TALA I VAIFANUA

Pago Pago - AMERIKA SAMOA

TULA’I MAI AMERIKA SAMOA – FA’ATULAGAGA LONA TOLU COVID-19:

Saunoa le afioga le sui Kovana, Talauega Eleasalo Ale, o le ta’ita’ifono o le Komiti Fa’afoe o le Covid-19 , “Ua tula’I nei Amerika Samoa I le fa’atulagaga lona tolu o le feagai ai ma le fa’ama’I Covid -19’ Mai le tulaga muamua sa taumafai ai e fa’afo’ia mai tatou tagata sa opea mai fafo ona o le sofa’I malosi mai o le fa’asa o femalaga’iga ona o le Covid-19; lona lua o le taumafaiga lea e fa’afo’I femalagaiga masani; ae o le taimi nei, o le a tatou ola fa’atasi ma lu’iga o le Covid-19.

“Ua mae’a fa’ailoa atu I le mamalu lautele nofoaga uma ua faia ai suega o le Covid-19, e te le tau fa’atalitalia se laina umi, e vave lava ona fa’atino lau suega ma e silafia lelei ai, pe o ni auga e fa’alogoina ua maua ia oe le verusi o le Covid-19 pe leai.”

Ua ma’ea fa’atulaga e le Soifua Maloloina nofoaga e faia ai tui o le Koviti-19 ae maise suega o le Koviti. Telefoni i le 219 mo aso ma taimi e tatala ai nei nofoaga. 

TIMA’I  LEMANU – “ LE ATUNUU E, O E FAI TUI PUIPUIA O LE COVID-19”

O le aso Gafua ua fa’ailoa mai ai fa’alaua’itele e Kovana Lemanu Mauga i le atunuu, ua tamau nei le fa’amamaluina o le “Fa’asa Lanu Mumu” ona i ai le mamalu lautele o le atunuu ua pesia mai i le verusi o le Covid-19.

E ese mai nei mea uma ua fa’atulaga atu ina ia tausisia e tagata uma, ae ua i ai ma le tima’iga matua taua lava, “I latou e le’i faia lava tui puipuia o le Covid-19, alofagia ia faia loa i lenei vaitau aua o le taimi tonu lava lenei sa mafua ai ona talosagaina le gaua’i o le atunuu ia malu puipuia. Manatu mamafa ma le alofa i le isi ou uso a tagata i pesia, tigaina ma I’u ina maumau le soifua, pe afai ae lutia fa’atasi uma tatou ona ua e fa’atamala ma ua le faia ou tui.”

O le fa’asa, ua amataina nei e o’o atu ia Mati, 01, 2022. Pe afai o le a mana’omia ona toe suia nisi o aiaiga o lenei fa’asa, e toe fa’alauiloa atu i le mamalu lautele o le atunuu. Ua fa’apena fo’i i le umi o le taimi e fa’amamaluina ai le fa’asa.

FAUTUAINA EKALESIA AOAO AULOTU EFKAS ONA O LE CODE RED

I se fa’aaliga fa’alauaitele ma ile failautusi aoao o le EKFAS, ua fautuaina ai le mamalu o le ‘aufaigaluega ma ‘aulotu uma o le EFKAS i Amerika Samoa nei, ina ia faautagia le faailo ua aumai e le Malo o Amerika Samoa mo le nofo puipuia o le atunuu mai le faama’i o le koviti i le Code Red.

E fautuaina le faagafua o sauniga lotu uma ma potopotoga uma faale-Ekalesia, mai le aso 22 o Fepuari, e tau atu i le aso 1 o Mati.  Mo sauniga lotu i le Aso Sa, e fautuaina le faia o lotu a le aiga lava ia, pe faaaoga le upega tafailagi e faasalalau atu ai sauniga i tagata lotu.  

Ia mulimulita’i i fautuaga mai le Matagaluega o le Soifua Maloloina mo le nofo puipuia mai le faama’i.  “Ia tatou nofo tatalo mo le atunuu atoa,” ose vaega lea o le fa’aaliga. 

KAMUPANI MO FA’AMAUMAUGA - CARAT SPACE LLC

Ua tatala nei faitotoa o le Kamupani Fou mo  Faamaumauga Taua o le Carat Space Pasifika LLC i le atunuu. O se lala o le Kamupani a le Carat Space mai Washinton DC. O le susuga David Alaga, o se alo e fa’asino i le susuga Pulu Ae Ae Jr mai Pago Pago, ae ua fa’apa’aga ma le susuga ia  Kapil Padwal. 

“O lenei taumafaiga ina ia mafai ona fa’aititia atili le so’ona vevesi o lagona o e faimalaga mai, aua ua malutia i o latou aiga. Ua fa’aitiitia atili ai fo’i le alagatupe fa’aalu a le malo i le totogi ai o nofoaga fa’anofoesea ai malaga uma o gasolo mai, ma i’u ai lava ina tatala lelei tatou feoa’iga,” o se fa’amalamalamaga lea a le susuga Alaga.

Ua ia fa’ailoa, o le latou polokalama e na’o le tasi lava le ala e mafai ai ona faauia mai fa’amaumauga, ae e mafai ona tele ona fesuia’iga e mafai ai ona mautu atili fa’amaumauga e fe’avea’i ai. E i ai foi aiaiga e ao ina mua’i fa’amautu ma aiaia lelei lona fa’aaogaina, ma ua iloga e aoga i le taumafaiga ia le so’ona sasao le Covid-19 i le tatou atunuu.

O Alaga sa mua’i tautua i le atunuu o se Inisinia o le Polokalama o Telefoni sa fa’aaogaina e le ASTCA ae le’i malaga i fafo i le amataga o le vaitausaga 2000. O lona aumau ai i Washington DC lea sa ia feso’ota’i ai ma Kapil Padwal.

“O lo ua tele lava polokalama ua fa’aaogaina i le vaitau lenei o le Covid-19, ma e tele fo’i luiga ae maise lava i o tatou atumotu o lo’o ua fa’ato’a tau amata ona fa’amasani i le fa’aaogaina o feso’ota’iga tafailagi mo mea uma e oo i fa’atauga ma feso’ota’iga tau femalaga’iga ma isi tautua uma. Ua manatu i ma’ua, o se taimi lelei lenei e mafai ai ona fa’aaoga se iloa ua maua, e tautuaina ai o tatou tagata lautele i nei tautua aua e le o faigaofie ona fa’aofi lona lavelave i matua matutua o le atunuu, o i latou ia o lo’o avea ma faamuamua i o tatou auaiga uma. O le taumafaiga ina ia mafai ona avea fo’i i tatou i Amerika Samoa ma se so’otaga mautu i fa’amaumauga feso’ota’i feavea’i fa’anatinati i ala o upega tafailagi i le Pasefika atoa,” o se tala toto’a lea mai le susuga Padwal.

O lo ua faamautu nei lea pisinisi i le Samoa Sports i Fagatogo ma e mafai ona e fesoota’i ma lea pisinisi i le upega tafailagi [email protected] poo le uepesite caratspace.com.