TALA I VAIFANUA

Pago Pago - AMERIKA SAMOA

85 TAGATA FA’AMAUINA MAUA I AI VERUSI COVID-19 

O le fa’aiuga o suega na faia i le aso Gafua Fepuari 28, 2022 ua fa’amaonia mai ai le to’a 20 o i latou ua maua ai le verusi. Mai le aso Sa, Fepuari 27, na faia ai su’ega e 103 ma fa’amaoni ai le na’o le to’alua ua maua ai verusi o le Covid, oo mai ai le tuufa’atasiga i le 65 tagata ua a’afia.

Mai lea to’a 20 e to’a 18 i latou ua mae’a faia tui puipuia o le Covid-19. Mai le aotelega sa i ai, ua maua ai nei le to’a 85 o i latou ua fa’amaonia ua i ai le verusi o le Covid-19 i le atunuu.

O le aotelega o i latou ua maua i le Covid-19 ua o’o i le 85 le faitauaofa’i - e pei ona fa’aalia i se lipoti a le Matagaluega a le Soifua Maloloina o le 8:30p.m. i le aso Gafua, Fepuari 28.

I le taimi nei, e leai se tasi ua taofia i le falema’i, ae ua fa’anofoesea mai lava lea aotelega i o latou lava aiga mo le 14 aso. O i latou uma fo’i o sui o aiga o lo’o nonofo fa’atasi ma nei tagata ua fa’amaonia ua i ai le verusi, ua avea ma nisi e ao foi ina faatautaia ai suega aua ua nonofo fa’atasi ma feso’ota’i ma le sui ua fa’amaonia ua a’afia.

O le fa’amalosiga o le faanofoesea o nei sui i o latou aiga, ua va’ava’aia e le Matagaluega o le Saogalemu Lautele, fa’atasi ai ma. le Ofisa o Mataupu Tau Samoa.

I le taimi nei ua tulai mai le aotelega o e ua maea faia tui puipuia o le Covid-19 i le 80.4%. 

FAUTUAGA MAI FOMA’I

O nisi nei o mea e mafai ona taula i ai lagona ma mafaufauga o le mamalu o le atunuu i nei aso ua fa’amalosia ai le Fa’asa Lanu Mumu o le Covid-19 i le atunuu: Manatu alofa ia te oe lava ma le isi ou uso a tagata, taumafai e va’ai toto’a i mea e te fiafiae faia mo oe lava ia, aua o lea ua lava le taimi. Tausia lelei lou soifua maloloina lelei.

Fa'aaoga so’otaga fa’ainiteneti ma telefoni e feso’ota’i ai ma aiga o i fafo ma i’inei fo’i ona o lo ua faamamaluina le faasa lanu mumu. Ia fa’alava lau malologa lea sa matua tau leai se taimi e tu’ua lava mo oe a’o le’i a’afia le atunuu i le Covid-19.Ona o lea ua tau le maua se fealua’i, tausami mea’ai paleni ma fa’atele i mea taumafa mama. Fa’atino nisi o galuega sa tuua lava e le faia ona o le tele o le pisi i galuega i aso faisoo.

Fa’aosofia lou gaua’i e kuka mea’ai manogi i lou aiga. Afai sa e le fiafia i lea taleni, taumafai loa e avea ma se tasi o mea e te faia i lou taimi ua avanoa nei. Fa’atele lou naunau e te fia iloa atili i le fa’ama’i ua mafua ai nei ona tapunia le malo mo le lua o vaiaso. Faitau ma fa’amasani lou aiga i mea e ao ina faia, ia le feoma’i ai lagona ona ua le feoa’i solo e pei ona masani ai.

A i ai nisi fa’afitauli poo fa’amatalaga e fia malamalama ai atili, ae maise nofoaga e faia ai tui puipuia ma suega o le COVID-19, telefoni DoH i le 219 pe taga’i i le latou Facebook page. 

