TALA I VAIFANUA

Pago Pago, AMERIKA SAMOA

MANA’OMIA FESOASOANI IA MAUA LE SUI NA SOFA’IA LE TINA MATUA

O se tasi o tina matua na osofa’ia e se tasi ma sola ese ma lana ato i le auala i Taputimu. O le tina o Cathrine Adler, o se tina papalagi ma e to’atele lava ana uo mamae, lea ua tula’i mai i latou e tau sailia se fesoasoani ina ia mafai ona maua mai le sui sa ia faia lea amio le taupulea ia te ia.

O le mea mautinoa ua gaoia e lea sui le ato a lea tina matua, ua latalata i le 70 mtausaga lona matua. O le tina o Wendy Malepeai, ua loa fo’i tausaga o faigaluega fa’atasi ma Adler, ua ia augani i ona aiga, e alofagia se’i tausailia mai le sui ua na faia lea gaoiga pupula o si tina matua, aua o se mea e le mafai ona faia e se atali’i o se aiga Samoa ua aoaoina ma fa’atonu lelei e lona aiga ma matua.

Ua fa’ailoa mai e Catherine Adler, ua fa’afefe o ia e le ali’i e la’ei uli uma lava, ae o le mitiafu fo’i ua saisai ai ona foliga, ma sa ia umia se sapelu. Na sofa’i o ia i le ao teatea lava ma fa’afefe o ia, e na te fasiotia o ia pe afai e le tuuina atu lana ato ia te ia.

“Sa ou fa’atalosaga ia te ia, peita’i e le’i manatu o ia e fa’amatuu mai lana ato.” Ua talosagaina ai e ia le mamalu o le afioaga o Taputimu, le itumalo o Tualatai ina ia latou tau sailia poo ai tonu lava lea ali’i talavou, ma fa’ailoa atu i le Ofisa o Leoleo pe afai ae maua ane e se tasi lana ato. A maua, ua ia talosagaina, ia alofagia ma fa’asa lea sui mai le nuu o Taputimu.  Ua tele tausaga talu ona nofo Catherine Adler i Taputimu, ae o lea fa’ato’a oo lea o lona olaga i se mea tiga faapea e tupu mai ia te ia.

“E le tatau ona tupu i Samoa lenei ituaiga faiga, e le masani ai o tatou tagata ona faia fa’apea o tatou matua matutua. O i tatou e fa’amoemoe i ai o tatou matua matutua i lo latou saogalemu ma le puipuigamalu i taimi uma. Pe afai e te silafia pe ete masalosalo i ni mea ua e va’aia i se sui talavou e tau atagia ai o loo umia e se tasi le ato a Adler, fa’ammolemole faafeso’ota’i le Ofisa o Leoleo.” o se fa’amatalaga lea ua fa’amalosia mai mo le taumafaiga e sailia lea sui le fa’aaloalo ma le le popoi.

O se tala a se tasi o tama sa ia fa’ailoa ai lona taofi, “Ou te iloa lelei e le fiafia tagata Samoa ae fa’alogo i nei ituaiga tala ae a’afia atu ai nisi i latou nuu, o lau vaega o le fa’ailoa mai o se mea ua e silafia e tusa o lenei solitulafono ua fa’aoo i se tasi o tina matua.

E le o se taimi muamua lea ua tupu ai ni mea faapea i le afioaga o Taputimu, ua i ai fo’i nisi sa fasiotia lava i le nofoaga lava lea i Taputimu, ma ua maliu ai. 

E ese mai lena, e i ai foi ma nisi o lipoti na maua mai i aiga lava o lo’o i lea vaipanoa o Taputimu, e a’ofia ni faiga fa’amalosi tamaitai.

TUUA LE MALO SUSUGA LE FAIFE’AU, TAMA & O LE FAIPISINISI - OTTO HALECK JR.

O le anoanoa’i o molimau patino i le fanau sa mafai ona suia olaga ma amioga ona o le galuega tima’i ma le fautua a Rev. Otto Haleck Jr. sa fa’afofogaina lea e ala i fa’asalalauga tu’usa’o sa latou tau faia mai i upega tafa’ilagi, ae le toe sauniga o le latou tama fa’aleagaga, i le Gov. Rex Lee Auditorium i Utulei i le taeao ananafi.

Ua le gata i molimau ae ua latou fatu ma taulagi pesega e fa’amanatu ai le taimi na suia ai o latou olaga talavou ona o le galuega timai ma faufautua a i la’ua ma Pr Vickie Langkilde Haleck  i o latou olaga talavou, talu mai le amataga o le Teen Challenge American Samoa.

O le ulua’i sauniga o le susuga le Faife’au Rev. Otto Haleck Jr sa faia lea i le aso Lulu, Me 19, 2021 ma sa taitaia lea sauniga mamalu e le susuga Rev. Simon Mageo, o le taitai o le Assembly of God  Itu i Sisifo #1.

O le sauniga lea sa matele ina faia ai le sao o le Teen Challenge ma fanau ma sa aoga i ai le tima’i fa’atama ma le auaunaga fa’afaufautua lelei a le susga le Fa’afeagaiga Otto Haleck Jr.

O le upu fa’amalosi ma se molimau fo’i a le susuga le fa’afeagaiga Re. David Katina mai le Ekalesia a le Great Life 684 na soso’o ai.

Na tula’i lea o le faletua a’o le susuga le Faife’au, Rev. Vickie Haleck, le sa mafuta ma Rev Otto Haleck i lona soifuaga faiaiga atoa, ma sa ia talatala le lelei fo’i o lea tama, i le galuega a le Atua, se’ia oo lava i le tausiga ma le fa’afaileleina o le soifua talavou o le fanau se’ia oo ina avea i latou ma nisi fo’i e aoga i le tala’aiga.

