TALA I VAIFANUA

Pago Pago, AMERIKA SAMOA

TOE FONO FA’AMAVAE MA FA’ATONU DOH TOBACCO DIABETES COALITION

O le aso Tofi na te’a sa fa’atautaia ai le fonotaga a le DOH Tobacco Diabetes Coalition i le Sadies by the Sea i Utulei, ma ua avea fo’i o se avanoa matagofie e fa’ailoa mai ai e le tamaitai Fa’atonu o le DOH Tobacco Diabetes Office, Farrah Lesa, o lona toe aso le aso Faraile o soso’o ai i le galuega.

“Ona o tulaga ua tatau fo’i ona va’ai toto’a i tulaga o aiga ma le soifua maloloina lelei ia tausia, ua tatau ai fo’i ona fa’aavanoa taimi mulimuli o le soifuaga e mafuta ai ma fanau ma latou fanau,” o sana tala lea.

Ona o le fonotaga sa fa’atasia uma le DOH Tobacco Diabetes ma ana pa’aga, o ia uma auaunaga a le Malo o lo’o soofa’atasi a latou tiute fai ma le auaunaga a le Koalisi lea a le Matagaluega o le soifua maloloina. Na latou fa’atasi e soalaupule se isi fo’i una’iga o le latou mau, o suiga e tatau ona fa’aulu i le fono faitulafono ina ia pasia ma fa’aopoopo tau teuteuga o le tulafono tau le fa’asa o le ulaula tapa’a i nofoaga faitele.

“O le tatou mafutaga o le a motusia nei ma Farrah Lesa e le o faigofie i lagona, aua ua loa ona galulue fa’atasi, ua matua manino fo’i le fa’amoemoe sa tatou matua una’ia ina ia mafai ona sao atu ma fa’amalosia se tulafono e taofiofia ai le ulaula tapa’a i nofoaga faitele. Lea o le a tu’ua le galuega, ae ua mae’a lelei lava ona faiva. Ua na’o nai teuteuga lea e tatalia le saini a le Kovana, a mae’a ona fa’afo’i lea i le fono faitulafono e pasia mai, ma fa’aofi ai e toe teuteu ai le tulafono ua mae’a fa’amalosia e fa’asa ai le ulaula tapa’a i nofoaga faitele,” o se amataga lea o se upu fa’amavae a le Taitaifono Meauta Mageo.

“Fa’afetai Lesa mo lou sao, ua le gata ia te oe, ae maise fo’i le tatou Teutupe a le koalisi, sa tauavea mai a e Ropeti Lesa, si tou aiga ina ua litaea mai le galuega sa galue ai i le tatou malo. O na faiva e le’i totogia, ae sa ia mataituina le fa’aaluga o le o le tinoitupe na toina mai le USHH/CDC ina ia mautinoa e oo le mau a le Tobacco/Diabetes i le tulaga ua taualoa ai nei.”

“E le tau sulaina le toga lelei, e iloga lava le galuega a le tagata, o fua fo’i e galuega e tumau i le Koalisi ae tu’ua e le tagata lona tofi. Fa’afetai mo nei tausaga e tele, e le’i upuia lava i tatou ma le tatou Koalisi fa’apea le manulauti tau’ave a i tatou, talu ona fa’atuina mai lenei fa’amoemoe. E mafua ona o le fa’amaoni o le tagata ta’ita’i i ona tiute tau’ave. Ia fa’amanuia lava le Atua i toe taimi o lau tautua, ae maise o le lumana’i i malologa o le a alofaiva atu i ai oulua uma.”

O lana toe saunoaga lea ma fa’aiu ai le fonotaga a le Koalisi.

I le taimi nei tuuina atu le ta’ita’iga i le tamaitai sa avea ma sui fa’atonu o Daphney Fale ma ua i ai ma ana soatau, Edith ma le vaega. Fa’afetaia le fonotaga matagofie ma le ‘aiga fo’i sa fa’amavae ai ma le fa’atonu o lea Koalisi, ma o le a fa’aauau fo’i le fonotaga e asiasia ai le fa’amoemoe o le Koalisi a le Faleluasaga ia Ofu ma Olosega lea e fa’amoemoe e tu’ua ai e le Koalisi mamalu le motu nei mo Ofu ia Iuni 8, ae fa’ato’a toe taliu mai ia Iuni 18, 2021.

