TALA I VAIFANUA

Pago Pago, AMERIKA SAMOA

$479 MILIONA MO AMERIKA SAMOA - MAI LE “AMERICAN RESCUE PLAN”

Ua faailoa mai e le tatou Faipule i le Konekeresi e $479 miliona le vaega tupe mo Amerika Samoa lea ua mae’a fa’atulaga e maua uma lava i le taimi e tasi mai le American Rescue Plan. O le aotelega atoa e $479,135,254.00.

Ua fa’ailoa ane e le US Treasury i le tatou Faipule i le Konekeresi Uifaatali Aumua Amata i le vaiaso nei lea tala fiafia, e maua lava le aotelega atoa lea i le taimi e tasi. O le Rescue Plan lea a le Malo tele e afua lea i mea ua afaina ona fa’agasologa ona o le a’afiaga o le fa’asa o le fa’ama’i Corona Virus. O le alagatupe lea e toe fa’aleleia o le tamaoaiga o le atunuu.

O le a fa’alauiloa atili mai fo’i nisi o alagatupe mulimuli mai, ae o le aotelega lea o le tinoitupe e toe fa’aleleia ai ni mea na fa’aletonu a le malo ina ia taofia galuega, le mafai ona fa’atino galuega ona ole  fa’asa o le Covid-19.

O le sao lea o Amerika Samoa mai le vaega tupe na fa’atulaga e le Konekeresi le $4.5 piliona mo teritori, ma ua fa’ailoa mai o le vaega tupe sa vaevae tutusa lava ma se isi vaega sa toe vaevae e tusa o le faitauga aofai o tagata o le atunuu. O le fa’aiuga ina ia tufa fa’apea lea tele o le seleni ua fa’atulaga, ina ia amana’ia le vasega o teritori laiti ma o latou mana’omia, ae ia le misia fo’i se tasi o teritori ma ni alamanuia.

Ua fa’atulaga mai fo’i e le Matagaluega o Tupe a le malo tele le fa’aaogaina o lenei vaega tupe tele, ma ua fa’ailoa mai e mafai ona fa’aaoga e le Malo e toe fa’aleleia ai le tamaoaiga tausi o le atunuu na fa’aletonu ona o le a’afiaga o le Covid-19 ma ona fa’asa.

O le vaega tupe fo’i lenei e fa’aleleia ai le totogi o tagata faigaluega sa fa’aitiitia ona ua fa’asa ona faigaluega i vaitau o le sofa’i mai o le Covid-19.

O le isi aoga tele o lenei fa’atupega, ua mafai ona faia ai a’oga e fesoasoani ai i tagata faigaluega e le’i maua ni galuega, ia maua tomai eseese e agava’a ai i ni galuega. Ua faailoa mai fo’i ua mafai ona fa’aoo atu ai se fesoasoani ia i latou e le o maua ni galuega e galulue ai ma le vasega o aiga e fia maua ni mea’ai, fa’aleleia fale e nonofo ai ma isi fo’i ituaiga o fa’afitauli o feagai ma i latou i tulaga tau le lava le tamaoaiga tausi o aiga.

Ua i ai vaega tupe e mafia ona fa’aleleia ai pisinisi laiti, ae maise lava pisinisi na matua o’otia lava i le tulaga o le fa’asa o le Covid-19 lea e aofia ai le vasega o pisinisi e fa’afeso’ota’ia femalaga’iga a tagata lautele, tusi ai pasese ma faia feutagaiga o latou faigamalaga i fafo ma toe fo’i mai. O nisi o pisinisi lea e fa’aagaaga mo faletalimalo ma nofoaga e tafafao i ai tagata maimoa mai fafo, fa’atasi ai ma pisinisi sa tautuaina turisi, o i latou na e ao lava ina maua se latou vaega e fa’aleleia ai latou pisinisi mai lenei fa’atupega.

O nisi o galuega ua talafeagai ona fa’aaogaina i ai le alagatupe lea o poloketi e aoga mo le fa’aleleia o le Suavai Lafoa’i ma galuega o le toe fa’aleleia atili ma fa’amama o le suavai taumafa i le atunuu, ae tatau ona mita’i lelei le tulaga o le Saogalemu o le Siomaga i nei galuega uma o le a fa’atupe ai.

Ua fa’atulaga mai fo’i sina vaega tupe mo le fa’aleleiga atili o le Broadband mo feso’ota’iga lea e manatu ina ia si’itia le saoasaoa i le 100Mbp o le download ma le 100Mbps mo le upload.

O lo ua aofia ai fo’i ma le fesoasoani tu’usa’o lava i lotoifale o aiga o lo’o ua mana’omia lava ona fa’aa’e ai le tautua a le Initeneti i le saoasaoa lava lea, ma ua fa’ailoa ai, o le vaega tupe lea e tatau ona fa’aoo ai lea auaunaga i aiga uma o Amerika Samoa.

“O ituaiga vaega tupe nei ua toina mai e matua tele se aoga o le a mafai ona fa’ae’e atu i Amerika Samoa ona o galuega o le a mafai ona fa’atino ai. O le fesoasoani tele mai le Malo Tele e matua lelei atoatoa ai le si’itaga o le olaga o tagata fa’apea ma le gafatia e le Malo ona fa’atupe a latou galuega atina’e o le atunuu i se tulaga mautu ma le lelei atoatoa e tautuaina ai ona tagatanuu ma e ua avea Amerika Samoa o le malo e nonofo mau ai,” o se tala lea a Uifa’atali Amata e tusa o le aoga o lenei fesoasoani tele ua maua nei.

