TALA I VAIFANUA

Pago Pago, AMERIKA SAMOA

FAAILOA ATU GALUEGA A LE USCOAST GUARD, SILAFIA E UIFA’ATALI  AMATA

O le vaiaso ua te’a na fa’atasi atu ai Uifa’atali Amata i le Ofisa o le USCoast Guard i Honolulu ma feiloa’i ma le Admiral Mathew W. Sibley ma ua ia fa’ailoa atu uma fo’i le tele o galuega o lo ua fuafua e faatino i le pasefika ma ua fa’ailoa atu ai fo’i ma isi galuega ua fa’afouina mo i latou i le fa’atinoga o le galuega.

“O lo ua iloga le saogalemu o le tatou malo atoa, fa’apea fo’i le pasefika ona o galuega puipui o le gataifale lea e feagai nei ma le US Coast Guard,” o se tala mautinoa lea a le tatou faipule i le konekeresi, Uifa’atali Amata.

“I le taimi nei ua fa’ateleina galuega ua fa’atulaga a le USCoast Guard e fuafua e fa’atino i le pasefika e puipuia ai ona teritori o Amerika Samoa, Guam ma le Northern Mariannas fa’apea fo’i ma tatou uo mamae i le FSM ma i isi uma malo o lo’o tatou tuaoi. O lo ua mae’a fa’atulaga galuega uma ma e va’aia ai le maualuga o le saogalemu o le tatou gataifale ina ua mae’a fa’ailoa mai e i latou galuega ua fa’atulaga mo i latou ina ia fa’ataunuu. Fa’afetai fo’i mo le ali’i Atimalala mo le fa’alauiloaga o latou galuega, e ui ina e le mafai ona fa’alauteleina lea tulaga i le mamalu o le atunuu.”

“E tele galuega ua fa’ailoa mai ma e puipuia e i latou nei gataifale uma lava ma e aofia ai le 1,150 o le aufaigaluega, 150 fitafita fa’aagaaga  ma le 80 o sui sivili ae ese ai ma le 400 Auxillary o tama ma tamaitai o lo’o ua mae’a fa’aauupegaina i tomai eseese mo galuega ma faiva.”

O lo ua aofia ai le aotelega o le lalolagi e 14 miliona sikuea maila o le sami a le laueleele, ma ua i ai i totonu Oahu, Maui, Kauai, ma Hawaii, aofia atu ai ma America Samoa atoa, Guam, Saipan, Singapore ma Iapani.

SUESUEGA FETARALE 2 MALIUI I LUGA O LE UAFU

Ua silia masina talu ona maliliu ni ali’i Filipino se to’alua, e sui e galulue i le Kampani Toso Pusa Oloa a le Peter E. Reid Stevedoring, ae o lo’o fa’aauau pea lava le faiga o sailiiliga a sui o le OSHA na o mai fafo, e tusa o le mea tonu na tupu i lea aso.

Ia Aperila 10, 2021o tamaloloa filipino nei e to’alua sa galulue i luga o le uafu ae fa’ate’ia loa tagata uma i le pa leo tele o se e foliga mai o se pa i se tasi o pusa i lea nofoaga.

E to’atasi le tagata faigaluega na maliu ai i lea lava mea na pa, ae to’atasi na mafai ona oo atu i le falema’i faatoa maliu ai ao taumafai ona togafitiga.

E to’alua isi sui faigaluega sa lavevea a’o o lo’o soifua pea i la’ua ona o lea fa’alavelave na tupu fa’afuase’i.

O le vaega o tagata faigaluega a le US Occupational Safety & Health Administration [OSHA] lea ua fa’aauau ona latou faia le suesuega, ma ua latou fa’aaogaina fo’i lipoti ma fa’amaumauga a Leoleo na mua’i fa’ato’ai ane i le nofoaga tonu na tupu ai le fa’alavelave.

O le a le mafai ona oo mai la o sui o le OSHA i le atunuu, aua o lo’o taofia lava fo’i femalaga’iga ona o le Covid-19. Aua o le Uafu tele lea a i tatou o lo’o va’ava’aia lelei e le vaega a le US Coast Guard, o lea la ua sootauau ai nei tautua a le malo tele, ma ua fa’atautaia ai sesuega ma fa’amaumauga o fa’amatalaga e le vasega o sui galulue a le vaega o le Coast Guard i le tatou nei malo.

O a lava ni fa’amaumauga ua mafai ona maua e sui o le US Coast Guard, Marine Safety Detachment  ua latou taofia lelei, fa’amaumau, ma sauni loa e auina atu i fafo mo suesuega ma faia ai le fa’aiuga a le OSHA.

O le tala lea ua fa’ailoa mai e le susuga Lt. Creigton Chong o le US Coast Guard i Amerika Samoa nei. “Ua mae’a uma ona matou fa’ataunuuina le suesuega atoatoa o le nofoaga o mea na tutupu ma fa’atalanoa fo’i sui sa auai i lea lava taimi i luga o le uafu ma va’aia le mea na tupu. Ua matou va’ai toto’a i fa’amaumauga uma, ua iloga mai o le suesuega ma le fa’ai’uga e ao ina faia mai e le OSHA ma ua lafo atu uma mea a fa’amaumau i le OSHA i Hawaii e latou te fa’aauau le suesuega ma faia mai ai le fa’aiuga. O i latou ia ua fa’ailoa mai e nafa ma lenei fa’alavelave.”

