TALA I VAIFANUA

Pago Pago - AMERIKA SAMOA

AMATALIA LE POLOKALAMA O PESEGA KERISIMASI A LE ARTS COUNCIL 2021 TESEMA 12-14:

E to’a 42 au fa’afiafia mo le polokalama o Pesepesega o le Kerisimasi 2021 ua fa’atulaga mo le polokalama lea na amatalia i le afiafi ananafi i le Pavilion i le Malaeoletalu i Fagatogo, ma e fa’atautaia lava fo’i e le Amerika Samoa Arts Council.  O le lona 44 ai lea o polokalama faapenei talu ona amata fa’atautaia mai e le Arts Council a le tatou malo lenei fa’amoemoe fa’aletausaga mai lona amataga e amata fa’agae’etia ai agaga i le vaitau fiafia o le tausaga mo le Kerisimasi ma le Tausaga Fou.

Ua fa’ailoa mai  ua mae’a nei ona fa’amasinoina nei aufa’afiafia ma pesepese i le aso Lua Novema 30, 2021, ma ua mautu mai e leai ni autalavou o masi’i mai le Manu’atele e malaga mai mo le fa’amoemoe lenei ma ua vaevaeina lelei e le aufaigaluega ma le pulega a le Arts Council lea aotelega o le aufa’afiafia mo po nei e tolu soso’o. 

Mai le ulua’i mafutaga a le Faigamalo sa faatasia ai mo se ‘aiga afiafi i le Maota o le Kovana i Maugaoali’i, sa fa’afofogaina ai le tuleiga a le afioga le Kovana e tusa o le tausaga atoa o le a fa’ai’uina.

“E oo mai i le taimi nei, o se tausaga fa’amanuiaina lenei tausaga atoa talu ona tutula’i mai le ofisa ulu o le faigamalo fa’ateritori o Amerika Samoa. Peita’i, pe ana le galulue fa’atasi le tatou ofisa nei ma vaega o ta’itasi uma o le malo ae maise i lana fono faitulafono ma le vasega o fa’amasinoga e fa’amalosia le tulafono, semanu e le mafai ona autasia i tatou i nei manuia.”

Ole ‘aiga tele lea mo le Kerisimasi 2021, sa fa’atulaga ina ia auai fa’atasi uma ta’ita’i o le Malo mai ona vaega tumaoti e tolu, le Fa’amasinoga, le Fono Faitulafono ma le Faigamalo.

“Ona o le toe fa’aleleia atoatoa o lenei maota, ua mafai fo’i ona outou maimoaina ma molimauina lona aoga ma le taua, ua mafai ai ona fa’aleleia le fa’avae se’ia oo i ona puipui ma le taualuga, o se galuega matagofie ma le aoga ina ia fa’aleleia pea le Maota Autu o le Taitai o le malo, ina ia mautu lona lelei aua ta’ita’i e soloa’i mai.”

Ua ia faafetaia le vaega sa afuafuaina lenei galuega se’ia oo lava ia i latou na gapatia i le fa’atinoga ia mautu ma lelei le galuega i lona toetoe mae’a lelei ai. 

Sa ia fa’ailoa atu, “O i matou ua na’o ni auauna i le atunuu, ina ia fa’ataunuu tiute e tatau ona faia ia mautu le fa’agasologa lelei o le faigamalo a le Teritori o Amerika Samoa. E tatau ia i matou ona nonofo ma fa’aaoga ma toe leoleoina ma tausia lelei nei aseta a le malo aua isi ta’ita’i e soloa’i mai e fa’aaogaina. O se fa’aeaga e tuu taimi ma e tatau ona va’aia toto’a fo’i ia mautu lelei le maota mo nisi  e mulimuli mai. Fa’afetai i le fa’asoa a le atunuu, ua ma’ua pale e avea ma ta’ita’i i lenei vaitausaga, e fa’aaogaina nei nofoaga taua.”

