TALA I VAIFANUA

Pago Pago, AMERIKA SAMOA

TUFATUFAGA O FA’AILOGA VASEGA FA’AIUASO KOLISI TUUFA’AASI – ME 19, 2021:

O le faatasiga a le vasega fa’aiuaso mo le tufatufaga o latou fa’ailoga fa’apitoa i kosi eseese ua tauavea e le fanau a’oga i le tatou Kolisi Tuufa’atasi na faia lea i le Jade Restaurant i Nuuuli i le afiafi o le aso Lulu na te’a nei, a’o loma le latou fa’au’uga i le aso Faraile o le vaiaso na te’a nei.

O le tamaitai o Perosiomelemaofeira Vaofanua o le Peresetene o le Asosi a le fanau aoga i le kolisi o lenei tausaga, na avea ma lauga faapitoa.  Na saunoa o ia, “O se tausaga ua tele lu’iga ma ua fa’amalosia ai i tatou e fa’aaoga le tomai fa’atekonolosi ma i mea e fa’aaogaina mo aoaoga, fa’aasi ai ma feso’ota’iga fa’ata’alise a Upega Tafailagi ma so’otaga fa’ata’alise, ina ia tatou maua ai a’oa’oga. O se suiga e le toe fo’i i tua i mea sa tatou ao’oga mai ai, ae ua mautinoa o ala nei o le a tumau ai sailiga, ma fa’aauau atu ai a tatou a’oa’oga i le lumana’i o lenei savaliga. O se tausaga ua tau leai se mafutaga fa’atasi i potu a’oga, ae ua koneti mai oe i le talanoaga i ala feso’ota’i, ma o se suiga ua sofa’i ai lo tatou soifua taumafai, ua fai fo’i ae ua mafai ona tatou faia. Fa’amalo atu le tauata’i, fa’amalo atu le agaga i le taua fa’alemafaufau, fa’amalo mo fesoasoani o le tasi i le tasi, fa’amalo le tumau ia ea lenei taumafaiga.”

O le ulua’i fa’ailoga faapitoa na fa’ailoa I lea afiafi, o le faailoga mai I le Faipule I le Konekeresi, Uifaatali Aumua Amata Radewagen.  Sa fa’alauiloa e Tigafau Suani, o se tasi o le sui o le ofisa le agaga fa’afetai ma le faamalo ia I latou sa ausia lea fa’ailoga.

O i latou mai le to’a 79 o fanau fa’au’u ua lautogia mo fa’ailoga na aofia ai:

Mai le mataupu o le Social Science na maua ai e le tamaitai o Mati Velma Salanoa le fa’ailoga tulaga togi silia i le kosi o le Social Science & Criminal Justice. O le vaega o le kosi Social Science ua maua ai foi e Nuuseni Vaimoli le fa’ailoga togi maualuluga i mataupu uma na ave mo lea kosi. O le tamaitai o Kayla Sauafea sa fai ma sui o lea vaega e taua’aoina latou fa’ailoga.

Ina ua mae’a lea sa tutula’i le sui o le ACNR mai le vaega a le Land Grant ma ia taua’aoina ai fa’ailoga sa saunia mo i latou ua maualuluga togi i a latou kosi na tau’avea

O le tamaitai o Sofia Mafua na ia mauaina le fa’ailoga mo le General Agriculture, peita’I o le tamaitai o Evely-Deidra Siioto Fetuao sa ia mauaina le fa’ailoga maoa’e o togi na ia ausia I le kosi mo le Agri-Business.

O fa’ailoga fa’apitoa a le BAOA poo kosi uma e agava’a ai mo le fa’atautaiga o Pisinsi, ua lautogia uma le au fa’au’u i teutusi tupe ua saunoa e le BAOA, ma latou tusi pasi, ae o fa’ailoga fa’apitoa sa mauaina lea e Valencia Shelbylani Tinae. O le sui ua iloga lana tautua i le BAOA na maua lea e Lui Lafaele.O le fanau fa’au’u uma lava e to’afitu na latou maua fo’i fa’ailoga tupe ma tusi pasi mai le BAOA e aofia ai: Nostalgia Tutuluomanulagi Aitaoto, Sulufaleese Eidleweiss Marantha Matai, Etevise Savelio, Sootaga V. Utu, Nancy Lagise Vaeao, Athena Salone Shalhout, Po’a Iese Sialoi, Suluao Annette Faaalo Uti ma TavaetotoUti.

