TALA I VAIFANUA

Pago Pago, AMERIKA SAMOA

MALAGA AUFAIGALUEGA ASTCA MANU’A - FA’ALELEIA O TELEFONI & TELEVISE

O tulaga fa’aletonu uma lava tau fesootaiga ma le Manuatele na amata mai ona fa’aletonu i le fa’aiuga o le vaiaso ua te’a, ma ua malaga atu nei le aufaigaluega mo le fa’amoemoe e fa’aleleia uma lava fesoota’iga tau telefoni fale, telefoni feavea’i, televise a le ASTCA ma le tulaga fa’aletonu so’o fo’i o le initeneti poo upega tafa’ilagi.

O le aumalaga lea sa tuuvaa ese atu i le aso Sa mo le Manu’atele ina ua maua lava si masele mai le louloua o le tau ma timuga fo’i i le Manu’atele ma i tatou iinei Tutuila.

Ua matauina fo’i ua amata i lenei taeao ona va’aia fa’amaumauga a le ASTCA ua fa’ailoa mai i a latou upega tafailagi ua mae’a faia i le Manu’atele e aofia ai le Faleluasaga ma le Faleta’u.

O latou inisinia ua malaga atu, na oo atu loa ma toe fa’afeso’ota’ia mai laina o feso’ota’iga mo telefoni fe’avea’i ma telefoni fale aua e manaomia i taimi uma e tagata. Na i’u lava ina totogi pau e le ASTCA le va’alele a le Samoa Airways e fa’ataunuu ai le latou malaga mo le au inisinia ina ia vave toe tatala mai feso’ota’iga ma le Manu’atele.

“O le aumalaga atoa lenei ua malaga i le Manuatele o le a mafai ai ona fa’aleleia feso’ota’iga uma nei e aofia ai telefoni fale, telefoni feavea’i, televise ma le Upega Tafa’ilagi.” O se tala lea mai le sui o le Pulega a le ASTCA sa faailoa mai ina ua fa’afeso’ota’ia e tusa o le aumalaga.

Ua fa’afetaia fo’i e i latou le vave ona talia mai e le Samoa Airways o le latou talosaga mo se malaga togipau mo le latou aufaigaluega ma ua toe fa’aleleia mai fo’i le WiFi Services i le afiafi o le aso Sa na te’a nei.

O lo ua manatu o le a maua mai se isi tala fiafia i le fa’aiuga o le aso Gafua e tusa ai o feso’ota’iga ma le Faleta’u.

MANUIA SAILIGA ‘TAMA MAI FAGASA’- PAKA FA’ASAO & TAGATA FAGASA:

Ua faaiu manuia le sailiga sa fa’atautaia e nisi o taulele’a mai Fagasa fa’apea ma nisi fo’i o le aufaigaluega a le Laufanua Fa’asao o Amerika Samoa, na sailia ai se tama mai Fagasa sa lipotia mai ua se i le ala sopo i le mauga o Fagasa, lea e i lalo o le va’ava’aiga malu a le National Park Services - American Samoa.

Ua fa’ailoa mai o le ali’i lea sa maua atu e le aufaigaluega ma tama mai Fagasa o lo’o ua silia ma le 10 itula e taumafai e sopo mai le ala i le va o Mt. Alava ma Fagasa ma ua pala uma ona lavalava i timuga ma ua i ai fo’i nai ona manu’anu’a ona o le mase’ese’e o le ala.

O le mamao o lana sopo i lea ala sopo e aga’i atu i le Mt Alava e tusa ua atoa le maila o lana savaliga ae fa’ato’a maua loa. E to’avalu i latou na sailia lenei tama.

O se tasi o le aiga o lea tama sa ia lipotia lo latou tama lea ua misia mai lona aiga i le afiafi po o le aso Tofi, ma sa latou fa’ailoa atu loa i le vaega o Leoleo tiute i lena afiafi, ma sa latou fa’ailoa atu fo’i i le Ofisa autu o le National Park Services ina ia maua ai se fesoasoani e sailia ai le latou tama.

E ui lava ina ua po ae le’i taofia ai le faia pea o le sailiga, ma sa fa’aaogaina ai le loli maualuga a le National Park Services ina ia mafai ona a’e se’ia oo i le nofoaga e le toe mafai ai ona uia e ta’avale lea ala sopo.