O le tama o le aiga o se tasi e le tele ni upu e tautala ai, e filemu lava lona soifua ma e faapea fo’i ona loto maulalo lava. O se tasi ua saunia lelei mo le galuega a le Atua.

O nisi o mau e masani ona saunoa i ai Otto, e ta’ita’ia ai lona soifua tautua ma fautua ai le fanau e aofia ai, “O lou alafa’i mai i le taeao fou, o se avanoa lelei lea ua tuuina mai e le Atua e te faia ai mea lelei, fa’aleleia ni mea sa fa’aletonu, ma ia e feso’ota’i lelei ai ma nisi uso a tagata. O le taimi lenei e te le toe solomuli ai pe fa’avaivai, tula’i mai, fa’amalosi ma ia e matua tumau i lou fa’amoemoega e tasi, ia maua le ola e fa’avavau, i tua atu o le oti.”

“O le taua o feagai ai ma i tatou, e le tatau ona e solomuli ai. E tauau e fa’anounou ai, pe te punou ai mo sina taimi, ae o le i’uga, e tula’i ai ma le mautinoa, ua aoaoina ai oe i le finagalo o le Atua mo oe. O ala tuai, e le tatalaina ai ni avanoa fou mo oe. Afai o tata lou fatu, e i ai lou fa’amoemoe. Afai fo’i o tumau le ola ia te oe, o lo’o tusia lou tala’aga e le Atua, o ia lea o u’uina le peni.”

O le toe sauniga o Otto Haleck Jr o le a faia lea i le aso Lulu lava ma e taitaia lea e Rev. Asaua Fuimaono.

O le tatalo e siitia lea e Rev. Maugaoao Alailefaleula, o le faitauina o le Tusi Paia e fofogaina e Rev. Gaoa Mauga, ma le lauga o le a fofogaina lea e Rev. Aifa Tanuvasa. Na soifua mai Otto Haleck Jr i ona matua o Max Haleck Jr. o Pago Pago, ma Taulima Lauvao, o Aunuu Amerika Samoa. Ona fa’aipoipo atu lea o ia i le tina o le Aiga; Vickie Teumalo Langkilde, Leloaloa, Amerika Samoa, ia Fepuari 14, 1989, o le aso fa’apitoa mo Manamea. Na faia lea sauniga i le Corner Stone Assemblies of God ma sa fa’apa’iaina lava i la’ua e le tama matua,  Rev. Otto Haleck Jr.

O la’ua alo e toa 7, e to’atasi lava ua maliu o Michael Haleck lea. E to’alua tama ma le to’afa o tamaitai, ae ua to’a 21 o fanau a la’ua fanau i lenei tausaga ua maliu ai lana susuga le Fa’afeagaiga.

O ona uso e to’alua ua muamua fo’i ona maliliu ia te ia ae ua totoe nei ona tuafafine e to’a fa o lo’o soifua mai le latou fanauga e to’avalu na soifua fa’atasi mai i latou matua. “Aue ua maliliu Toa, ua maumau auupega o le taua!”

MAUA ATALI’I TOGISILIA I TAFUNA HIGH SCHOOL “DREAM CHASER  AWARD” I LE US AIR FORCE

O le ali’i sa avea ma togisilia i le tausaga e 2017 i le a’oga maualuga a Tafuna, John Xavier Anesi Iosefo, ua fa’afiafiaina nei o ia ma si ona aiga atoa ina ua maua e ia le fa’ailoga fa’apitoa a le USAir Force, le Dream Chaser Award.”

O lenei fa’ailoga e sailia lava se tamaititi poo se teine a’oga i tausaga ta’itasi e toina i ai, pe afai o i latou o nisi o le ituaiga o tagata Polenisia, Maikorenisia poo le ‘au Melenisia lo latou tupu’aga. E tatau fo’i i lea sui ona fa’ailoa lona naunau i tu ma aga mata’ina fa’ata’ita’i ma e agaga i le faia lea o mea tonu uma.

E afua mai ia te ia se malosi’aga e faamalosi atu ai i nisi o fanau a’oga e to’atele i totonu o le Iunivesite o San Francisco.

O le ali’i talavou lenei o John Xavier o le atali’i e fa’asino ia Tauiliii Silivelio ma Juliana Iosefo o Tafuna, ma sa faa’uu mai Tafuna ma le tulaga togisilia e to’atolu fo’i i latou na tula’i mai lea tulaga i le fa’au’uga o le tausaga 2017.

O le a faau’u mai o ia mai le Iunivesite o San Francisco i le vaiaso nei ona soloa’i loa lea o ana taumafaiga e ulufale atu ai lea e faigaluega i le United States Congress ao le’i amata ona ana aoaoga i le Iunivesite o Georgetown ia Setema lea ua totogia atoa ana aoaoga e lana Sikolasipi lea mai le Puleaga a lea Setete. Pe afai o le a maea loa ona maua lona fa’ailoga Masters ona fa’ato’a ulufale loa lea o le ali’i talavou i le United States Diplomatic  Corp.

Ua faailoa mai i sana fa’amatalaga na fa’asalalauina mai e le Facebook lona agaga fa’afetai i le Atua ae maise o lona aiga i matua ma ona au uso ma tuafafine ona o le fesoasoani sa ia mauaina mai ia i latou uma lava, i le taimi a’o taumafai mo lenei fa’ailoga ae maise ana aoaoga uma. O lo’o ia misia fo’i le mafutaga, ae peita’i, e tatau lava ona fa’aauau le taumafaiga.

Fa’amalo le Tauata’i i lea alo o le atunuu, ma ia fa’amanuia atili le Atua i faiva.