O le vaega a le Human & Health Services sa maua ai e Falenaoti Isadora Mageo le fa’ailoga togisilia mo lea kosi ma le tamaitai o Rachelle Lemalie Toleafoa.

Mai mataupu uma tau le Fa’aperetania poo le Igilisi, ua fa’ailoa mai e fa Igilisi sa tau’avea i le tausaga a’oga atoa mo fanau i le Kolisi. O Igilisi maualuluga lava e tatau ma le fanau i le kolisi ona pasia fa’ato’a fa’au’u o le Eng 150 ma le Eng 151.

O le fanau ua maua fa’ailoga ua pasia uma e i latou Igilisi e 4 sa amata mai le aoga o tauavea se’ia oo ina pasia Igilisi maualuluga. O le tamaitai o Lilly Lauina. Peita’I ole isi to’atolu o le fanau lea iloga le lelei o togi ma maualuluga taumafai i Igilisi fa’atulaga mo le Kolisi, eng 150 & 151: Judith Savaliatoa Liu, Geraldine Meridian Aliitaeao Ofisa, ma le sui na te mauaina le togisilia mai lea vaega o kosi tau’ave i le kolisi Lolua Lefulefu Leonomea Denitra Mary Leomiti.

Na soso’o lea ma fa’ailoga na tapena e le Asosi o Fanau a’oga e maualuluga togi i mataupu lava sa tauavea i le Kolisi poo le Phi Theta Kappa, ma sa tutula’i ai le susuga Kuki Tuiasosopo na te taua’aoina tu fa’ailoga nei mo latou sui o le a fa’au’u i lenei vasega fa’aiuaso a le ASCC.

O le fa’ailoga ua maua mo le sui totino o le PTK ua maua lea e Judith Liu; Fa’ailoga mo le Community Service ua maua lea e Jenzel Cuison, ma ua fa’apea fo’i ona toe maua e lea tamaitai le fa’ailoga o le Leadership.

O le isi fa’ailoga o le Taitai Tausa’afia na maua lea e Geraldine Meridian Aliitaeao Ofisa, Naoiailagi Tausa’afia Senio ma Perosiomelemaofeira Vaofanua.

Na saunoa fo’i Tuiasosopo e fa’amanuia atu i taumafaiga ma sailiga o le atamai a le to’a 12 o le fanau o sui o le PTK o le a tu’ua i latou ona ua fa’aiu manuia taumafai i lenei afa tausaga.

O le vaega a le Physical Education na tula’i ai le tamaitai faiaoga o Cassandra Bess Lund mo ana fa’ailoga na taua’aoina atu.

O le sui ua ia filifilia e mauaina le fa’ailoga o le toaga malosi mo fa’amalositinoa ma ta’aloga ua ia filifilia ai le tamaitai o Lilly Lauina ‘o le sui mo ali’i ua ia filifilia ai Tamasipani Fa’afoi. Mo le fa’ailoga o ta’ita’i lelei i lana fo’i vaega o a’oa’oga, sa mauaina lea e Dimitrius Mauga. O le fa’ailoga maoa’e lava ua mafai ona tuaa’aoina i se tasi o sui e sili ona tausoa o ona tiute ma e na te fa’amoemoeina fo’i i lana itu o le tautuaina o le fanau ia malolosi ma lelei le tausiga o latou tino.

I tulaga o a’oa’oga mo Faia’oga ua taua’aoina fo’i latou fa’ailoga fa’apitoa  ma e to’a 16 Faia’oga ua fa’amau fa’ailogaina mo le galuega tau faia’oga i latou ua fa’amanuiaina tuamafaiga mo fa’ailoga AA ua aofia ai Toetu Lilomaiava, Jacinta Tavita, Fiti Seine Sua, Fa’aleiloa Oeti, Avasa Matoka ma Jennifer Sue Leoso.

