TALA I VAIFANUA

Pago Pago, AMERIKA SAMOA

988 LAINA FOU MO VALA’AU O LE PAGATIA – SEFE MAI SE TASI!

O lo ua mae’a ona fa’atulaga le laina o feso’ota’iga ma e ua pagatia i lagona o’otia poo sauaga o le tino. O i latou ua ootia ma ua mana’omia se fesoasoani, o le Laina 988 ma ua fa’amalosia foi lea lava laina mo isi setete ma teritori uma o le Malo tele. Ina ia le maua se toma’aga e i latou o pagatia, ua faatulaga nei lea laina o le a tatala lona fa’aaogaina i le masina o Iulai 2021.

O le so’otaga o tautua eseese mo i latou o le a vala’au mai o le a fa’afoeina mai ai lava i lea lava laina mo fautuaga ma tima’iga ia fa’asao mai le soifua nei maumau. O le matagaluega o Tautua Eseese a le Matagaluega o Alagamanuia mo Tagata Lautele (DHSS) o le a latou fa’atautaia lea auaunaga ma leoina lea laina ina ia talia so’o se vala’au i so’o se taimi o le ao ma le po.

Ua sauni le Matagaluega o Alagamanuia mo Tagata Lautele ina ia latou galulue fa’atasi uma lava ma isi tautua uma, ia au le auaunaga i tagata uma e fia maua le fesoasoani e fa’asao ai ona lagona ootia ma le oo ai sana filifiliga e fa’amuta le ola.

O lo ua latou galueaina uma nei aiaiga uma ma so’otaga ina ia mafai ona au le tautua i e uma e mafatia. I latou ua mana’omia le fesoasoani ma se tau’au e fa’alagolago i ai i taimi o le le mautonu i fa’aiuga fai.

O le tamaitai o Tuumafua Maiava o le DHSS lea sa mafai ona fa’asoa mai e tusa o lea numera fou ua fa’atulaga e fa’aaogaina uma e teritori ma Setete o le Iunaite Setete o Amerika lea e mafai ona fa’amalosia a’ia’i ia Iulai 2021.

TIMA’IGA MAI LE STARKIST SAMOA - FIA MAUA TAGATA FAIGALUEGA

Ua amata ona galulue fa’atasi le Malo ma le Kamupani I’a a le Star Kist ina fa’afaigofie uma lava le tele o tapenaga mo tagata e fia faigaluega i le tatou Kamupani, ona au mata mana’omia ont fa’atumu avanoa faigaluega i a tatou sifi uma lava o le ao ma le po.

Ua aofia i nei talanoaga le fa’atautaiga ona pu’e o ID poo pepa fa’amaonia, pepa faigaluega ua kilia ai nisi o tagata e le’i mua’i faia pepa nofo mau iinei, ae maise i latou ua leva ona le aoga latou pepa fa’amaonia, ua mafai nei ona talosagaina e le Star Kist latou ID e toe fa’afou.

O lona uiga, tusa poo le a le mafuaga ua e le mafai ai ona faigaluega, ae ua e silafia e te fia faigaluega, o le taimi lava lenei ua tatala ai le avanoa e fa’aleleia ai ou pepa faigaluega, ma amata loa lava ona e galue i le Star Kist.

Ua i ai vasega e fa’atautaia e fa’ailoa ai ia te oe ou tiute i le avanoa o le a lautogia ai oe e te faigaluega ai. ua fa’ailoa mai e ese mai avanoa o le fa’amama I’a, ua maua fo’i ma avanoa i galuega tau matata eseese ua avanoa i le taimi nei.

Ua i ai le fa’ataotoga o le aotelega o apa i’a e tatau ona mae’a gaosia ma sauni mo le la’uina atu i fafo, ae peita’i a le atoa le faitau aofai o tagata faigaluega, o le a fa’aletonu lea auaunaga, ua le ‘ausia le aotelega lea. 