Ua fa’apea fo’i ona fa’amalo ma fa’amanuia mai le afioga Uifa’atali Amata i le tatou Kovana Sili ma le taupulega ona o le galulue fa’atasi ina ia maua manuia eseese mai le Malo tele i lenei vaitau o le Covid-19 ma ona fa’asa.

“O le lelei ai ona fa’asoasoa mai o lenei aotelega o le seleni mai le Malo tele, o se fua lea o le tulaga galulue fa’atasi o le faigamalo ma i matou o sui fa’atauva’a i le Laumua e finaua nai sootaga laiti e fa’aleleia atili ai le fa’amatuu mai o nei fa’atupega. O lo ua iloga mai le galulue fa’atasi o taitai o atumotu fa’ateritori o Amerika ina ia mautu a latou fo’i vaega tupe, e tusa o lo latou faitau aofai ma le tele o galuega sa a’afia ona o le Covid-19.”

TAPUNIA E LE DOH LE FALEA’IGA O SONNY’S I NUUULI:

O le fale’aiga o Sunny’s Restaurant i Nuuuli, sa asia fa’afuase’i e le Matagaluega o le Soifua Maloloina, ma ua tapunia ai ona ua tele ni mea e ao ina fa’aleleia muamua a’o le’i toe tatala mo le tautuaina o le atunuu e ala i mea tausami mo le latou fofoga taumafa.

“O le umu kuka ua le tusa ma aiaiga o ituaiga umukuka e tatau ai ona fa’avela ma tapena mai ai mea tausami mo le atunuu atoa ua fiafia i a latou tausami tapena ma fa’avela,” o se lipoti lea ua fa’ailoa mai e sui na afea fa’afuase’i lea fale’aiga.

Ua va’aia e le tulaga lelei paipa o le suavai mama e tatau ona tapena ai mea taumafa, ae maise le taimi e fa’avai ai mea’ai a’ano o manu fasi e fa’aaoga mo kuka eseese. Ua fa’ailoa mai fo’i o le paipa e ave’esea ai le ga’o mai mea’ai gaosi ua ta’i sa’o lava i lalo o le palapala i fafo o le fale’aiga.

Ua fa’amauina fo’i i lipoti a le DOH le fa’amatalaga mai le ali’i e ona lea faleaiga ua fa’ailoa mai ai, “O le vaitaimi lenei ua fai lava si pisi na’ua o i matou uma ma le aufaigaluega e tautuina tagata uma ua gasolo mai, ma ua le maua lelei ai se taimi mo se galuega fa’amama lelei o le umukuka.”

O le mafuaga lea ua finagalo malilie ai sui o le Matagaluega o le Soifua Maloloina o le a tapunia lelei le fale’aiga mai le tautuaina o tagata lautele ae o le a lava ma totoe ai le latou taimi e fa’aleleia ai mea uma ua fa’atonuina e fa’aleleia mo le gaosiga o mea’ai aua le fofoga taumafa o le atunuu o lo’o fiafia tele i le Kukaina o le Mamoe a le Sonny’s Restaurant, fa’apea ma le kapuvae.

I le afiafi lava o le aso Gafua na tapunia ai le fale’aiga lea, ua va’aia ai le galueaina o le Paipa Vai tele o lo’o ta’ia aga’i atu i le a’ai o Nuuuli, ma sa matua toe siakia atoa e le ASPA le latou laina lea, ae taofia le suavai mai aiga uma o le to’atele o le afio’aga.

O lo ua toe fa’aleleia so’oga o le paipa vai lea, ina ia ta’i atu le suavai e mama atoatoa, ae le o ulufia e le palapala ma eleelea ai le suavai o lo’o fa’auia mai paia uma i le afio’aga o Nuuuli.

O le galuega lea sa fa’atautaia lava e le Kamupani o lo’o faakonekarate mo galuega o le Suavai a le ASPA i Nuuuli.

POLOKALAMA O A’OA’OGA SU’ISU’I MA LE TAINA O MEA-TAULIMA

I se fa’aalia mai le American Samoa Coalition Against Domestic and Sexual Violence (ASCADSV) ua fa’ailoa ai o le a faia le polokalama o a’oa’oga ‘Su’isu’i ma le Taina o mea-taulima’ a le O sa e Nafa ma Tinā ma Fanau Sauāina, ia Iuni 14, 2021 - Iulai 23, 2021. O lenei polokalama, o se taumafaiga ina ia si’itia tulaga i agava’a ma taleni, e mafai ai ona atina’e lelei ma ‘ausia se olaga mautū ma le tauāloa mo tagata ta’ito’atasi, aiga ma fa’alapotopotoga. 

Mo le resitaraina o lou suafa, fa’afeso’ota’i mai le O sa i le Tolu Street, Lions Park i Tafuna, po o le telefoni 699 0171 / 252 4805 / 254 2168. O lea polokalama, o lo o sapasapaia ma galulue fa’atasi ai le ASCADSV, DYWA, ma le O sa o Punaoa ale Malo o Amerika Samoa (ASG-Department of Commerce). Ona o tulaga i le fa’ama’i oti e pei ona iai nei – KOVITI 19, ia vave fa’afeso’ota’i mai le O sa mo sou avanoa, ona e fa’atapula’a le aofai o tagata mo lenei polokalama.