I latou ua fa’au’u ma fa’ailoga Bachelor of Education;Tupemeleke Shiela Ieremia, Motusalaia Save Danielson, Mafia Teleofa Tusi Ioane, Sola Mailo, Delphina Gloria Sagatu, Tautala Getrude Seti, Ina Shekinah Tupufia ma Selita WooChing.

Fa’ailoga fa’apitoa mo matauou fa’a-Saeanisi i le Kolisi sa tula’I ai le susuga Dr. Dewees  ma lana fa’ailoga lava e tasi na tapena i ai lana teutusi o le seleni na faimeaalofa ai, lea sa maua lea e le tamaitai na tauavea muamua ana vasega, ona toe nofo lea ma le a’oga ua le toe alu atu. Peita’i ina ua toe taliu atu, ua ia va’aia le suiga tele ia te ia i le tulaga o le auai i vasega, leai se toe fa’avaivai, ua iloga fo’i ona sa’o lana va’ai toto’a i ana meaa’oga ma ua fa’aiuina ma le manuia i lenei tausaga lana taumafaiga i ana mataupu o le Chemistry: Ua maua lea fa’ailoga e Jenzel Angelica Cuison.

O fa’ailoga na tomuli i ai le fa’amoemoe o le fanau fa’au’u na tuuina lea i le Asosi o fanau a’oga mo latou fa’ailoga fa’apitoa ma sa mauaina le fa’ailoga muamua e Tamasipani Fa’afoi, o le fa’ailoga lona lua na maua lea e Naoiailagi Tausa’afia Senio ma le fa’ailoga o le Taitai mataalia na maua lea e le tamaitai o Perosiomelemaofeira Vaofanua.

Na fa’afiafiaina atili le fanau fa’ai’uaso i le latou aiga fiafia ma o latou ta’ita’i o le Pulega o le Kolisi Tuufaatasi o Amerika Samoa lea sa aofia ai le afioga le Peresetene Rosevonne Makaiwi Pato ma lana taupulega mo lea fa’amoemoe maualuga e fa’afetaia ai le ola saili o le fanau ua fa’aiuina ma le manuia latou taumafaiga i a’oa’oga.

[Tala tusia o le fa’au’uga i le lomiga a taeao]

TOE SA’AFI MO MYRNA PENINA MITCHELL O FAGATOGO - “Ou te Taoto ma ou filemu…”

Ina ua maea ai o se taimi umi o fa’ataotolia le gasegase o le tamaitai o Myrna Penina Mitchell ile falema’i LBJ Tropical Medical Center i Faga’alu, ona fa’ato’a moe filemu lea i a’ao o lona Fa’aola ia Aperila 15, 2021. 

I molimau sa fa’afofogaina, ua iloga ai uiga o lenei taumaitai tausa’afia. “E le ose tasi e so’ona saunoa, e le o se tasi fo’i e gae’e gofie lona tagata i ni fa’amatalaga, ae loloto lava lana tofa, e auiliilia ona lagona fa’ato’a fai ai sana fa’amatalaga. E lau fofoga fiafia i taimi uma, i lana ataata fa’atausala e ono se ai se tasi i ona uiga filemu, ae a manatu e fa’aalia sona lagona, e mautinoa e ia ua e lagona lona taofi. E le alo fo’i o ia i le mea moni.”

“I lana galuega sa galue ai i le Matagaluega o Tautua & Alagamanuia mo Tagata Lautele a le Malo, sa i ai lea i le vaega o tautua eseese mo le fanau. E matua onomea lava ia ma le vaega sa ia tautua ai. E auau o ia i le fanau, e nate fa’afailelea uma le fanau a ona uso ma ona tuagane, o se tasi e agaga i tamaiti ma ua talafeagai ai lana galuega ma ona lagona fa’atamaitai tausitama ma ta’ita’itama.”

O le molimau a si ona tina, sa ia fa’ailoa ai, “Aua lava nei fa’apea se isi, e ataata le fa’atausala amioga va’aia i le tele o taimi o Myrna, ae i ai le taimi e liu ai, ua faailoa mai e se tasi o tamaitai Taupousa sa faia’oga i le fanau a’o laiti, “O ia lea o lou soo lelei. Peita’i, ia te a’u, o ia o se tama teine e le taitai ona lagona se leo malosi, pe talia fo’i se upu ma se lagona fa’asea, ae fa’alogo ma gaua’i gofie o ia e talia le faatonuga ma le usita’i.”