Ua fa’ailoa mai le fa’amoemoe e tolu lelei aso e faia ai le aso mo Tupulaga, ae muamua lava usuia le fonotaga a le Koalisi lea, ia mafai ona fa’amautu atili ai le latou Koalisi a le Luasaga ma le latou Komiti Fa’afoe, ona soso’o ai lea ma le semina mo Tupulaga talavou uma, e aofia ai Ekalesia e tolu ua i ai i le Faleluasaga, EFKAS, AOG ma le SDA.

FA’AUU 79 FANAU A’OGA MAI LE ASCC - ME 21

O le fa’au’uga o lenei afa tausaga a le Kolisi Tuufa’atasi o Amerika Samoa na taua’aoina ai tusi pasi mo le to’a 79 o le ‘au fa’auu. Mai le to’a 79 e to’atasi sa taua’aoina ona fa’ailoga e lua, e lua fo’i ana kosi sa taumafai ma ua mae’a lelei, le ali’i lea o  George K. Malaki, o lona fa’ailoga AA in Human Services ma le AA in Liberal Arts.

Mai le vasega fa’a’u e to’alua lava sui sa ausia togi sili ona maualuluga, lea e fa’atulaga latou GPA 3.90-4.0 ma ua tula’i mai ai le tamaitai o Valencia Shelbylani Tinae ma le tamaitai o Judith Liu i lea tulaga maoa’e. 

E to’atolu i latou sa maua e i latou togi GPA 3.75 se’ia oo GPA 3.89 o le Magna Cum Laude, lea sa tula’i mai ai Falenaoti Isadora Mageo, Geraldine Meridian Aliitaeao Ofisa ma Nuuseni Nathaniel Vaimoli.

O le vasega sa maua le Cum Laude lea e toasefulu i latou lea e aofia ai: Mary Fanoia Lefiti; Silivelia Leua Robertson, Meleine Aeto Salavea, Sabrina Kennice Uti, Venessa Sherrie nTele Young, Tinou F. Laulu; Agahpay Lina Manase; Jenzel Angelica Cuison, Perosiomelemaofeira Vaofanua ma Motusalaia Save Danielson.

O fa’ailoga uma sa tufatufaina lea i le afiafi o le aso Lulu na te’a i le latou ‘aiga fa’atasi ma le pulega fa’apea ma faia’oga a le vasega fa’aiuaso, ma sa va’aia ai le fa’afiafiaina o i latou ona o le fa’amanuiaina o latou taumafaiga, peita’i o fa’ailoga Sikolasipi a le tatou Malo, mo i latou na talosaga ma ua talia lelei e le Komiti o Sikolasipi a le Malo, sa tula’i ai lana afioga Senatoa Faiivae Alexander Godinet, o le susuga fo’i lea i le ta’ita’ifono o lea lava komiti, na tolaulauina suafa o i latou ua ausia agava’a fa’atulaga mo lenei fesoasoani tupe a le Malo e totogia ai latou a’oa’oga pe a fa’aauau i nisi Iunivesite i fafo.

O e ua agava’a mo nei sikolasipi e aofia ai: Valenicia Shelbylani Tinae mo le fa’ailoga maualuga i le Business Management i le Iunivesite o San Francisco State, Calefornia. O Judith Liu ua talia mai lana suesuega e fa’aauau mo le Psychology i le University of Utah. O Falenaoti Mageo ua maua lana sikolasipi mai le tatou malo e fa’aauau ai ana suesuega mo le Medical Lab Science i le Dixie State University.

Geraldine Ofisa ua maua lana sikolaispi mai le tatou Malo e fa’aauau ai ana suesuega mo lona fa’ailoga i le Exercise Science i le Dixie State University.

Nuuseni Vaimoli ua maua lana sikolasipi mai le malo ina ia fa’aauau ana a’oa’oga i le Criminal Justice. i Dixie State University. Lilly Lauina ua maua lana sikolasipi mai le tatou Malo e faaauau ai ana suesuega i le Social Work i le Kolisi o le Union College.

O Tinou Laulu ua maua lana sikolasipi mai le Malo e fa’aauau ai ana aoaoga i le Civil Engineering i le Iunivesite o Portland State University, ma le fa’ailoga mulimuli sa taua’aoina lea ia Arizona Tua ina ia fa’aauau aua aoaoga i le Iunivesite o Southern Utah i ana mataupu Tausi Tusi ma Suetusi.

Sa saunoa ai le peresitene o le Kolisi Tuufaatasi Dr. Rosevonne Pato ma ia fa’ailoa “O le tausaga lenei o se tausaga ua ta’imua i mea e tele, ua le tasi ae ua lasi mea fou ua ausia e lenei vasega fa’aiuaso a le tatou Kolisi. O le tausaga lenei ua atoa i ai le 70 o tausaga talu ona fa’atautaia mai le Kolisi i le 1971.”

