TALA I VAIFANUA

Pago Pago - AMERIKA SAMOA

243 AOFAIGA MAUA COVID-19 - 3 VAIASO TALU ONA A’AFIA LE ATUNUU

Mai le 77 suega na faia i le aso Sa na te’a nei, ua faamaonia ai le to’a 12 ua maua ai verusi o le Covid-19, ua maua ai ma le aofaiga o e uma ua fa’amaonia le i ai o verusi Covid-19 e 243. Ua atoa fo’i le tolu vaiaso talu ona fa’amamalu le fa’asa lanu mumu i le atunuu.

Ua lalamua nei Tafuna i le tele o e ua maua ai verusi o le Covid-19, 51 ua tula’i mai ai, Nuuuli e 37 ma Leone e 12. Talu mai lava le vaiaso muamua, sa na’o le itu i sisifo lava o Tutuila sa maua ai tagata i le verusi, peita’i ua sosolo atu nei i nisi o afio’aga i sasa’e o le atunuu. Mai Failolo se’ia pa’ia Alao, ua i ai nei le fa’ama’i Covid-19, ua le maua mai se isi mai Aunuu ma le Manu’atele. O le to’a 77 lea o sui sa faia suega, o i latou na o’o atu i le falema’i i Faga’alu.

Ua fa’amauina fo’i le to’afa o sui ua fa’amautu pe taofia nei i le falema’i i LBJ Medial Center, i le itu ua fa’apitoa mo gasegase Covid-19, ae le’o lisia mai i latou o tigaina tele, e le’o i ai se suiga tele ia i latou talu mai ona taofia.

O i latou ua fa’amaonia ua maua i le Covid-19 ua fa’anofoesea i latou i o latou aiga.

Ua tima’ia fo’i i latou uma ina ia fa’autagia, ia nonofo lelei i o latou aiga, ma ia le feso’ota’i atu i isi sui o latou aiga.

Mai le to’afa ua taofia nei i le falema’i, ua fa’ailoa mai e Dr. Ledua, ua taofia ona o lo ua tino matutua i latou ma e i ai nisi o latou gasegase ua mafua ai ona moomia lava ona va’avaaia toto’a e foma’i i taimi uma.

O i latou e to’afa e aofia ai le le 37 tausaga le matua, ua mae’a faia ona tui puipuia e lua ae le’i faia le Booster; tama e 82 tuasaga o le soifua; e lei faia ni ona tui puipuia; tama e 102 tausaga o le soifua ae leai fo’i ni ona tui puipuia ua faia; ma le tina matua e 63 tausaga o le soifua e lei faia fo’i ni ona tui puipuia.

Ua iloga mai o lo’o ua solosolo manuia lava i latou uma nei.

1,504 AOFAIGA O TUI PUIPUIA FAIA MATI 03, 2022

Ua iloga mai le naunau o tagata ina ia faia o latou tui puipuia i le luluti mai ai o le a’afia o le atunuu i le Versi o le Covid-19.

Lea ua fa’amauina mai le aotelega o tui na faia mai nofoaga e tolu i le atunuu i le 1,504. O nofoaga e tolu, Samoana Gymnasium, Tafuna DYWA ma le Catholic Hall i Leone. O le aotelega e 1,249 o tui na faia mai nei nofoaga uma e tolu o tui Booster.

O nisi sa le mafai ona oo i ai le tautua, ona ua ta le taimi e tapunia ai ae le’i oo i ai le fa’asologa. O i latou na sa fa’atonuina e sili ai ona fa’agasolo i le tuiga lea sa faia i le aso Toona’i Mati 05, 2022 i le Malaeva’alele, ae afai e te oo ane e faia sou Booster ia taua’aoina lou pepa fa’amaonia o ou tui puipuia.

TIMA’IA LE MALO FESOASOANI PISINISI TAU ATINA’E

E ui ina ua lutia le atunuu i le Covid-19 ma ua taumafai atili le malo ina ia toe faamama le atunuu mai lea fa’ama’i, pe fa’amalosia fo’i le atunuu ina ia mafai ona ola ma le Covid-19 e lotolotoi ai e pei lava o isi gasegase uma ua a’afia ai tagata lautele o le atunuu, ae ia alofagia e le malo, le isi itu atoa o le ‘Tautauina o Ona Tagata.’

O se aioiga lea a le tamaitai Faipisinisi Ella Gurr i sana saunoaga e tusa o le fa’amamaluina o le Fa’asa Lanu Mumu i le atunuu ona o le Covid-19 ua sofa’ia le saogalemu o tatou tagata.

O Ella Gurr o le tamaitai Peresetene lea o le Pago Pago Trading Company, ma sa ia fa’auia atu se emeli i lana afioga le Taitaifono o le Komiti Fa’afoe o le Covid-19 i Amerika Samoa, o le afioga fo’i lea i le Sui Kovana o le tatou Malo, Talauega Eleasalo Ale. O lana talosaga ona o le vave tapunia lava o pisinisi, pe mafai ona fa’aumiumi teisi atu le taimi e tatala ai faitoto’a o pisinisi.

Ona o le limiti lea o le taimi e tatala ai pisinisi mo a latou tautua e fa’atautaia, ua mafua ai ona tapunia atu ma mou atu ai lava ma le tele o pisinisi.

Ua talosagaina nei e Gurr le fa’amatuu mai o le ARRA funds na fa’atulaga mo fesoasoani i pisinisi tumaoti ina ia mafai ona talosagaina atu ai e pisinisi ni a latou alagatupe fesoasoani i lenei vaitau o le fitaituga ai i le Covid-19 ma lona fa’asa lanu mumu o fa’amalosia nei.

Ua talosagaina foi le feso’ota’iga ma le matagaluega o Fefa’ataua’iga a le malo ina ia tatala mai mo nei talosaga uma aua ua mae’a fa’atulaga mai le $9miliona mo pisinisi ae $1miliona mo totogi o e faigaluega mo lea fa’atupega ina ia mafai ona fa’amatuu mai i pisinisi uma ua oia ona o le fa’asa lanu mumu o le Covid-19.

Ona o l’o’o fa’amamaluina le fa’asa lanu mumu, ae tatau lava ona faamatala mai se auaunaga i laina feso’ota’i tau tafailagi e fa’aulu atu ai nei talosaga a faipisinisi ina ia le motusia latou tautua ma fa’aitiitia itula e faatautaia ai, ma le toe gafatia ai lava e pisinisi ona toe tatala latou tautua mo le mamalu lautele.