TALA I VAIFANUA

Pago Pago, AMERIKA SAMOA

FA’ALETONU LE TAU I MANU’A – FAIGATA ATILI ONA FA’ATINO GALUEGA MO FESOOTAIGA

Ua fa’ailoa e le ASTCA pau le ala o feso’ota’iga o lo’o maua ma le Manu’atele, o le laina o Upega Tafa’ilagi poo le Initeneti, ae motumotu fo’i ma vaivai e le taitai ona atoatoa le malosi’aga o lea sootaga. O lona uiga e le o mafai lava ona maua ni so’otaga ma aiga i telefoni fale, telefoni fe’avea’i ma le televise fou a le ASTCA na fa’atulaia.

Ua to’ai taunuu le aufaigaluega sa moomia mo le galuega toe fa’aleleia o ala uma o feso’ota’iga, peita’i ua fa’ailoa mai e i latou, ua maea faia galuega toe lipea  ole 2 dishes na moomia, peita’i e amata atu le galuega feso’ota’i mo le f’a’aleleia o le so’otaga ma Manu’a ae ua faigata tele ona o le louloua o le tau ma timuga. O le lipoti lea o galuega a le aufaigaluega na fa’atino i le aso Faraile talu ai, Iulai 2, 2021.

O tautua e tolu lea e mo’omia ona fa’aola e fa’alagolago lea i le so’otaga o Dishes nei e luau a mae’a toe lipea.Ua oo mai lava ia Iulai 04, e le o mafai lava ona faia se galuega mae’a lelei mo lea sootaga ona e timuga ma louloua pea le tau. O le tala mai i le aso Gafua, na toe manatu ai e fa’aauau le galuega lenei peita’i ua fa’ailoa mai, ua le maua mai se tala i le aso lea pe na taunuu lea fa’amoemoe.

O lo tumau pea le taumafaiga ina ia maua se feso’ota’iga, peita’I a fai e lei mafai o lona uiga, e le o mafai lava ona fa’amae’a galuega a le au Inisinia na malaga atu.Fa’aauau pea na fa’amalulu mai le ASTCA ona o le faigata ona fa’amae’a o so’otaga tau feso’ota’iga ma le Manuatele, o lo ua taumafai i le mea e gafatia, ae fa’amoemoe tele le galuega i le mana o le Silisili Ese e fa’aosofia le atamai i e galulue, fa’atasi ai ma le fa’aleleia o le tau mo galuega e moomia lava ona faia.

O lo’o taumafai atu pea telefoni fe’avea’i ma isi sootaga tau Initeneti e talanoa ai i nai aiga i le Manu’atele ae o lo’o le mafai lava ona maua se sootaga, i le teao ananafi.Ua fa’afetaia fo’I e le ASTCA le fesoasoani tele o lo’o latou maua mai le aufaigaluega a le ASPA o lo’o i ai i le Manu’atele mo I latou I le taimi nei.

A’AFIA AUNUU MATAGI & GALU MALOLOSI –FA’ATAGISIA LE FESOASOANI A LE MALO

“Leai lava se isi mea e sulufa’i i ai Aunuu ma ona tagata o nonofo mau ai, na’o le Malo, ina ia fesoasoani mai a’o le’i oo ina a’afia se soifua o se tasi o tagatanuu ma ia taumafai fo’i e fa’aleleia me aua iloga mai o le a fa’aletonu atili, ma avea ma e tetele ai nisi galuega e toe taumafai i ai mulimuli e fa’aleleia ai. Fono le ie a’o le’i masae tele,” o le tala lea a se tasi o loo alaala tumau ma usu mai e faigaluega mai Aunuu, Peter Taliva’a.

Na fa’auia mai se talosaga ma o se fe’au e fa’atagisia ai se fesoasoani vave atu a le malo ae maise o le matagaluega o galuega lautele ina ia vave ona fa’asao mai nisi o fale nofo o aiga i le motu o Aunuu ona o le tetele ma le malolosi o aupeau o le Sami i lenei vaitau louloua i le atunuu.

Ua le gata i nai aiga o lea itu o le motu ae ua matauina fo’i, afai ae le vave fa’aleleia le apitagalu ua fa’aleagaina e i’u ina aia atoa le itu o i ai le falesa ona o le pa ma’a sa fausia lava e le afioaga e taumafai ona tatalia ai le malolosi o aupeau o le sami, ua le toe gafatia ona tatalia le maualuluga ma le malolosi o galu fafati i lea itu o le motu.

