TALA I VAIFANUA

Pago Pago, AMERIKA SAMOA

FOAI REVAMMP FOUNDATION $5,000 I LE AMERICAN SAMOA COMMUNITY CANCER COALITION

O le aso Lua na te’a, sa faia ai le foa’i a le REVAMMP Foundation I le American Samoa Community Cancer Coalition (ASCCC) ia ia latou fa’asoa atu i nisi ua po’ia i le gasegase o le Kanesa, ma ua mana’omia le fesoasoani tau seleni, e totogia ai nisi o latou pili ma’i ma togafitiga.

O lo ua fa’ailoa mai e le sui na auai atu o le ASCCC i le potu o fa’asalalauga a le 93KHJ VO3 lea sa fa’ataunuu ai lea foa’i, “O lenei foa’i e matua talisapaia ma le agaga fa’afetai tele. E tele le mana’omia aua ua matua to’atele i latou ua fa’amauina i o latou faila ua maua i le kanesa. O lenei la foa’i, ua gafatia ai e le Cancer Coalition ona faia ana foa’i masani e ta’i $500 mo le sui ua po’ia i le Kanesa ma ua lagonaina le faigata ona totogia o latou pili ma’i, ma pasese fo’i e femalaga’i ai mo togafitiga.”

O sui o le REVAMMP Foundation sa laua fa’atautaia le sailiga tupe na faia e fa’afiafia ai Tina o le atunuu i le Gov. Rex Lee Auditorium mo le Aso o Tina, o Atoa ma Mokihana Ripley. O lena sailiga ua gafatia ai ona tuufa’atasia lenei tinoitupe mo le fa’amoemoe e tuuina atu i le ASCCC, e fesoasoani i e ua po’ia i le Kanesa ma ua mafatia i latou i le totogia o talavai, o pasese ae maise o togaiftiga.

Pe afai e te fia malamalama atili i le tapenaga o lau talosaga mo lea ituaiga o fesoasoani mai le ASCCC telefoni i le 684-699-0110.

TASI LE SIFI AUFAIGALUEGA STAR KIST SAMOA - NA’O LE SIFI AO

O le tulaga ua i ai le galuega a le Star Kist Samoa le tatou Kamupani I’a ua fa’ailoa mai ua toe tasi le sifi ua fa’atautaia ai, ma ua fa’atulaga lea e alu lava le lua vaiaso amata atu i le aso 24 o Me. Ua na o le sifi ao - amata i le itula e 6 i le taeao ua fa’atulagaina i le taimi nei. 

Ua iloga mai ua le lava pea tagata faigaluega mo sifi e lua, ae ua fa’aopoopo mai ma le tulaga ua le tele fo’i va’a i’a e uia le tatou nei kamupani ina ia sasa’a iinei a latou fagotaga.

Fa’ailoa e Michelle Faist, mai le StarKist Co., “Ua mae’a ona fa’ailoa fo’i i le afioga le Kovana lea tulaga, o lo’o ua taga’i toto’a i ai o ia, mo se taumafaiga ina ia mafai ona fesoasoani mai le malo mo se vaifofo o lea fo’i fa’afitauli.”

Ua fa’ailoa mai la e le pulega a le Star Kist, o le le atoatoa o le aufaigaluega mo le tapenaga o le uta fa’atulaga o le apa i’a e auina atu i fafo mo fefa’atauaiga, o lea ua fa’aititia ai fo’i oka mo le tele o kamupani eseese o latou pa’aga fa’alemaketi e fa’atau atu ai le I’a tu’u apa a i tatou.

I le amataga fo’i o le masina sa tapunia ai le Kamupani mo le vaiaso e tasi, ae se’i tatalia nisi va’a fagota e sapalaia mai le I’a ina ia lava mo sifi fa’amama i’a, peita’i o lea ua tatala galuega ae ua tasi le sifi e fa’aaoga. Ua fa’ailoa mai, o le a’afiga lava lea o le to’esea mai o le tele o tagata faigaluega, lea ua iu ina faapea ai le sioti o le aufaigaluega mo sifi e lua. Peita’i ua le fa’ailoa mai e le tamaitai Pule lua o le kampani, ua pa’u fo’i le tau o le i’a a i latou e fa’atau atu ai i va’a i’a. O le isi lea fa’auilavea i le aofai o va’a i’a e afea le tatou kamupani i’a e fa’atau mai i ai latou fagotaga.

USU ATU TAFUNA HIGH I FALEA’OGA UA TUSITUSIA MA FA’ALEAGAINA - ME 24

Ua i ai nisi poo se tasi fo’i ua matua ia faia le sauniga o le tusitusia o falea’oga o le A’oga Maualuga a Tafuna i se aso o le fa’aiuga o le vaiaso ua te’a nei. E ono lelei falea’oga ua me’a faia ai lenei galuega mataga, ma ua fa’anoanoa tele ai le tamaitai Pule Aoga o lea Laumua, le vasega o faia’oga ma lautele o fanau a’oga, ona o lea faiga leaga.

Peita’i, e le’i manatu le tamaitai pule a’oga ma le vasega o Matua o le PTA ma le aufaigaluega uma a lea Laumua e malo mai lea galuega leaga i o latou loto fa’amagalo ma galulue loa e toe valia falea’oga uma na fa’aleagaina, ma ua toe pei lava e le’i i ai se mea na tupu i nei faleaoga e 6 i le taimi nei.

Ua fa’ailoa e le tamaitai Pule A’oga Tutuila Togilau, “Ou te lagona lava sa faia lenei galuega le taupulea e nisi i le afiafi o le aso Faraile poo le vaveao fo’i o le aso Toona’i.”

