TALA I VAIFANUA

Pago Pago, AMERIKA SAMOA

MATAGOFIE LE TRADE FAIR - AOGA MATATA ESEESE NUUULI VOCTECH HIGH

I le Laumua o le A’oga Maualuga a le Matata Eseese i Nuuuli, sa fa’atino ai le latou Faaaliga tele o latou Matata sa a’oa’oina ai i latou i le amataga mai o le latou soifua a’oa’oina i lea a’oga maualuga, se’ia oo mai i le toe tausaga, o le a fa’au’u ai i latou ma tu’ua le a’oga Nuuuli VocTech High.

O le fa’aaliga o lea e ao ina maua ai togi mo le fanau vasega 12, ua maua fo’i le avanoa o isi fanau a’oga uma lava e fa’amasani ai i le fa’atautaiga o nei ituaiga o fa’aaliga, e tapena ai i latou mo le latou vaitaimi pe o le latou toe tausaga i lea a’oga.

O le aotelega o kosi eseese o lo’o tau’avea e le fanau fa’aiuaso o lenei tausaga, o le aofai fo’i lea o nofoaga eseese sa fa’aalia i le taeao ananafi,ina ia maimoaina e le mamalu o matua, ae maise o le vasega o e ua lautogia o faia’oga, e togia lenei fa’amoemoe mo le fanau vasega 12 i lenei tausaga.

Ua le gata la i le vasega o matua na maimoaina le fa’aaliga tele lenei, ae sa masii atu fo’i le vasega o le pulega o le Matagaluega o A’oga, le fa’atonu sili ma nisi o lo’o pulea le itu o A’oa’oga Tau matata Eseese a le ASDOE, ina ia latou mataituina le Fa’aaliga o Matata Eseese 2021.

Na auai le susuga le Fa’atonusili o A’oga, Talauega Samasoni Asaeli, ma sa ia fa’aalia, “Fiafia tele e va’aia galuega ua mae’a fa’atino e le fanau aoga.O le taua lea o le aoao o fanau a’oga i matata eseese, ua saunia lava i latou e faigaluega i le mae’aai o a’oa’oga i a’oga maualuluga. O le fa’amoemoega fo’i lea o le Malo i ni fanau e mafai ona latou fa’atinoa galuega nei e aofia ai le Faiuila, Inisinia ma le Kamuta.”

“O le fa tausaga o aoao i le kosi mo le fa’ailoga Tipiloma,ua gafatia ai ona e fa’atino faiva nei, pau a o le fa’aleleia atili ona o le faigaluega ma fa’aaoga atili lona atamai ua mautu mai aoaoga i a’oga maualuluga,” o sana tala fiafia lea. 

Sa fa’asolo lana maimoaga i galuega fa’atino a le fanau, ua oo atu i le matata tau Tusi Ata Fale, o le Fai Uila, O le Kamuta, o le Faifa’ato’aga e fa’aaoga ai le suavai, Hydroponic, ae totoina ai fuala’au ‘aina mata.

O le vasega o fanau o lo’o latou fa’ataua le gaosiga o mea taumafa eseese, ua latou tapena fo’i i le matata mo le Suisui aua o lo’o tele fo’i le seleni e maua e i latou ua mae’a fa’aofi i ai lea tomai ma ua mafai ona latou suia lavalava o so’o se ituaiga. Ua va’aia le i ai ma le fa’aopopoga i lena kosi ua fa’aopoopo i ai ma le gaosiga o le mitiafu ua mae’alolomia i ai ni mamanu matagofie e mafai ai ona fa’ateleina le alumia o na oloa fa’atau atu.

O le vaega o Kamuta ua iloga le matagofie o latou oloa, ae ua matua mae’a ona fa’atau ese uma lava e le vasega o i latou na asiasi atu e maimoaina mea na fausia e le fanau a’oga, o i latou o lo’o tau’avea lea matata.

O le fanau e to’alua o le vasega Fai Uila, o Justus Amituanai mai Masefua ma le ali’i o John Va’a mai Masausi, o e uma ua i le level 12, sa la’ua tuu fa’atasia le la’ua poloketi e fa’aaoga ai tane kesi mai le Origin Energy i Tafuna, lea e faigaluega ai fa’avaitau i la’ua e fa’amautu o la’ua silafia i le kosi o tauavea i le a’oga.