E ui ina sa muai vala’auina leoleo mo se sailiga, ae sa fa’ailoa mai e le Matagaluega e ao ina taofia le sailiga se’ia oo i le taeao e soso’o ai.

E maua atu le tama ua vaivai lava lona tino, ma ua mana’omia e lona tino ona ‘ai se mea’ai ma inu sina vai suamalie. Na iloga lelei e tatau ona fa’aoo o ia i le falema’i ina ia mautinoa ua siakia leleia o ia ma sa fa’afeiloa’ia fo’i i latou i le ta’avale a le EMS mo lea tulaga i le taimi ua oo mai ai i le alatele i luga atu o Pago Pago.

LISIA E LE SAMOA AIRWAYS LE VA’ALELE E FA’AAOGA MO FEMALAGA’IGA

Ua faailoa mai e le Samoa Airways ua latou lisia maia nei le va’alele 737-800 ina ia tulaueleele i le malae va’alele o Faleolo International Airport ia Iulai 13, 2021, mo a latou femalaga’iga fa’avaomalo. E malaga mai lea va’alele mai Brisbane, Ausetalia.

Ua fa’ailoa mai fo’i e le ofisa o le Palemia Fa’aauau Lautafi Fio Purcell, o le va’alele lea e malaga mai Netherlands  ia Iulai 02, 2021 mo Brisbane e siakia ai ona fa’ato’a malaga ese mai ai lea mo Samoa ia Iulai 13, 2021.

O le pasiga atoa o lea va’alele ina ia atoatoa lona lelei mo femalaga’iga i le ea mo pasese uma fa’avaomalo e faia atoa lea i le taimi lava e tulaueleele ai le va’alele lea i Brisbane, Ausetalia.

Ua fa’ailoa mai e Lautafi Fio Purcell o Samoa, ua mae’a nofo sauni pailate o le a galulue i lea va’alele i Niu Sila i le taimi nei e amatalia ai latou pepe kilia mo le faigaluega ai i malaga a lenei va’alele ua mae’a aiaia mo femalaga’iga a le Samoa Airways. E fa’ato’a malaga ese i latou ma fa’amautu i Brisbane i le fa’aiuga o lenei masina, e amata tapena ai i latou mo le ulua’i malaga mai a le va’alele lisi fou mo Samoa.

O le va’alele lea ua lisia e Samoa o se va’alele  Boeing 737-800 na fausia lava a le Kamupani i Netherlands ma e ono tausaga o le feagaiga fa’alisi ua fa’aaogaina ai nei e le Samoa Airways mo latou malaga fa’avaomalo lea e aofia ai Niu Sila, Fiti ma Ausetalia i lona va ma Samoa.

E lua vaiaso lea e faia ai aoaoga a le aufaigaluega i le va’alele lea, e aofia ai Pailate uma ma tamaitai ma alii  tautu uaina ma mea’ai i luga o lea va’alele. O le a fa’amasani fo’i i latou i le va’alele lea ma ona totoga uma, ina ia latou matua iloa lelei le va’alele ma ona vaega uma.

Ua fa’ailoa mai fo’i e Lautafi Purcell, e tauau e fa’atautaia se faigamalaga fa’apitoa mo le aufaigaluega ina ia mafai ona fa’ata’ita’ia o latou tiute uma i luga o lea va’a a’o lei malaga mai i Samoa ia Iulai 13, 2021 i Faleolo Airport.

O le va’alele lea ua fa’atulaga e fa’aaogaina lea mo malaga o totoe mo i latou uma o tagata Samoa o lo’o opea i Niu Sila ma Ausetalia i nei vaitau o le fa’asa ona o le Covid-19.

Ua atoa lelei le tausaga atoa o lo’o leai se va’alele ua fa’afaigaluegaina mo le Samoa Airways talu mai ona taofia femalaga’iga ona o le Covid-19. Ma ua atoa ai fo’i le tausaga talu ona taofia e le Malo o Samoa lo latou toe fa’aaogaina o se va’alele mai le Kamupani a Malaysian Malindo Air ia Mati 2020.