Ua mae’a i le masina ua te’a feutaga’i Kovana Lemanu Mauga ma le Pule Sili o le StarKist Samoa Jason Kim, ma ua fa’ailoa ai, ua tele fo’i isi polokalama matagofie e fa’aosofia ai le fiafia o le aufaigaluega i taimi e tiute ai, ina ia maua’a le fa’alogona lelei o e faigaluega ma le fa’amaoni i le Star Kist.

O lo ua fa’ailoa mai, ua galulue fa’atasi le Ofisa o Femalaga’iga a le tatou Malo ma le Kamupani I’a, ia vave lava ona faafouina latou pepa nofo mau, fa’aleleia o latou ID ia mafai ona toe faigaluega, ma ua tele le avanoa e vave ai ona faigaluega i le isi vaiaso fou.

Ua fa’amalosia so’o se tasi o sailia sona avanoa faigaluega, e mafai ona asiasi ane i le ofisa ulu o le Star Kist i Satala mo se fa’atalanoaga o so’o se mea e fesoasoani ane ai le Star Kist e toe fa’aleleia ou pepa ma amata ai ona e galue loa mo sou totogi.

Ua faailoa mai, afai lava ae tumau le lelei o le galuega ma le fa’amaoni a so’o se tasi ua ofoina atu i ai le fa’atupega a le Star Kist, o le a fa’aauau ai lava ona faigaluega ma le fiafia i latou i Amerika Samoa.

I le amataga o lenei tausaga faigaluega, ua masani le Kamupani I’a i le tatou malo, e fa’aauau ai fo’i le fa’aitiitia o latou tagata faigaluega. O le taimi e fa’auma ai galuega fa’aletausaga ia Tesema, e masani ona o malaga ai le to’atele o sui mai Samoa e asiasi i latou aiga, ma tuai ona toe taliu mai i le amataga o le tausaga.

Peita’i o lenei tausaga, e le o faimalaga i fafo nisi o e na faigaluega i le Kamupani, aua o lo’o taofia femalaga’ia e pei ona silafia.

O lona uiga e le tatau ona i ai se fa’aletonu  le aofai o tagata faigaluega a le Kamupani, aua e le o malaga nisi i aiga, pe o foi i fafo i Amerika. Ua iloga mai o lo’o i ai pea i latou sa faigaluega i le Star Kist iinei, ae o le fesili o le a se mea ua tupu, ua le toe faigaluega ai i latou?

Ua le gata ina le atoatoa le numera o i latou e faigaluega i aso ta’itasi, ae ua to’atele na’ua ua le toe fia faigaluega i le Kamupani I’a, suia galuega ma e amata faigaluega i ni avanoa ua maua mai e i latou i le Malo.

“Ua amata ona iloga ua lava ma totoe le tausiga lelei o aiga mai le fesoasoani mai o alamanuia mai le Covid-19, ua avea ma mea ua le toe faigaluega mai ai nisi aua ua lava mea’ai ma tupe o stimulus e tausia ai latou aiga mo se vaitaimi. O avanoa faigaluega fo’i i nisi vaega o le Malo, Matagaluega o A’oga, Matagaluega o le Soifua Maloloina, lea ua avea ma ala ua faigaluega ai nisi ae tu’u le avanoa sa faigaluega ai i le Star Kist,” o le fa’amatalaga lea a le sooupu o le StarKist Co.

I le fonotaga a le malo ma sui o le kamupani, ua fa’amautu ai se tasi o mataupu. O i latou ua uma le aoga o le Immigration ID, gasolo sa’o i le Star Kist mo fa’amaumauga ona fa’ato’a faia lea o se ala fa’apitoa e fa’avave ai ona toe fa’aleleia le ID.

O se faiga lava lea ua mua’i fesoasoani ai le malo ina ia fa’afaigofie i se ala vave ona fesoasoani i le Kamupani I’a, ia vave i ai a latou tagata faigaluega e fa’atinoa galuega.

