TALA I VAIFANUA

Pago Pago - AMERIKA SAMOA

FA’AAUAU LE ATUNUU FAASA LANU MUMU COVID-19:

I le afiafi o le aso Sa na te’a nei, sa fa’alauiloa ai e le afioga le Kovana Sili, Lemanu Peleti S. Mauga i le televise le fa’auauina pea mo le isi vaiaso o le fa’asa o le Lanu Mumu o le Koviti-19. 

I lana saunoaga lava lea sa ia mua’i fa’afetaia le atunuu i le fa’autagia mai o le mua’i fa’asalalauga ina ia nonofo filemu le atunuu i le Fa’asa Lanu Mumu o le Covid-19 i le vaiaso atoa ua te’a. Ua fa’apea fo’i ona ia fa’alalolalo mai i le vasega o le ‘au faipisinisi ma Kamupani eseese o lo’o tautuaina le atunuu i so’o se ala o fa’atino ai latou auaunaga.

“Ua mautinoa, efa’amoemoe fo’i le tatou faigamalo atoa o Amerika Samoa ia te outou i tautua eseese o lo’o outou  fa’atinoa mo le mamalu lautele o le atunuu. E le faigofie lenei vaitau ona o le a le o gatusa le futia ma le umele i le fa’asoasoaina o le tamaoaiga saili ona o le fa’asa ua fa’amamaluina nei.”

“Peita’i, afai ae le sapaia a’ia’I e le atunuu lautele lenei talosaga ina ia nofofale ma ia fa’aaoga alalava e tolu ua fa’atonuina e puipuia ai i tatou mai leneifa’ama’I pipisi, o le a fai fua lenei galuega, ae le mafai ona mautu ai le tatousaogalemu mai le Covid-19.”

“Ua ia fa’ailoa mai, e oo mai i le fa’aiuga o galuega i le aso Sa ua tula’i mai le aotelega o e ua fa’amaonia ua i ai le verusi i o latou tino i le 63. Mai lea to’a 63, e i ai nisi e le’i faia lava ni tui puipuia o le fa’ama’i Covid-19, peita’i, e na’o le tolu lava mea ua fa’atulaga mai e mafai ai e i tatou uma ona toe fa’afo’i Amerika Samoa i le tulaga mama mai le fa’ama’i lenei, fai o ou tui puipuia o le Covid-19, faaaoga mai pupuni fofoga i taimi uma ma le fa’amama lelei o tatou lima ma nofoaga e nonofo lelei ai ma fa’avava mamao mai lefeso’ota’i ma isi i nofoaga faitele. E mautinoa e tumama lava o tatou tagata, o le ala lea o le fa’amamafa o le tolu o mea na,” se toe tima’i le a le kovana.

“O nisi o tatou tagatanuu, e le o manana’o lava i latou e faia ni o latou tui puipuia, talosaga atu, ia alofa i le isi ou uso o lo’o naunau ina ia le po’ia i lefa’ama’i ma iu ina maumau le soifua, poo lau fanau fo’i ma fanau a lau fanau, manatu ia i latou na.”

“Mai fa’aiuga ma fa’amaumauga ua maua mai e le Komiti Fa’afoe o le Covid-19 ma le vasega i foma’i fa’apitoa mo fa’ama’i pipisi fa’apenei, ua taumafai ai foma’i ina ia latou faia mai ai ni fa’aiuga e mafai ai ona taofia vave le toe pipisi ma le sasao fa’aafi o le Covid-19 i le atunuu, ma ua mafua ai ona toe fa’aopoopo mai le isi vaiaso e tatou te nonofo ai pea i le Fa’sa Lanu Mumu o le Covid-19. O nisi aiaiga uma o le Fa’asa lea o le a fa’ailoa mulimuli atu pe a mae’a solaupule i ai le Komiti Fa’afoe o le Covid-19 i le atunuu.”

Fa’ailoa e le kovana,  ua fa’atulaga le aumalaga a le Feterale i ona vaega eseese o le a faato’ai mai i se aso o lenei vaiaso, ma o i latou e malaga mai e fesoasoani mai i galuega o lo’o fa’atautaia ina ia fa’aitiitia le sasao o le Covid-19 i le tatou atunuu.”

I lana toe tima’iga, ua ia fa’ailoa ai, “E le mafaia e le Malo se mea e faatino ma gafatia ona ausia le fa’amoemoe, pe afai e le gaua’i mai i ai finagalo o le atunuu atoa. E mana’omia ona tatou loto gatasi, galulue fa’atasi i le manatu e tasi, e ausia ai e i tatou mea o fa’anaunau i ai.”

O le fa’aauauga o le Fa’asa Lanu Mumu, o le a tapunia uma lava tautua a le Malo mo le isi vaiaso atoa sei vagana ai I latou e fa’atautaia tautua e fesootai ma le Covid-19. O le a tapunia aoga uma e o’o i a’oga tuma’oti, ae o le a tatala pisinisi mai le itula e 5:00 i le taeao se’ia oo i le itula e 4:00 i le afiafi. O le a fa’apena fo’i ona tatala feoa’iga i ta’avale la’u pasese i itula ua fa’ailogaina mo pisinisi. Taofia feoa’iga uma a le mamalu lautele i le itula e 9:00 i le po.

FAATONU O LE ASDOE – LE O LAVA AU’UPEGA MO A’OGA LAINA FESOOTAI A LE INITENETI

O lo ua to’atele matua ua fa’asea ona o lo ua leai ni mea faigaluega e fa’aaoga e latou fanau e faia ai latou lesona i upega tafa’ilagi e pei ona moomia ai i lenei vaitau ua lutia le atunuu i le Covid-19.

O le polokalama lea na amata afuafua ina ua fa’aolioli mai le fa’ama’i Covid-19 i le atunuu talu mai le 2019. Na mae’a taua’aoina fo’i konekarate i Kamupani na malo i le tauofoga ina ia latou sapalaia mai le ASDOE i masini e moomia ona faaaoga mai e fanauiti se’ia oo i fanau i a’oga maualuluga, e fa’atino ai le fa’amoemoe, o Aoaoga i Laina Fesoota’i Fa’aIniteneti.

Ua oo mai la ina lutia le atunuu i le taimi nei, ae lei tofu umia e le fanau a’oga a le atunuu ni a latou mea faigaluega nei e aofia ai Ipad, tablets ma Laptops.

I le fonotaga faapitoa a le au faasalalau ma le susuga le Fa’atonu o A’oga i lenei vaitau, Talauega Samasoni Asaeli, ua ia fa’ailoa manino mai ai, “E le lava lea sapalai o nei masini e tatau ona fa’aaoga e le fanau a’oga uma i le teritori i le taimi nei.”

Ua ia fa’ailoa mai, “O tulaga o femalaga’iga o va’a oloa e la’u mai ai uta o nei oloa moomia, o le tasi lea fa’afitauli o lo’o ua feagai pea lava ma le matagaluega. E na’o le 1000 Chrome Books ua taua’aoina mo a’oga tulaga muamua ma ua mae’a ona tufatufaina atu.

Mo Aoga Maualulouga ua tatau ona faaauau le tufaina atu o le 8,800 laptops i le masina nei o Mati. Ua mae’a fa’amuamua le avanoa mo nei tautua i le vasega o fanau fa’ai’uaso i lenei tausaga.

Ua fa’ailoa mai fo’i, ua leai ni tufatufaga o mea’ai a le fanau i le taimi nei mai le SLP.