TALA I VAIFANUA

Pago Pago - AMERIKA SAMOA

39 SUI FA’AMAONIA FA’ATO’A MAUA I LE COVID-19

O le toe tauaofiaga i le Aso Gafua a le aumalaga o Ianuari 27 mai Honolulu, ua fa’ailoa ai le toe soso’o o le isi 4 aso e toe fa’anofoesea ai, mo nisi suega fa’aopoopo o ni isi ua fa’amonia ua maua i le Koviti-19. 

Ua fa’ailoa e le Matagaluega a le Soifua Maloloina i le Zoom ma le au malaga, e 39 i latou ua fa’amonia fa’atoa maua i le Koviti-19. O i latou nei e aofia ai tagata malaga e toa 33 ma le au faigaluega i le quarantine e toa 6 sa i ai i le Tradewinds Hotel.

Ua fa’ailoa e foma’i ma le Matagaluega o le Soifua Maloloina i ona sui mamalu, “O le mana’oga ua i ai nei, ia taumafai ona fa’afetaia’ia le fa’ama’i i le ulufale mai i totonu, ae fa’asaogalemu atoa le atunuu pe a tuuina atu le fa’ama’i e pipisi fa’aafi ai ona ua le taofiofia e i tatou uma i le ulufale mai ai o i tatou i totonu o le atunuu.”

O le aso 11 o Fepuari e ma’ae ai le nofo va’avaia o i latou i totonu o le quarantine - po’o fale nofo vaia ai tagata malaga. 

FEPUARI 04 - ASO TAUALOA KANESA I LE LALOLAGI:

O se feau fa’apitoa lenei sa tuuina mai e le tatou Faipule i le Konekeresi o le Malo Tele, Uifa’atali Amata e tusa ai o le Aso Fa’apitoa mo Taumafaiga uma e tete’e atu i le Kanesa.

“E toeititi lava tofusia aiga uma ma pelega ua gasemalolo ona o le ma’i fita o le Kanesa. O le tala mautinoa, o se taimi sili ona fitaituga lea o le soifuaga pe a oo ina lutia lau folauga i se tala e fa’ailoa atu ai ia te oe ua e po’ia i lea gasegase. O taimi ia o le le mautonu, ae ua na’o opo atu i sui ua a’afia ai, ma tatalo pea i le Atua mo se fa’amafanafanaga ma se to’omaga mautu.”

“Ua tatou iloa ua i ai togafitiga ua mae’a fa’amaonia e aoga i nisi sa mua’i maua ai, ma ua vave faia nei togafitiga ma fa’amaonia ai ua toe fa’aopoopo mafutaga ma taimi e soifua fa’atasi ai ma nisi o tatou pelega sa a’afia i le Kanesa.”

“Peita’i, o le galuega sili ona vave ona fa’ataunuu e i tatou uma, o le fa’alauiloa atili lea o auga, o lea fa’ama’i ma taumafai e va’ai patino i ala eseese ua mafai ona fa’ailoa atu ai i le atunuu mea e mafua ai ona a’afia i lea ma’i tiga ma le faigata.”

“A vave iloa ma susu a’e le sui i ana talavai, ona vave lea ona silafia o le fa’aletonu ma vave faia ai togafitiga, o le ala sili lea o le vave ona faia togafitiga, e mautinoa ua tele ai le avanoa e toe togafitiga le Kanesa i tagata ua po’ia ai,” o se fa’apupulaga le a Uifaatali.

Ua fa’afetaia e le tatou sui i le Konekeresi le galuega mae’ae’a a le vasega o foma’i o lo’o galulue punoua’i i le togafitiga ma le suesueina lelei o gasegase o le atunuu.

