TALA I VAIFANUA

Pago Pago, AMERIKA SAMOA

FA’ALAUILOA & FA’ATAUA - AGAVA’A TAUSIMA’I I LE ATUNUU E LE VASEGA TAUSIMA’I TATOU KOLISI:

O le mea mautinoa, e le o taitai ona lava tausimai mo le atunuu atoa i lona matagaluega o le Soifua Maloloina ma le Falema’i Tele i Faga’alu.

O le manulauti lea o galuega fa’atino a le Kosi o Tausima’i a le tatou Kolisi Tuufa’atasi ina ia latou fa’alauiloa atu a latou matafaioi ma tautua mo le lautele, ina ia fa’aosofia ai le lagona fia auai ma tau’avea kosi Tausima’i e le fanau a’o’oga i le tatou Kolisi.

Ese mai lena, o le fa’atinoga i nofoaga lautele ma asiasiga fo’i o lo’o fa’atautaia e le fanau ua tapena mo le fa’au’uga o lenei afa tausaga, ua avea lea ma latou galuega fa’atino e maua ai o latou togi fa’aiu o le latou taumafaiga i aoaoga fa’apitoa fa’atausima’i.

Ua faailoa e le tamaitai Fa’atonu o Kosi Fa’atausima’i i le Kolisi, Lele Ah Mu, “O le tele lava e oo i ai matou vasega mai le amataga o le kosi lenei e ta’I 20 pe latalata fo’i i ai, peita’i e fa’asolo mai le lua tausaga atoa, ua i ai nisi e fa’ama’amulu mai le aoga, o nisi ua le gafatia togi e pasi ai, ma ua i’u ane le 2 tausaga e tatau ai ona fa’au’u, ua to’aititi i latou e ausia le fa’aiuga o le folauga.”

“O se isi lea vaega tele o le galuega ma kosi fa’atausima’i nei, ia mafai ona o atu le fanau o tauavea aoaoga ina ia fa’ata’ita’i ona tautuaina le mamalu lautele o le atunuu. O le latou mea e fai, o le va’ai o se nofoaga e mafai ona to’atele nisi e uia i aso ta’itasi, ma o iina e fa’atautaia ai le latou auaunaga mo le mamalu lautele. E faia e i latou siakiga masani e faia pe a faia talavai masani a le lautele. Siaki le maualuga o le toto, siaki fo’i le maualuga o I ai le suka, ma fa’afesiligia fo’i ni auga o nisi ituaiga o gasegase o lo’o masani ona fa’atautaia i siakiga masani a le mamalu lautele.”

O le pololalama la lenei a le fanau a’oga, o le a fa’atautaia lea i le aso, Aperila 28, i le TAOA Building i Tafuna ma o le a latou mua’i tautuaina ai le mamalu o Matua Matutua o le atunuu. Ua le faia na’o le TAOA lea fa’amoemoe, ua mafai ona oo ane i ai so’o se tasi ina ia molimauina le faumafiaga a le fanau, ma ia fa’aaogaina tatau fo’i lea auaunaga taua ua latou fa’atinoa mo le mamalu lautele.

Ua fa’amauina ma fa’alauiloa le latou aso fa’apitoa lea ma le latou galuega fai, “Ala Tuusa’o i le Soifua Maloloina!”

O le auala o le a togia ai le fanau a’oga, o le tele o lo latou silafia o latou tiute fa’atino, ma le ala ua latou fa’atinoa  ma fa’aaoga ai nei tomai ua latou a’oa’oina i le potu a’oga.

O le a tatala le avanoa mo lea auaunaga faia fua, mai le itula e 8:00 i le taeao se’ia pa’ia le itula e 2:00 i le aoauli.

E tolu vaega o tamaitai ma ali’i tausima’I o le a galulue fa’atasi i le fa’atinoga o le “Ala Tuusa’o i le Soifua Maloloina.” O i latou o lo’o sailia fa’ailoga o le Registered Nurse; o i latou o sailia fa’ailoga o le Practical Nursing [PN] ma le vasega o fanau o lo’o sailia le fa’ailoga Nurses Aides.