“Ou te fa’afetaia lo outou va’ai mamao i le soloa’i mai o tausaga ma nofoaiga i lenei maota ma ua outou pasia lelei ai le fa’atupega mo lenei galuega, peita’i, o lea e le’i mae’a lelei le galuega na fuafua ma taumafai ia mae’a ona faia i le Maota. O le tele lava o galuega na fa’atulaga mo le Maota lenei ma le Maota o alaala ai le Sui Kovana, ua mae’a ona faia, ae le’i mae’a lelei uma mea ua fa’atulaga, peita’i o le tele ua i ai nei.”

I lana saunoaga ua ia fa’ailoa mai, “O i ma’ua ma le tofa le Sui Kovana, ua ma’ua iloa e tele lu’iga o le tausaga fou o lo’o fa’aolioli mai, ae ua i ai le fa’amoemoe o le galulue fa’atasi pea o i tatou e tu’umamaina ai ma avea o se tausaga e fotua’i mai ma ona fo’i manuia. Tatou talosia se tausaga filemu ma le saogalemu, tatalo i le Atua o manuia ia tumau ana fa’amanuiaga ae maise i le puipuigamalo o nai o tatou fanau o tautua mamao mai i tafa o taua ma nofoaga o vevesi, alo uma o Amerika Samoa o lo’o fafo ma togi mai le latou ma’a i le tamaoaiga maua o le atunuu.”

“Mai ia te’i ma’ua ma le tina o le atunuu, fa’apea le tofa Talauega Eleasalo Ale ma le Faletua, ia manuia le Kerisimasi ma le Tausaga Fou o lo’o fotua’i mai.”

A’o le’i toe mae’a lana saunoaga sa ia toe fa’atepa le vasega o ta’ita’i uma ua ofaga i le Maota o le Malo Maugaoali’i, i le fa’amoemoe sili o le fa’atasiga, “Pe a outou fa’apea ane pe aisea ua leai ni vaitaumafa o’ona ma le malolosi fa’apea ai ma se fa’atasiga ua fa’asaina le tagofia o le Sikaleti, ona outou silafia lea, o le fa’amamafa ua fa’atula’ia nei, Ia avea i tatou ma ta’ita’i lelei, e usita’ia tulafono tau le tagofia o le Sikaleti ma vaila’au o’ona i so’o se fa’ataisga. Ua fa’asaina nei mea uma i so’o se fa’atasiga a i tatou o ta’ita’i o le Malo o Amerika Smaoa. Tatou taumafai atu ina ia fa’ata’ita’i se soifua e le tagofia vaila’au o’ona ma ia taumafa paleni fo’i i taimi uma, mo le soifua maloloina lelei.”

FA’AMUMUA MOLI KERISIMASI I LE AFIO’AGA O MATUU MA FAGANEANEA - MOLI SAMASAMA:

Ua mae’a molimauina e le to’atele i le atunuu le fa’amumuina aloa’ia o moli auro ma le samasama matagofie o le afio’aga o Matuu, ma sa ta’imua lea fa’amoemoe e le Ekalesia Fa’apotopotoga Kerisiano i Amerika Samoa i Matuu ma Faganeanea lava.

O le susuga le Fa’afeagaiga Rev. Elder Fouvale Asiata ma lana ekalesia atoa sa talimalo mo le sauniga mamalu e toe fa’amumu ai moli emoemo auro o lenei tausaga, ma ua atoa i ai le fa o tausaga talu ona faia lea fo’i fa’atofala’iga i le afio’aga i le vaitau fiafia o tausaga ta’itasi.

Ua le na’o le afio’aga ma le Ekalesia i Matuu sa auai, ae ua i ai latou vala’aulia fa’apitoa e aofia ai le mamalu o le fa’aao o le Malo o Amerika Samoa ma le faletua Le Fofoga Fetalai o le Maota ma le faletua fa’atasi ai ma aufaipese eseese mai isi pulega ma le SOFIAs ina ia latou peseina vi’iga o le sauniga mamalu. O le afiafi o le aso Sa, Tesema 05, 2021 na fa’atautaia ai lea fa’amoemoe taua.

