TALA I VAIFANUA

Pago Pago - AMERIKA SAMOA

FA’AOPOOPO TAGATA MAUA COVID-19 

O le aso Gafua Mati 07, 2022 na faia ai suega e 657 ma e to’a 49 ua fa’amaonia ua maua i le Covid-19. Pe afai e tuufa’atasia ma le faitauga sa i ai, ua maua le aotelega e 291 ua a’afia i le verusi Covid-19 i Tutuila.

Ua leai ma se tasi o le to’a 49 lenei ua taofia i le tatou falema’i faapitoa mo gasegase Covid-19, ua fa’anofoesea uma i latou i o latou aiga mo le 14 aso, ma faia mai ai lipoti o le fa’agasologa o le latou maua ai i le Covid-19.

Pe afai ua e silafia se tasi ua maua i le Covid-19, e mafai ona e fa’ailoa atu lou alofa e ala i le avatu i ai o sau fe’au fa’amalosi e ala i laina feso’ota’i o le Facebook, emeli ma isi, ae ua fa’amolemole atu, aua e te taumafai e te oo i ai. E mafai foi ona e faia se fa’atauga ma molitai i fafo ane o le faitoto’a o le latou fale, ma vala’au i ai i le telefoni e fa’ailoa i ai lou alofa ua molita’i atu i ala o feso’ota’iga ua talia i lenei vaitau.

Ua tula’i mai le 80.7% o le atunuu ua mae’a faia latou tui puipui o le Covid-19. 

LEAI SE FA’AIUGA MO GALUEGA A LE STAR KIST - I AI SUIGA O LE FA’ASA LANU MUMU

Ua fa’alauiloa i le aso Gafua e le Loia Sili, Falefatu Alailima Utu, “O lo’o fa’asaina lava ona faia ni fa’atasiga faitele i le atunuu, peta’i ua i ai nisi o mea ua faia ai se suiga, ina ia mautinoa ua mafai ona tufatufaina atu nisi o alamanuia mo le mamalu lautele o Amerika Samoa.”

“O le tufatufaga o pepa e talafua ai mea’ai a le fanau aoga, lea ua fa’atulaga mo le aso, faapea ma le tufatufaga o pepa mo mea’ai a le Food Stamps ua tatau fo’i ona faia mo le mamalu o lo’o agava’a ai.”

Peita’i e le’i faia se fa’aiuga a le Komiti Fa’afoe e tusa ai o le tatala o galuega i le StarKist Samoa.

“Pe afai e faia se fa’aiuga a le Komiti Faafoe e tusa o le tatala ai o galuega a le Star Kist, e matua fa’amamaluina lava le faia o tui puipuia uma o le aufaigaluega e fa’amalosia fo’i ma le Booster mo i latou e ao ina faia i le taimi nei tui na ma isi uma tulafono ua fa’amauina e tatau ona usita’ia mo le vava lalata o tagata faigaluega i soo se taimi i le galuega ma fafo.”

“E ese mai lea e ao ina faia suega i taimi uma e moomia ai, fa’aaoga fufulu lima ma isi uma aiaiga faapena ia mautinoa e le sasao fa’aafi le fa’ama’i aua e to’atele na’ua tagata i le nofoaga e tasi pe a talanoa loa i le tatou Kamupani lea. O le fa’aaoga o pupuni fofoga o le mea ua masani ai i latou uma mai lava i le amataga ma e fa’afetaia le aufaigaluega lenei aua e matauina lava le usiusita’ia e i latou o tulafono uma na.”

Ua mautinoa e fa’ailoa mai se fa’aiuga a le Komiti Fa’afoe i le talosaga lea a le Star Kist Samoa i le fa’aiuga o lenei vaiaso.

Ua toe fautuaina lava le atunuu, ia utagia mai le soona feoai ma tafafao i ta’avale i luga o le alatele. Ia o atu e faia tui puipuia ma faia fa’atauga, ae ia le umi le taimi o tuua aiga. Ua salalau i le ea le verusi ma ua maua lava soo se tasi pe a le faia le pupuni fofoga i taimi uma, ua oo lava i lotoifale o aiga, pe afai ua i ai se tasi ua fa’ataletale, faaaoga pupuni fofoga.

Ua fa’ailoa mai, e i ai se suiga i le umi e tatala ai pisinisi i se taimi foi o le vaiaso nei, faapea ai ma le taimi e tatala ai pamu kesi mo feoa’iga ia mautu le kesi o ta’avale. Ua i ai le fa’amoemoe o le a umi fo’i taimi e tatala ai feoa’iga i ta’avale la’u pasese.

I pisinisi uma e tatala mo fefa’ataua’iga ma tautua eseese, ua fautuaina ina ia tatala e faigaluega tagata e tatau lava ona moomia i le galuega, ae taofia uma le isi to’atele o le aufaigaluega i aiga.

FA’ALAUILOA LBJ AIAIGA TAGATA E LE’I FAIA TUI COVID-19

E oo mai i le afiafi o le aso Gafua na te’a nei, e le’i fa’ate’aga lava gasegase e to’afa ua mae’a taofia i le falema’i mo gasegase Covid-19 i le LBJ Medical Center i Fagaalu.

Peita’i, ua fa’ailoa mai e le susuga le foma’i Dr Akapusi Ledua, “O lo’o manuia lava i latou e to’afa, e le o iloga mai ai ni foliga tigaina e pei ona taofia ai, ina ne’i tupu mai. Ua faavasega lava taimi e tuuina atu ai le okesene e fa’aaoga mo i latou, ma e leai se tasi ua fa’aaogaina tumau ai le ventilator poo le masini okesene.”

Mai le to’afa lea ua taofia nei, e to’atasi lava le sui ua mae’a faia tui puipuia e lua o le Covid-19, ae o leisi toatolu e le’i faia ni tui puipuia.

“O le aiaiga ua i ai nei a le falema’i telei Faga’alu, pe afai o le a e maua mai i le Covid-19 ma taofia ai oe, afai e le’i muai faia ni ou tui puipuia o le Covid-19, e mua’i faia ou tui ona fa’ato’a e te’a ai lea i tua mai le falema’i,” o se faamatalaga lea a Dr. Ledua.

“Ua matua fautuaina lava le mamalu o le tatou atunuu, ina ia o ane e faaaoga le auaunaga o lo’o faia pea e foma’i ma tausima’i a le DOH, ia fai tou tui puipuia mai le Covid-19. Afai ae sau se tasi ua maua i le Covid-19 ae le’i faia se tui puipuia, e fa’amalosia le faia o lona tui puipuia muamua e tusa o le lua vaiaso talu ona fa’amaonia lona suega ua maua ai i le Covid-19. Afai la ua te’a i tua ae le’i faia le tui lea i le aso atofaina, e toe oo lava sui o le DOH i le fale o le gasegase lea ina ia faia ai lona tui muamua ma toe fa’asolo foi e faia le tui lona lua.”