O le aotelega e to’a 16, o sui o lo’o auai i le Caregivers Program lea e aoaoina e le Nursing Dept. a le ASCC ae fa’atupe mai e le TAOA, o le a auai fa’atasi ma sui uma o le Polokalama Fa’atausima’i mo lea fa’amoemoe aoga. O le vasega lea a le Caregiver’s Course o lo’o fa’agasolo a latou aoaoga i le taimi nei, e faia fo’i i le Kolisi Tuufa’atasi i vaiaso ta’itasi.

O sui uma o a’oa’oina fa’apitoa mo le tausiga o tagata matutua i tua i aiga, e a’oa’oina fo’i ia silafia lelei ona fua le fiva, fua le suka le aofai o le masoa ma le ga’o I le toto, fua le umi ma le mamafa o tagata lautele e tausia fa’apitoa e i latou, faitau lelei le tata o le fatu ma ia iloa fa’amaumau uma nei ituaig o faitauga ina ia malamalama lelei le gasegase po’o le foma’i fo’i, i a latou fa’amaumauga e faia ai fa’aiuga mo togafitiga.

I le taimi lava e tasi, e fa’asolo i latou ina ia fa’atautaia ni a’oa’oga fa’apitoa i ala e silafia ai e le tagata matua, po’o le se uiga o ni fa’aletonu ua ia fa’alogoina i lona soifua i aso taitasi. O auga o gasegase masani o le ma’i suka ma le toto ua maualuga, o le a fa’alauiloa atoatoa ai e sui o lenei vasega o aoaoga fa’atausima’i.

Ua lualuagia fo’i lenei tautua, o le a maua nai fa’amalositino tau taumafa mama mai le vasega o i latou o tau’avea kosi fa’atausima’i i le Kolisi, ina ia maua pea le malosi o le tino, a’o saofafa’i matua ma le lautele e tatalia siakiga ma fa’afofogaina latou a’oa’oga fa’apitoa i auga o gasegase o lo’o fa’atupula’ia i totonu o le atunuu, le ma’i suka ma le toto maualuga.

O le aso Tofi o le a masii atu ai lenei vasega atoa i le Manu’atele lea e asia ai e i latou Ta’u Manu’a, ma o le a atoa ai le latou vaiaso i lea itu o le Manu’atele. O le a latou fa’aaogaina le Falema’i fa’aitumalo i Ta’u mo a latou tautua uma e tatau ona fa’aoo i tagata lautele o lo’o papaa’ao i le Faleta’u, lea aofia fa’atasi ai Fitiuta Ta’u ma Faleasao.

O le fa’aopoopo i a latou tautua lautele, o le a i ai a latou folasaga e fa’atutu i le Covid-19, fa’atasi ai ma le ituaiga o ituaiga tui e puipuimalu ai le soifua lautele mai lea fa’ama’i faigata, ae o le taua o lea asiasiga, o le fa’amaumauga lea o faitauga mo’omia mo le Manuatele e tusa o le latou soifua lautele, lea o le a latou aga atu e fa’atino ma faitauina i le vaiaso atoa.

“O le fanau a’oga ua leva ona tapena ma ua mausali le latou fa’amoemoe, ua fia tautuaina e i latou le mamalu lautele o le atunuu e oo lava i le Manu’atele. O lou silafia o faitauga o lou soifua maloloina, ma e galue atili e fa’atulaga sa’o i aso ta’itasi lou soifua maloloina, o le ala tu’usa’o tonu lava lea i lou soifua maloloina lelei,” o se tala fiafia lea a Ah Mu.