Ona avatu lea o le kesi lenei e fa’aaoga e fa’avevela ai le suavai e ta’ele ai le tagata i le suavai mafanafana ia mama lelei le tino. O le la’ua poloketi lenei e faia ai lo la’ua togi fa’ai’u o le tausaga, aua o le a fa’au’u i la’ua i le tausaga nei. Fa’ailoa mai e le la’ua faia’oga o Saolotoga Lameko, “O i la’ua nei e fa’amoemoeina lava i le to’avalu o i latou lea e sauni e fa’au’u.”

Mo lea Kosi e to’avalu fo’i le fanau e tauavea le Eletise i le vasega 11, to’a 8 le vasega 10 ma le to’a 10 o lo’o ua fa’ato’a a’e mai le vasega 9.

I le vasega a le Small Engines, o latou nei o loo matua malomaloa solo a latou taavale minimoke ua fausia ma tuufa’atasia mai ni u’amea, pa’u ma nai afi o moavao sa maua lava e le fanau mai mea na foa’i ane e le Ofisa o le Procurement & Property Management.

Ua fa’ailoa ai le fiafia o fanau tama e fausia ta’avale, ma ua aoga lo latou sogasoga ua feoa’i solo lava ta’avale nei i totonu o le lotoa ae leai ni mafa, o le ala lea o le malomaloa.

O le susuga Paul Kuresa, vasega 12 mai Tafuna, e i ai lana ta’avale faapena ua fealuai solo ai.

O le susuga Sakaria Seuava mai Malaeimi ma Tarrant Asifoa Level 11, sa la’ua va’ava’alua e tuufa’atasia le ta’avale ua fa’aalia.

O le ali’i o David Va’a o Leone ua vaava’alua i la’ua ma le tamaitai inisinia o Caroline Leasiolagi mai Kokoland ina ia fausia le ta’avale ua fealua’i solo fo’i ma le pasese i le lotoa a le WildCats i le aso ananafi.

O Taumafaiga uma ua fa’aalia e le fanau, ua fa’ailoa mai e le susuga le Coach William, “O le a fesoasoani atili lea ile fa’aiuga a le WASC e toe pasia ai le matou a’oga i lenei tausaga a sau.”

Malo le tauata’i i le fanau sa galulue punoua’i mo lenei fa’amoemoe, ae malo fo’i le fa’atoatoa i le vasega o faia’oga ona o le fesoasoani malosi i fanau.

APERILA19-23, 2021 - FA’ATAUA LE SI’OMAGA O LE LALOLAGI & TOTO AI LA’AU

Ua fa’asalalau fa’alauaitele mai le poloa’iga fa’amalosia a Kovana Lemanu P.S.Mauga, ina ia utagia e le atunuu le fa’ataua o le Lalolagi matagofie na tapena e le Atua Foafoa, ina ia tatou ola saogalemu ai fa’atasi ma Manu ma La’au. 

Peita’i, o se fe’au taua fo’i lea i le Ekalesia Aos Fitu ma ua fiafia le latou ta’ita’i e fa’aaoga lenei vaitau e fa’aopoopo atu i lea tima’iga i a latou sauniga fai o le vaiaso.

“O le atoga o le tatou Siomaga e aofia ai le Ea ma le Gataifale i le Sami Lanumoana ma o lo’o ua ofaga i ai I’a ma manu fetolofi i le Alititai, o ona Punaoa fa’afouina o le lalolagi e sapaia ai lo tatou soifua ma’ale’ale.

“O mea e sili ona taua i le tagata soifua,o lona soifua saogalemu ma le fiafia i le tapenaga a le Atua o le Ola, ua tatou o sapi ai nei, e ao lava ina fa’aauau ona lelei ma fa’asao mo isi augatupulaga o soloa’i mai.”

“Ua fesiligia lo tatou sao i lo tatou vaitau nei, ia fa’aauau ona tatou fa’amama le Siomaga, fa’asoasoa tatau aua le so’ona fa’aaoga pe fa’amaumau Puna’oa eseese o le Laueleele ma le Moana sausau, aua o matai’ai ia mo i tatou i lo tatou vaitau, ma augatupulaga o meaola uma o lo’o soloa’i mai e ola i le Lalolagi Matagofie.”

O se talatala lea a le susuga le Faafeagaiga o le Ekalesia Aso Fitu Samoa Tuto’atasi,  i le sauniga o fonotatalo i afiafi o Aso Lulu taitasi. 