O lo ua i ai fa’amaoniga o le tetele o peau ma le malolosi i ata fa’asolo pupu’u ua fa’alauiloa mai e lenei tama i lana facebook ua mafua ai ona fa’afeso’ota’ia mo se fa’amatalaga mai le a’afiaga o lo ua feagai nei ma le latou aiga ae maise le Ekalesia ma le e galuega fo’i a le malo mo le fa’aleleia o le Uafu mo va’a laiti pe a mae’a nei le louloua o le tau.

“Na mae’a faia lava le sao o si matou aiga, e fa’aleleia ma fa’amautu le paina o le apitagalu ina ia le solofa atu le oneone ma le palapala o le apitagalu i le sami, peita’i ua va’aia nei le lamatia o le soifua atoa o si matou aiga, pe a faifai ai pea le sofa’i mai o aupeau malolosi ma le maualuluga lea ua va’aia i lenei vaitau louloua o le tau.”

Ua ia toe fa’ailoa mai, “Afai ae i ai toega a le aia mai e le aupeau o le tai o le apitagalu o lenei aiga ma le lotoa a le Ekalesia, e fa’auma la le galuega solofa o le oneone ma le palapala e le tetele o timuga. Ona ua aia, e le toe faigata ona tafea atu loa toega tafega o timuga.” 

Fa’ailoa mai e Taliva’a, mai le amataga o lenei taumafaiga e fa’asao meatotino ma aseta a aiga ma le Ekalesia, sa galueaina lava e matou aiga ma le Ekalesia. O nai a matou tupe lava sa fa’atau ai mea e fa’aaoga mo le taumafiaga ia sefe le soifua ma le taugata o mea totino ma ala fo’I e uta mai ai, ae lenei ua va’aia le vave ona solofa atu o nei galuega ma ua tele se galuega toe fa’aleleia e mana’omia ona faia, lea ua fa’atagisia ai le fesoasoani a le malo.”

“O le fausaga o le pa e siomia ai le apitagalu sa latou fa’atutu ai kalone 44 ma fa’atumu i le oneone ma le ma’ama’a o le matafaga, ona laina lea e talia le malolosi o le aupeau i le apitagalu. Lea ua autausaga ona faia lea galuega lelei, ua vaaia fo’Ii ua elea ma pala atu kalone nei aua e le mapu le sofa’i e aupeau o galu malolosi i taimi uma, ma ua tatau loa ona fa’amautu lelei le galuega o le apitagalu o lea itu o Aunuu, e tatau ona faia e le Malo.”

“Ua ese fo’i le malolosi ma le mauaululuga lea ua va’aia i le aupeau o sofa’ia lea apitagalu. Ua ova mamao le maualuluga i le Uafu ma ua le sefe fo’i va’a folau ma la’u pasese i le Uafu ona o lea tulaga. Ua mae’a aia le isi itu o le Apitagalu ma le pa sa fausia, o lona uiga e leai se umi ae toe fa’aleagaina atoa i le taimi nei lea taumafaiga e taofiofi mai le sologa o le eleele ma le oneone aga’i i le sami.”

Ta’ua e Taliva’a, “Ua mae’a ona faia atu ni asiasiga ale malo ma nisi o pisinisi tumaoti ma maimoaina fo’i le a’afiaga sa i ai o le apitagalu lea, peita’i o lea lava e tatalia se toe tali mai poo a fea o le a amatalia ai se galuega fa’asao o lea galuega. Na asia fo’i i latou e le afioga Kovana Lemanu Mauga, lea la e tatalia fo’i se toe fa’ailoaga mai ia Aunuu poo le a se fuafuaga ua faia mo Aunuu.”

I soo se galuega mo Aunuu, e leai fo’I se faigofie o iai ona o tulaga o fela’ua’iga. Ua ititi fo’i tino o va’a e mafai ona avatu ai masini mo lea motu e faatino ai galuega. Ua masani ai le ASPA i nei fatiga aua o le taimi lava e oo ai le masini suaeleele i Aunuu, pau lea o se taimi e vave uma ai ona fa’atino isi galuega uma e tatau ona fa’aaoga i ai lea masini ao le’i toe faafo’ia maia i Tutuila. O le Fotu o Samoa e masani ona alu e ave masini tetele a le ASPA mo galuega o le Suavai sa faia mo Aunuu.