Sa i ai sui o le Child Services a le DHSS, sa molimau “O Myrna o se tamaitai tino lelei, te aulelei, e le fesiligia lea tulaga, peita’i o se va’aiga lea o se tasi e to’a lelei i le galuega, e auau tele o ia i le fanau, masalo o le isi lea mea e fiafia ai tele o ia e ala usu atu i le galuega, ma fa’atalanoa ma matua auaunaga mo le fanau e afua mai lava i le laiti se’ia oo ina mae’a tausaga mo le auaunaga a le matagaluega. E to’a lava ia te ia le tele o fa’aiuga fai o le matou galuega, aua o lona faiva lea, ma e onomea ia te ia lona lea tofi.”

“E laufofoga fiafia tele o ia, e le va’aia sona foliga ita pe siisii fo’i sana tala i so’o se tasi i le Ofisa fa’apea ma matua e soloa’i atu mo le tautua. E fa’amanuiaina o ia e le Atua i le faigaluega onosa’i ma e fa’afiafialoto lava lona soimaga i le galuega i aso uma. Ina ua taofia o ia i le falema’i, sa matou misia o ia i le galuega, peita’i o lea ua soso’o lava ma le sola ese atu ai, ua leai fo’i la se toe sootaga ma ia i le galuega. I lona toesea ai mai le galuega, ua se’i lava se tasi sa fa’amoemoeina i le matou itu o le tautua mo le lautele.” O se tala lea sa molimau ai se tasi o sui faigaluega i lona Ofisa mamalu.

O lana uo mamae o Senara Fa’alevao, sa molimau “Aua o a’u lava e feosofa’i ma le telea’i, ae o Myrna e to’a i ai lona pisi i se upu fa’amalosi, o se fautua e fa’atuatuai le faiga o fa’aiuga ma fuafuaga, aua le so’ona vevesi. Ou te misia lana ataata ma e fiafia lava lona tagata i taimi uma. O ia lava o le Queen. O lana savali fa’aeteete ma lana faifailemu, e matua agava’a ai lava e avea ma Tausala ma Queen o lona aiga. Emoni lava e le mafai ona faigofie ona fa’agalo uiga tausa’afia aua o ia lava lena. E to’a i ai mo se fautua pe ta lagonaina fa’avesivesi se mea i le mafaufau, poo le a sana upu apoapoa’i mai. E lua lava ana tala ataata ma fa’amalu mai i lona loto, uma fo’i le vevesi o le mafaufau, Lea ua sola, o lea le toe i ai se sulufaga aua o ia e pei o se uo mamae, uso, tina toe fautua i lona nei tagata vaivai. Myrna, fa’afetai mo nei tausaga e tele sa e fesoasoani mai ai i lou tagata fa’atauva’a. Ia manuia lau malaga.”

O lona toe sauniga ma fa’amautu ai o ia i lona oliolisaga tumau sa fa’ataunuuina lea i Masefau i le aiga o lona tama o Frank Mitchell Jr.

O lona tina o lo’o soifua pea lava, Rachel B. Laurenson Mitchell o Fagatogo, ma o i latou e tautua I le Ekalesia Katoliko Roma i Fagatogo lava. O Myrna o se tasi o la’ua fanau e lima , e to’atasi lava lona uso ae to’a tolu ona tuagane.

Na amata ana aoaoga i le St. Francis School I Leloaloa ma soso’o ai ma le ulufale i le Fa’asao ma fa’aiu ai I le ausaga e 1989. Ulufale loa i le a’oga a Heald Business College ma fa’au’u mai ai.

Na amata lana galuega I le Envision Inc Hayward, Kalefonia o se asi o Data Entry Clerk. Soso’o lea ma le faigaluega I le Chalker San Francisco, CA o le Line Cook Manager.

Ae siitia mai loa I le tatou atunuu ma toe faigaluega ai loa I le Matagaluega o Alagamanunia mo Tagata Lautele I le tautua mo Fanaiti Child Care Division 2006-2021.