Sa ia tula’i ma ua ia fa’ailoa, “Sa fa’aalu so’u taimi aoga lava ou te auai ai i le tele o gaoioiga o lo’o fa’atino i le taimi nei, e fa’ailoa mai ai i tagata lautele o lea atunuu ae maise lava o le fanau talavou i a’oga, le aoga o le amata ona va’ai toto’a i puna’oa eseese o le lalolagi i le Laueleele ma le Sami, ia fa’asoasoa lelei, ia le so’ona fa’atauga i o tatou vaitau, ae avea ma lape, e le toe lava ma isi augatupulaga o lo’o soloa’i mai o le atunuu.”

“O i tatou o lo’o ia i tatou lea fo’i fe’au taua ile tausiga lelei o le soifua maloloina i mea’ai tatau, e i ai mea ua fa’asaina, o mea na e mafai ona latou toe fa’aleleia le eleele ma le alititai o le gataifale.” O le toe fa’atepa lea a le ta’ita’i ekalesia i Leone.

Mai le poloaiga fa’alaua’itele a le afioga le Kovana Sili ua ia fa’ailoa ai aso ua atofaina mo le fa’ataua a le Malo, lea ua amata mai ia Aperila 19 se’ia oo ia Aperila 23, 2021, o lona uiga o le vaiaso atoa, e fa’ai’u mai i le aso.

Ua le gata i le tatou nei teritori ae ua fa’ailoa mai, o lo ua aofia ai ma le Iunaite Setete o Amerika atoa. O le taumafaiga ua fa’ailoa mai, “E fa’atupula’ia ai le fiafia o tagata uma e fa’ataua le tatou Siosiomaga ma le Lalolagi matagofie o tatou o ola fa’atasi ma feso’ota’i ai.”

“O le soifuaga fa’anatura o mea uma e ola, e aofia ai mea uma i le Ea, Laueleele ma le Sami fa’apea ma Vaitafe ma Puna o Vai, o lo ua avea ai le tagata soifua ma tausimea lelei a le Atua na foafoaina le Ola ma ia fa’aauau fo’i lo tatou soifua soofa’atasi. O meaalofa sili ona taua nei ua mafai ona tatou maua, fa’aaoga ma ia fa’asoa lelei aua le augatupulaga o lo’o soloa’i mai e ola i lenei lava si’omaga. ”

“O le auga o le taumafaiga lenei e toe fa’ataua le Lalolagi, o le tatou  Siomaga i lona aotelega, ina ia taulogologo pea ia i tatou o soifua fa’atasi ma manu ma la’au ma meaola uma i le laueleele ma le sami, ina ia le fa’atauga pe tu’uvale fo’i lo tatou soifua fa’aaoga tatau o nei puna’oa uma, e afua i le fofoga taumafa se’ia oo i minerale eseese ma sosia aoga uma o le Laufanua ma le Gataifale ae maise o le Ea Mama e manavaina.”

“O le tatou fa’aaoga fo’i o taumafa mama ma le paleni, o le fa’aumiumi fo’i lea o le tatou soifua ma ola e tete’e atu fa’ama’i eseese aua e paleni le tino ma ua paleni fo’i ma le mamafa. O le fa’ataua sili lea e ao ina tulimata’i e i tatou ta’ito’atasi, ia le so’ona fa’amaumauina e i tatou sosia ma puna’oa o le Siosiomaga, ae fa’aaoga na’o lou sao e fa’aaoga, ae tuu pea le tele o isi uma e soifua ai.”

“O lou fa’ataua ma le fa’aaoga tatau o Puna’oa uma ua e maua mai le tatou Siosiomaga, o lo tatou sao lea e tapena ai le tupulaga o le a soifua a’e a taeao. O lo ua o gatasi mea uma ma le tatou galulue punoua’i ina ia faaleleia atili pea le tatou Siosiomaga m o le lumana’i.” 

O se aotelega lea o le fa’amua a le tatou Taitai, Kovana Lemanu P.S. Mauga ina ia manatua e le atunuu lautele, ia fa’asao, faaleleia ma fa’amatagofie atili le tatou Siosiomaga, o le tatou Lalolagi lava lea o tatou o soifua fa’atasi ai uma ma isi mea e ola uma na foafoaina e le Atua.