TOLAUAPI A LE SSY: FA’AMALOSITINO

“E le faigofie ona toe fa’aititia lou mamafa, ae taumafai pea, e i’u lava ina gafatia! E leai lava se isi mea e faaititia e tatau ona fa’aitiitia muamua lava lau tausami, ma toaga loa e fa’amalosi lou tino e fa’aaoga mea’ai ua mae’a ona tausamia. Fa’aaoga tatau lau fa’amalositino i ni fe’au e faia masani, ae a leai matua fuli loa e fa’amalositino fa’atasi ma isi uma i le SSY ”O Oe Ua Pa’ee & Malosi! i lona fa’asamoaina.” O timaiga masani lea ona fa’alogoina i soo se taimi e te koleni fa’atasi ai ma i latou ua manatu e faia se suiga i o latou tino ma atagia ai, ua e paleni, pa’ee ma malosi.

I le tu’uaga umi lenei o a’oga, ua sagai atu nei le SSY e amata vave le latou misiona lea ao le’i matutua le fanau ma fa’aauau ai pea le so’ona a’ai, ma fa’ateteleina lo latou mamafa. Lea ua amata mai i le fanauiti e ta’i 5 tausaga se’ia oo i le 14 tausaga le matutua le latou Tolauapi Muamua lea na amata mai ia Iuni 28, ae fa’amuta nei ia Iulai 09, o le fa’aiuga o lenei vaiaso.

O vaega mautu o le tolauapi lea o le a aoaoina ai le tausami paleni ma mea’ai e tausia ai le tino paleni o le tagata soifua, mai le la’ititi se’ia oo ina avea ma tagata matua. O le vaega lua o ta’aloga e fa’atino i taimi atofa o le Tolauapi lenei, ua fa’aaoaoina pea le Tata fiti, o fa’amalositino ina ia fa’ameme’i lelei ai maso uma o le tino ma malolosi atili ai so’oga o le tino ma ponaivi. Ua aoaina fo’i le Yoga.

O le vaega lona tolu o le auai mai lea o le 4H mai le kolisi ina ia latou fa’atino aoaoga ma tomai lautele e aoaoina e le latou fo’i vaega poo le 4H. O loo aofia ai ma asiasiga i le ASCC Land Grant, o nisi o pa’aga a le 4H, lea e totoina ai la’au toto, fuala’au ‘aina, fa’ato’aga masani o mataiai a le atunuu, ma mea’ai paleni e mafai ona tuufa’atasia mai i nei togala’au o fuala’au ‘aina, e tausia lelei ai lou tino ona o mea’ai paleni.

Ua i ai i vaega po asiasiga le malaga asiasi atu i le nofoaga o lo’o fa’amautu i ai le tautua mo le Suavai Mama, o se faamalosiga taua, ina ia taumafa le vai ae le o meainu suamalie. Fa’amasani i le Vai e te ola umi ai.

Ua asia e i latou le Land Grant i le aso ananafi ma e to’a 50 i latou ua aofia i lea Tolauai na malaga uma mo lea fa’amoemoe, e fia va’ai patino le fanau i ala o toto ai la’au ma fa’ato’aga, e ao ina latou fa’ataitaia. Ua le gata i lea ae ua faia foi le galuega lelei a le vasega o e faigaluega i le Land Grant, ua fa’amatalatala le aoga o lea la’au ma lea la’au i le soifua o tagata Samoa ma nisi uma e mafai ona fa’aaogaina nei la’au toto.

O nisi o la’au ua maimoaina o togala’au o fuala’au aina mata, o nisi e tatau ona fa’avela, ae o mea’ai sili nei ona moomia e le tino o le tagata soifua e fafagaina mai ai lea lona malosi i aso uma o le soifua. O lea asiasiga e mana’omia ina ia tagai totoa le fanau i ala e maua ai e i latou mea’ai paleni aua le tausiga lelei o le soifua maloloina.

O le Tolauapi lona lua a le SSY ua fa’atulaga ina ia amatalia lea ia Iulai 12 ma fa’asolo atu ia Iulai 23 ma mae’a ai galuega mo le fanauiti e ala I aoaoga ma polokalama fa’apitoa a le SSY. Ae o lo’o fa’aauau lava ona faia Koleniga mo le Tatafiti ma le Yoga i aso fa’atulagaina mo le fanau talavou.