Na auai fo’i le afioga le Ma’opu Soliai Fuimaono Tuipine ma le faletua i lea fo’i fa’amoemoe maualuga, ma o le faletua o le Kovana, Ella Mauga sa ia o’otia le lipine, e tatala ai le fa’amumuina o moli auro samasama i le la’au Kerisimasi tele i lumafale o le Malumalu EFKAS i Matuu ma Faganeanea, ma e fa’asolo moli nei e oo atu lava i Fatu ma Futi.

Ua faatauanau fo’i le lauga a le susuga le Fa’afeagaiga ina ia le gata ai i le fa’amumuina o moli nei le fa’amoemoe o lenei vaitau o le tausaga, ae ia fa’auia atu sau fesoasoani i so’o se tasi ua iloga e i ai le mana’omia i o latou aiga, ma tagata taito’atasi fo’i ua fa’auia i ai e le Atua ou ala i aso ta’itasi.

“Ia tatou ola fetufa’i i manuia o le Atua ua foa’ia mai mo i tatou, aua le ‘alo lau silasila pe afai e te iloa atu lo latou mana’omia i ai. Ia e mua’i fa’amagalo atu i nisi ua sese mai ia te oe ma ia e alofa atu i so’o se tasi.”

O le toe vi’iga na fofogaina e le SOFIAs na iloga ona matua tuuina i luga le fua le sauniga mamalu o lea afiafi, sa matua foliga mai o agelu i latou i lalo nei i o latou siufofoga suamalie ma le matalasi.

FOA’I TAMA TUAI A MARIST CRUSADERS MO LE HOPE HOUSE I FATUOAIGA: $10,000.

O le vaitau o le agaga foa’i, ua fa’atino fo’i e le Sosaiete a Tama Tuai a Malisi Crusaders mo le nofoaga o lo’o tausia fa’apitoa ai e ua tino matutua, o e gasegase fa’apitoa ma e ao ina tausia fa’apitoa i luga o moega. O le foa’i e $10,000. ua taua’aoina lea i le afioga Moseniolo Viane Etuale ma nisi o le Asosi a Tama Tuai a Malisi i le Pulega, Aufaigaluega ma i latou o lo’o nofoia ma tausia fa’apitoa i lea nofoaga taua.

O le afioga le Epikopo Peter Brown, le Pulega ma le Aufaigaluega ma e uma o nofoia le Hope House sa latou tali leleia lenei foa’i ma le agaga fa’afetai.

E le’i mamao atu sa fa’atautaia ai e le Asosi lenei le latou Ta’amilosaga Tapolo e saili tupe ai mo lenei foa’i taua. E ese mai lea sa i ai fo’i le latou fa’amoemoe e fia faia se foa’i mo le fa’aleleia o polokalama fa’atautaia mo a’oga a le fanau o lo’o ao’oga i le Fa’asao Marist High i le taimi nei, e aofia ai ma polokalama tau ta’aloga afeleti ma nisi o galuega fia fa’aleleia i le lotoa ma faleaoga.

O le asosi fo’i lea MBCAA ua mae’a ona latou faatautaia nisi o fesoasoani mo le Laumua e ala i mea nei:

Fesoasoani atili i le aoaoina o fanau i totonu o vasega - 17 le fanau aoga ua mae’a maua lea fa’amalosi’au i aoaoga.

Faia galuega i totonu o le lotoa a le Aoga

Fa’atupe nisi o Polokalama mo Ta’aloga a le Fa’asao Marist High

Fa’atauina nisi o mea faigaluega e fa’aalu ai le $7,000. ma toniga a le Au Football a Malisi

Fa’atupe le ‘au Netball fou a le Marist Crusaders.