O le taeao lava o le aso Gafua lea sa fa’ailoa atu ia te ia lenei mea ua tupu, ma o ia lea sa fa’atulaga e na te vave usu mai e tatala le falea’oga ae saunia le fanau ua atofa mo le suega o le ASVAB. Na vala’au atu o ia ma fai atu e ono lelei falea’oga ua fa’aleagaina, ma sa latou galulue loa e vala’au le matagaluega o galuega lautele a le malo mo se fesosaoani vave e punitia ai lenei va’aiga maasiasi.

Na fa’afeso’ota’ia fo’i le fa’atonu sili o a’oga, Talauega Samasoni Asaeli, fa’apea le pule o A’oga Maualuluga a le matagaluega o Aoga, ae maise Faipule o le Itumalo e tusa o lenei galuega leaga ua faia i nai falea’oga fou i le lotoa.

O le susuga le sui fa’atonu o a’oga Fa’afetai Teofilo lea sa ia vave gaoioi loa ma kiliva mai apa vali mo le fa’amoemoe o le galuega toe fa’aleleia o mea ua fa’aleagaina.

O le aso Sa na fa’amae’a lelei ai nei tapenaga uma ma ua matauina le toe fo’i ane le matagofie o nei falea’oga. O i latou na fa’amae’aina le galuega lea sa aofia fa’atasi ai nisi o matua, o faia’oga o le aufaigaluega meniteni a le PWD, le ali’i Faipule o Mark Atafua ae maise nai fanau a’oga sa auai e faauma lelei ona toe valia falea’oga nei i itu na fa’aleagaina.

“Fa’afetai atu lava i le sapaia mai e le vasega o matua ma le matagaluega o Galuega Lautele ona ua vave ona toe tanumia le mataga sa faia e nei sui i laleaoga o le Laumua o le Toa.” I le taimi nei ua leai se tasi o lo ua taofia pe maua e leoleo ni fa’amatalaga e masalomia ai mo tusitusia o faleaoga, e tele le sala ua mae’a fa’atulaga e le malo mo lea ituaiga o solitulafono, ua e fa’aleagaina meatotino a le malo.

Ua tima’ia le fanau a’oga, pe afai e fa’alogoina e i latou ni fafatala e mautinoa ai se tasi sa auai i le au fa’aleagaina o meatotino a Tafuna High, ia fa’ailoa atu ia i latou, o le a mautinoa lava e fa’asalaina lena sui.

O loo i ai mea pu’eata a le a’oga, peita’i ua faia tonu lava lea goioiga sese i vaega o le lotoa e le o sao atu i ai ave o le mea pu’eata. Ua faatagisia fo’i le mamalu lautele pe afai lava e te silafia ane se tasi sa mautinoa lava na auai i lenei galuega leaga, fa’amolemole ia logo mai lava le Ofisa o le Aoga i Tafuna, poo le ofisa o Leoleo o latalata ane ia te oe.

FA’ALETONU O FEAGAI AI MA LE NOFO VA’AVA’AIA I HONOLULU HAWAII

O le masina o Me le ulua’i masina na fa’apea e faia ai le lua malaga e faia mo i latou sa tofia i Amerika talu ona tapunia alavaa i le va o Amerika Samoa ma Hawaii i le masina o Mati i le 2020. 

O le isi malaga mo le masina o Me sa fa’atulaga ia Me 28 ae ua tuu atu i tua ia Iuni 1, 2021. 

Ua fa’ailoa mai fa’alaua’itele e le tala fa’amaumau ua fa’alauiloa mai e le Komiti Fa’afoe o le Covid-19, “E ui lava ina tele taimi fa’aalu e feutaga’i ai ma tagata ina ia nofo sauni mai mo le faigamalaga, toe fa’atonutonu foi taimi e tatau ona oo atu i ai ua oo mai i Hawaii mo le nofo va’ava’aia, ae ua to’atele lava i latou ua iloga mai, e pei ua foliga ua manatu ina ia fa’ato’a o mai i taimi e tatala ai femalaga’iga, pe ua filifili fo’i e toe nonofo pea ia i Amerika.”

O le mea lea ua mafua ai ona fa’aitiitia le to’atele sa fuafua e malaga mai i le malaga lona lua o Me, ma ua tele fo’i suafa ua toe ave’esea mai le lisi a le matagaluega o le Soifua Maloloina, aua ua filifili e toe nonofo pea ia. O le nofo va’ava’aia mo le va’a mo Iuni 01, 2021 ua amata ona nofoia le faletalimalo i Hawaii ia Me 17, 2021.

O i latou uma ua mae’a faia tui e lua e puipuia mai ai le Covid-19, e mafai ona fa’ato’a nofoia le nofoaga i le fa’aiuga o lenei vaiaso.O isi uma sa malaga mai i le malaga mulimuli nei mai Honolulu lea ua mafai ona tatala i tua i le aso Gafua na te’a nei. O i latou na sa nofoia le fale nofo puipuia i Fatuoaiga.

O nisi sa taumafai e malaga mai ua ofoina atu ia i latou e faia o latou tui muamua o le Covid-19 ina ua nofo va’ava’aia i le Tradewinds ia Me 18, 2021. O le ala lea sa fa’anonofo ai i latou nei e le’i faia tui puipuia ia ese mai i sui ua mae’a faia latou tui puipuia, sa i Fatuoaiga.

O lo ua manatu nei le Komiti Fa’afoe ina ia ausia ma mautu lelei le 90% o le vaega o tagata ua tatau ona tui puipuia, fa’ato’a mafai ona tatala mai a tatou femalaga’iga, aua e le o sefe lava le atunuu pe afai e i ai nisi e le’i faia lava tui puipuia.