“E matua fa’afetaia le galuega faifai pea ma le fa’amaoni a ali’i ma tamaitai foma’i, tausimai aufaigaluega i Ofisa eseese o le Maota Gasegase ma le Matagaluega o le Soifua Maloloina seia oo lava ia i latou o galulue feso’ota’i ma tatou aiga i tua i afio’aga, fa’afetai mo la outou pitola’au tausi i le taumafaiga e tima’ia le atunuu i fa’ama’i pipisi e oo lava i Gasegase tuga e pei o le Kanesa, Ma’i Suka, Toto Maualuga, Ma’i Fatu ma isi uma gasegase e maua ai le atunuu.”

“Ua silisili ona fa’afetaia le vasega o foma’i, tausima’i ma isi uma ua fa’apitoa le latou tausiga lelei o tatou matua matutua i le atunuu, ua iloga ua siitia i luga le tautuaina o i latou i lenei vaitausaga ma o se mea silisili lea ona lelei. ua iloga ua i ai le vasega o tausima’i fa’apitoa mo tua i aiga.”

ASO 5 FEPUARI - LEAI NI SUEGA UA TOE FA’AMAONIA KOVITI-19 I SAMOA

O se tala fiafia tele ua maua mai nei e le Fa’anofoesea a le malo o Samoa, aua o lea sa i ai pea le fa’aluafesasi ma taofia ai femalaga’iga, e tauau ina fa’ateteleina le sasao a le Covid-19 i Samoa, peita’i o suega uma sa toe faia mo e uma na fa’amaonia suega muamua o maua ai verusi o le covid-19, ua kilia uma, ua leai ma se tasi o toe maua ai se verusi.

O lona uiga o suega na faia fa’afitu ai lea ona faia suega mo aumalaga uma sa taofia ma fa’anofoesea, ua maua mai le tala fiafia ua kilia atoa i latou ma le verusi, ma ua toe tatala fo’i le Malo o Samoa mo a latou galuega ma feoa’iga masani.

O le taimi nei o lo’o fa’anofoesea lava le to’a 31 o i latou sa mua’i maua latou suega ua maua ai verusi i le falema’i nofova’ava’aia o le Covid-19 i le Falema’i o Tupua Tamasese Meaole i Moto’otua. Mai lea to’a 31 o sui nei e taofia mau e fa’anofoesea ua to’a 4 o i latou e fanauiti e i lalo ane o le 12 tausaga le matutua.

25 o nei sui o taofia o e na maga mai Brisbane Ausetalia ia Ianuari 19, ma le to’a 6 o tausima’i sa latou tausia lelei gasegase nei o lo’o fa’anofoesea i le falema’i fa’apitoa mo le Covid-19.

Ua fa’ailoa o pasese nei ua fa’anofoesea o lo’o maloloina lava, e le o iloga mai ai ni auga o le gasegase.

O le isi uma vasega o le aumalaga mai Brisbane fa’atasi ai ma le to’a 200 o le aufaigaluega o loo ta’imua mai i galuega e fa’amautuina ai le nofova’ava’aia ma le siakiga o pasese uma e ulufale mai, ua fa’amaonia le mama uma o i latou mai verusi o le covid-19 ia Fepuari 05, 2022.

Ua fa’ailoa mai e le sui mamalu o le Soifua Maloloina a Samoa, “O le to’ai tonu mai lava o tui mo le tuiga o le mamalu lautele mai Ausetalia, ia Fepuari 01, 2022, ua mafai ona fa’aauauina ai le tuiga o lo’o fa’agasolo nei. O ituaiga tui lea ua oo mai o le AstraZeneca, ma ua iloga ai ona fa’afetaia lea fo’i foa’i tele mai Ausetalia.”

Ua i ai fo’i le fuafuaga a le Malo o Samoa o le a kiliga le tui Pfizer mo le fanau 5-12 tausaga le matutua ma ua i ai se fuafuaga ua mae’a fa’aataoto nei e amatalia lea tuiga i le Kuata Muamua o lenei tausaga.

Ua fa’atulaga fo’i Booster mo le fanau e 12 tausaga ma fa’asolo i tagata matutua ua tatau ona amatalia e fuafua ia i latou na muamua lava faia latou tui puipuia i le amataga o tuiga i le atunuu.