TALA I VAIFANUA

Pago Pago - AMERIKA SAMOA

TATALA FALE FA’ANOFOESEA COVID-19 - MALAEVA’ALELE I TAFUNA

O le aso Faraile ua te’a na faatautaia ai se sauniga mamalu e tusa ma le 45 minute le umi e tatala aloa’ia ai le Nofoaga fou mo le Fa’anofoesea o tagata ulufale mai, ia mautinoa e le o malaga mai ma ni a’afiaga o le Covid-19. O se tasi lea o galuega tele a le Malo ua fa’atautaia nei, e fa’aaogaina ai latou vaega tupe na fa’amatuu mai mo galuega e puipuimalu ai le atunuu mai le a’afia i le Covid-19.

O le Fale fa’apitoa lea mo e fa’anofoesea ua fausia fa’afogafalelua, ma e 36 potu ua mae’a fa’amautu ai. O le fogafale muamua ua fa’atulaga ai potu e 14, e aofia ai ma le ma ua aofia ai se potu fa’apitoa mo galuega fa’atausima’i e tapena ai latou galuega fai i aso uma mo e o fa’anofoesea. 

O lo’o ua aofia ai fo’i ma le fale e taina ai tagamea, o le Umukuka atoa ua mae’a fa’aau’upegaina mo le gaosiga o taumafa ma le tufatufaina atu i sui uma o fa’anofoesea. O lona vaega mulimuli o le potu e faafeiloa’ia ai le mamalu o e gasolo atu mo le fa’anofoia o lea maota. O le fogafale lona lua ua fa’amautu ai le aotelega o potu e 22 ma e fa’a’ea malulu uma nei potu ua maea fa’auia i ai le televise ma initeneti, telefoni ma nai umukuka laiti mo le fa’aaogaina e le mamalu e gasolo mai ma faamautu ai. 

O lo ua i ai moega matagofie ma e tofusia lava le potu ma lona faleta’ele, ua matua foliga mai lenei nofoaga o se faletalimalo ua lava tapena ina ia fa’afiafiaina le mamalu o le atunuu pe a fa’anofoesea.

Ua fa’ailoa e le susuga Fa’alavai Ta’ase, sui fa’atonu o le Matagaluega o Galuega Lautele a le Malo, i le taimi na ia taua’aoina atu tusi pasi o lea fale mo lona fa’aaogaina i le Fa’atonu o le Soifua Maloloina Motusa Tuileama Nua, “O le Maota lenei ua matua pasia lelei mo lona fa’aogaina e pei ona manatu ai le malo e talimalo ai mo e fa’anofoesea. Ua ausia uma fo’i nei uma agava’a e lea maota.”

Sa ia faailoa mai fo’i le tau aofai o le galuega atoa e aofia fa’atasi le fale mo e faanofoesea fa’atasi ai lona fa’ameafaleina ua fa’aaluai le $2.5miliona. Na faalauiloa mai fo’i e le susuga Ta’ase, o se ulua’i galuega fo’i lenei na afuafua ma faatuina toe faamae’a leleia, e le faigamalo fou lenei ua tula’i mai.

O le faletua o le afioga le Kovana Sili, Ella Mauga na ia ootia le lipine e ulufale ai le to’atele sa auai ina ia latou maimoaina le galuega ua mae’a lelei ona fa’atautaia e le Kamupani Faufale a le P.J. Construction, lea e faatautaia e le susuga Iupeli Kava. O ia fo’i lea sa fai ma sui o le Pulega ma le Aufaigaluega a le Kamupani Faufale e na te faia se latou toe upu e tusa o le latou galuega tele ua mae’a ma ua matagofie lava.

O se upu fo’i mai le tatou Kovana Sili Lemanu P. S. Mauga sa ia toe fa’amanatu atili atu ai i le mamalu o le atunuu, le taua tele lava o le mua’i faia o tui puipuia o le Covid-19 ina ia malupuipuia muamua lava oe, ona fa’apea fo’i lea ona malupuipuia lou aiga, ma fa’asolo mai ai i so’o se mea e te auai ai, ae mulimuli ai ina malutia fo’i si ou atunuu atoa, ona ua e ola tapenapena e fetaiai ma lenei fa’ama’i pipisi ma le mata’utia.

Sa au le susuga le Matua Pulu Ae Ae Jr e avea ma sui mamalu o le afioga Uifaatali Aumua Amata, le tatou Faipule i le Konekeresi i lea fa’amoemoe ma le to’atele o sui mamalu o le Senate, le afioga le Peresetene ma isi foi afioga i Senatoa sa auai. Fa’apea fo’i le Maota o Sui o le tatou Fono Faitulafono i ona sui tofia sa maua le avanoa lelei e asia mai maimoaina lea atoaga fo’i o lea tautua a le Malo.

Na asiasi uma i latou sa auai e maimoaina potu uma ma fogafale e lua o le Maota mo le Fa’anofoesea, ma ua iloga ai, e matua tutusa lava le tapenaga o lenei galuega ma se faletalimalo o lo’o ua fa’anofoesea ai nei le to’atele o e ulufale mai fafo, ina ia suesueina toto’a pe le o maua i le Covid-19 mo sina vaitaimi ma toe tatala i tua.

E pei ona fa’amautu mai nei, atonu o le malaga lea o loma nei ia Fepuari 17. 2022 o le a tatala ai le fa’aaogaina o lea Maota, peita’i o le a pa’u lea fa’aiuga i le mamalu o le Komiti Fa’afoe o le Covid-19 lea e fa’atautaia lava latou fonotaga i as Gafua uma ta’itasi.

VAEGA MULIMULI - FA’ANOFOESEA MALAGA VA’ALELE IANUARI 27

O lo ua mae’a tatalaina nei i tua le vaega o le aumalaga e toa 189 o le aumalaga a le Va’alele Hawaiian Air ia Ianuari 27, 2022, sa fa’anofoesea i le faletalimalo o le Tradewinds.

O le aumalaga lea sa toe maua ai nisi e to’alua fou lava ua maua ai le verusi i le latou suega lona tolu na faia i le aso Tofi na te’a. Ona o le popolega i le fa’ato’a maua lea o ni verusi i tino o ia sui e to’alua, e tusa ai ma la’ua fa’amaumauga mai i luga o le TalofaPass, ua iloa ai o lo’o malosi verusi lea ua a’afia ai nei sui o le pasese.

O le toe fa’anofo umi ai lea o i latou mo le isi 4 aso ina mafai ona toe faia le isi tui e fa’ailoa ai pe ua leai se tasi o i latou o i ai verusi o le Covid-19. O le tau fa’amautinoaina lava o lo’o malupuipuia pea le atunuu mai le fa’ama’i.

Ina ua mae’a le tuiga i le aso Sa ma ua maua fo’i le tala fiafia i le afiafi i le taimi o le latou fonotaga i luga o le Zoom sa fa’ailoa atu ai loa i le mamalu sa fa’anofoesea ua mafai ona latou o i aiga.

O saunoaga uma o lea feiloa’iga na fa’ailoa ai le agaga faafetai, ma le fa’amalo i le galuega tele o lo’o feagai ai ma le Matagluega o le Soifua Maloloina ma le Malo fo’i i le totogia ai o potu uma o loo alaalata’i ai le mamalu o le Pasese. O le afiafi lava o le aso Sa e ta ane le 8:30 ua mae’a uma i fafo le mamalu o le pasese ma o latou uta.