“Lona lua, o se vasega ua sili ona latou fa’ataututu atu i suiga ua i ai mo le fa’atautaiga o a’oga ma vasega, ua latou gafatia ona faia suiga lelei ma ua tula’i mai ua fa’amae’aina o latou faiva fa’aleaoaoga ma tusi pasi maualuluga ua taua’aoina nei.”

O le vasega lenei ua matele ina fa’aaogaina e i latou feso’ota’iga tai tafailagi i a latou a’oa’oga ma ua avea i latou o nisi ua gafatia ona faia lea suiga tele, ua tau leai se sootaga ma faia’oga i potu a’oga, ae ua faia mai aoga i ala fa’aonapo nei, ma ua fa’apena fo’i le tele o latou suesuega mo latou fa’ailoga.

O le saunoaga fa’amalosi ina ia saogalemu i latou a’o latou samia o latou fa’ailgoa ma o latou aiga ma uo mamae sa tula’i le afioga le Kovana Sili ma ia tima’ia ai le vasega fa’au’u. “A tuai ona outou o ese atu mai tatou atunuu ma le mafutaga ma aiga, saili se galuega e galue ai i lenei taimi e te aoga ai i lou aiga, ona fa’ato’a tu’ua ai lea o nai outou matua ma aiga pe a maua avanoa.”

Ua ia fa’amanatu atu e le o toe umi ae tatala mai avanoa mo galuega a le Malo i le vaega a le Malo mo le Taumafanafana, ma e mafai lava ona galulue ai ona malaga ese atu ai lea mo le toe a’oga.

Na soso’o lea ma le avanoa o le tamaitai Loia Lornalei Meredith. O lenei tamaitai sa mua’i sailia ona fa’ailoga fa’afaia’oga ma ausia, ona avea lea ma faia’oga, ae toe naunau lona loto e fia avea ma Loia i le tatou atunuu. 

Na fa’aulu lana talosaga ma le le mailoa pe tua ma ni a lana taumafaiga. Peita’i na talia mai, ma ua ulufale ma aoga. Ua fa’asolo ma ua gafatia ona avea ma Loia i le setete o Utah lea ua toe taliu mai lava i le nofoaga sa fa’anaunau i ai e tautua ai, le tatou malo.

I le taimi nei ua to’aono le la’ua fanau ma lona to’alua Peniamina Fanene ma sa fa’au’u mai o ia i le kolisi i le tausaga e 2005 lea sa ia umia ai lona fa’ailgoa AScince. E valu tausaga o avea o ia ma Faia’oga i Leone High peita’i e le’i manatu o ia ina ia tumau ai iina lana sailiga, ae o lo’o nanau lona loto e fia avea ma Loia.

O lana sailiga ua ia faailo i le fanau fa’au’u, i lona sipelaina o le WISDOM. W  ua ia fa’ailo o le Why &Why not me? Aisea o au? Aisea fo’i e le o a’u ai?  I -I don’t belong here Inside. O lou lagona e te o auai o se tasi e tatau ma lea faiva, ae ua fai lava ma le naunauta’i, ua oo ina ausia ai le fa’amoemoe, ua tatau ona va’ai toto’a i le ogatotonugalemu, ma ua i ai lava le loto e faia ai.

• S o le Success: E le sau le manuia na’o ia, ae tatau lava ona tele na’ua omiga ma le tigaina o lou ala i le manuia. E oo mai manuia a’o lona suamalie sa e mauaina i lou ala, ua fa’atonutonu oe e tiga ma faigata o le ala, ua mafua ai ona suamalie ia te oe le manumalo ma le manuia ua e maua i le i’uga o lau faigamalaga tausaili.

• D- determined [Fa’anaunau] - Leai se faavavaivai, a le maua le fa’amoemoe toe tu i luga ma toe taumafai atili, ole tele o lou le ‘ausia o se mea ua e fa’anaunau i ai, e aoaoina atili ai oe ina ia mafai ona e manumalo mai ai. O - Open [Tatala] Ia tatala e oe lou lava faitoto’a o avanoa eseese mo lau sailiga. E tatala fo’i e oe lou faitoto’a i ou lava manuia i le fa’aiuga o lau folauga.

• M - Mastering [Ae Manumalo] Ia avea oe ma se tasi e toe tu ma tepa i tua i lou ala sa e savalia mai, ma e iloa ai, ua e manumalo mai lau savaliga ma lou faanaunauga e fia tini taunuu i le manuia sa e mana’o i ai.