Ina ua fesiligia Lt Chong e tusa ma le mea tonu sa tupu, ae ua fa’ailoa mai e ia, “Ua le mafai ona ou talanoa e tusa o le suesuega patino o le mea tonu na tupu, o mea na e tatau ona fa’atali se’ia mae’a lelei le suesuega a le OHSA i le mea na tupu ma fa’ailoa mai ai se latou fa’aiuga.”

“Pau lava le mea mautinoa, sa maliu lava le to’atasi o nei filipino na maliu ai lava i le nofoaga na tupu ai le fa’alavelave, ae o le isi na oo lava i le falema’i ma toe maliu mai ai,” o sana toe tala lea e tusa o le fa’amaumauga moni ua mautu mai mo lea fa’alavelave.

Ua ofo mai fo’i fa’amafanafanaga a le US Coast Guard i le mamalu o aiga ma e pele ia i la’ua ua maliliu ona o lenei fa’alavelave matuia tele ua amia ai soifua o nei tama.

FA’ATULAGA AMATALIA FEMALAGA’IGA SAMOA AIRWAYS IA IUNI 2021

Ua fa’ailoa mai e le ta’ita’i le tumau o Samoa, “Ua fa’atulaga feoa’iga a le Samoa Airways i le masina lenei o Iuni, ma e muamua ai ona fa’atulaga se malaga mai a le va’alele o le a lisia mo nei malaga e uia mai Niu Sila, ma fa’ato’a malaga mai ai i Samoa. Ao i ai le va’alele lea i Niu Sila o le a siakia lelei ai mo le fa’atautaiga o faigamalaga a le Samoa Airways.

Ua fa’ailoa mai e le Palemia fa’aauau, Tuilaepa Malielegaoi, “Ona o lea ua leai ni va’alele se tele e feoa’i i le va o Samoa ma Niu Sila, o lea taugata ai le totogi o pasese ona o lo’o lisia fo’i le va’alele. Peita’i, o lana saunoaga e tusa o le maualuluga ai o pasese mo nei faigamalaga, o le a fa’atulaga lea I le tele o malaga e mafai ona faia, ma o le a mautinoa lava e mana’omia ona malaga na’o tagata ua mae’a faia o latou tui puipuia mai le Coronavirus. Ua manaomia lava ona tutumu lelei nofoa uma o nei ulua’i malaga ina ia tau pa’u mai pasese i tiami uma, ma e mautinoa lava e fesoasoani lea e tau fa’aititia mai ai le pasese.”

“Ua le gata ai i lea ae o le a tele ana malaga ina ia matua lava ma totoe ai se pa’u o pasese. Ua le gata la i pasese ae ua fa’atulagaina fo’i le la’uina o uta, o se tasi foi o tautua e mafai ona pa’u teisi ai le pasese mo e femalaga’i. E tatau ona matua fa’aaoga lava le va’alele lea ia vave ona maua le fesoasoani mo pasese o tagata femalaga’i.”

“I le taimi nei ua maua fo’i e le Fiji Air le tele o malaga i totonu o malo fa’aatumotu o le pasefika e aofia ai Kiribati, Tuvalu, Solomona ma isi atumotu laiti, o mea ia sa masani ona femalaga’i ai le Samoa Airways.

SAMOA I ALABAMA-FA’AUU MA TOGI MAUALULUGA – MAUA FOI SIKOLASIPI  FOOTBALL

Maua mai fo’i tala fiafia mai se tasi o aloalii o se tamaitai Samoa mai le Manu’atele Fa’aniniva Michelle Faoa Brooks-Robertson o Ofu Manu’a, ma le ali’i o James E. Robertson ll o Homewood, Alabama, o le la’ua alo o “Tre’ James E Robertson lll ua ia maua le togisilia i le vasega fa’aiuaso Thompson High School i Alabaster, Alabama.

I lona fa’au’uga ua ia mauaina ai le GPA 4.0 ma ua agava’a o ia i le sikolasipi atoatoa e a’oga ai i le Kolisi ma ta’alo i le football fa’apea ma le Basketball ma o se tasi fo’i o le tulimta’ia le taunuuga o lana taumafaiga i nei ta’aloga i le lumana’i. O Tre o le aloali’i lea o le tina matua o Fiatuiga Iesilika Faoa Brooks o Ofu Manu’a ma Enterprise Alabama ma lona toalua o James E Robertson lll o Homewood Alabama.

O le tama o le tama o lona tina o Tilotilo Asiolefolasa Saleapaga Faoa, o tama moni lava  o le Manu’atele. Ua filifili nei lea alo o le Manu’atele o le a ulufale atu i le Uanied States Air Force Academy i lana sikolasipi atoatoa ua maua mai lona ausia fo’i o togi maualuluga i lona tausaga fa’aiuaso.