$49.6 MILIONA MO POLOKALAMA TAUSIGA O FANAU & AIGA MAI LE COVID-19:

Ua fa’aauau pea ona toina mai le tele o fa’atupega mai le Malo tele e ala i afaina o feagai ma le lautele o tagatanuu o Amerika ona o le fa’ama’I Covid-19. Lea fo’I la ua fa’amatu’u mai le $49.6 Miliona mo le tausiga lelei o fanauiti i nofoaga ua tausia ai i latou  ma latou aiga, ma ua atofaina lea seleni e fa’asoa mai e le Matagaluega o Alagamanuia mo Tagata Lautele.

Ua fa’alauiloa e Kovana Lemanu P.S. Mauga, ua mae’a fa’auia lenei tele o le seleni I le Matagaluega o le DHSS o le tatou Malo ina ia fa’aaoga mo le fanauiti ma aiga ma le tausiga lelei o fanauiti I lenei vaitau o lofia le lalolagi ma le malo tele ma ona teritori I le fa’ama’I Covid-19. O lea vaega tupe na toina mai le US Dept of health and Human Services e fa’auia mai le Administration of Chidren & Families.

O le alagatupe atoa na pasia mai e le faigamalo a Biden-Harris lea na fa’amatuu ai le $39 piliona mo le fuafuaga e toe fa’aleleia ai le tausiga o tagatanuu o le atunuu atoa I le tausaga 2021. O le tupe mo Amerika Samoa e $49.6 miliona

Ua fa’atutu lea fa’atupega i nofoaga e tausia faapitoa ai fanau, le tausiga lelei o fanau ma aiga, ma le fa’amoemoe tele o le a saogalemu atili le fanau i nofoaga nei e tausia lelei ai i latou, ia lelei fo’Ii ona aoaoina i latou ia popoto ma sauni ai e a’e malolosi i a’oga, fesoasoani ai i matua, ae maise lava tina, ina ia mafai ona toe o e faigaluega.

O fa’atupega nei o le a mafai ona fa’aaogaina e o’o lava  ia Setema 30, 2024.

Ua saunoa fo’i Kovana Lemanu P.S. Mauga, “Ou te fa’afetaia le tula’I mai fo’I o le faigamalo a Peresetene Biden ma Harris ma le la’ua magafagafa I le soifua laulelei ma le tausiga fa’apitoa  o fanauiti I lenei vaitau o le fa’ama’i Covid I le lalolagi, lea ua aofia atu ai Amerika Samoa I le latou fa’asoa, o le isi lea fa’afetai tele. E le’I mamao atu fo’I ona tatou mauaina nisi o fa’amanuiaga mai le CARES Act mo lenei lava tautua mo fanauiti I nofoaga e tausia lelei ai, ae o lea ua toe soso’o mai, fa’afetai.”

“Ona o le DHSS Child Care Division o le a latou fa’asoasoaina lenei vaega tupe, i poloklama uma o le a pasia e fa’atupe ai, o le a latou taga’i toto’a ma fa’amaumau le aoga o le fa’atupega e fa’aleleia atili ai le olaga o fanau ma tuusaogalemu mai lo latou soifua i omiga ma fa’aletonu ole soifua talu ai le Covid-19. E tatau ona matauina se suiga tele i le tautuaina o le fanau ma iloga lelei ua siitia le tausiga o fanau i nofoaga ua pasia e tausia lelei ai, ae fa’amatu’u matua e faigaluega, ia tausia i latou e pei lava o tausia i latou i totonu o latou aiga, ia ola fiafia le fanau i lea tausiga, ia lelei totogi ma fa’afiafiaina i latou o tausia lelei fanau I nofoaga nei, ia tonu ma sa’o le faiga o totogi o tagata faigaluega ia faatasi ai ma isi tautua uma o feso’ota’i ma nofoaga nei. Ia mataituina e nofoaga nei aiaiga uma ua fa’atulaga mai e mulimulita’i ai le auaunaga mo fanau a le Region IX,” se toe tima’i lea a le afioga le kovana sili.