Ua fa’ailoa mai, o le fesoasoani lea ua le fa’apea ua na’o tagata Samoa, ae ua fa’asalafa atu mo i latou uma mai fafo i lo’o nonofo i Amerika Samoa, ae ua uma le aoga o le ID. Ma ia maua kilia mai le Fa’amasinoga ma kilia mai le falema’i. A mae’a ona taga’I toto’a i ai le Komiti Fa’afoe o le Immigration ae talia, ona vave loa lea ona apalai mai o latou pepa fa’afou, ae na’o le Kamupani lava a le Star Kist e talia ona faigaluega ai.”

Ua fesiligia fo’I le ofisa o tagata faigaluega a le Star Kist pe mata e lava ai I tagata nei ua maua I le atunuu, ae ua faailoa mai, “Talosia ae lava, aua o lo ua amata aiaia le isi ala, e mafai ai ona aumai sa’o tagata faigaluega mai Samoa, o lalo o le polokalama Guest Worker Permit a le malo o Amerika Samoa. 

Fa’ailoa e le StarKist le fa’afetai ona e talia lava e Kovana o Amerika Samoa so’o se mana’oga e fa’auia atu I latou ta’ita’iga ina ia fesoasosani mai ai i tulaga tau tagata faigaluega. 

MANAOMIA MATAGALUEGA O FA’ATO’AGA FESOASOANI FAAALIGA  FA’ATO’AGA & MEA’AI

Ua foufou nei se fa’aaliga tele o fua o fa’aeleeleaga a le Atunuu faapea ma se Fa’aaliga o Mea’ai e mafai ona gaosia lelei mai fua o fa’aeleeleaga a le atunuu, ae ua fa’ailoa mai e le taiulu o le matagaluega o Fa’ato’aga, “O lo ua mana’omia lava nisi o pisinisi poo fa’alapotopotoga e ofo mai e fesoasoani I le fa’atupega o lea fa’amoemoe e fa’amau fa’ailoga ai le sisigafu’a o lenei tausaga 2021.”

O Aperila 14 -17, 2021 lea ua fa’atulaga ai lenei fa’aaliga tele e fa’atautaia ai lea faamoemoe matagofie mo le Aufai Fa’ato’aga fa’apea ma nisi o Faipisinisi laiti pe o fale’aiga foi.

Ua fa’atino le vaega a le Fa’atonu o Fa’ato’aga ma ua fa’auia ana tusi fa’alauiloa o lea fa’amoemoe i pisinisi uma o latou faipa’aga fa’ale-tautua I totonu o le atunuu ina ia latou alofagia lea fa’amoemoe o le matagaluega o fa’ato’aga.

Ua fa’ailoa o le Aufaifa’ato’aga lava latou o le a fa’aalia fua lelei o a latou fa’ato’aga sa fa’apolopolo mo lenei ituaiga o fa’aaliga tele. Ese mai fa’ato’aga o Matai ‘ai a le atunuu ae ua fa’asolo mai i fuala’au ‘aina mata ma fuala’au aina suamalie fa’apea ai ma lafu manu.

O lo ua aofia i lenei fa’aaliga o tulaga o Fugala’au ma la’au toto e fa’amatagofia ai maota ma laoa o le atunuu. Ua i ai le tuigateu ma ma o le isi lea vaega o le fa’aaliga. E mautinoa o le a to’atele fo’i nisi e fiafia i lea vaega o le fa’aaliga aua ua le misia malumalu o le atunuu ma le tele o teu fugala’au manogi I Aso Sa ta’itasi.

Ua fa’ailoa mai le ali’i fa’atonu o Fa’ato’aga, “O le a I ai le sao o le Matagaluega e fesoasoani ai I le totogi o le Fa’aaliga, peita’I e itiiti na’ua se vaega ua atofaina mai mo le fa’amoemoe, ma e tatau ai ona saili I ala ua fa’atino ai nei le fa’amoemoe.” 

Ua fa’ailoa mai fo’I, e fa’aitiitia lava le polokalama mo lenei Sisigafu’a 2021.