai lo malo tetele ua mae’a fa’amauina e le UNO.

“Peita’i e matele lava le si’itaga lenei i le tau ua fefa’atauai ai nei e Sigapore le latou lava suau’u, O lo ua mataituina a’ia’i fo’i e le tatou pulega nei se tulaga ua fa’aaogaina ai lea a’afiaga le tulaga le lava o le suau’u i le lalolagi , ma ala e siitia ai le totogi o le suau’u ma le kesi mai lea malo. E le mafai ona tatou sofa’ia le saolotoga o malo e fuafua tatau ai le totogi o latou oloa fa’atau mai i maketi i fafo, peita’i e i ai lava ala o fefa’ataua’iga ma latou aiaiga e mafai ona fa’amaite ai se fa’afesili ina ia le a’afia lea si’itaga o le tau o le suau’u ona ua matauina se ala e mafai ai ona fa’aaoga le avanoa e si’itia ai totogi o le suau’u mo atunuu laiti e pei o i tatou,”o se tala lea a Tuatoo.

Ua faafetaia e Tuatoo le tofamanino ma le tofaloloto i le kovana sili, Lemanu Peleti Mauga, ona o lo’o ua feutaga’ia lava se tau e mafai ona fesoasoani ai i le mamalu lautele ia le matua pagatia i le tau o le suau’u ma oloa tau suauu lea e aofia ai kesi va’alele, kesi ta’avale i le kiso ma le unleaded ma isi.

“O le totogi o lo’o ua tuuina mai i tagata Amerika Samoa ua i ai le feagaiga mautu e fa’atau atu aie le tatou malo ina ia le so’ona maualuga e pei o isi uma setete o le Iunaite Setete o Amerika. O le ala lea e fa’aigoaina ai o le MAP. O lo’o tauavea e le malo le isi vaega o le tau o le suauu mo le kalone e tasi, ina ia maulalo le tau mo le lautele.”

Ua matauina fo’i, ua taugata mai le suau’u ma le kesi ta’avale afi i isi setete uma o le Iunaite Setete e aofia ai Hawaii lea ua $5.00 i le kalone.

FA’AAUAU FAILA FUA LAFOGA, OFISA O LAFOGA

Ua fa’ailoa fa’alaua’itele mai le toe amatalia fo’i o le auaunaga a le Ofisa o Lafoga a le malo mo le mamalu lautele o le atunuu ina ia faila latou lafoga o le tausaga ua te’a ma nisi tausaga ua le failaina ai lau lafoga.

O le aso Gafua na te’a nei sa toe amatalia ai talu mai ona tapunia galuega a lea Ofisa o le Malo ona o le aiaiga ma le fa’asa o le Covid-19 i le atunuu.

Itula e tatala ai lea tautua e amata mai le 8:am i le 2pm Aso Gafua, aso Lua ma Aso Lulu, le tatala mo le Aso Tofi ma le Aso Faraile.

O le nofoaga e faia ai o le Ofisa Lafoga i le EOB Maota o le Malo i Utulei. Fa’amamaluina le fa’avava mamao ma ia faia pupuni fofoga i taimi uma. Leai ni fanauiti e talia ona susu atu ma se matua i le nofoaga lea.

Na’o le to’a 10 taagata e alaalata’i e faatali avanoa e faila ai lafoga. Ua faia lenei tulaga ina ia mafai ona usita’ia e le Ofisa o Lafoga a le tatou Malo le aiaiga ua mae’a fa’amamaluina mo le faasa o lo’o tatou o soifua ai i lenei vaitau o le pepesi ai o le Covid-19 i le atunuu.