TALAVAI FA’ATULAGA – AE FA’AMAMALU LE FA’ASA LANU MUMU O LE COVID-19

Ua i ai aiaiga tamau e ao ina silafia e le mamalu lautele o e fia maota gasegase mo talavai. Ma ia tatau ona i ai pepa fa’amaonia o le talavai. E uia mai o le ER e i latou ua mae’a tuutaimi lou va’aiga o le foma’I ona toe fa’asino lea i le fale’ie e alaalata’i ai a’o fa’asolo gasegase.

O mea masani lava e mua’i faia o le fa’amauina lea o le maualuga o le toto ma faitauga masani o lou soifua maloloina mo le silasila i ai ole foma’i o le a e va’aia. E faia ai i’ina ma lau suega o le Covid-19. Afai e fa’amaonia lau suega ua ia te oe le verusi o le Covid-19, e fa’atonuina loa oe e te alu i le fale ma faanofoesea mo le 14 aso. O le sui e mama mai le verusi o le Covid-19, e faasolo atu e va’aia le foma’i.

O i latou o le a fa’amaonia le maua ai le verusi, e i ai le galuega o le a faia ia te oe, a’o e le’i malaga i le fale. E muamua lava ona toe fa’atalanoa oe ma sailiili mea sa e i ai, o lou aiga ma le aofai o e o mau fa’atasi ma oe, a’o le’i molita’i oe i lou aiga e fa’anofoesea ai. O le a latou toe fa’atulaga se isi aso mo oe e te va’aia ai le foma’i mo lau talavai sa tatau ona faia i lea aso.

MICHAEL SUN TALIA U.S MILITARY ACADEMY WEST POINT

Ua fiafia tele le ali’i talavou o Michael Sun o le South Pacific Academy, ua talia lana talosaga e ulufale ai I le US Military Academy o West Point.

O Michael Sun o le alo muamua lea o le atunuu sa talosaga mo avanoa fa’apenei, ua talia mai e le West Point i lenei tausaga ma ua iloga mai, ua leva ona sauni Sun mo lea avanoa.

Ua saunoa fo’i le afioga le Sui Faipule o Amerika Samoa i le Konekeresi, Uifa’atali Amata, “Ua ou fiafia tele e fa’ailoa atu le sui muamua o Amerika Samoa sa fa’aulu lana talosaga ua talia a’ia’i mai ele West Point, Michael Sun. Ua ausia uma e ia agava’a sa mo’omia mo lona lea avanoa i le US Military Academy. E mautinoa ua saunia lea alo o le atunuu mo lona lumana’I e aotauina ai i nei tomai fa’ata’ita’i, ma o se matati’a fo’i sa ia galue malosi i ai ina ia ausia. Fa’amalo tauivi i le atalii Michael Sun ae maise o le tapua’iga mau i matua o lenei alo o le atunuu.”

O matua o lenei alo o le atunuu o ZhenDong Sun ma LiDong Zheng, na amata mai lava a’oa’oga uma a Michael Sun i le South Pacific Academy.

Ua matauina e maualuluga lava togi ua ausia e Michael Sun i ana a’oa’oga maualuluga i le SPA, ma ua faapea fo’i ona maualuluga ona sikoa io le SAT ma le ACT.

E ese mai le tulaga maualuluga o togi ausia i kosi tau’avea i a’oga maualuluga, ua fa’asili foi ona taga’i nei ituaiga o avanoa i sui ua latou fa’ataua auaunaga e faia mo le atunuu lautele, ma isi uma ituaiga o fa’atinoga eseese e fa’amautu ai lona iloa fa’aaoga tatau le taimi. Ua va’ai fo’i i lona auai i nisi aoaoga fa’apitoa ua ia fa’atinoa, lona auai i ta’aloga ma avea ma ta’ita’i lelei i fa’alapotopotoga o tamaiti aoga sa auai, ma isi ma sa ofo atu ai lana tautua e aoga agaga mo le mamalu lautele o le atunuu.