TALA I VAIFANUA

Pago Pago - AMERIKA SAMOA

FA’AMAONIA DOH MAUA I AMERIKA SAMOA LE ‘RSV’

I se pepa o fa’amatalaga, ua fa’ailoa ai e le Matagaluega o le Soifua Maloloina le i ai o le fa’amai o le “RSV” i Amerika Samoa. Ua fa’amonia lea tulaga i suesuega sa faia i le Matagaluega o le Soifua Maloloina ma le Falema’i o le LBJ. 

O le ma’i lea e iloga mai ona auga e fa’faigata ona manava lelei le tagata ua maua ai, e mafua fo’i ona o se verusi ua i fea’avea’ia i le ea. O i latou e tele le afaina ai o le pepe ma tagata matutua. 

O le RSV, o se flu lava i ona auga mai ma ua i ai ona fa’ailo e pei o le: tafe le isu; e fa’asolo ina le lagona se fia’ai; Tale; Fiva; niniva.

Fa’ailoa e le DoH, o le to’atele lava e lelei ona tausia o latou soifua maloloina e matele lava ina toe malolosi mai lea ituaiga o ma’i i le tasi pe lua vaiaso. Peita’i o le ma’i lea e i’u ina maua gofie ai le tagata ua maua ai i le pneumonia ma le Bronchiolitis poo le ma’i tau le fa’a’i i le fanauiti e le’i atoa le tasi le tausaga le matutua.

E leai se togafitiga ua maua mo lenei fa’ama’i pipisi ae i ai mea ua mafai ona faia ina ia mautinoa ua toe te’a ese le ma’i ma oe. E tatau ia te oe lea ua mautinoa ua maua i le RSV e le tatau lava ona e fealua’i i nofoaga tumutumu, ua le tatau ai ona e alu e faigaluega, ma fanauiti e le tatau ai ona o i le a’oga. Nofo lelei i le fale se’ia oo ina le toe fa’alogoina e oe auga ua ta’ua o le fa’ama’i.

Pe afai o le a e galue feso’ota’i ma nisi o matua matutua, fa’apea fo’i ma le fanauiti, e tatau ia te oe ona fa’aaogaina lau pupuni fofoga i taimi uma, ia le a’afia oe fa’apea ma isi i le fa’ama’i lea pe afai e i ai lava se tasi o i latou uma ua amata maua i le RSV.

Nisi o mea e ao ina faia i taimi uma e fa’aitiitia ai le avanoa e te maua ai i le RSV: Fa’aaoga lau pupuni fofoga e punitia ai lou tale ma mafatua mai nisi; Aua nei feso’ota’i ma se tasi ua mae’a maua i le RSV; Fufulu ou lima i le fasimoli mo le 20 sekone; Fufulu i taimi uma nofoaga e masani ona tagofia e nisi.

FA’AAUAU $100 MO FANAUITI 5-11 MAE’A TUI COVID-19:

Ua fa’ailoa e le Malo ma le Komiti Fa’afoe o le Covid-19 ua fa’aauau atu nei le totogia o le $100. mo le vasega o fanauiti 5 -11 tausaga ua maea faia o latou tui puipuia o le Covid-19 ma e muta lea fa’amanuiaga Fepuari 28, 2022.

O le faamanuiaga lenei sa fuafua muamua lava e muta ia Ianuari 14, 2022. Ona o lea fa’amanuiaga e i ai nisi sa le mafai ona mauaina i le taimi na mae’a faia ai latou tuiga mo fanau e 5-11 tausaga le matutua, o lea la ua suia nei le fa’aaliga taua. 

O fanau uma lava na faia tui puipuia o le Coronavirus e mafai ona latou taua’aoina mai pepa tui puipuia ua mae’a faia, e maua ai le latou fa’amanuiaga nei mai le Ofisa o le Disbursing i le EOB.

TOATOLU SUI TOFIA KOMITI FA’AFOE ASGERF

Ua taua’aoina atu nei e le Kovana ana tofiga mo sui fou e to’atolu i le Komiti Fa’afoe o le ASGERF poo le Litaea o Tagata Faigaluega a le Malo.

O le masina ua te’a sa tofia ai e Kovana Lemanu Peleti Mauga sui nei e toatolu ma tuuina atu lana tusi i le Fono Faitulafono ina ia fa’amonia nei tofiga: Malemo Tausaga, le teutupe a le Malo; Pule o le Aufaigaluega a le Ofisa o le Kovana Tauimavave Tauapa’i Laupola; ma Lisa Peau - o se tasi ua leva ona tuatua i le ofisa o aofga. 

O le vaiaso ua te’a sa fa’amonia ai e le Maota Maualuga tofiga mo Malemo ma Tuimavave, ae o Peau o lo’o malaga i fafo. 

Ae sa fa’ailoa e le Ofisa o le Kovana, o le aso 27 o Ianuari na malaga ai Malemo i fafo. 

O le vaiaso lenei o lo’o fuafua e faia ai iloiloga a le Maota o Sui i nei tofiga a le kovana.